Thursday, December 2, 2010

කොයි ලොව යන්නේ - මරණින් පස්සේ!

අපේ මිනිස්සු වැඩ කරන විදිහ බැලුවාම වෙලාවකට හිතෙනවා කොහෙද මේ දුවන්නේ කියලා.... අපි මොන අරමුණ වෙනුවෙන්ද ජීවත් වෙන්නේ කියන එකවත් බොහෝ දෙනාට අවබෝධයක් නෑ වගේ... 

අම්මලා අප්පච්චිලාගේ  වුවමනාවට ලෝකෙට එනවා.... එයාලගේ උනන්දුවෙන්ම කවලා, පොවලා, පාසැල් යවලා උගන්වනවා.... ඔන්න හිරිමල් වියට ආවට පස්සේ කොල්ලෙක් නම් කෙල්ලෙක් පස්සේ දුවනවා කෙල්ලෙක් නම් කොල්ලන්ව කුලප්පු කරනවා.... ඊට පස්සේ ඔන්න බැඳගන්නවා.... ළමයි හදනවා... ඒ ළමයින්ට උගන්වන්න, උන්ව ලොකුමහත් කරන්න සල්ලි හොයනවා... සමාජයේ කැපී පේන්න නොයෙක් දේ කරනවා... අන්තිමේ ජීවිතේ පුරාම තාවකාලිකව සතුටුදායක අවස්ථා කීපයක් සහ දුක්බර අවස්ථා බොහොමයක් එක්ක මෙලොවින් සමුගන්නවා... අපි මේ ලෝකෙට එන්නේ මොකටද, කොහේ ඉඳලද, යන්නේ කොහේටද කියලා හිතන අය බොහොම අල්පයි... හිතුවත් ඒ වෙනුවෙන් වැඩ කරන්න වෙලාවක් තියෙන්නේ කීයෙන් කී දෙනාටද? 


ජීවිතේ කියන්නේ ආදරයම ද?
ආදරය කියන්නේ කෙනෙක්ව අයිති කරගැනීම ම ද?
කෙනෙක්ව අයිති කර ගැනීම තුළින් ජීවිතය ජය ගත හැකිද?

ආදරය කියන්නේ බෙදා දෙන්න මිස බදාගන්න නොවේ කියලා කතාවක් තියෙනවානේ.... ඒත් පස්කම් සැපත පසුපස ලුහු බඳින සමාජය ආදරය විවාහයට, පවුලට ලඝු කරලා.... ඒත් අපි මේ සමාජයටම ආදරය කළ යුතුයි.... ගහ - කොල, සතා - සීපාවා, ඇල - දොල... මේ සියල්ලට අපි ආදරය කළ යුතුයි.... එහෙම වුණොත් අපි මේ ලෝකෙට ආපු කාරණය යම් තරමකින්වත් අපට ඉටු කරන්න පුළුවන් වෙයි.... හිත හොඳින් මරණින් පස්සේ යන තැනකට යන්න පුළුවන් වෙයි....

මැරෙණ ඉපදෙන - ඉපිද මියයන
ලොවෙහි සරමින - දිවි පුරා
අනුන් වෙනුවෙන - කිසිත් නොකරන
දනන් ඇතිතැන -සුව නැතා....

කිමද ආවේ - ලොවට පාවී
ගෙවමු දිවි ඒ නොම සිතා
කොහෙද යන්නේ - ලොවෙන් නික්මී
කුමට සොයමුද ඒ ගැනා

වෛර කර කර ද්වේශ කර කර
ලෝ සතට තම දිවි පුරා
ලෝභයට - ආලයැයි කියලා
මෝහයෙන් වෙලෙමුද සදා

නොම ප්‍රමාදව අද අදම දැන්
බලනු මැන මොහොතක් සිතා
දිවිය කෙළවර සතුට සැනසුම
ලබමු සැමහට පෙම පුදා

Saturday, November 6, 2010

S.M.S. Star

සිරස සුපර් ස්ටාර් වලිං පටන් අරං, ඩාන්සින් ස්ටාර්, ලවිං ස්ටාර්, කොමඩි ස්ටාර්, ටැලන්ට් ස්ටාර්, ඩ්‍රීම් ස්ටාර්, සිඟිං ස්ටාර්, ෂැඩෝ ස්ටාර්, ලිට්ල් ස්ටාර්, මෙගා ස්ටාර් වෙනකං එස්. එම්.එස් හෙවත් කෙටි පණිවුඩ හරහා ජයග්‍රාහකයා තෝරන තරඟ මාලා අපේ රටේ රූපවාහිනී නාලිකා තුලින් විකාශය වුණේ මිනිස්සුන්ට කොයි ස්ටාර් බලන්නද කියලා හිතා ගන්න බැරි විදිහට. මං නම නොකියපු ස්ටාර්ලත් ඉන්නවා නං තරහා වෙන්න එපා හොඳේ....


ඉතිං ඔය කොයි ස්ටාර් එකටත් වඩා අලුත් විදිහකට අපේ... ඒ කිව්වේ ශ්‍රී ලංකාවෙ අභිමානය කියලා කියන කට්ටියක් රටේ ඉන්න ජනප්‍රිය තරු ටිකක් ගෙන්නලා තරඟෙට දාලා, රටේ ඉන්න ජන - ප්‍රිය හා අප්‍රිය දෙගොල්ලන්ගෙන්ම හැදුනු විනිශ්චය මණ්ඩලයකුත් දාලා අපූරු ස්ටාර් එකක් කළා... ඒකෙ අරමුණ මට දැනෙන විදිහට, උසස් රසවින්දනයක් ඇති ශ්‍රී ලාංකේය ජනතාවට තමන් කාලයක් තිස්සේ ආදරය කරපු ගීත අමු අමුවේ විනාශ කරන හැටි බලාගෙන ඉවසීම ප්‍රගුණ කරන්න ඉගැන්වීම... ඒත් එතන හිටපු දයාසිරි ජයසේකර, දමිතා අබේරත්න, සනත් විමලසිරි වගේ උදවිය ඒ කටයුත්ත සාර්ථකව කරගන්න ඉඩ දුන්නේ නෑ.....
කොහොම කොහොම හරි අන්තිම තරඟෙට.... ඒ කිව්වේ ග්‍රෑන්ඩ් ෆිනාලේ එකට කවදාවත් නැතුව හතර දෙනෙක්ම ආවේ මොකද කියලා අපි නම් දන්නේ නෑ... හැබැයි දන්න අයත් ඇති...  අනේ ඉතිං මේ හතර දෙනාගෙන් අඩු තරමෙ දෙන්නෙකුට වත් අපේ කන් පිනවන්න පුළුවන් කියලා දැනගෙන හිටපු නිසා අපිත් කට උඩට හරවගෙන ග්‍රෑන්ඩ් ෆිනාලේ එක බැලුවා... දෙයියනේ කියලා ගෙදර තිබුණු ජංගම දුරකථන අංක හතරෙන් දයාසිරි මහත්තයට 3 කුයි සුරේශ් මල්ලියට එකකුයි ගහලා ඇඳට ගිහිං දොයියගත්තේ හෙට උදේ වෙනකොට දයාසිරි මෙගාස්ටාර් වෙලා ඉඳියි කියන පරම විශ්වාසයෙන්... ඒත්...


උදේ බලනකොට දයාසිරි දෙවැනියා.. සුරේෂ් තුන් වැනියා... අනේ අපොයි... මගේ බිරින්දෑට නම් හොඳටම හිතේ අමාරුවේ.... 


අයියෝ ඕකත් දුක්වෙන්න දෙයක් ද මං ඇහුවාම කට්ටිය මං දිහා බැලුවේ කිසිම හැඟීමක් නැති අළුගෝසුවෙක් දිහා බලන විදිහට...


ඉතිං මං පොඩ්ඩක් පැහැදිලි කරා.......


දයාසිරි මෙගා ස්ටාර් වුනේ නෑ කියලා රටේ ප්‍රජාතන්ත්‍රවාදයට ලොකු හානියක් වෙනවාද? නෑ...
දයාසිරි මෙගා ස්ටාර් වුනේ නෑ කියලා රටේ වෙළඳ ව්‍යාපාර පවත්වගෙන යන්න අමාරු වෙනවාද? නෑ...
දයාසිරි මෙගා ස්ටාර් වුනේ නෑ කියලා රටේ මිනිස්සු බඩගින්නේ ඉන්නවාද? නෑ...
දයාසිරි මෙගා ස්ටාර් වුනේ නෑ කියලා රට එක පවුලකට සින්න වෙනවාද? නෑ....
දයාසිරි මෙගා ස්ටාර් වුනේ නෑ කියලා රට ජාත්‍යන්තරය ඉදිරියේ හෑල්ලු වෙනවාද? නෑ....
දයාසිරි මෙගා ස්ටාර් වුනේ නෑ කියලා එයාව හෙට අනිද්දට හිරේ දායි ද? නෑ...


පහුගිය ජනාධිපතිවරණයේ දී ඔය ඔක්කොම වෙලත් අපි මේ අපූරුවට කට පියාගෙන ඉන්නේ...


ඒක නම් ඇත්ත...... කට්ටියම මුමුණමින් තමන්ගේ වැඩක් බලා ගත්තා....


