Tuesday, December 31, 2013

ගුඩ්..බායි.. 2013 නොහොත්.. වෙල්කම් 2014


තත්පරය, විනාඩිය, පැය, දවස, සතිය, මාසය වගේ ම අවුරුද්දත්.. එකක් යද්දි තව එකක් එනවා.. මේවා ඔක්කොම සාපේක්ෂ මිනුම් ඒකක.. තත්පරය කියන එකේ කාල පරාසය චුට්ටක් වෙනස් උනානම් ඉස්සෙල්ලා කියපු හැම එකකම තරාතිරම වෙනස් වෙන හැටි හිතාගන්න පුළුවන්.. ඒ විතරක්ය.. විනාඩියට තියෙන්නෙ තත්පර 60යි කියලා අපි (අපි කිවුවට මං නං නෙවෙයි.. වෙන කවුරුහරි තමයි ඕක කොරල තියෙන්නෙ) ගොඩනගාගත්තු නිර්නායකය පොඩියක් එහෙ මෙහෙ කළොත්.. ඉතිං ඔය කාල මනින ඒකක ඇතුළුව ඒ වටා ගොඩනැඟිච්ච හැම දෙයක් ම අනේ ඉතිං උපකල්පන මත ගොඩනැගුණු බහුබූත නොවෙයි ද?  එහෙම බැලුවාම මේ ලෝකෙ භෞතිකව ගොඩනගලා තියෙන හැම දෙයක්ම සංකල්ප හා උපකල්පන.. ඔය ඉතිං භෞතික විද්‍යාව ඇම්. සී. කිවු එකට විතරක් උත්තර දෙන්ට හැකියාවක් තිබුණා (කණා ගැසීමේ හැකියාව නිසා)  වුණත්.. උ.පෙ ට සී එකක් (මීට අවුරුදු 16 කට විතර කලිං) ගත්තු මං වගේ ගොබිලෙකුගෙ මෝඩ අදහසක් වෙන්ටත් පුළුහං..

ඒත් ඉතිං මට තේරෙන විදිහට මේ කාලය කියන රෙද්ද කීතු කීතු වලට ඉරුවොත් ඉරන්ට පුළුහං චූටිම රෙදි කෑල්ල තමයි ක්ෂණය.. තත්පර විදිහට, විනාඩි විදිහට, පැය විදිහට.. ඔය කොයි විදිහටත් අපි ඔය ක්ෂණ බුරුතු පිටිං පහු කරනවා.. ඔය අතරෙ පොරෝජන ගත්තු ක්ෂණ තියෙන්නෙ කොයි තරං අල්පයයිද හැබෑට.. ?

අපි ඉතිං අවුරුද්දක් මාරු වෙද්දි.. මාතෘකාවෙ තිබුණා වගේ පරණ අවුරුද්දට  ගුඩ් බායි කියන්නෙ ආයෙමත් ඒ අවුරුද්ද අපට හමු නොවන බව දැන දැනමයි.. වී මිස් යූ 2013 කිවුවා නං වැඩිය ලස්සනයි නේද? අපි එහෙම කිවුවට.. අපි ජීවත් වෙනකං කී පාරක් නං 2013 අපේ ජීවිත වලට එයි ද?  ඒ එද්දි .. මොන වගේ තෑගි අපට අරං එයිද? එයාට අපිව හිතට අල්ලලා නං.. හොඳ තෑගි අරං එයි.. මොකද හිතන්නෙ...?

වෙල්කම් කියලා 2014 පිළිගත්තට මදි.. එයාට අපි ගැන සුන්දර මතකයක් ලබා දෙන්ට ඕන..

Saturday, December 28, 2013

නාන විදිහ..

මචං.. උඹ හොඳටම වයසට ගිහිං නෙ..
ඉතිං වයසයිනෙ බං දැං..

නෑ බං උඹේ මූණෙවත් ඇඟේ වත් නෙවෙයි වයස.. ඔය කොණ්ඩෙයි රැවුලෙයි.. බලපං සුදුවෙලා බාගෙට බාගයක්.. ඒ මදිවට තට්ටෙත් එනවද කොහෙද?
හරි හරි ඉතිං කොණ්ඩෙයි රැවුලයි තියෙන්නෙත් ඇඟේ නෙ..
උඹ හවස නානවද?

නෑ බං..
එහෙනං උදේ පාන්දර ?
එහෙමත් නෑ බං..ඇයි එහෙම අහන්නෙ..
නෑ.. උඹ හැමදාම වැඩට යනවනෙ.. ඉතිං අවේලාවෙ නාලා වෙන්න ඇති ඔය කොණ්ඩෙ පැහෙන්නෙ කියලා හිතුණා..
ආ.. ඒකනම් වෙන්න ඇති..
ඈ.. දැං උඹ කිවුවෙ අවේලාවෙ නාන්නෙ නෑ කියලා..
හෙක්.. හෙක්.. මං කිවුවෙ උදේ පාන්දරටයි .. හැන්දෑවටයි නාන්නෙ නෑ කියලා.. මං නාන්නෙ රෑ දොලහට එකට විතර බං..



Friday, December 27, 2013

සලජාතකය කියන්නෙ මොකක්ද?

මචං ඔය සලජාතකය කියන්නෙ මොකක්ද? 
එහෙම ඇහුවේ මගේ මිතුරෙකි.. ඒ මිතුරා ඇසූයේ නොදන්නා කමටමය.. 
ඇත්තටම ඒක සලජාතකය නෙවියි සලජාකස ය .. සමස්ථ ලංකා ජාතික කවි සම්මේලනය.. 
මං තෝරා දුන්නෙමි
එතකොට අතකසය කියන්නෙත් ඒ වගේ එකක් ද? 
ආ.. ඔවු.. ඒ අගනුවර තරුණ කවි සම්මේලනය නෙ...
උඹ ඒකෙ නැද්ද?
නෑ මචං..
ඒකෙ ඉන්නෙ තරුණ අය හින්ද ද?
හෙහ්.. හෙහ්.. ඒකත් හරි දැං අපි වයසයිනෙ නේ බං..? ඒත් ඒක නෙවෙයි හේතුව.. අපි ඉතිං මූණුපොත් කවියොනෙ.. මූණුපොතට තවම අතකස ඇවිත් නෑ.. සලජාකස යි.. කෝකිලහඬයි තමයි දන්න තරමින් ඉන්නෙ..
මූණුපොතේ කවිපිටු ගොඩාක් තියෙනවනෙ..?
ඔවු මචං.. මොනවා කරන්නද? එක එක්කෙනා දා ගන්නවා.. එපා කියන්නයෑ..
ඔක්කොගෙම ඉන්නෙ එකම කට්ටිය ද?
ඒකනෙ.. හුඟක් වෙලාවට එකම කට්ටිය..
කවි සංගම් වලත් එහෙමද?
ඔවුනෙ මචං.. ඒවයෙත් එහෙම තමයි.. ලොකු ලොක්කො ටික තමයි වෙනස්.. ඇතුළ එම මයි..
කිසි තේරුමක් නැති වැඩක් නේද?
හැබැයි නැත්තෙමත් නෑ..
එක එක කවි සංගම් වල වගේ ම කවි පිටු වලත් ප්‍රතිපත්ති වල පොඩි පොඩි වෙනස්කම් තියෙනවා.. ඒ වගේම වැඩි කවියො පිරිසකට මේ කවි කලාවෙ රැඳෙන්නත් මේක ලොකු උදවුවක් වෙනවා.. මොකද හැමෝම තමන්ගෙ පිටුවල/සංගම් වල ජනප්‍රිය කම රැකගන්නත් එක්ක මොන මොනවා හරි වැඩකට ඇති දෙයක් කරනවා.. තරඟකාරීත්වය ඇතිවෙනවා..
හපෝ.. තරඟකාරීත්වය ඇති වුණාම... කොලිටිය අඩුවෙනවා නෙ බං..
තරඟකාරීත්වය ගානකට තියෙනකං හොඳයි.. වැඩි වුණොත් නං එහෙම වෙනවා.. දැනට ෂේප්..
හෙක්.. හෙක්..
ඉතිං මොනවද උඹලා ඔය කරන සේවය?
එහෙම ලොකුවට කියන්න තරං දෙයක් නෑ.. සිංහල සඳැස් කවියත් දැං හැංගිලා තියෙන්නේ.. ඔය සිවුපද කීපයක් විතරනෙ බං සමාජයේ තියෙන්නෙ.. ඒත් සඳැස් කවිය ඔයිට වඩා ලොකු පරාසයක විහිදිලා තියෙනවා.. ඒවා පොඩ්ඩක් එළියට දාන්න තමයි අපි ට්‍රයි කරන්නෙ..
එළ.. එළ..