කොහොම හරි ඉතිං මෙගා ස්ටාර් ඉවර වෙලා ගුටි කෙළියක් ගියා කියලා පසුව දැන ගත්තා..... සමහර විට මෙතනින් ජනතාව පාඩමක් ඉගෙන ගනියි.... ඔව් ඒත් ඉගෙන ගත්ත පාඩම ඉක්මනින්ම අමතක කරයි.....


හොඳ හොඳ ස්ටාර් එළිවෙන ජාමෙට ලූ නේ....













Friday, September 24, 2010

දෙහිවල හිර මැදිරි සංකීර්ණය හෙවත් ! Zoo

පිංතූරෙ ගත්තු තැනට යන්න

පසුගිය සතියේ ඉරිදා තියෙන කරදර, වැඩ රාජකාරි සියල්ල පැත්තකින් තබා මාත්, බිරිඳත් මගේ පුංචි දියණියත් දෙහිවල සත්වෝද්‍යානය නැරඹීමට ගියේ හුඟ කාලෙකින් පොඩි එකීව විනෝද සවාරියක් එක්ක යන්න බැරි වුණ හින්දයි. කොහොම කොහොම හරි අපි අමාරුවෙන් වාහන පොඩ්ඩත් අයිනකට දාලා, පෝලිමෙත් ඉඳලා ටිකටුත් අරගෙන ඇතුලට ගියා කියමුකෝ..... 

සත්තුන්ට වඩා හිටියේ සත්තු වගේ ඉන්න මිනිස්සු බවත් කියන්න එපැයි..... මේ හුඟ දෙනෙක්ගේ ඇඳුම් මෝස්තර ගැන කවදත් වගේ මගේ විවේචන තියෙනවා... ඒක ඉතිං මේකට අදාල නෑ නෙව....

ඔන්න ඉතිං සියක්කාරයා, පැස්බරා..... ආදී කුරුල්ලො ටික බලා ගෙන අපි ඉස්සරහට ගියා.... පැස්බරා කියන්නේ ගොඩබිම වේගෙන්ම දුවන්න පුළුවං කුරුල්ලා කියලා මං අහලා තියෙනවා කියලා පුංචි එකීට කියනවත් එක්කම මට හිතුනේ අනේ ඉතිං මෙයාට දැං දුවන හැටිත් අමතක වෙලා ඇති නේද කියලා.... ඇයි දෙයියනේ මේ චූටි ඉඩක් අස්සේ මේ අහිංසකයව හිරකරලා කොයි තරං නම් කාලයක් ගතවෙලා යන්න ඇතිද?

බස්සා, බකමූණා වගේ සමහර කුරුල්ලෝ නං වගේ වගක් නැතුව නිදි. ඒ ඇහැරුනා කියලා යන්න දිහාවක් නැති නිසා ද නැත්නං ඒගොල්ලො හැමෝම නිශාචරයන් නිසාද දන්නේ නෑ...... 

ඔන්න ඉතිං ලස්සන පුංචි දිය ඇල්ලක් එක්ක තියෙන පුංචි ජලාශයක් ලඟට අපි සේන්දු වුණා... එතැන තාරාවොයි, හංසයොයි ගොඩාක් හිටියා... ඒ අය නම් සංතෝෂයෙන් ඇති කියලා එක පාරට හිතුණත්..... එහෙම වෙන්නෙ කොහොමද...? එයාලට මේ ඉන්න වෙලා තියෙන්නේ ස්වභාවික ජලාශයක නෙවෙයිනේ..... එයාලගෙත් නිදහස සීමා වෙලා..... ඒත් සාපේක්ෂව අපේ පැස්බරාට වඩා නම් මේ අයගේ ඉරණම හොඳයි කියලා මට හිතුණා....

ඔන්න ඊ ළඟට අපි බැලුවේ වළස්සු දෙන්නෙක්. ඒ අය හිටියේ වතුරේ බැහැලා.... නාන වෙලාව වෙන්නැති..... මේ ගොල්ලන්ට කැලේ ගිහිං මී කඩන්න, වතුරේ පීනන මාළුන්ව අල්ලගන්න එහෙම අවස්ථාවක් හම්බ වෙලාම නැතුව ඇති නේද...?  මට එහෙම හිතුනා.... මේ ඉන්නේ අම්මයි පුතයි වෙන්න ඇති. වලස් තාත්තා ඔෆිස් ගිහිං වෙන්න ඇති. නේද අප්පච්චි..... පොඩි එකී දන්න තරම.... නෑ නෑ පුතේ එයා නිදි ඇති... සචී ගැටළුව විසදුවා.....

ඊළඟට අපිට කොටි, ව්‍යාග්‍රයො, ජගුවර්ලා, දිවියෝ, සිංහයෝ වගේ කට්ටිය මුණගැහුණා..... මේ කට්ටියව දැක්කහම නං මට හිතුණා මේක සත්තු වත්ත කියලා කිව්වට හිරගෙයක්ම තමයි කියලා.... සිංහයින් හිටියේ පුදුම කලකිරීමකින් වගේ කියලයි අපට හිතුණේ... රජෙක් වගේ කැලේට වෙලා හිටපු මේ අපූරු සතාට කැලේ ඉන්න දෙන්නෙ නැතිව කරන්නේ මොන තරම් පාප කර්මයක් ද කියලා මට හිතුනා..... (සරත් ෆොන්සේකා මහත්තයත් ඉන්නේ මේ විදිහට වෙන්න ඇති කියලත් මට හිතුනා. ඇයි ඉතිං උන්නැහෙත් රජෙක් වගේ නොවැ හිටියේ....). ඕවා පල දෙන්නේ කාටද...? කියන එක තමයි ප්‍රශ්ණය. බලං ඉන්න අපටත් කොටහක් හම්බ වෙයිද දන්නේ නෑ.....මොනවා කරන්නද... දුක හිතේ දරා ගෙනම... අපි ගිහිං මොනවා හරි ඩිංගක් බඩට දාගන්න කියලා එතන තිබුණු අවන් හලට ගොඩවුණා..... 

සත්තුංගේ කූඩු ලඟ හිටපු තරම් සෙනඟක් මේ අවන්හලේ නං හිටියේ නෑ..... පුටු මේස වල හොඳට ඉඩ තිබුණා.... ඉතිං හොඳවැයිං මේසයක් ලඟ වාඩි වෙලා කාරිය, මං ගිහිං බත් ගැන ඇහුවා.... එළියේ තියෙනවා Normal Rice Take Away 150/=, ඇතුලේ තියෙනවා Fried Rice 290/= . පුංචි එකීත් එක්ක එළියට ගිහිං කන්න අමාරුයිනේ.... අපි ඉතිං මේසෙ පුටු වල ඉඳගෙන Fried Rice කන්න ලෑස්ති වුණා.... ඔන්න ඉතිං Fried Rice මේසේ ගාවට ආවයි කියමුකෝ.... මේවා එළියේ රුපියල් 80/= ට විකුණන ජාතියේ Fried Rice. මුං ට..... (පුංචි එකී හිටපු නිසා හිතුණ දේ කිව්වේ නෑ....)

ඔන්න ඉතිං තව තව සත්තු ටිකක් බලාගෙන යනකොට හම්බ වුණා හරි හුරතල් යාළුවෙක්.... එයා තමයි ඔරං උටං. එයාට කෑම දෙන්න එපා කියලා පුවරුවක් තිබුණු නිසා පුංචි එකීගේ ඉල්ලීම පැත්තකට දාලා බලං හිටියා... ඒත් මිනිස්සු බොහෝ දෙනෙක් ඒ පුවරුව කියවගන්න තරම් දැනුමක් තිබුණු අය නෙවෙයි මයෙ හිතේ.... මේ අපූරු හුරතලාගේ ඇඟ බොහොම තරබාරු බව තේරුනේ එයා මිනිස්සු වීසි කරන කෑම ඇහිඳින්ට එහාට මෙහාට සක්මන් කරනකොටයි. එක අතකට අකුරු කියවන්න බැරි මිනිස්සු හිටපු එක ලොකු දෙයක් කියලා මට හිතුනා.....නැත්නම් මෙයා එක තැනම ඉඳලා තවත් තරබාරු වෙන්න තිබුණා...

ඊළඟට අපි ගිහිං අලි සංදර්ශන බලන්න වාඩි වුණේ හිටපු සෙනඟ කන්දරාවෙ හැටියට පරක්කු වුණොත් අපේ පැංචිට අලි සෙල්ලම් බලන්න බැරි වෙයි කියලා හිතුණ හිංදා.... ඔන්න ඉතිං අලි සෙල්ලං පටං ගන්න පැයක් විතර තියෙද්දී කිව්වෙ නැතෑ මුහුදු සිංහයාගේ සෙල්ලම් තව විනාඩි 15 කින් මින් මැදුරෙදි තියෙනවැයි කියලා... බිරින්දැට එතනම ඉන්න කියලා, දූ පැටියවත් උස්සගෙන ගියා ඉතිං මින් මැදුරට.... ඔන්න ඉතිං කොහොම හරි ගිහිං අයිනකට නැගලා කෙල්ලව උස්සලා සෙල්ලං ටික පෙන්නුවා...ඒත් මේ මුහුදු සිංහයා කොයි තරම් නම් අහිංසක හුරතල් සතෙක්ද කියලා දැක්කහම මට හිතුනෙ එයා නිකම් රජයේ සාක්කි කාරයෙක් වෙන්න හදනවද කියලා.... ඒත් එයාට ඒ තරම් සැපක් නම් ලැබෙන එකක් නෑ.....

ඔන්න ආපහු පුංචි එකීවත් කරේ තියාගෙන අලි පිට්ටනිය ලඟට ආවා.... බුදු අම්මෝ අලි පිට්ටනියට ලං වෙන්නත් අමාරුයි.... ඒත් අන්තිමේ කොහොම හරි රිංගගෙන අලි සෙල්ලමුත් පැටියට පෙන්නුවා කියමුකෝ... අලින්ගේ වැඩ ගැන ආයේ කියන්න දෙයක් නෑ....නේ.. දියවන්නාව පැත්තේ අලි වගේ නෙවෙයි... සද්දෙට වඩා උන්ගේ වැඩ හරිම ලස්සනයි.... බලං ඉන්න හරිම ආසයි... ඒත් මෙච්චර හොඳට හැසිරෙන්න දැනගත්තත් මෙයාලා සංදර්ශනය ඉවර වුණාම කණුවක ගැටගහලා තමයි තියන්නේ.... දියවන්නාව පැත්තේ ඉන්න අලි ගැන හිතුවාමනං ඒකෙ ඒ හැටි වැරැද්දක් පේන්නේ නෑ.... ඒත් මෙයාලගේ ලෝකෙ කොයි තරම් නං පුංචි වෙලා ද කියලා හිතෙනකොට අර නැටුමෙන් ලබපු ආශ්වාදය වෙනුවට දෙනෙතට කඳුළු බිංදු දෙකක් නම් ඉනුවා...

අලි නැටුම් වලින් පස්සේ තමයි අපි උරගයෝ සහ මාළු බලන්න ගියේ.... එයාලගේ ඉරණමත් අනිත් සත්තුන්ගේ ඉරණමට දෙවැනි වුණේ නෑ.... ඒ හැමෝම වගේ තමන් නොකල වරදකට හිර දඬුවම් විඳින හිරකරුවන් පිරිසක් විදිහට තමයි මට පෙනුණේ.... 

එහෙම බැලුවාම කූඹි, මීයෝ, හූනෝ, කැරපොත්තෝ වගේ ගෙවල් වල ඉන්න සත්තු, අපට වද දුන්නත් නිදහසේ ඉන්නවා නේද කියලා මට හිතුණා... අපට කිසි වදයක් නැති, ගිරවුන්, පැස්බරුන්, හාවන්, ඔටුවන්, මොණරුන් ඔවුන්ගේ ඇති අපූර්වත්වය නිසාම හිරකරුවන් වී ඇති අයුරු...!

අපි වගේ හිතන තවත් අය ඉන්න බව මට තේරුණේ, ලස්සන සීබ්‍රාවුන් බලන්න අපි ගිය වෙලාවේ එතැන හිටපු මහත්මයෙක් අපිත් එක්ක කළ කතාබහේදියි. 
"කොයි තරම් ලස්සන සතෙක් ද? ඒත් ඌ කොයි තරම් නම් අසරණ ද?" 
"ඇත්ත. අපි කියනවා අපට නිදහස නෑ කියලා" "මෙයාලට ඒක කොහොම දැනෙනවා ඇතිද? " 

ඔන්න ඉතිං අපි දෙහිවල ජාතික සත්ව සිරමැදිරි සංකීර්ණය නරඹලා ඉවර වුණා.....
පුංචි එකීට නං හරි සංතෝෂයි... ඒත් මට නං දුකයි....

මෙහිදී නම් නොකියවුණු සතුන් මා හා අමනාප නොවනු ඇතැයි උදක්ම බලාපොරොත්තු වෙමි

Thursday, September 9, 2010

සක්විති සුවය!

අපි සිංහල බෞද්ධ පුරවැසියෝ වෙමු. එසේ වුවත් නොවූවත් ලෝ දහම සැමටම පොදුය. එහෙත් අපේ බෞද්ධ අර්ථ කථනයන්ට අනුව "දිඨ්ඨ දම්ම වේදනීය කර්මය" නම් කර්මයක් වෙයි.. මේ කර්මය ඇස් පනා පිට පළ දුන් අවස්ථා අපි එමට දැක ඇත්තෙමු. මේ මෑතකදී එය නැවතත් සනාථ වූ අවස්ථාවක් දක්නට ලැබුණි. ඒ සක්විති රණසිංහ ලෙස පෙනී සිටිමින් ජනතාව රවටමින් ජනතා මුදල් කොල්ල කමින් සක්විති සුව විඳි සක්විත්තා, හිඟන පුද්ගලයෙකුට සමාන පෙනුමකින් යුතුව පොලිස් අත් අඩංගුවට පත් වූ අවස්ථාවයි. 


ඔහු ජනතාව රවටා උපයා ගත් මුදල් මහා උජාරුවට වියදම් කළේය... එහෙත් "රජකම් කලත් කළ කම් පළ දෙන" බැව් ඔහුට අමතක වී තිබිණ. කල් ගතවෙද්දී ඔහුගේ පොකැට්ටුව හිස් විය. ජීවත් වෙන්නට විදිහක් නැතිව දහදුක් වින්දේය. දරුවන්ට උගන්වන්නට විදිහක් නොවීය. නිදියා ගන්නට ඇඳක් නොවීය. හැම දෙයකටම වඩා ජීවත් වෙන්නට නිදහසක් නොවීය. 


"කිරි දියෙනි දෙවියත් - අඟුරු සුදු වෙන කළෙක් නම් නැත්" යන කවි දෙපද ය සිහියට නංවමින් ඔහු නැවත නැවතත් ජනතාව රවට්ටමින් මුදල් හොයන්නට උත්සාහ කළේය. 


අවසානයේ ඔහු පොලීසියට කොටු විය. ඒ වත්මනෙහි ඔහු සමඟ එකට ජීවත් වන කාන්තාවත් (බිරිඳ යැයි හැඳින්වෙන) සමඟය. ඔහු විසින් රවටනු ලැබූ ජනතාව කුස ගින්දරේ මිය නොයන්නට ඇත. එහෙත් ඔවුන්ට මිය යන්නට වුවද බියක් නැත. එහෙත් මේ සක්විත්තා නම් මිය යන්නට බොහෝ සෙයින් බිය වනු ඇත. මන්ද ඔහු කළ පවු ඔහු පසු පස හඹා එන බව ඔහු දැන්වත් දැන ගනු ඇති බැවිනි.







මා මෙහි දැක්වෙන පිංතූරය ගත්තේ පහත දැක්වෙන වෙබ් පිටුවෙන් වන අතර ඒ පිළිබඳ මෙහි අයිතිකරු(වන්)ට ස්තුතිය පළ කරමි.

පිංතූරෙ ගත්තේ මෙතැනින්

Saturday, July 24, 2010

ශ්‍රීමත් මුරලි | Sir Murali

ක්‍රිකට් ක්‍රීඩාවේ නිරත වූ අති විශිෂ්ඨ ක්‍රීඩකයන් බොහොම දෙනෙකුගේ නමේ මුලට ශ්‍රීමත් නාමය එකතු වෙලා තියෙනවා. ශ්‍රීමත් රිචඩ් හැඩ්ලි, ශ්‍රීමත් ඩොනල්ඩ් බ්‍රැඩ්මන්, ශ්‍රීමත් විවියන් රිචර්ඩ්ස්, ශ්‍රීමත් ලෙන් හට්න් මේ අයගෙන් කීප දෙනෙක්. 

ඒත් ආසියාතික විශිෂ්ඨ ක්‍රීඩකයන්ට එහෙම ගෞරව නාමයක් දීලා තියෙනවා මම නම් දැකලා නෑ. ඒ කියන්නේ විශිෂ්ඨ ආසියාතික ක්‍රීඩකයින් හිටියේ නෑ කියන එක ද..? සුනිල් ගවස්කාර්, ඉම්රාන් ඛාන්, සහීර් අබ්බාස්, කපිල් දේව්, අරවින්ද ද සිල්වා මම රස විඳපු අති විශිෂ්ඨ ආසියාතික ක්‍රිකට් ක්‍රීඩකයින් කීප දෙනෙක්. මට හිතෙන විදිහට නම් මේ අයටත් ශ්‍රීමත් ගෞරව නාමය දෙන්න ඕනි. දැන් මේ ලැයිස්තුවට අලුතින් ම එකතු වුණ කෙනා තමයි මුත්තයියා මුරලිදරන්. 

කලින් කියපු අයට කෙසේ වෙතත් මුරලි ට නම් දෙන්න ම ඕනි කියන එකයි මගේ අදහස. මොකද මුරලි ක්‍රීඩා කරන කාලය තුල ක්‍රීඩාවේ විනය අපූරුවට රැකපු කෙනෙක්. තමාට අනිත් අයගෙන් මොන වරද සිදු වුනත් සිනා මුසු මුහුණින් ඒ සියල්ල විඳ දරා ගන්න මේ අපූරු මිනිසා සමත් වුණා. ඔහු ශ්‍රී ලංකාවෙන් බිහිවුණු විශිෂ්ඨතම ක්‍රිකට් ක්‍රීඩකයා බව මගේ අදහසයි. ඔහු ඉතා ආදර්ශවත් ක්‍රීඩකයෙක් මෙන්ම ආදර්ශවත් මිනිසෙක්. 