Tuesday, December 24, 2013

කවිය හා පැදිය

චිත්‍ර කලාව, මූර්ති කලාව, නාඩගම් කලාව, නූර්ථි කලාව ආදී වශයෙන් කලාවෙහි විවිධ වූ ප්‍රභේධයන් පවතී. සකලවිධ කලාවන් වූ කලී අපගේ සංස්කෘතිය ගොඩ නැඟූ මහා ශක්තීන්ගේ එකමුතුවකි. කාව්‍ය සාහිත්‍යය යනු ඉහත කලාවන්  අතුරින් වඩාත් ජනතාවට සමීප වූ කලාවකි. එය අනෙක් බොහෝ කලාවන්ට මූලික වූ නිසාම විශිෂ්ඨ කලාංගයකි. කාව්‍යයක් යැයි කී විට එය ගද්‍ය, පද්‍ය , නාද, සිනමා ආදී වශයෙන් ප්‍රභේධ වේ. එහෙත් භාවිතයේ දී, පද්‍ය කාව්‍ය වලටම කාව්‍ය යැයි කියන්නට පුරුදු වී ඇත්තෙමු. එහෙත් පද්‍ය කාව්‍ය හෙවත් පැදි නිවැරදි අරුතින්ම යොදා ගැනීම අප සතු යුතු කමකි. 

පැදි හෙවත් පද්‍ය
කුමරතුඟුවන් කී පරිද්දෙන්ම "ඇද පැද කිව හැක්කේ - පැදි" බව වටහා ගැනීම වඩාත් පහසු තේරීමකි. මෙකී රිද්මය නිසාම අපට පද්‍යයක් ගද්‍යයකින් වෙන්කොට හඳුනා ගැන්ම අපහසු නොවේ. ඉහත කී පැදි ප්‍රධාන වශයෙන් ගී, සැහැලි, සිලෝ සහ සීපද වශයෙන් ප්‍රභේධ වේ. ඒ ඒවායෙහි තිබෙන ආකෘතිමය ලක්ෂණ නිසාවෙනි. අවාසනාවකට බොහෝ අය සිතනුයේ පැදි යනු සීපද බවයි.

ඇද පැද කීවාම ඇති ද?
ඉහත කී ආකෘතිමය ලක්ෂණ වලින් ඔබ්බට යන කල, අපට හමුවන බොහෝ ලක්ෂණ සමස්ථ කවියටම එනම් සමස්ථ සාහිත්‍ය කලාවන්ටම අදාල වේ.එනම් නිර්මාණය සාර්ථක පැදියක් වීමට ප්‍රථම සාර්ථක කවියක් විය යුතුය. එය අරුතින්, රසයෙන් සුපෝෂිත නිර්මාණශීලී යමක් විය යුතුය. එය එසේ වන්නට අප සැළකිය යුතු ලක්ෂණ කිහිපයක් පහත දක්වමි.

1. අනුභූතිය
නිර්මාණයට පාදක වන අත්දැකීම හෙවත් වස්තු බීජයයි. නිතරම සුලභ නොවන අනුභූතියක් තෝරා ගැනීමට උත්සුක විය යුතුය
2. පරිකල්පනය
තරමක් සුලභ අනුභූතීන් වුවද සාර්ථක පරිකල්පනයන් තුළින් ඉදිරියට ගෙන යමින් බිහි වූ සාර්ථක නිර්මාණ අප දැක ඇත. පරිකල්පනය යනු සත්‍යයේ හා කල්පිතයේ සංකලනයෙන් නිර්මාණ බිහි කරන අපූරු මෙවලමක් බඳුය. කවියා සිතින් මවා ගන්නා දේ පරිකල්පනයයි.
3. ව්‍යුත්පත්තිය
කවියා සිය නිර්මාණය ඉදිරිපත් කරන ආකාරය, භාවිතා කරන බස, ආකෘතිය, යෙදුම් ආදිය තුළින් ව්‍යුත්පත්තිය හඳුනාගත හැක. 
4. අලංකාර
උපමා, රූපක, දීපක, ආක්ෂේප, උත්ප්‍රේක්ෂ ආදී අලංකාර වලින් නිර්මාණය ඔපවත් වෙයි. 
5. දෘෂ්ඨි කෝණය
කාගේ දෘෂ්ඨියෙන් ඉදිරිපත් කොට ඇති ද යන්නයි. එනම් කථන ක්‍රමයයි. කවියා තමන් දක්නා ආකාරයෙන් ඉදිරිපත් කරන්නේ ද? බාහිර අයෙකු ලෙස ඉදිරිපත් කරන්නේ ද යන බවයි.
6. උචිත බව
කවියේ අර්ථයට උචිත ලෙස භාෂාව, වචන, රිද්මය, අලංකාර ආදිය සැකසී තිබීම උචිත බවයි.
7. ව්‍යංගාර්ථය
නිර්මාණයක යටි පෙළ අරුත, සැඟැවුණු අරුත හෙවත් ධ්වනිතාර්ථය ලෙස හඳුන්වන්නේ මතු පිටින් පෙනෙන අරුතට එනම් වාච්‍යාර්ථයට අමතරව පවතින අරුතයි.

මෙලෙස රසවත්, හරවත් හා සවිමත් වන කවිය ප්‍රාණවත් වූ පැදියක් බවට පත් කිරීමෙහි ලා ආකෘතිය ඉටු කරන්නේ මහඟු මෙහෙවරකි. 


එළිසම හා එළිවැට තුළින් ආලෝකමත් වන පැදිය, යති පිහිටුවීම් තුළින් වර්ණවත්ව ගයන්නාගේ මෙන්ම අසන්නාගේ ද සිතෙහි නිවීම, ආශ්වාදය හා රසවත් බව සනිටුහන් කරන්නේ නම් පැදිය මෙන්ම කවියා ද සාර්ථකය. බස වත්, රස වත්, මස වත්, හිස වත් අමතක නොකළ යුතුමය..


මූලාශ්‍ර :- හරියටම කවි හදන හැටි (ගුරු මුෂ්ඨි) - සේන අම්බලම්ගොඩ
      නූතන පද්‍ය සංග්‍රහය - ගොඩගේ ප්‍රකාශකයෝ

Wednesday, December 18, 2013

පැරණි රසාංගයක්..

අපේ අප්පච්චිගෙ පාසැල් කාලෙ මිතුරන් කිහිප දෙනෙක් පහුගියදා අපේ ගෙදරට ආවා.. ඒ අය කලාතුරකින් හමු වුණත්.. අපේ ම පවුලෙ අය වගේ.. මේ අයත් එක්ක සතුටු සාමීචියෙ යෙදෙද්දි කාලය යනවා තේරෙන්නෙ නෑ.. ගැටවු කාලෙ කරපු කවටකම්.. හ්ම්.. අපට හැරෙන්නවත් බෑ.. ඒ තරම්.. ඒ අතර එයාලගෙ පරණ පුංචි පුංචි හුට පට වුණත් ගෙනාවෙ අව්‍යාජ හිනාවක්..

අප්පච්චිගෙ මේ යහළුවන් අතර ඉන්නවා හමුදාවෙ සේවය කරපු කෙනෙකුත්.. ආරි මාමා.. එයා තවමත් බොහොම විනෝදකාමී චරිතයක්.. එයාගෙ හිනා මවන කතා රැසක් අතර මට හිත ගිය පුංචි කතාවක් තිබුණා.. ඒක මෙහෙමයි..

ආරි මාමා ඒ කාලෙ සේවය කළේ හිඟුරක්ගොඩ හමුදා කෑම්ප් එකේ. ටික කාලයක් මෙහි සේවය කරපු ආරි මාමා දැක්ක දුටු හැමෝගෙම හිත්ගත් චරිතයක් වෙන්ට ඇති කියන එක අමුතුවෙන් කියන්ට ඕන නෑ.. ඉතිං කොහොම හරි ආරි මාමට මාරුවීමක් ආවා.. පළවෙනිදට තමයි යන්ට තියෙන්නෙ.. දැන් 31 වෙනිදා සමුගැනීමේ සාදයට හෝ ගාලා සූදානම් වෙනවා.. මේ අතර ඔහුගේ මිතුරෙක් ඔහුව එක්කගෙන යනවා දැන්වීම් පුවරුව ළඟට.. එහි ගම් තලියක් ගාලා අලවපු ලිපියක් පෙන්වනවා.. එහි තිබෙනවා ලස්සන කවියක්..මෙන්න මෙහෙම..

  
කඳවුරු පෙදෙස අද නම් ගණඳුරු පාටයි
ලස්සන ආරි හිඟුරක්ගොඩ ආ දාටයි
ආරී කළු උනත් මට නම් සුදු පාටයි
මට දුක ආරි පළවෙනිදට යනවාටයි

  

හොයලා බලපුවාම මේක ලියලා එවලා තියෙන්නෙ අහල පහල බිත්තර ගෙදර බිත්තර අක්කගෙ දුව.. ආරි මාමට මේ ගැටිස්සි ගැන ඒ හැටි උනන්දුවක් නොතිබුණා කිවුවත් කවිය නං තවමත් කට පාඩං.. ඒ වගේම අපේ අප්පච්චි, ආරි මාමා සහ වෙනත් නැන්දා කෙනෙකු වෙනුවෙන් පද බැඳපු ගීතයකුත් ආරි මාමා හිනාවෙවී මතක් කර කර කිවුවා..