ශ්‍රීමත් මුරලි! මම මුරලිව එසේ අමතමි. ඔබ ක්‍රිකට් පිටිය තුල අපව අමන්දානන්දයට පත් කළේය. ක්‍රිකට් පිටියෙන් පිටත සෙවණක් නැති මිනිසුන්ට සෙවණක් ලබා දුන්නේය. ඔබව විස්තර කරන්නට මා හට වචන නැත. 

ශ්‍රේෂ්ඨ වූත්, විශිෂ්ඨ වූත්, නිහතමානී වූත්, ප්‍රසන්න වූත්, යථාර්ථවාදී වූත් ශ්‍රීමත් මුරලි! පසුගිය දශක දෙකකට ආසන්න කාලයක් තුළ ඔබ අප රට වෙනුවෙන් කළ මහඟු සේවයට මගේ ආචාරය!ඔබ හා සම කරන්නට කෙනෙකු මෙ දියත නැත. මුරලි අසම සම ය!


ඔබ කළ මෙහෙය සුපිරියි දිනවන්න රට 
නැඟෙනවා නිරතුරුව සොහොයුර මතකයට
රණ විරුවෙකු නොවූවත් ඔබ රැකපු රට
රැකි හැටි විශිෂ්ඨයි සොහොයුර කළක සිට

පන්දුව, පිත්ත මොන එක ගත්තත් අතට
ඔබ අප පිනෙව්වා නැත කිසි හිඟක් කොට
සමු ගෙන යන්න නිසි කාළය පැමිණි විට
නැහැ ඔබ මැලි වුණේ හැම අත් හරින්නට

සහ ජීවනය යහ ගුණ දම් පිරුණු සිත
මහ ඉහලින්ම දස්කම් පිරි නුඹගෙ ගත
ඇතැමුන් කී නමුත් නොයෙකුත් දරුණු මත
නුඹ පෙන්නුවා "පත පොඩි බව ඇතොත් හිත"


පිංතූරෙ ගත්තෙ මෙතැනින්

Monday, June 28, 2010

ද්වන්ධ සටන....!

දෙදෙනෙකු හෝ දෙපිරිසක් අතර ඇතිවෙන තීරණාත්මක සටනකට අපි ද්වන්ඬ සටනක් යැයි කියමු. මෙය හදිසියේ මට සිහි වූයේ වත්මනෙහි අප රට තුළ පවතින අපූරු ද්වන්ධ සටනක් නිසාය. එය අන් කිසිවක් නොව විපක්ෂයේ ප්‍රධාන පක්ෂයේ නායකත්වය සඳහා වූ ද්වන්ධ සටනකි. මෙය මීට පෙර පැවති ද්වන්ධ සටන් වලින් වෙනස් වන්නේ මෙය "අලට වැඩියි කොස්" ආකාරයේ සටනක් බැවින් යැයි මට සිතේ. එනම් මෙයින් කවර පුද්ගලයා ජයගත්තත් රටට හෝ පක්ෂයට අමුතු සෙතක් නොවන බව පැහැදිලිය. 


රනිල් වික්‍රමසිංහ යනු දීර්ඝ කාළයක් දේශපාලනයේ නිරත වීමෙන් හා නායකත්වයේ විවිධ ඉසව් තරණය කල වචනයේ පරිසමාප්ත අර්ථයෙන්ම කෘතහස්ත දේශපාලන නායකයෙකි. එහෙත් ඔහු ශ්‍රී ලංකාවේ නායකත්වයට කිසි සේත්ම සුදුසුකම් දක්වන්නේ නැත. මන්ද ඔහු දැඩි ලිබරල් මත ධාරියෙකු නිසාය. ඔහු ට අපේ සංස්කෘතියට හෙණ ගැහුවත් ප්‍රශ්ණයක් නැත. ඔහුට අවශ්‍ය රටේ ආර්ථික ශක්තිය ඉදිරියට ගෙනැවිත් රට ශක්තිමත් කිරීමය. අනෙක් අතට 1994න් පසු එජාපයේ පරණ පවු සහ අළුත් පවු සියල්ල ගියේ රනිල් ගේ පිටින්ය. ඔහු ගෙනා සටන් විරාම ගිවිසුම ද අවසානයේ ජනතා අප්‍රසාදයට ලක් විය. මෙහෙම බලනකොට ඔහුට යලිත් රටේ නායකත්වය අපේ ජනතාව ලබා දේ යැයි විශ්වාස කරන්නට අපහසුය. 


දැන් අලුත් නායකයෙක් රනිල්ගේ අඩුපාඩු තමා ලඟ නැති බව කියමින් නායකත්වයට එන්නට සැරසේ. එහෙත් අප මතක තබා ගත යුතු කරුණක් වේ ඔහුට රනිල් ලඟ ඇති උසස් ගුණාංගයන්ද නැති බවය. ඔහුට රනිල්ට තරම් හොඳට මේ රටේ ආර්ථිකය ගොඩ ගන්නට නොහැකි බව පැහැදිලි ය. දැන් එජාපයෙන් මේ රටට නායකත්වයක් සෙවීම තේරුමක් නැති බව පැහැදිලිය.


අපට තව දුරටත් මේ යුධ සොමිය විඳ විඳ ඉඳින්නට සිදු වනු ඇත.

රටකට යන කළ තේරුම් ගන්නට
බලපන් මැති සබ සංයුතිය
එහි ඇති පක්ෂත් නායක රොත්තත්
බලපන් යන්නේ කොයිබටද
උන්ගේ කියුමන් කෙරුමන් ඔක්කොම
බලපන් ඒ හැම ඇත්තටද
බල අරගලයයි හැමතැන ඇත්තේ
බලපන් වට පිට තව නො ඉඳ.......!


පිංතූර 1
පිංතූර 2

Monday, May 17, 2010

Oh! Sri Lanka Cricket | අහෝ ශ්‍රී ලංකා ක්‍රිකට්!



කුමාර් සංගක්කාරගේ නායකත්වයෙන් යුත් ශ්‍රී ලංකා 20-20 පිරිමි ක්‍රිකට් කණ්ඩායම ජයග්‍රාහී ලෙස අවසාන පූර්ව වටය දක්වා ගමන් කර සතුටින් දිවයිනට පැමිණියහ.... 
අනේ එහෙම කියන්න තිබුණා නම්...
ඒත් ලංකාව අවසාන පූර්ව වටයට ගියේ ඉන්දියානුවන්ගේ හදිසි ඇද වැටීම නිසා සහ ක්‍රීඩකයන් කීප දෙනෙකුගේ දක්ෂතාවයත් වාසනාවත් මත මිස අපේ කණ්ඩායම හොඳම කණ්ඩායම් හතර අතර සිටි නිසා නොවේ. අඩු ගානේ නවසීලන්තයත්, දකුණු අප්‍රිකාවත් අපට ඉදිරියෙන් සිටි බව මගේ හැඟීමයි. 
අනෙක අප දුර්වල වූයේ අපේම වරදිනි.... පුරුදු පරිදිම සුදුස්සාට සුදුසු තැන නොලැබී තිබුණි.



මෙන්න උදාහරණ


1. පන්දුවට පහර දීමේ සුභ ලකුණු පෙන්වූ දිනේෂ් චන්දිමාල් ට ලැබුණේ තරඟ 3 ක් පමණි. ඒකත් ලැයිස්තුවේ අවසාන භාගයේ දී ය.
2. ඉතා හොඳ ප්‍රහාරක පිතිකරුවෙකු වූ චින්තක ජයසිංහ ට එකම ඉනිමක් ලැබුණු අතර ඔහුට මුහුණ දීමට හැකි වුණේ 1 පන්දුවකට පමණි. ඒ අවසන් පන්දුවට පහර දීම සඳහා ඔහු පැමිණි නිසා ය.
3. එහෙත් ඉනිම 6 ක් අති සාර්ථකව (විශේෂයෙන් ඉනිම 4ක් තුල ආරම්භක පිතිකරු ලෙස ලකුණු 12ක්) ලකුණු 15ක් රැස් කළ සනත් ජයසූරිය තරඟ හයට ම යොදා ගැනිනි.
4. පළපුරුදු මෙන්ම කඩුළු අතර සිටින ක්‍රීඩකයන් වූ  නුවන් කුලසේකර හා තිලාන් තුෂාර ට ලැබුණේ ඉතා අඩු තරඟ ගණනකි.
5. මෙයට අමතරව කණ්ඩායමට ඇතුළු විය යුතුව තිබූ කීප දෙනෙක් ම කණ්ඩායමෙන් විසි වී තිබුණි... චමින්ද වාස්, ඉන්දික ද සේරම්, ඉසුරු උදාන, ගයාන් විජේකෝන් ඒ අතර ප්‍රමුඛ වෙයි....


මෙහි අපට සතුටු විය හැකි ක්‍රීඩා විලාශයන් පෙන්වූයේ 
මහේල ජයවර්ධන
ඇන්ජලෝ මැතිව්ස්
චාමර කපුගෙදර
කුමාර් සංගක්කාර
තිසර පෙරේරා
ලසිත් මාලිංග
මුත්තයියා මුරලිදරන් 
අජන්ත මෙන්ඩිස්


යන අය බව මගේ හැඟීමයි. එහෙත් ඔවුන්ට හැම විටම දස්කම් දක්වන්නට බැරි බැව් අප තේරුම් ගත යුතුය. සුදුසු විකල්පයන් අප අත තිබේ... එහෙත් අප මේ හදන්නේ ලංකාවේ ක්‍රිකට් කණ්ඩායමත් ලෝකයේ ආශ්චර්‍යයක් කරන්නද..?


ලොවම පරදා
කිරුල දිනුවා
එදා අපි ලෝකේ
එහෙත් අද ඇයි
මෙලෙස ඉන්නේ
නිවට ලෙස පැරදී
තමන් දිනවන 
සටන නවතා
දනන් ලෙස
සිහළේ
යළිත් ජය ගමු
ක්‍රිකට් ලොව අපි
එකමුතුව පෙරසේ....!

සැ.යු.** මෙය www.cricinfo.com වෙබ් අඩවියේ ඇති දත්ත ඇසුරු කිරීමෙන් හා මගේ උපකල්පනයන් තුලින් නිර්මාණය කළ ලිපියක් වන අතර යම් උපකල්පනයන් හි දෝෂ වී නම් සමාවෙන මෙන් ඉල්ලා සිටිමි.

විශේෂ ස්තුතිය : මුරලි තරඟාවලිය අතර මැද අසනීප වූ බව දන්වා මා නිවැරදි කළ KAS සොයුරාට.

පිංතූරෙ ගත්තෙ මෙතැනින්

Monday, May 3, 2010

අර්ජුන හා සනත්



දෙස්පාලන පොරපිටියේ
සටන වෙනස් නොවැ මිතුරේ
එවන් වූ සටන් කෙරුමට
නුඹට ජවය ඇතේ…….

පක්ෂය දිනවන්න නොවේ
තමාව දිනවන්න නොවේ
රට දිනවන්නයි නුඹලා
සටන කළ යුතු…..

ක්‍රිකට් ගහපු ඒ යුගයේ
නුඹලට අපි බැන්ද පෙමේ
කිසි වෙනසක් තවමත් නෑ
සිදු වෙලා පුතේ…..

අපේ රටට වින කරනා
හොරු, දූෂිතයන් පන්නා
රට දිනවන්නට හැමදේ
කරනු මැන මතූ…..


අර්ජුන හා සනත් මේ වන විට පාර්ලිමේන්තු මන්ත්‍රී වරුන්ය. ඒත් ඊට පෙර ඔවුහු අපේ ආදරණීය ක්‍රිකට් ක්‍රීඩකයෝ වුහ.

අර්ජුන පාර්ලිමේන්තු ගියේ 2004 ඉඳන්ය. ඒ වන විටත් ඔහු ක්‍රිකට් ගැහිල්ල නවත්වා තිබුනි. ඔහුට අවශ්‍ය වුනේ කොහොම හරි ක්‍රිකට් හා අනෙකුත් ක්‍රීඩාවන්හි සිදුවන හොර මැරකම් නැවැත්වීමටය. එහෙත් ඔහුට ඒ සඳහා අවස්ථාවක් ලැබුණේ නැත. අර්ජුන අත හැරියේ ද නැත. දිගින් දිගටම ඔහු යුක්තිය වෙනුවෙන් කෑ ගැසුවේය. අන්තිමට ඔහු තමන් සිටි පක්ෂයද අත හැරියේය. මෙය අපට අරුමයක් නොවූයේ ඔහු ක්‍රිකට් ගහන කාලයේ සිටම යුක්තිය වෙනුවෙන් නැගී සිටි, ඒ වෙනුවෙන් කැප කිරීම් කළ චරිතයක් බැවිනි. අරවින්ද අසාධාරණ ලෙස කණ්ඩායමෙන් ඉවත් කල විට ඔහු ඊට විරෝධය පා සංචාරය වර්ජනය කලේය. එම වර්ජනය නොකලා නම් හොඳ බව රටක් හැටියට අපට හිතුනත් එයින් පසු අවුරුදු 9ක් අරවින්ද ක්‍රීඩා කලේ අර විරෝධය නිසා නොවන බව කාට නම් කියන්නට පුළුවන්ද? අප ලෝක කුසලානය දිනුවේ තමන්ගේ නායකයා ගැන කණ්ඩායමේ ක්‍රීඩකයන්ට තිබූ ඉහල විශ්වාසය නිසා නොවන බව කියන්නට පුළුවන්ද? මුරලි ගේ ප්‍රශ්ණයේදී තම කණ්ඩායමත් සමග ඔහු විරෝධය පෑවේය. එයින් මුරලිගේ අනාගතය එළිය වුනේ නෑ කියා කීමට පුළුවන්ද? අද අර්ජුන ගේ කණ්ඩායම ජනතාවය. ඔහු අප වෙනුවෙන් හඬ නගන බව අප විශ්වාස කරමු. දේශපාලන කරලියේ ඉහලටම යාමට ඔබට ශක්තිය ලැබේවායි හද පතුලින්ම පතමු….

සනත් පාර්ලිමේන්තු ගියේ 2010 දීය. ඊට කලින් ඔහු ජනධිපතිවරණයට කඩේ ගියේය. එහෙත් ඔහු තාමත් ක්‍රිකට් ගසයි (සමහර විට ඒ ලංකාව ලෝකයේ ආශ්චර්ය කිරීමේ එක් පියවරක් විය හැකිය.) ඒ විතරක් නොවේ. ඔහු ජනාධිපතිවරණය සමය වන විට කණ්ඩායමෙන් කැපී ගොස් තිබුණි. ඒ නිකම්ම නොවේ….. සෑහෙන කාළයක් එක දිගට අසාර්ථක වීමෙනි. එහෙත් (හොඳට කඩේ යාම නිසා විය හැක) ඔහුට යළිත් කණ්ඩායමේ ස්ථානයක් ලැබුණි. කොහොම වුණත් තවමත් මම සනත් ක්‍රීඩා කරනු දකින්නට බෙහෙවින්ම ආසා කරමි. එහෙත් ඉක්මනින්ම ඔහු ක්‍රීඩා ගාරයට යනු දකින්නට අසා නොකරමි. සනත් කිසි විටෙක අනුන් වෙනුවෙන් - යුක්තිය වෙනුවෙන් කතා කරනු මම දැක නැත්තෙමි. ඔහු තුල තිබූ දක්ෂතාවයට අමතරව ඔහුගෙන් මා දුටු උසස් ගතිගුණය වන්නේ ඉහල තරඟකාරීත්වයයි. ඔහු තරඟයකට සහභාගී වන අතර තුර ක්‍රීඩාගාරයට වී විවේකීව සිටින කෙනෙක් නොවන බව මම දැක ඇත්තෙමි. ඔහුගේ හොඳම මිතුරෙකු වූ රොෂාන් මහානාම අසාධාරණ ලෙස කණ්ඩායමෙන් ඉවත් කල විට ඔහු කිසිවක් කළේ නැත. මාවන් අතපත්තු නම් විශිෂ්ඨයා අසාධාරණ ලෙස බංකුවේ රඳවා සිටින විට ඔහු කිසිවක් කළේ නැත. ඔහු ක්‍රීඩාව තුලින් දිනා ගත් ජනප්‍රියත්වය පාවිච්චි කරමින් දේශපාලනයට පා තැබූ නිකම්ම නිකම් පුද්ගලයෙක් බව මගේ හැඟීමයි. අඩු තරමින් දැන්වත් කණ්ඩායමෙන් ඉල්ලා අස් වුණා නම් ඔහු තුල යම් ප්‍රතිපත්තියක් ඇති බව පෙනෙනු ඇත. සනත්, ක්‍රිකට් ක්‍රීඩා කරන කාලයේ දී සිටි සනත් ට වඩා ප්‍රතිපත්තිගරුක, වැරැද්දට එරෙහි වන පාර්ලිමේන්තු මන්ත්‍රී කෙනෙක් අපි ඔබෙන් බලාපොරොත්තු වෙමු. මේ වන විටත් ඔබ සහභාගී වන ලෝක කුසලාන 20-20 තරඟාවලිය තුල යලිත් ඔබට අණසක පැතිරීමට (දේශපාලන බලයෙන් නොව) හැකි වේවා’යි ද පතමු. ඒ සඳහා අවශ්‍ය ශක්තිය ඔබට ලැබේවායි හද පතුලින්ම පතමු……

පිංතූරෙ ගත්තෙ මෙතැනින්..

Tuesday, April 20, 2010

අවුරුද්දට පෙර...

අවුරුද්දක් තරඟෙට දුවලා
හම්බ කරපු සොච්චම යොදවා
අවුරුදු කන්නට ඇඳුම් ගත්තෙ අපි
රෙදි කඩ වල මහ පොර වැදිලා…

යුතුකම් හැකි සේ ඉටු කරලා
ලෝකෙට පරකාසෙත් කරලා
අවුරුදු කෑවා ඊළඟ මාසේ
මැරිල' ගියත් කම් නෑ කියලා…..