මේ කවිය මං සටහන් කළේ.. මීට අවුරුදු 40 කටත් ඉස්සර.. ගැමි තරුණියක ලියූ අව්‍යාජ කවියක සුන්දරත්වය ඔයාලත් එක්ක බෙදාගන්නයි..

අතීතයේ රස ආවර්ජනය කරපු අපේ අප්පච්චිගෙත්, ආරි මාමා ඇතුළු යාළුවන්ගෙත් ජීවිත එදා දවස ඇතුළෙ ආයෙමත් තරුණ වෙන්ට ඇති කියලා මට හිතෙනවා..  කට්ටියටම නිරෝගී සුව, චිර ජීවනය පතනවා.. 

පුළුවන්නම් මාව නවත්තන්න...


ඒක කරන්න පුළුවං මට ම විතරයි.. ඔයා කොච්චර උත්සාහ කළත් ඔයා ට මාව නවත්තන්න බෑ. මේක මගේ අයිතිය. 

කඳූ මුදුනින් එන ගඟ මං පවුර වුණා ..........ඔයා 
කොහොම නැවැත්තුවත් මාව මං යන මඟ ගියා
ඔයාගෙ කඳුළුත් අරගෙන මගේ ළඟින් .....තියා
කඳු පාමුල හිනා වෙවී හිඳිමි දෙනෙත් ........පියා

ඔයා කිවුවෙ මං නපුරුයි කියලා.. ඒත් මට ඕන උනේ ඔයාව තනි කරන්න නෙවෙයි.. ඔයාට ඔයාගෙ පාඩුවෙ ඉන්න දෙන්නයි. ඔයාගෙ දුක, ලෙංගතුකම මට නොදැණුනා නෙවෙයි. ඒත් ඒක ආදරය නෙවෙයි.. ඔයාට ඒ ආදරය දැනේවි..

මට ම කියා මල් නැතුවට පිපුණේ කිසි ..........ගසක
යට ම මලේ සුවඳ නිසා බැඳූණත් හිත ...........රසක
රට ම බලා සිටියත් ඔය කඳුළැලි පෙම් .........ඇසක
හෙට ම ඔයත් පෙම් කරාවි පෙර නොකරපු ලෙසක

එදාට ඔයා අද වගේ මට සාප කරන එකක් නෑ.. ඒ වෙනුවට මට ස්තුති කරාවි.. ඔයාව නිදහස් කළාට.. මගේ නැවතුම ඔයා නෙවී.. මට සාප කරලා හරි හිත හදාගන්න.. ඔයා තනන අලුත් ලෝකය සුන්දර, පින්බර එකක් වේවි.. මං ඒ ලෝකෙ නැතුවට.. ඒක මට සතුටක්..

අද පිපිලා හෙට පරවෙන මල බඳු සිත ...........අතැර
මඳ සුවඳින් රස නොනැඟෙන තැන නොම වී නතර
සඳ ඉර සේ ළඟ රැඳෙනා හදකට වී ..............සොඳුර
ළඳ දියතේ හස වපුරන් උණුසුම හැර ...........කතර

Wednesday, December 11, 2013

පුතේ අද පරදින්න..

        

හඬ හඬා ඉකිලන්න
එපා එ ද පැකිලෙන්න
පුතේ මගෙ ගුණ පුන්ණ
සටන අත නොහරින්න

සෙනේහය

පතුරන්න
දමේ ගොස මතුරන්න
සදාකල් පවතින්න
ගුණ සුවඳ විහිදන්න

අසීරුයි

ඉවසන්න
පරාජය විඳගන්න
හෙට යළිඳුනැගිටින්න
පුතේ අද පරදින්න
  

Friday, December 6, 2013

මගෙ ආදර අම්මා


කවි ලියන්න ඔබ වෙනුවෙන් දැරු තැත නැත නිම්මා
බැහැ මගෙ හිත එක විදිහට තියාගන්න නම්මා
ලියන ලියන කවිය ඔබට මදි මල් දම් දැම්මා
සඳකට ඉර කොතරම් වෙද, එතරම් මට අම්මා
  



අද අම්මා ගැන කවි ලියන්න විශේෂ දිනයක් නෙවෙයි. මගේ නිර්මාණ අතර දෙමවුපියන් වෙනුවෙන් කෙරුණු නිර්මාණ බොහොම ස්වල්පයයි තියෙන්නෙ. අම්මට, අප්පච්චිට කොහොම කවි ලිවුවත් ඒවයෙ අඩුවක් මට දැනෙනවා.. ඉතිං ඒක මකලා දාලා නිකම් ඉන්නවා.. මගේ අම්මගෙන් මගේ ජීවිතයට ලැබුණු ශක්තිය මෙතෙකැයි කියන්න බෑ. ඒක හුඟාක් දරුවන්ට නොලැබෙන තරමේ එකක් කියලා මං දන්නවා..

මගේ ආදර අම්මාට.. දීර්ඝායුෂ, චිර ජීවනය ප්‍රාර්ථනා කරන්න ඕන කියලා හිතුණු හින්දයි එක පාරටම මෙහෙම සටහනක් ලිවුවෙ..




Sunday, November 24, 2013

ඉරිසියාකාරයා හා සියාතු ගේ ගෙදර

සියාතු ගේ ගෙදර සියාතුගේ වෙලා දැන් සෑහෙන දොහක්ය. සියාතුගේ පවුලේ නීතියට අනුව එකෙකුට අයිතිකාරයා වෙලා දිගට ම ඉන්ට බෑ ය. ගෙදර ජීවත් වෙන අය ගේ වයස, උගත් කම, හැකියාව වගේ ඒවා සලකා බලා සැරින් සැරේ බද්ද මාරු කොරන්ට උවමනාය. කරුමේ කියන්නේ මේ ගෙදර සියාතුගේ හත්මුතු පරම්පරාවෙන්ම පැවතගෙන අය ජීවත් වන්නේ ය. ගේ පොඩ්ඩ උනා ට දස්ස ගෘහ නිර්මාණ සිල්පියෙකු විසින් හදලා තියෙන හින්දා.. හැමෝට ම ජීවත් වෙන්ට පුළුවන් ය. එයිට අමතරව අහල පහල ගෙවල් වලිං පන්නපු එවුනුත් මේ ගෙදර ජීවත් වෙනවාය. එහෙං මෙහෙං ආපු එවුවන්ට ඉන්ට දීලා, දැං ගෙදර මුල ඉඳං හිටපු එකා මොකාද කියා හොයා ගන්ටත් අමාරුය. කොහොම වෙතත් සියාතුවා කාගෙත් හිත ගන්ට දස්සයාය. සියාතුවාගේ ඥාති අක්කාට ගේ තියෙන කාලෙ.. අක්කාටත් හොරෙන් අක්කාගේ පවර් එකෙන් ම ගේ ලියා ගන්ට තරම් සියාතුවාගේ වැඩ කිඩ සියුම් ඒවා විය.

ඒත් ගේ අයිතිකාරයා උනු දවසේ ඉඳං සියාතුවා ගේ තිබුණේ වැඩ වලට වඩා පඩ ය. පඩ වලිං කට්ටිය ආං බාං කරන එකත් පට්ට වැඩක් බව සියාතුවා දැන සිටියේ ය. ගෙදර ඉන්න එවුවන්ගෙන් බාගයක් ම ගෙදර පාලනය කොරන එක තමාගේ රාජකාරිය කියලා හිතුවත්.. ඒක කොළේ සියාතුවා ම ය. ගෙදර හිටපු අයගෙං වැදගැම්මකට ඇති වැඩක් කොරලා පණං හතරක් හම්බ කළේ කීප දෙනෙක් විතරය. සිදාදිය ට ගිහිං රස්සා කරලා ගෙදර වියදමට සල්ලි එවන අයත් ඉන්නවා ය. දුක මේ හම්බ කොරන සේසත සියාතුවාගෙත්.. ගෙදර පාලනය කොරන්ට ඉන්න අයගෙත්.. ඇඳුං ආයිත්තං, ගමන් බිමන් වලට පිරිමහගන්ට වත් මදි වීමය. ඒත් සියාතු නිකං හිටියේ නෑ ය.. අහල පහල හැම තැන ම ගොස් පොළියට සල්ලි අරං ආවේය. වියදං ටික සේප් කරගන්ට හැකි විය.. ගෙදර එවුං හිතුවේ වරදක් නැතැයි කියා ය.

දැං තවත් අවුලකි.. ගෙදර උන්ට කන්ට දෙනවා මදිවට පොළිය ගෙවන්ටත් ඕනෑ ය. සියාතු ඒත් නිකං හිටියේ නෑ ය. තව තවත් වැඩි පොළියට සල්ලි ඉල්ලං ආවේ ය. ගෙදර මිනිස්සු තාමත් සතුටින් ය. උන් හිතන්නේ අපට කන්ට බොන්ට ටික තියේ නං.. සියාතු චිත්තරපටි බැලුවට මොකෝ කියා ය.