අපට තරම් වත් හයිය නැතී
අපෙ නෑයෝ හැම තැනම ඇතී
අනේ ඔවුන්ටත් අපට වගේවත්
අවුරුදු සමරන්නට ඇත්නම්……



අවුරුදු ලංවුනා…
අපිත් ලහි ලහියේ ලැබුණු පුංචි ඉඩත් හම්බ කරපු සොච්චමත් වෙන් කලේ අවුරුද්දට ඇඳුම් කැඩුම් ගන්න…
ඊලඟ මාසෙ නොකෑවත් යුතුකම් ඉටු කරන්න ඕනැ නේ……..
පුලු පුලුවං විදිහට අම්මට, අප්පච්චිට, නැන්දම්මට……
අනිවාර්යයෙන්ම ගන්න ඕනි හැමෝටම ගත්තා…..
අප්පච්චිගේ හිතට හරි නෑ….
එයාට එච්චර වියදම් කරන්න එපා… ලු
හේතුව හොයලා බලනකොටයි තේරුණේ…..
චූටි බාප්පගේ ළමයි ගැන අපට අමතක වුණා කියලා තමයි අප්පච්චි හිතලා තියෙන්නේ…..
චූටි බාප්පා නැති වුණාට පස්සේ ඒ අය හුඟක් අමාරුවෙන් ජීවත් වෙන බව අමුතුවෙන් කියන්න දෙයක් නෙවෙයි….
ඒත් අපිට පුළුවං විදිහට අපි උදව් කරනවා…..
ඔය වගේම අපේ උදව් අවශ‍ය නෑදෑයෝ කොයි තරම් නම් ඉන්නවාද…
එහෙම බැලුවාම අපි මේ කරන දේවල් මොනවද කියලා හිතෙනවා…..
ඒත් ඉතින්….
අනේ මන්දා……
අපි චූටි බාප්පගේ ළමයින්ට ඇඳුම් ගන්න පුංචි ගානක් යැව්වට පස්සේ තමයි අප්පච්චිගෙ හිතට පොඩි සැනසුමක් ආවේ…..
තව කීයක් හරි යවන්න තිබුණා නම් කියලා මටත් හිතුණා….
ඒත් අපිත් අපේ තත්වේ තියාගෙන ජීවත් වෙන්නත් එපෑ….
ඒකට ටිකක් වියදම් යනවනේ…..

මොනවා කරන්නද... ඕක තමයි ජීවිතේ හැටි....

පිංතූරෙ ගත්තෙ මෙතැනින්

Friday, April 2, 2010

වස විස නැති අපි.....

අප නිතරම පන්සල් යනවා... මල් පහන් බුදුන්ට පූජා කරනවා.. ඒත් අපේ හිත් තුල වස විස ඕනි තරම්... අනුන්ගේ වැරදි හොයන්න... අනුන්ව හෙලා දකින්න නිමිත්තක් තියෙනවද කියා බලමින් ඉන්න එකනේ වැඩිපුරම කරන්නේ... 


පහුගිය දවසක පන්සල් ගිය වෙලාවක මගේ දුවයි මගේ මල්ලි කෙනෙක් ගේ දුවයි විනෝදෙන් ඉන්න වෙලාවක පිංතූරයක් ගන්න මට පුළුවන් වුණා....
ඒ පිංතූරය දැක්කම මට හිතුණා ඔවුන් කොයි තරම් සැහැල්ලුවෙන්ද මේ ඉන්නේ කියලා... 
ලොකු වෙනකොට ඒ සැහැල්ලුව ඔවුන්ට නැති වෙන බව හිතෙනකොටත් දුකයි.... 
ඒත් ඒක එහෙම නොවෙන්න නම් සමාජ ආකල්ප වල ලොකූ වෙනසක් විය යුතුයි....



මේ සැහැල්ලුව මේ ලෙංගතුකම අපේ සමාජය වෙලාගන්න දවසක් එනකම් මං හීන දකිනවා...

Wednesday, March 31, 2010

ආදරණීය අබේ...




අපව හැරදා ගියද සමුගෙන
රැඳෙනු ඇත ඔබ සදා සවනත
එපමණක් නොව ඔබ ලබා දුන්
මිහිර අපමණ තරම් විය මට....

නොදැක ඇති මුදු නුඹව හැබැහින්
හදවතේ නුඹ හට ඉඩක් විය...
ඒ ඉඩෙහි නුඹ කරපු හරඹය
සදාකල් මා හදට සුවඳය...

අපව සැනසූ ඒ සොඳුරු හඬ
යලිත් පතනට දිරිය නැත මට
නිවන් පුර රන් දොරටු හැරගෙන
යන්න පිං පෙත් පතමු නුඹ හට....
.

පිංතූරෙ ගත්තෙ මෙතැනින්..

Friday, March 26, 2010

නුඹ මට වෛර කළා නම්

හදවතින්ම ආදරය කරපු දෙදෙනෙක්ගෙන් කෙනෙක් මිය ගියාම... දුක ජීවත් වෙන කෙනාටනේ.... මේ වගේ ආදරෙන් හිටපු දෙන්නෙක්ගෙන් ජීවත්ව ඉන්න කෙනා මේ විරහව විඳින්නේ කොහොමද කියලා අපි දැකලා තියෙනවා... ඒත් මියගිය කෙනා ඒක විඳින්නේ කොහොමද..... ? එයාට එය දැනෙන්නේ කොහොමද... ? මේක පුංචි පරිකල්පනයක්....


නුඹ මට වෛර කළා නම්
අඩු තරමේ මාව අමතක කළා නම්
අනේ මට හිත හදා ගන්න තිබුණා
නුඹ මට මෙච්චර ආදරේ බව දැන හිටියා නම්….
ඒත් මොනවා කරන්නද…?
මැරෙන්න තියෙනවානම් මැරෙනවාමනේ…
මාව තවත් අසරණ කරන්නේ නැතිව
තවත් ලස්සන හදක් 
තෝරගන්න බැරි ඇයි නුඹට
මට ආයෙ එන්න බෑ
නුඹේ ආදරය දැක්කම යන්නත් බෑ
මාව තවත් අසරණ කරන්න එපා….
මේ ආත්මයට විතරක්
වෙන කෙනෙක්ට ආදරය කරන්න
ලබන ආත්මයේ පටන්
අපි ආයෙත් එක්වෙමු
අනේ මට යන්න දෙන්න…
මං දැන් මැරිලා….!

පිංතූරෙ ගත්තෙ මෙතැනින්....

Monday, March 22, 2010

අඹ ගෙඩිය



රස විඳින්නට මා සිතා සිටි


ලේන් සියොතුන් ඉවට හසු වූ


ගසේ බඩගා මා නෙලා ගත්


සත්තු කාලැයි මා වීසි කළ

නුඹ………..

බොහෝ කලක් තිස්සේ පෙරුම් පුරා.... නෙලා ගත්තද ලේන් සියොතුන් ගේ ඉවට හසු වූ බැව් දැනුණු කල අපට යම් අපුලක් සිතට නොදැනේ යැයි කියන්නට පුළුවන්ද....? සත්තු කාලා.... එහෙම කියලා හිත හදාගෙන නෙළූ පලය ඉවත හෙළන්නට අපට සිතේ..... පෙරේත කම වැඩි නම් සත්තු කෑව කොටස ඉවත් කොට එය රසවිඳින්නටද අප පෙලඹෙනු ඇත.... මෙය අපේ ජීවිතයේ එක්තරා පැතිකඩක් යැයි මට සිතේ.....

Thursday, March 18, 2010

බොරු කියනවා නම් ප්ලෑන් කරලා කියන්න….



මේක මීට අවුරුදු 12කට විතර කලින් සිදුවුණු පුංචි රසවත් සිදුවීමක්. අද යාළුවෙක් එක්ක කතා කර කර ඉන්නකොට මට මේක මතක් වුණා. මේක හොඳ විනෝදබර සිදු වීමක්.

ඔන්න අපේ යාළුවෙක් හිටියා. අපි එයාට රෝහිත කියමුකෝ.. එයා තමයි මේකෙ කථානායකයා. එහෙමත් නැත්නම් ප්‍රධාන නළුවා. මිනිහා ටිකක් විනෝදෙට බරයි. කයිවාරුවත් අඩුවක් නෑ. ඉගෙන ගන්න වගේම ක්‍රීඩාවටත් දක්ෂයි මීටර් 400 ඉසව්වෙන් සමස්ථ ලංකා තරඟ වලටත් ඉදිරිපත් වෙලා තියෙනවා.

අපි මේ කියන දවසට සති කීපයකට කලින් අපේ යාළුවා මොකක්දෝ ප්‍රධාන පෙලේ තරඟයකට සහභාගී වුණා. හම්බ වුණේ 4 වෙනි තැන. හැබැයි රූප පෙට්ටියේ ප්‍රවෘත්ති වලට මෙයාවත් යන්තම් පෙන්නුවාමිනිහා අපටත් දුරකථනයෙන් දැනුම් දුන්නා ප්‍රවෘත්ති බලන්න කියලා අපිත් ඉතින් බැලුවා කියමුකෝ

ඔන්න මං කියන දවස උදා වුණා.. අපි උ.පෙ පංති ගිය යාළුවෝ කට්ටියක් විනෝද ගමනක් ගියා. රෝහිත මේ පංතියට සහභාගී වුනේ නැති වුනත් අපේ තිබුණු හිතවත් කම නිසා එයත් අපිත් එක්ක එකතු වුණා…… අපි ගියේ සීගිරි දඹුලු.