පහුගියදා ගමේ පරණ යාළුවො සැට් එකකට එන්ට කියලා පාටියක් දාන්ට සියාතු සිතුවේ ය. එය ඇත්තටම ඉස්තරං පාටියක් ය. මෙවැනි පාටි සියාතු ට කජු කනවා වගේ ය. කරන්ට ඇත්තේ වටේ රවුමක් දාලා ණය ටිකක් ඉල්ලා ගැනීම විතරක් ය.

මේ විදිහට ගෙදර තියාගන්නවා නං .. සියාතුට සින්නක්කරේට ම ගේ ලියා දෙමු කියා ගෙදර හැමෝම කතා වෙනවා ය. තව ටික දොහක් ගියොත්.. අමුතුවෙන් ලියන්ට දෙයක් ඉතුරුවෙන එකක් නෑ කියා ඉරිසියාකාරයෙක් කෙඳිරුවේ ය. 

Tuesday, November 19, 2013

නව මං පෙතෙහි අගේ..

  
එකමත් එක රටකි ඇති සමුදුරු මැද්දේ
කඳු පෙළ මනරම්ය දිය උල්පත් ඇද්දේ
කෙත්වතු තිබේ හේනුත් තියෙනෙව' බැද්දේ
තවමත් ඇහෙනවා සියොතුන්ගේ සද්දේ
  
මුව මී ගෝණ ඉත්තෑ සා පොවුවන්ද
ගව සූකර බළල් බලු අග සවුවන්ද
කවදත් දහම හුරු ඇත් කුල සෙවුවන්ද
එබිමෙහි තවත් ඇත හොර රා බිවුවන්ද
  
මිණිකැට තිබේ පොළොවේ ඔබ මොබ නිතර
ගං දිය ගලයි හැඩ වී කඳු හෙල් අතර
මහ වැවු හැඩයි බැලුවෙමි මම වී නතර
වෙන මොන ලස්සනද නව මං පෙත් විතර
  

Sunday, November 17, 2013

පිටිකර බෙහෙත් කෝ මේ පය බර වායයි

                           
මළ කා ගියත් හිත පොබයන කවි අවිය
සළකා මය දැයේ දියුණ ද විදු රවිය
වළකා ලිය නොහැක ගිණි සිළු දැවි දැවිය
බලකාමය නිසා අප හැම තැවි තැවිය
  
නිවසට අප පැමිණ හූරා ගෙන වස්තූ
කරකාරෙට අරං එහි සිටි බවලත්තූ
මරු වසඟයට යවමින් සවිබල පුත්තු
හෙළ සිරිතටත් ගිණි අවි නොවැ කළෙ පත්තු
  
රහමෙර ගෙනත් හුරු කර, කර මාට්ටුව
මස මර මරා කන්ටත් කළෙ සීට්ටුව
හෙළ වෙද කම මරා බිහි කර වාට්ටුව
අවසන දුන්නෙ බහු ආගම් පූට්ටුව
  
සුද්දා දුන්නු අල හා මුහු උනු ගෝවා
රෙද්දේ පුරා පෙරෙමින් රහ කර කෑවා
මැද්දේ උන්ගෙ සැලසුම් මෙහි ගිණි ලෑවා
යුද්දේ කොටි හපුවො අප වෙත ගෙන ආවා
  
යන්තම් නිමා වී තිස් වසරක යුද්දේ
අඩියක් දෙකක් කරදර අතරින් ඇද්දේ
ලුණු රහ බලන්ටත් කල් මදි විය හොද්දේ
විරුවා නතර විය මහ උළු ගේ මැද්දේ
  
අයියා මල්ලි ලැම්බෝගිනිගෙනාවයි
පොඩි මල්ලී හඳේ එය හරිවිනෝදයි
මාමල' බාප්පල පියතුම වගේමයි
මහ ජනතාව මහ පාරේ උලා කයි
  
කලකට ඉහත අප හට අණවිණකරලා
රට හැර ගියපු අය කළු සුද්දන් මවලා
ඇවිදින් තිබේ විරුවන් විලසින් ඇඳලා
චෝගම් ගුලිය යන්නට අප හට කවලා
  
මොනවා නැතත් රට මැද හයි වේයායයි
ඉක්මණටම වගේ පැට්‍රල් හඳ පායයි
දැනටත් ළූණු බෑ කන්නට තුන්සීයයි
පිටිකර බෙහෙත් කෝ මේ පය බරවායයි
  

Friday, November 15, 2013

ගත කොහොම ද හිත වගෙ බෙදුවේ...?

     
ලොව වැනසෙද්දී කවි ලිවු මා සිත - නුඹ වැනසෙද්දී සසල වෙළා
මල්ලියෙ අද නම් පමණට වැඩියෙන් - නුඹ මා හදවත සිදුරු කළා
  
නුඹ දෙඩු වදනක විස තිබුණා නම් - දරා ගනිමි දෙවරක් නොසිතා
දිය - කිර වෙන් කර රස බැලුවා නම් - නුඹ වනු ඇත හෙටටත් සමතා
  
ඔවදන් මනුදම් ඇසුරින් හුරුකර - නුඹ ලොකු වන තුරු බලා හිඳී
මවුපියො, ගුරුවරු, නෑ සියො ගැන නම් - නුඹ හිතුවා මගෙ හිතට මදී
  
තනි වූ පෙම් හිත දෙතුන් දෙනෙකු වෙත -දෙන්නට නුඹ කොහොම ද හිතුවේ
හිත විතරක් නම් කමකුත් නෑ තව -ගත කොහොමද එළෙසට බෙදුවේ
  

Wednesday, November 13, 2013

බැරිදා විග්‍රහය !තාරුණ්‍යය - සමයම

තාරුණ්‍යය පුදුමාකාරය. සීමා මායිම් ගැන වගේ වගක් නැති, ඉවසීම කියා දෙයක් හඳුනන්නේ නැති, පෙරලන්න හිතුණොත් මහාමේරුවත් ලොකු නැති.. එවන් තාරුණ්‍යයක් මටත් තිබුණාදැයි  මම මගේ හිත විමසමි. 

මගේ තරුණ කාලයේ ම මා ද පිළිකුල් කළ අයුරෙන් හැසිරුණු මගේ සමවියෙහි වූ තරුණ තරුණියන් පිරිසක් ද සිටි බව මට මතකය. ඔවුහු මිතුරු සමූහයක් වූ අතර, වැඩි දෙනෙකු තනි පුද්ගලයින් විය.  එක කොල්ලෙකු සමඟ කෙල්ලන් 2-3 ක් සහ එක කෙල්ලකු සමඟ කොල්ලන් 2-3 ක් එකට සැරීම මෙම කණ්ඩායමේ ස්වරූපයයි. කාලය යද්දී එක එක කුරුල්ලා කිරිල්ලියකුත් අරං මාරු වූ අතර.. අවසන මේ සමයම නිමා විය. 

මා මේ සටහන ලියුවේ මාගේ ඥාති සොහොයුරෙකුගේ එවන් වූ පිංතූර පෙළක් දැකීමෙන් හටගත් කම්පනයෙනි. ඔහු ඉන්නේ භද්‍ර යෞවනයේ ය. ඇතැම් පින්තූර වල ඔහු හා වෙළී කෙල්ලන් දෙදෙනෙකු සිටින අතර.. තවත් පින්තූරයක ඔහු තවකෙකු සමඟ එක් කෙල්ලෙකු හා වෙළී හිඳියි. මේවා සමාජ සමයං ය. එහෙත් එවන් වූ සමයං මීට 14 අවුරුද්දකට පෙරත් තිබුණි. ඒ අනුව නිසි කල ආ කල මේවා නිමා වනු ඇත. එතැනට වෙනත් පිරිසක් එනු ඇත.

තරුණ වියේදී වේවා, මැදි වියේදී වේවා සිංහලයන් විදිහට අප අපගේ සීමා මායිම් පුළුල් කළ යුතු තැනදී ඒවා පුළුල් කරනවා මිස ඒවා නොතැකිය යුතු නැත.


Sunday, November 10, 2013

සුබ උපන්දිනක් වේවා සොඳුරිය..!

                                
සඳුදා උදයේ සිට
සිකුරාදා වන විට
ඔබ ගෙවනා කටුකදිවිය
නොතේරෙන්නෙ නෑ මට
  
හතරේ කණිසම වදී
ඔබ කුස්සියටමවැදී
උයයි පිහයි එක යුද්දෙට
හය වෙද්දිත් මම නිදී
  
ලෑස්ති වෙන්නට පෙර
තෙල් ගා තැවිලිත්කර
අප්පච්චිට සලකන එක
අගයමි ලෙස පෙම් බර
  
පොඩි උන් වත් ඇහැරවා
ලදහොත් කෑමත් කවා
හනි හනිකට දුව යන්නේ
රැකියාවට දුර ගෙවා
  
නිවසට හැන්දෑවට
එයි මඳහස කැටි කොට
දරුවන්ගේ පාඩම් වැඩ
බලයි තදින් සැරකොට
  
මවු පියො දෙදෙනට මගේ
ඔබෙ අම්මා හට වගේ
සලකන එක හරි සතුටක්
වැඩි වෙයි ඔබෙ ඇති අගේ
  
කරදර බාධක මැද
මා හා දුක් විඳවිඳ
එන භවයෙත් මගෙ ම වෙන්න
ඇයි පැතුවේ රන් කඳ
  
උපන් දිනය සමරන
ඔබ හට පෙම සමඟින
පතමි පැතුම් ඉටුවන්නට
දින දින මතුඑළඹෙන
  

Thursday, November 7, 2013

සුදු වන කරමලය

නිතර දකින කුකුලා ගේ කරමලය සුදුයි කියලා කියනවනේ. ඇත්තටම මම මේ කියන්ට යන්නේ ඒ කතාව නං ඇත්තමයි කියලා.