අපිත් එක්ක ගෑනු ළමයි කීපයකුත් ගියා. ඒ අයගෙන් බොහෝ දෙනා අපේ පංතියේ අය.. අපේ මිත්‍රයා මේ ගෑණු ළමයි එක්ක පොඩි කයිවාරුවක් ගහන්න සැට් වුණා.. හැබැයි කෙල්ලො ටික මිනිහව වැඩිය මායිම් කලේ නෑ. යාළුවා ඔහුව කෙල්ලන්ට හඳුන්වා දෙන්න උත්සහ ගත්තා. මෙන්න මේ වගේ දෙබසක් තමයි ඇති වුණේ.

රෝහිත : හලෝ.. කොහොමද? මං නම් ඔයාලව දන්නේ නෑ. ඒත් ඔයාලා නම් මාව දන්නවා ඇති නේ?
කෙල්ලෙක් : අනේ අපි ඔයාව දන්නේ නෑ.. නේ
රෝහිත : මොනවා? (විශ්මය අඟවයි) ඔයාලා ටී.වී බලන්නේ නැද්ද?
කෙල්ලෙක් : අපි නිතරම ටී.වී බලනවා නේ.. ඔයා මොන ප්‍රෝග්‍රෑම් එකේ ද හිටියේ..?
රෝහිත : මාව පහුගිය කාලේ නිතරම ටීවී එකේ පෙන්නුවානේ ප්‍රවෘත්ති වලට
(හැබැයි මිනිහව පෙන්නුවේ තප්පර 0.5 ක් තරම් චූටි කෑල්ලක. ඒ මදිවට එකම එක දවසයි.)
කෙල්ලෙක් : අනේ සොරි අපි වැඩිය ප්‍රවෘත්ති බලන්නේ නෑ නේ.
(අනිත් අයත් ඒක අනුමත කළා)
ඒත් කෙල්ලෝ ටික හිමින් සීරුවේ මාරු වෙලා ගිහින් අපේ වෙන යාළුවෙක් ගෙන් අහලා තියෙනවා මොකක්ද මේ ටීවී කතාව කියලා. මිනිහා ඇත්තම දෙසා බාලා. අපේ රෝහිතයගේ පටි හතම රෝල්…….

පිංතූරෙ ගත්තේ මෙතැනින්...

ඔන්න සින්ඩියට මාත් ආවලූ.......

මං එක පාරක් සින්ඩියට එන්න ඉල්ලුම් පත්‍රයක් දැම්මා... ඒත් මගේ සටහන් ඔක්කොම තිබුණේ පිංතූර අස්සේ.. මං හිතුවේ හැමෝටම කියවන්න ලේසියිනේ... කියලා.. ඉතිං මං නිකම්ම කින්ඩි වෙලා ගියා...සිංහල අන්තර්ගතය මදි.... සින්ඩියෙන් එහෙමයි මට කිව්වේ.. මං එයාලගෙන් පුංචි ඉල්ලීමක් කරා.. මේකෙ තියෙන්නේ තනිකර සිංහල නිර්මාණ (පිංතූර අස්සේ වුණත්) ඉතිං සින්ඩියේ තීරණ ගන්න මහත්තුරු මීළඟ සාකඡ්ඡාවකදී පුළුවන්නම් පොඩි යෝජනාවක් දාන්න පිංතූර විතරක් තිබුනත් ඒ පිංතූර වල තියෙන්නේ සිංහල කරුණු නම් පොඩි අවස්ථාවක් දෙන්න කියලා.

පස්සේ මට හිතුනා.. කියවන්න මෙහෙම එකක් තියෙන බව අනිත් අය දැන ගන්න එපැයි... ඉතින් ඒකට මේ සින්ඩිය වගේ එකකට මං සම්බන්ධ වෙන්න එපැයි... කියලා. අනික ප්‍රසිද්ධ පිරුළකුත් තියෙනවනේ... මෙන්න මෙහෙම....

"පඳුර ලඟට මා යනවා විනා වේ
පඳුර මා ලඟට එනවා හිනා වේ.." 


ඔන්න ඉතින් මං කරපු වැඩේ අලුතින් දාන සටහන් වෙනම ලියලා පසුබිම් පිංතූරෙ වෙනම දැම්මා....පරණ දාපු ඒවැයිනුත් කීපයක් වෙනස් කළා... ආයිත් පාරක් දැම්මා ඉල්ලුම් පත්‍රයක්...

මෙන්න වැඩේ ගොඩ... මාව සින්ඩියට සුදුසුයි කියලා... නිර්දේශ වෙලා...

ඔන්න දැන් ඔයාලට මගේ නිර්මාණ සින්ඩිය හරහා... බලන්න පුළුවන්...

ආපු එකේ පුංච් විචාරයක් දීලා යන්නත් අමතක කරන්න එපා.... හොඳේ....

Tuesday, March 16, 2010

මං හොඳ කෙනෙක් අද නුඹ සිතුවාට වඩා....



අම්මා කෙනෙක් දරුවන් වෙනුවෙන් විඳින වේදනා, කරන කැප කිරීම් මෙච්චරයි, මෙපමණයි කියන්න බෑ. ඇයට ඇති ණය අපට කවදාවත් ගෙවන්නත් බෑ....
හැම අම්මා කෙනෙක්ම වගේ හීන මවන්නේ තමන්ගේ පුතා සක්විති රජෙකු කරන්න...

මගෙ අම්මත් හීන දැක්කේ ඒ ටික කරන්න.... ඒත් මං.....




මං හින්දා නුඹ නොකාපු වේල් ගණන ....කීයද
මං හින්දා නුඹ හඬාපු කඳුළු ගැළුම් ........කීයද
මං හින්දා නුඹ හෙලාපු සුසුම් වළලු ......කීයද
අම්මේ මට කියන්න ඒ ණය ගෙවන්න ..ඕනෙද

පුංචි කාලෙ අප්පච්චී ගහනකොට ..........මට
මාව බේර ගත්තේ බොරු කියා .......කුමකට
ඒ සිදුවුණ හැම පවකම උරුමෙ .........අද මට
දෙන්න මගේ අම්මේ එය සැපක් .......මා හට

නුඹ සිතු පැතු ලෙස අම්මේ නුඹේ .....පුතු කුඩා
රජ වූයේ නැත සැම පරදවා ...........ගෙන විඩා
තැවෙන්නට එපා මොහොතක් තරම හෙම හඬා
මං අද හොඳ මිනිසෙක් නුඹ හිතනවට ......වඩා


Wednesday, March 3, 2010

මිතුරු දම....

පවුල් බැඳීමට පමණක් දෙවැනි වන, ඇතැම් විට කාටත් වඩා ලං වෙන, දෙයක් වේ නම් ඒ මිතුරු දම වේ. 
එහෙත් අවංක, ආදරණීය කල්‍යාණ මිත්‍රයින් අපට හැම තැනම හමු නොවේ. 
මා එවැන්නන් කීප දෙනෙකු ලැබීමට තරම් භාග්‍යවන්තයෙකු වූ බැව් සිහිපත් කරන විට ......
මට මා ගැන සියුම් අභිමානයක් නැඟෙයි.....

අප කිසිවෙකුත් අංග සම්පූර්ණ අය නොවේ. අප අතින් වැරදි සිදුවේ. එහෙත් මා නිවැරදියි, අනෙකා වැරදියි යන මතයේ කිසිවෙකු සිටියහොත්.......එවැනි හේතුවක් නිසා අපට මිතුරෙකු, හතුරෙකු කරගත හැක. එහෙත් ඉවසීමෙන් වැඩ කලහොත් සියල්ල කාලය විසින් විසඳනු ඇත. මා එය කියන්නේ නිකම්ම නොවේ..... අත්දැකීමෙනි.

මේ ඒ අත් දැකීමයි

වරෙක මගේ ප්‍රාණ සම මිතුරු රෑනක් හිටියා...එයින් දෙදෙනෙක් ඉතාම සමීපයි. සමහරු කිව්වෙ මගෙ අග සව්වෝ කියලා... ඒත් මං වැඩිය දුර දිග හිතන්නේ නැතිව (ඇත්තටම ඕනෙවට වඩා අනුන් ගැන හිතලා) ගත්ත තීරණයක් මුල් කරගෙන, මගේ යාළුවෝ මට විරුද්ධව චෝදනා පත්‍රයක්ම සකස් කරලා මගේ හොඳම් යාළුවෝ දෙන්නව ප්‍රධාන සාක්කි කාරයෝ කරලා, විත්ති කාරයට කියන්නෙත් නැතුව දඬුවම් ක්‍රියාත්මක කළා. ඒ අය මාත් එක්ක කතා නොකර ඉන්න තීරණය කරලා. ඒත් කීප දෙනෙක් මේකට එකඟ වෙලා නෑ. නමුත් සාමූහික තීරණයක් නිසා නිහඬ වෙලා ඉඳලා තියෙනවා. 
මං මේ කාලෙ ලොකුම පීඩනයකට ලක් වුණේ මට දඬුවමක් දීලා කියලා මං දන්නැති නිසායි. නමුත් මගේ යාළුවො කීප දෙනෙක් මාත් එක්ක මේ ගැන කතා කරලා මට චෝදනා කීපයක් කිව්වට පස්සේ මට පුදුම හිතුනා මේ අයවද මං මෙච්චර ආදරෙන් ආශ්‍රය කළේ කියලා. 
ඔව්න් ඉදිරිපත් කළ චෝදනා 7-8 අතරින් එකක් හැර අනික්වා කිසිම පදනමක් නැති ඒවායි. ඔවුන් ඒවා ගෙතුවේ කොහොමද කියලා මට හිතාගන්නත් බෑ. 
අනික් හේතුවට පදනමක් තිබුණත් සත්‍යය නෙවෙයි කියලා මං දැනගෙන හිටියා. ඒත් මට ඒ කාරණේ දි මං නිවැරදියි කියලා කියන්න තිබුණේ මගේ හෘද සාක්ෂිය විතරයි.