අපි වැඩියෙන්ම ආදරය කරන දෙන්නා තුන්දෙනා අතරෙ අපි හැසිරෙන විදිහෙන් ම ඒ ටික හිතා ගත්තහැකි නේ. අනික් අය අතින් වෙන සැළකිය යුතු වැරදි ඉවසන්ට පුළුවන් වන අපට මේ ලෙංගතු මිනිස්සුන්ගෙ චූටි වැරැද්දත් ඇති හිත රිදෙන්න.

මගේ අම්මා, අප්පච්චි, බිරිඳ සහ දරු දෙදෙනා තමයි මගේ උදහසට වැඩිපුර ම පාත්‍ර වෙන්නෙ.. උදහසට පාත්‍ර උනා කියලා ආයෙ මං උල තියන්නෙ එහෙම නෑ. ඒත් නිතරම අපි අතර පුංචි පුංචි ගැටුම් ඇති වෙනවා.

ඒත් ඔය තරම් ම ලෙංගතු මගේ අක්කත් එක්ක දැං එහෙමට පැටලිල්ලක් ඇති වෙන්නෙ නෑ.. සමහර විට එයා දැං වෙනම පවුලක නිසා වෙන්ට ඇති.

ඕකෙ තවත් පැත්තක් තියෙනවා.. අපි කොච්චර කිවුවත් වඩාත්ම නිදහස් ව හැසිරෙන්නෙ කිට්ටුම යාළුවත් එක්ක කියලයි මං නම් හිතන්නෙ. යාළුව ව අපි ඉතිං ආමන්ත්‍රණය කරන්නෙ "මචං" කියලා නෙ. ඔය වගේ නිදහසේ ඉන්න වෙලාවක.. අම්මට, පෙම්වතියට පවා මචං කියවෙන්ට ගිය වෙලාවල් තියෙනවා..

චූටි අතීත කතාවකුත් අමුණන්නම්..

ඉස්සර ලස්සන කෙලි පොඩ්ඩක් දැක්කම ළඟ ඉන්න යාළුවට කකුලෙන් ගහලා පෙන්නන එක අපේ පුරුද්දක්. දවසක් පෙම්වතියත් එක්ක ළඟින් ඉඳගෙන කතාබහ කර කර ඉන්නකොට.. ලස්සන කෙල්ලෙක් ගියා.. මටත් නොදැනීම මගේ කකුල වැඩ කළා.. කියපු බොරුව නං මොකද්ද කියලා මතක නෑ.. ඒ හැටි අවුලක් උනේ නැති බව විතරක් මතකයි..

කොහොම උනත් පෙම්වතිය හොඳම යාළුවෙක් තරම් ළඟින් දැනෙනවා කියන්නේ වාසනාවක්. 

Wednesday, November 6, 2013

සොඳුරිය..ට

        
නෙතු අග සුපිපෙන කඳුළැලිමුතුවන්
මුව මත ලෙල දෙන සිනහව අමවන්
සුළඟට නැලැවෙන කෙහෙරැළිතඹවන්
මට නැත අන් කිසිවක් ලොව නුඹ වන්
  
මොනවා නුඹ මට කෙරුවත් තරහින්
පනවා දඬුවම් වැඩි දුර නොගිහින්
එනවා යළි මගෙ අසලට විගහින්
දෙනවා ඉඟි බිඟි ම'වෙතට හොරැහින්
  
රැකගෙන පති දම් සහ මගෙ දරුවන්
පණ මෙන සලකා දෙගුරු ද හොබවන්
බැතියෙන සැරසී කිස තොස නිමවන්
මම දෙන පෙම මදි නම් මට කමවන්
  

Tuesday, November 5, 2013

කැමති/සුදුසු වෘත්තිය තෝරා ගැනීම

මේ ගැන මාධව හබරකඩ සහෝදරයා ලිපි පෙළක් ලියාගෙන යනවා. ඒ අතර තිබුණු මේ ලිපිය කියවන්න ගිහිං තමයි මට මේ ලිපිය ලියන්න හිතුණෙ.

අපි වෘත්තියක් තෝරාගැනීමෙදි තමන්ගෙ කැමැත්ත, හැකියාව, වාසනාව වගේ කරුණු බොහොමයක් ගැන සිත යොදවන්න අවශ්‍යයි. කැමැත්තයි හැකියාවයි තිබුණු පලියට එම වෘත්තියෙහි යෙදෙන්න තරම් කෙනෙකු වාසනාවන්ත වෙන්නෙ නෑ. සමහර විට ඔහුට සුදුසු ම වෘත්තිය වෙනත් එකක් වෙන්න පුළුවන්.
උදාහරණයක් විදිහට මං ඒ කාලෙ (වෘත්තියක් තෝර ගන්න කාලෙ) කැමතිම වෘත්තිය වුණේ රියැදුරු වෘත්තිය. ඒ පිළිබඳ හොඳ හැකියාවකුත් මට තිබුණා. ඒත් ඒක කරන්න අයිතියක් මට තිබුණෙ නෑ. වෙනත් විදිහකින් කියනවා නම් මගේ පවුලේ අය, ඥාති හිත මිත්‍ර සමාජය මං එහෙම වෘත්තියක් කරනවාට කැමති උනේ නෑ. ඒ නිසා මං හෙවුවෙ ඊළඟ විකල්පය.

මං මුලින් ම තාවකාලික ව සමීක්ෂණ නිලධාරියෙකු විදිහට වැඩ කළා. මිනිසුන් අතර ට යන එක සතුට ඇති කරන දෙයක් උනත් ආයතනය ගැන සහ එම ව්‍යාපාරය පැවැත්වෙන අයුරු ගැන ඇති වූ කලකිරීම මත එම රාජකාරිය මං දිගින් දිගට කරන්න හිතුවෙ නෑ.

ඊ ළඟට ගෙවල් වලට ගොහිං ගණිතය විෂය උගන්වන්න හිතුවා. ඒ වැඩෙත් එතරම් සතුටුදායක උනේ නෑ. ළමයින්ට මාව හිතට අල්ලන්නෙ නැතුව ඇති.

ඊ ළඟට පිරිවෙනක රජයේ පත්වීමක් අරගෙන ගණිතය උගන්වන්න ගියා. එතැනදී ආයතනයත්, ඉගෙනගත් ශිෂ්‍යයනුත් සතුටු වුණත් මගේ හිතට සතුටක් දැනුණෙ නෑ.

ඊ ළඟට Software Developer කෙනෙක් විදිහට ගමන ආරම්භ කළා. වෙනත් ප්‍රශ්න නිසා ආයතන කිහිපයකට මාරු උනත්, මෙතැනදී නම් කරන දේ ගැන සතුටක් තිබුණා.  බොහෝ විට ඒ ඇති වූ ප්‍රශ්නත් ආයතන කලමණාකරනය පිළිබඳ ප්‍රශ්න.

බැලුවහම මගේ සිහිනය වෙලා තිබුණේ පාරිභෝගිකයො රවට්ටන්නෙත් නැති, සේවකයො රවට්ටන්නෙත් නැති ආයතනයක්. ඒ සිහිනය මං ම හෙළිකරගත යුතු එකක් කියලා මට තේරුණා. මීට වසර 3 යි මාස 4 කට විතර ඉස්සර.. Perfect Software Solutions(Pvt) Ltd  කියලා පුද්ගලික සමාගමක් ඇරඹෙන්නෙ එහෙමයි. අද වෙනකොට ඒ හීනය සෑහෙන දුරට සාර්ථකව හෙළි වෙලා තියෙනවා. මොන ප්‍රශ්න තිබුණත්.. මං අද වෘත්තීය වශයෙන් තෘප්තිමත්.

ප.ලි.
අද වෙනකොට නං වාහන දක්කනවා කියනකොටත් ඔළුවෙ කැක්කුමයි.. (ඒ කාලෙ කොළඹ වාහන පදවලා තිබුණෙ නැති නිසා වෙන්න ඇති ආසා හිතෙන්න ඇත්තේ..)

Monday, November 4, 2013

හදිසියේ දුටු එ'දිගැසා

       
නුඹට සිංහල බැරි නිසා
දොඩමි මම අණ්ඩර බසා
එපා මා හා උරණ වන්නට
දනිමි දෙනුවන් වල රසා
  
නුඹ ම පෑ ඉඟි බිඟි වසා
යොමා නෙතු වෙනතක්දෙසා
මාත් මිනිසෙකු වගක් නොසිතා
පෙළනු කිම මා මේ ලෙසා
  
නොබිනුවෙමි මම නම්මුසා
නුඹයි මා හද දිනු යසා
එක හිනාවක් ළඳේ ඇති මට
නො එමි පෙම ඇති දැයි අසා
  

Tuesday, October 22, 2013

දොස්තර ගේ සාස්තර

මේ සිද්දිය වෙනකොට මට වයස 10ක් විතර ඇති. මට ඒ කාලෙ සූටියට පපුවෙ මහන්සිය වගේ තිබුණා.. ඒ කිවුවෙ උදේ ඉඳං රෑ වෙනකං දැඟලුවාට පස්සෙ රෑට පපුව ඇතුළෙ රූං රූං ගානවා.. එයිට අමතරව අපේ අම්මට මං හරිම කෙට්ටුයි.. ඇත්තටම පොඩි කාලෙ මං ටිකක් කෙට්ටුයි. ඒත් ඒක අසාමාන්‍ය නෑ. අපේ අම්මට විතරයි අසාමාන්‍ය වුණේ. අපේ අම්මට අනුව මගේ ඇඟත් ටිකක් දුර්වලයි. ඒ නිසාම මාසෙකට දෙකකට සැරයක් විශේෂඥ වෛද්‍යවරයෙක් මුණගැහිලා විටමින් එකක් එහෙම ලියා ගන්නවා..  ඔය වගේ දවසක් ගියා විශේෂඥ දොස්තර මහත්තැන් කෙනෙක් බැහැදකින්න. ඉතිං දොස්තර මහත්තයාට මගේ දුර්වලකම් ගැන පේලියක් දෙකක් කියනකොට ම තේරුණා පස්නේ මොකද්ද කියලා.. මගේ අත අල්ලගත්ත දොස්තර මහත්තයා මෙන්න මෙහෙම කිවුවා..

ඇල්වතුර නාවන්නෙ නෑ නේද? උණුවතුරමනෙ නාවන්නෙ ..
හෙම්බිරිස්සාවක් හැදුණ ගමන් උස්සගෙන යනවා නේද ඉස්පිරිතාලෙ?
තාම කවනවා නේද?
තනියෙම කොහෙවත් යවන්නෙ නෑ නේද?
.................................................
................................................

ඔය ප්‍රශ්න ඔක්කොටම උත්තරේ උනේ ඔවු කියන එක. දොස්තර මහත්තැන් මට කිවුවා මෙහෙම.

පුතා ගෙදර ගිහිං තාත්තට කියන්න.. ඒ දොස්තර මහත්තයා සාස්තර කියන්නත් දන්නවා කියලා..

ඊට පස්සෙ ආයෙත් අම්මා දෙසට හැරුණු දොස්තර මහත්තැන් පුතා විතර ද ඉන්නෙ?  කියලා ඇහුවා.
නෑ දුවෙකුත් ඉන්නවා.. කියලා අම්මා උත්තර දුන්නා..

පුතා පුතෙක් විදිහට හදන්න. දුව දුවෙක් විදිහට හදන්න.
බය නැතුව ඇල්වතුර නාවන්න.. නෑවට පස්සෙ රස්නෙට ප්ලේන්ටියක් දෙන්න.
ඔය විදිහෙ උපදෙස් වට්ටෝරුවක් දොස්තර මහත්තැන්ගෙන් අපේ අම්මට ලැබුණා..

ඇත්තටම ඒ උපදෙස් ටික මට සෑහෙන තරමේ නිදහසක් ලබා දුන් බව මට මතකයි.

අපේ අප්පච්චි මට දුවන්න පනින්න අවසර දෙන්නෙත් හරි අඩුවෙන්.. කොටිංම බයිසිකලයක් ගෙනත් දුන්නත්.. ඒක පදින්න පුරුදු වුණේ හොරෙං.. අප්පච්චි කෙසේ වෙතත් අම්මා එදායින් පස්සෙ මට කොල්ලෙකුට අවශ්‍ය නිදහස දෙන්න නිතරම උනන්දු උනා..

හැබැයි තවමත් අම්මට මං කෙට්ටුයි.. 

Thursday, October 17, 2013

හිමවත කළ හැකිද සොඳුරිය නුඹට සම?

                    
ම ඳ හ ස හිරුගෙ විඳ සුවබරහිමිදිරියේ
සෙ නෙ හ ස පුදමි සඳ නුඹ වෙතසුමිහිරියේ
කි තු ගො ස බිඳුණු පසුව ද නොම අත හැරියේ
නු ඹ මි ස අත්වැලක් නැත මගෙසුවිසැරියේ
  
බැ ඳි මහ පවුරු පිණි බිඳු මෙන්ම යකතර
සැ දි මඟ කවුරු කීවත් නොම විය නතර
ලැ දි බව නො අඩු විය අග හිඟ කම අතර
රැ ඳි නෙතු කඳුළු නොදුටිමි හසකැන් විතර
  
ක ය නුඹෙ විකුණුවත් මට එය නැත කාරී
ලෙ ය මගෙ රකිණු වෙනුවෙනි ලුහු කළෙ සාරී
රැ ය ඉකි බිඳිණු කිම මිත මට ඇත තේරී
සි ය හදවතින් තවමත් නුඹ මගෙ බාරී
  
වෙ හෙ රෙ හි බුදු මැදුරෙ හා මහ බෝ මළුවේ
ද හ රෙ හි උතුම් සදහම් සිසිලස ගැලුවේ
ප හ රෙ හි සැඩ, ඇදෙන්නට මල් නැහැනෙළුවේ
නු දු රෙ හි තිබෙන නිවනකි නිතරම බැලුවේ
  
මි හි ම ත සිටින මනු පල්ලන් අතර යම
සි හි තෙ ත රැකගෙන ම ගිණියම් කරන ළැම
ඇ ඳි ව ත පරයමින් රැකගත් පතිනි කම
හි ම ව ත කළ හැකිද සොඳුරිය නුඹට සම
  

Thursday, October 3, 2013

බැරිදා විග්‍රහය!සිස්සත්තේ අතුරු කතා


පහේ සිස්සත්තෙ පටං ගත්තේ එකදාස් නවසිය අසූ අටේය.. ඊට කලිං තිබුණේ පහේ සිස්සත්තේය.. බැලුවාම අණ්ඩර දෙමළයක් වගේ තිබුණාට මේක ඇත්තය. මං ලිවුවේ පරණ පහේ සිස්සත්තේ ය. ඒ අවුරුද්දේ සිස්සත්ත දෙකක් තිබුණේ ය. ඕවා පරණ කතා ය.

ලෝක ළමා දිනේ යෙදුණ ඔක්තෝබර් පළමුවැනිදා සිස්සත්ත ප්‍රථිඵල එළියට ආවේය.. ආපු ප්‍රථිඵලය හොඳ වුණු ළමෝ.. වාසනාවන්තයෝ ය. නැත්තං එදාට සමරන්ට වෙන්නේ ලෝක ගුටි බැට දිනය වන්නේ ය.

මෙවර සිස්සත්ත විබාගේ කාලෙකට පස්සේ පස්න පත්තරේ වැරැද්දක් නැතිව තිබ්බ විබාගයක් හැටියට ඉතිහාස ගතවෙනවාය. ඒත් ඉතිං අතරමඟ එක එක කොහු තිබ්බ විත්තිය කනිං කොනිං ඇහෙනවාය.

උත්තර පත්තර බලන්ට යන්නේ ඉස්කෝල වල ටීචැර්ලාය. එහෙවු ටීචැර්ලාට තමං ගේ ඉස්කෝලෙ දරුවන්නෙ උත්තර පත්තරේ බලන්ට දෙන්නේ නැතිය. ඒත් සීතාවක රාජධානිය පැත්තේ ටීචැර්ලාට තමන්ගේ ඉස්කෝලෙ දරුවන්නේම උත්තර පත්තර බලන්ට හම්බුවෙලා ය කියලා කතාවක් තියේ ය.

ආරංචියේ හැටියට ඉස්පිල්ලට, පාපිල්ලට, ඇලපිල්ලට, ඇදපිල්ලට පමණක් නොව ඉස්පේස් එකටත් ලකුණු කපනවාය. ඉතිං ඔය අඩු වුණු ඇලපිල්ලක් .. පාපිල්ලක් පත්තරේ බලන ගමං  එක්කහු කොරන්ට මේ ටීචැර් ලා ට බැරි කමක් නෑ ය. හැම ටීචර් ම වංචා කාරයෝ නෙවුණට.. රටේ හැටියට සැලකිය යුතු වංචා කාරයෝ පිරිසක් ටීචැර්ලා අතරත්  ඉන්නවා ය.