කාළය හෙමින් ගතවුණා. මං ඔවුන්ගෙන් යාළුකම යදින්න ගියේ නෑ.... ඒත් මං ඔවුන්ගේ යාළු කම අමතක කළේ නෑ. 
මං දැනගෙන හිටියා, ඔවුන් එහෙම හිතුවේ ඔවුන්ගේ අධික සංවේදී බව නිසා කියලා. ඒත් මගේ යාළුවෝ මාව තේරුම් අරන් හිටියේ නෑ....
යාළුවන්ට උදව් කරන්න අවස්ථාවක් ආවාම මං කවදාවත් මඟ ඇරලා නෑ. ප්‍රශ්ණ ආවා වුණත් මං දිගටම ඒ ගුණය පවත්වගත්තා...
තව ටිකක් කල් යද්දී.....
එක එක ගැටය ලිහෙන්න ගත්තා.....
ඒ යාළුවෝ බොහෝ දෙනා හිටියාටත් වඩා මට ලං වුණා....
මට විරුද්ධ පිලේ හිටපු අය, බොරු ගොතපු අය අසරණ වුණා....
සත්‍යය කවදා හරි ජය ගන්නවා. එතකල් ඉවසන්න.....
ඒ වගේම අවංක යාළුවෝ හරි වටිනවා. ඔවුන්ව තේරුම් ගන්න....

ඉවසුම තියෙන තැන
සැනසුම නිතර වෙසෙතී...
කළණවූ සුමිතුරන්
අපරිමිත සම්පතකී...
සත්‍යය කෙදින හෝ
උඩට මතුවන දෙයකී...
රැකු මැන දහම ගරු
දහම ඔබවද සුරකී........!

 පිංතූරෙ ගත්තේ මෙතැනින්...

Tuesday, March 2, 2010

Please don't kill us|මිනිසුනි අනේ පවු රැස් කර ගන්න එපා!

අපි - ඒ කියන්නේ මිනිස්සු මේ ලෝකෙ බිහි වෙනකොට අපිට මේ පොළොවෙ අයිතියක් නොතිබෙන්නට ඇති. එතකොට මෙහි අයිතිය තිබෙන්නට ඇත්තේ තිරිසන් සතුන්ට වෙන්න ඇති. ඒත් ටික කලක් යද්දී මිනිසා අවි ආයුධ හදා ගෙන සතුන් දඩයම් කරගෙන කන්න පටන් ගත්තා. පස්සේ ශිෂ්ඨාචාර සම්පන්න වුණා. ඒත් අර වනචාරී යුගයේ තිබුණු පුරුදු ඉඳහිට මතක් වෙනවා... ඒකනේ නිතරම කුලල් කාගන්නේ, එකිනෙකා මරාගන්නේ, අනික් සතුන්ගේ මස් කන්නේ.

කුකුළා කොයි තරම් මිනිසා ට ලඟ සතෙක්ද...?  

උදේ පාන්දර අපිව ඇහැරවනවා....
උන්ගේ මළ පහ අපේ භෝග වලට පොහොරක් වෙනවා...
මෙකී නොකී තව ප්‍රයෝජන බොහෝමයි....

ප්‍රයෝජන නැතත් කුකුළා මිනිසාත් එක්කලා අවුරුදු දහස් ගනණක් තිස්සේ එකට ආ සතෙක් නේ...

ඒත් අද කුකුළට වෙලා තියෙන දේ පේනවනේ...

හරක් මස්, ඌරු මස් නොකන සිල් වතුන් කුකුල් මස් කන්නේ ඇයි කියලා මං හොයලා බැලුවා.. මට ඒ තරම් තාර්කික හේතුවක් නම් හමු වුණේ නෑ.  

මේ ඒ ගැන මා කළ නිර්මාණයක්....


Monday, March 1, 2010

ලෙඩ හදවත් ටෙන්ඩරය|Tender for weak Hearts

නිදහසින් වසර 62 ක් සපිරුණ ද සසිරිබර මෙ සිරිලකේ පාලකයන් අපට නිදහසක් ලබා දී නොමැත්තා සේ ය. ඔවුන් අවුරුදු 5 කට වරක් පාර්ලිමේන්තුවට තේරී පත් වෙයි..... එහෙත් ඉන් පසු ඔවුන් වැඩ කරන්නේ ජනතාව ගැන තඹ පයිසෙකටවත් මායිම් කරන්නේ නැතිව ඔවුන්ගේම සුබ සාධනය වෙනුවෙනි.

මට හිතෙන්නේ ඔවුන්ට එක්කෝ හදවත් නැතිවා විය යුතුය. නැතිනම් ඒවා පාවිච්චි නොකරනවා විය යුතුය. අවුරුදු 5ක් පුරාවට පාවිච්චි නොකිරීමෙන් දැන් ඒවා ක්‍රියාත්මක නොවෙනු ඇත.

මේ මට හිතුන දේ මං ලියපු විදිහයි....

Wednesday, February 17, 2010

අප්පච්චී|Appachchi

අපි කොහොමත් ගිලෙනවා|we will be evoured for sure

මට මතක නෑ|I can't remember

සුන්දර මාවතක යන විට අතීතයේ සිදු වීම් මතක් නොවෙනවානම් අපි මැරිලා උපදින්න වෙනවා.....ප්‍රේමයෙන් දෙනෙත් අන්ධ වෙලා තිබුණු එවන් අතීතයක පරිසරයේ ලස්සන විඳින්න වෙලාවක් තියෙන්නත් නැතුව ඇති...






මේ වගේ මල් පිපිලා තිබුණද

එදා මට නම් මතක නෑ.

මේ වගේ කොළ හැලිලා තිබුණද

අනේ මට නම් මතක නෑ.

ලේන් සියොතුන් කුමක් දෙඩුවද

ඒවා ඇහුණද මතක නෑ .

ඔබ මගේ අත අල්ල ගත්තම

මාව වත් මට මතක නෑ..!

Tuesday, February 16, 2010

කොහොමද අපි නිදහස් වෙන්නේ..!

සුනාමිය... (The Tsunami)

සිනාසියන්

දයාබරිත වූ 
නුඹෙ මුදු හදවත
පැතුම් නැසූයෙමි 
වියෝගයෙන් ...
සමා වෙන්න මට 

පිංබර කුමරිය 
අපගේ උරුමය 
මෙයයි ඉතින් ....
මගේ හදෙත් 

පෙම් කුසු පිපුණ මුත් 
නුඹේ සෙනේහේ අනුහසකින්....
මිලාන විය 
ඒ කුසුම් හදේ පිපි 
සිතූ නිසා හෙට ගැනත් බිඳක්....
දරන්න බැරි මට 
වෙනත් කිසිත් නොව 
නුඹේ දුකයි 
සොඳුරිය සැබැවින්
අනාගතේ නුඹ 

ලොවේ ලබා ජය 
සිනාසියන් යළි සිනාසියන්..!



එපා මට ඔබ ගේ සෙනේ!

 

මගේ නෙතු අග කඳුළු බිඳුවක
අගය නොදනින සොඳුරියේ
සිනාසෙනු කිම ම'සිත හඬවා
තනිව ඔබගේ ලෝකයේ
සිතින් ඔබ වෙත බැඳී සිටියෙමි
කිසිවෙකුට නොදැනෙන ලෙසේ
වරද වූයේ මගේ අතිනුයි
මුළු ලොවම පැවසූ ලෙසේ
අහිංසක මා සෙනේ පැතුමන් 
අවමනට ලක් කර මෙසේ
සිනාසෙන්නට එපා ලඳුනේ
එපා මට ඔබගේ සෙනේ..
 මෙහි පසුබිම නිර්මාණය කරදුන් දිලක්ෂිකා සොයුරියට මාගේ ප්‍රණාමය.

Monday, February 15, 2010

මං තනි නෑ

 අපි හුඟ දෙනා හිතනවා අපිට කවුරුත් නෑ අපි තනි වෙලා. අපි ගැන කවුරුත් හොයන්නේ නෑ අපි ගැන කවුරුත් බලන්නේ නෑ කියලා...

ඒත් අපි හොඳට හිතුවොත් අපි වටේ බොහෝ දෙනා ඉන්නවා...
සමහරු අපිට වරදින්නේ කොතනද කියලා බලන් ඉන්නවා....
               ..... වැරදි වලට හිනා වෙන්න
වගේම
               ..... වැරදි නිවැරදි කරන්නත්...

සමහරු ආදරයෙන් බලා ඉන්නවා අපේ ජයග්‍රහණ දිහා....

වැදගත් ම දේ අපි තනිවෙලා නෑ.....














මං තනිවෙලා....
ඒ වගේද පේන්නේ ...
හොඳ... ට බලන්න...
මගේ වටේ කොයි තරම් 
කට්ටියක් ඉන්නවද.... කියලා.....