කොහොම උනත් පාස් වෙච්චි දරුවෝ මේ දවස් වල වීරයෝ වෙලා ය. එක කෙලි පැංචියක්.. තමන්නේ තෑග්ග ලෙස තාත්තාගේ බීම නතර කොරන්ට කියා ඉල්ලපු ආදුරුසමත් කතාවකුත් අහන්ට ලැබුණේය. මාත් ඔය සිස්සත්තෙන් පාස් වෙච්චි දා අප්පච්චිගෙන් ඉල්ලුවේ සිගරැට්, අරක්කු වර්ජනයක් ය. වාසනාවකට අප්පච්චි ඒ වර්ජනය කළේ තුන් මාසයක් විතර ය. බීම නැවැත්වීම නිසා තාත්තාගේ කොලෙස්ටරෝල් වැඩි වීමේ අවදානමක් තිබෙන බැවු මේ පොඩි එකීට මතක් කොරන්ට ඕනෑ ය. 

තමන්ගෙ දුව, අල්ලපු ගෙදර පුතා, අයියගෙ පුතා, බාප්පගෙ දුව, යාළුවගෙ නංගිගෙ නැන්දගෙ දුව සිස්සත්තෙ පාස් වෙච්ච රිසැල්ට් වලිං ෆේස්බුකිය පිරිලා ය. කෙල්ලො ගෙට උනාම වෙඩිං එකට වඩා ලොකුවට පාටි ගන්න රටේ මේවා මහා ලොකු දේවල් ද නොවේ ය. 

Tuesday, October 1, 2013

මගෙ ආදරේ මේ වෙන්නැතී

නිති මීරි බස් තෙපලන්නැතී
හිස අත ගගා සනසන්නැතී
වෙන කාටවත් මං දෙන්නැතී 
මගෙ ආදරේ මේ වෙන්නැතී

බිඳුණු පෙම් දම් නොසොය' නොබලා
ලැබුණු සුවයක මිහිර විඳලා
යුතු කමුත් අකුරට ම කරලා
නොම යදිමි පෙම නුඹෙන් පෙරලා

හස තොස පවා විමසන්නැතී
රට තොට පුරා සැඟවෙන්නැතී
හොඳ තැනකවත් ගැවසෙන්නැතී
මම මා ගැනත් තව දන්නැතී

Wednesday, September 25, 2013

බැරිදා විග්‍රහය ! රනිල් ගෙදර යයි ......?


රනිල් කිවුවාම ඉතිං රනිල් මල්ලවාරච්චි නොවේය. මේ කියන්නේ රනිල් වික්‍රමසිංහ මාමා ගැනය. රනිල් ට කවුරු මොනවා කිවුවත් මං තාමත් කැමති රනිල් ජනාධිපති වෙනවාට ය.. ඒ දේශපාලනේ ඉන්න එවුං එක්ක බැලුවාම රනිල් ට වඩා හොඳ එකෙක් හොයා ගන්ට අමාරු හින්දාය.

රනිල් කිවුවාම සමහරුන්ට මතක් වෙන්නේ බටලන්ද ය. ඒ කාලේ බටලන්ද වගේ තව ලන්ද වල් ගොඩක් තිබුණේ ය. ඒක කාලයේ වරද මිස රනිල්ගේ වරද ම නොවේය. ඒ වැරැද්ද කළේ ප්‍රේමදාස ඒකාධිපති ආණ්ඩුවේ යටහත් ඇමැත්තෙකු ලෙස ද නැත්නම්.. රනිල් ගේ ඕනෑ කමිං ම ද කියන්ට දන්නේ රනිල් ම ය. ලලිත් ලා ගාමිණී ලා ඒකාධිපති වියරුවට එරෙහිව නැගිටිනවිට.. නැගිට්ටෙ නැති එක නං රනිල් ගේ නොහොඹිනා කපටි කම ය. නැති නං නපුංසක කම ය. කෝක වෙතත් අද ඒකාධිපති වියරුවට එරෙහිව නැගිටින්ට ලලිත් හෝ ගාමිණී කෙනෙක් මෙලොව නැති එකේ අඩුව අපට දැනෙනවාය.

මෙරට මැතිවරණ පවත්වන වේගය බැලුවා ම රනිල් අඩුගානේ මැතිවරණ සෙන්චරියක් ව ත් පරාද වී ඇතැයි මට හිතෙනවාය. පරාජය ජයග්‍රහණයේ ආරම්භය කියා හිතුවාට හැමදාම ආරම්භයේ ඉන්ට බැරිය. අපි විකල්පයක් හොයන්ට ඕනෑය.

මගේ ඇණ ලැයිස්තුවට අනුව මෑත කාලයේ අපට හම්බ උන හොඳම හා උපරිම චෑන්ස් එක 2010 ජනාධිපතිවරණයට සරත් මාමා ඉදිරිපත් වූ අවස්ථාවය.. උන්නැහේ නොම්මර 17 වගේ ජෙන්ටල් මෑන් කෙනෙක් ය. වා නං වා ය. පෝ නං පෝ ය. වා පෝ දෙකක් නැතිය.  උන්නැහේ ආවෙත් තනියම නොවේය.. අලියයි සීනුවයි උන්නැහේට පුල් බකප් එක දුන්නේය. දේශපාලනයෙන් ගත්තත්, බුද්ධිමය පැත්තෙන් ගත්තත්, ආර්ථිකය පැත්තෙන් ගත්තත්.. උන්නැහේට රට කරන්ට ඕනෑ කරන හැම මෙවලමක්ම උන්නැහේ වටේ තිබුණේය. ඒත් උන්නැහේ ගියේ හිරේටය. මගේ හිතට දේශපාලන හේතුවක් මත එතරම් දුකක් දැනුණේ.. ගාමිණී දිසානායක මැරුණු දවසේ ය. අන්තිම බලාපොරොත්තුව අහිමි වීම කොච්චර කිවුවත් දුකක් ය.

දැං ඉතිං සරත් මාමා ට කොරන්ට හැකි යමක් තියේ දැයි විශ්වාස නැතිය. වටේ හිටි පට කොක්කු සේරම ඉගිල ගිය නිසා ය..

දැං ගහලා බලන්ට ඇත්තේ එක තුරුම්පුවය. ඒකත් කපෝතියෙන් බේරෙන්ටය.

රනිල් ගෙදර යා යුතුය..  එය අපට වැදගත් ය. රනිල් ගිහාම එන්නේ කවුද කියන එක ඊට වඩා වැදගත් ය. පේන මානයක හරි ඉන්නේ.. කරූ විතරමය.. කරූ ට ත් දාහතක් අරං ගිහිං තනියෙම ආ එකට  සමහරු අනං මනං කියනවා ය. මොනවා උනත් කරූ කරන්ට ගිය වැඩ වලිං මුලින්ම අනාගත්තේ එතන ය. අනික පක්ෂ නායකත්වයට ඡන්දය ඉල්ලීම ය. කරූ නිහඬ උනත්.. නියම ජෙන්ටල් මෑන්ය. උන්නැහේට ප්‍රේමදාස ප්‍රතිපත්තිවත්,.. ජේ ආර් ප්‍රතිපත්ති වත්, බණ්ඩාරනායක ප්‍රතිපත්ති වත්, රාජපක්ෂ ප්‍රතිපත්ති වත්, වික්‍රමසිංහ ප්‍රතිපත්ති වත් ඉස්සරහට ගෙනියන්ට උවමනාවක් නැත. උන්නැහේ මේ රට තිබූ තැනින් අඟලක් හරි ඉස්සරහට ගේන්ට පුළුවං වගේම ඡන්දේ දිනන්ටත් හොඳ අවස්ථාවක් තියෙන නායකයෙක්ය.

මේ පාර නං රනිල් ගෙදර යයි.. මට හිතෙන්නේ එහෙම ය.

ඒත් යන්නෙ නැත්නං තවත් එක කෙරෙමයක් තිබේ ය. රනිල් දෑත් ශක්තිමත් කරන්ට යෑමයි.. එමඟින් එජාපයේ අර්බුදයට සුළු හෝ සහනයක් හිමිවනවා පමණක් නොව.. රජයට වැඩක් කළ හැකි මිනිසෙකු එකතු වෙනවාය.. රනිල් විපක්ෂ නායකයා විදිහට අසාර්ථක උනාට.. ඇමැති කෙනෙක් විදිහට හා අගමැති විදිහට රට ඉස්සරහට ගෙන ගිය නායකයෙක්ය.. වාචාල වංශ වැනි ප්‍රගතිශීලී නායකයන් සිටින නිසා රාජ්‍ය දේපල (පවුල් වල අයට මිස) විකිණෙන එකක් නැතිය.  ඒ කෙරේමෙනුත් රට ගොඩ යන්න පොඩි චෑන්ස් එකක් තියෙනවාය..


ප. ලි.
මේ ක්‍රමයට ලියන්ට පොඩි ආශාවක් හිතුණ නිසයි මෙහෙම ලිවුවෙ.. දැං මේ රටාවට බොහෝ දෙනෙක් ලියනවානෙ..

එතකල් ඉන්න..

       
තම දරු ගඟට විසිකළ සැහැසිවු දිනිති
තම ඵල බුදින රුක් බඳු පියවරු රකිති
තම නට සොඳුරු දුදනො ද දෙවිවරු කරති
තම අඬහැරය අසරණ දුගියට නගති
  
නියමිත කලක් ඇත මල් විකසිත වෙන්න
මුකුලිත වෙන්න වුව යුතු නිසි කල එන්න
මිනිසුන් හදනු බැහැ පවසා තතු දන්න
කාලය තමයි විසඳුම එතකල් ඉන්න
  

Friday, September 20, 2013

වෙනදා වගෙ නෙවෙයි රා ටික අමුතු ...රසයි

                                        
දවසක් ගියා හැන්දෑවක ගමපැත්තේ
මාටිං නොමැත මුට්ටිය පමණයිඇත්තේ
හනිකට මුවට හලමින් සොට් එක ගත්තේ
හොර කමකට නෙවෙයි පවසමි මමසත්තේ
  
වෙනදා වගෙ නෙවෙයි රා ටික අමුතුරසයි
ටික ටික මගේ ඇඟපත හැම තැනමකසයි
නිදිමත නොවෙයි නැවතුවෙ මා බමනහිසයි
දැහැනක වැටුණු අයුරකි එම සුවයයසයි
  
නැත හිත ඇදෙන්නේ පෙර ලෙස හැමතැනම
විමසිලි නැඟෙයි ඉඳුරක සෙලැවුනතැනම
කය මගෙ තියෙන අතරේ එම සිටිතැනම
මිදෙනට යන හැඩයි යන්නට තැනතැනම
  
යනවිට ගම මැදින් හනිකට අඳුරවකා
මඟ හමු වුණා මහසොන් යැයි කියනයකා
මොනවා වුණත් ඒකා මහ බොළඳඑකා
බැලුවා මා දිහා සිය තොල් යුවළ විකා
  
කුමරුනි කොහිද යන්නේ මේහැන්දෑවේ
අමතක ඇයිද ජයසෙන් මංලංකාවේ
එකවර මටත් අමුතුම බලයක්ආවේ
මොහු සෙබලෙක්ය පෙර කල මගෙහමුදාවේ
  
මොකටද වැඩි කතා චෙරියෝ කියල'මම
ඇවිදන් ගියා අඩිපාරේ තිබුණුඑම
සයිමන් හනික දිව යයි වෙත නිවසතම
කුකුලෙකු අතෙහි ඇත පණ කඳ නොවුනුනිම
  
සයිමා නොදැක්කට මං කවුරුදකියලා
කුකුළා හඬ තලයි එක වර මංදැකලා
අඳුණනවද බැලිමි යළි එබිකම්කරලා
අප හමු වෙලා ඇත කලකට පෙරඉඳලා
  
පෙර භවයකදි කුකුළා මගෙ පියසොයුරූ
සයිමා එකල ඉඳළා අපහටසතුරූ
සොයුරා අවසනදි විය සයිමටනපුරූ
එනිසයි නපුරු කම සයිමා යළිපැතිරූ
  
සයිමෝ අතහරිනු දැන් ඔය දුබලසතා
කීවෙමි හනික උගෙ පණ බේරනටපතා
සයිමට ඇසුණෙ නෑ මා කිවු සමඟිකතා
බැහැ වළකන්ට ඇති කරුමය ගතිමිසිතා
  
හැරුණෙමි යළිත් මගෙ කය වෙත යනලෙසට
තේරුම් ගතිමි කරුමය පළ දෙනබවට
අනුනගෙ පවු එපා ගන්නට තමඇඟට
එළියට යළිත් නොම එනු කීවෙමිසිතට
  

Thursday, September 12, 2013

හිතේ මැවුණ රුව නුඹගෙයි දුටුවෙ පමා වෙලා....

නීල නයන දිගු ඉඳුවර නුඹට උරුම .....වෙච්චී
මාල වළලු අරුමෝසම් තාලෙට හෙල..වෙච්චී
ආල වඩන ඉඳුරන් මගෙ හීනෙට බර ...වෙච්චී
බාල උනත් නුඹ ගැන සිත ආලය ඇති .වෙච්චී

සතේ නැතත් මං ඉන්නම් කියා ආව .......පලා
පතේ බතුත් නැතැයි ඇයත් කියයි කඳුළු ..සලා
ගතේ දිරිය තිබුණට මම හිඳිමි වෙමින් ....මුළා
හිතේ මැවුණ රුව නුඹගෙයි දුටුවෙ පමා වෙලා

සඳේ රුවට කැටයම් කළ මූණ ටිකක් ...හරවා
විදේසයෙන් ගෙනා සුවඳ පුයර හිතේ ...පුරවා
හදේ පතුල පෙනෙන ලෙසට සිනහ වීසි කරවා
ළඳේ වචන දෙකක් කියන් මගේ හීන ..මරවා


Friday, September 6, 2013

දිලෙනු ගගනත සුපිපි සඳ මෙන

සතුටින් ඔද වැඩෙන
සෙනෙහෙන් අපව සනහන
මිතු දම් නිති රකින
නුඹ මගේ දියණියයි සැම දින

දැන් හය වසරකී
පීදෙන නැවුම් මලකී
වූවද ලොකු එකී
තාම නුඹ මට තෙමස් සෙයකී

මනුදම් හැඳිනගෙන
ගුණදම් නිති වඩවගෙන
සිරිදම් සිතට ගෙන
දිලෙනු ගගනත සුපිපි සඳ මෙන

Tuesday, September 3, 2013

අපිත් එක්ක සැට් වෙන්නේ..

ඔෆිස් එන්න උදේම
මා නැඟි බස් රියේම
ගෑණු ළමයි වට කරගෙන
කොල්ලන් හැම වෙලේම

මගේ තරුණ කාලයේ
සෙල්ලං මතකය තියේ
ගෑණු ළමයි මා අසලම
දැවටි දැවටි නොවැ ගියේ

මුංගෙ සද්දෙ හරි වදේ
ඇති වගෙ බරටම තදේ
ඒ කාලේ ලවු කෙරුවේ
ඔහොම නෙවෙයි අපි හොඳේ

ඇවිදින් ආයතනෙ වෙත
දැමුවා එෆ් බි ය ට අත
හරි ලස්සන කෙල්ලො පිරිල'
ඒ වෙතමයි යන්නෙ හිත

කෙල්ලෝ චැට් නොම කරයි
කොල්ලන් වෙතටම දුවයි
අපිත් එක්ක සැට් වෙන්නේ
නාකි හුටප්පර තමයි

Wednesday, August 28, 2013

දැම්මෙමි මමත් එහෙනම් ලස්සෙට ..කොඩිය


දවසක් දෙකක් නොව තෙවසරකට .....වැඩිය
හෙමිහිට නමුදු නැංගෙමි පඩියෙන් .......පඩිය
ලද සහයෝගෙ ඔබ ගෙන් ගෙන දුනි ...එඩිය
දැම්මෙමි මමත් එහෙනම් ලස්සෙට ..කොඩිය

කවියෙන් පටන් ගත්තෙමි යන්තම් ....අමුණා
හරියට කවි හදන්ටත් ඉඩ කඩ ..........ලැබුණා
පැදියට ගැදියටත් සහයෝගය ..........තිබුණා
බැරිදා විග්‍රහය ජීවිතයට .....................එබුණා

පළවෙනි කමෙන්ටුව ගෙන ආ මිතුරු .....දුකා
"මනුසත්" දෙවැනි.. "බිඟුවා" ලෙංගතුම ...එකා
ඔය වගෙ බොහෝ අය සිටියා තනිය ......මකා
හැම ගැන කියනු බැහැ පින් දෙමි කඳුළු ..වකා

මුලදී මටත් දැමුවට එක එක ................කින්ඩී
අමතක කරනු බැහැ අවකාශයෙ ..........සින්ඩී
ගැහුවට පම්පෝරි අද වාගේ ...............චණ්ඩී
සින්ඩිය නොවෙන්නට "හදපතුල"ත් නොන්ඩී

පෙර දින දුන්නු සහයෝගය දෙගුණ ....කර
පිය මැන යන්න ලොව වෙත එය එකළු කර
මට අත දෙන්න ඔබෙ අදහස් අවදි .......කර
සලකමි ඔබට මගෙ කවි හිත පුබුදු .......කර

Tuesday, August 27, 2013

Phobia.. ! භීතිකා

යම් කිසි දෙයකට දක්වන අනියත බිය හෙවත් භීතිකාව ට ඉංගිරිසියෙන් ඔහොම කියනවා.. මනස ගැන ටිකක් හදාරපු කෙනෙක් හරි.. සියල්ල දත් කෙනෙක් හරි හිටියා නං මීට වඩා විස්තරයක් ඒ ගැන කරාවි.. 

මට Phobia කියපු ගමන් මතක් වෙන්නෙ එක්තරා කාලයක බොහොම හිතවත්ව හිටපු නංගි කෙනෙක්ව.. 

මෙන්න මේකයි කතාව.. අපි එක්තරා ප්‍රසිද්ධ උපදේශක මහත්මයෙකුගේ වැඩමුළුවකට සහභාගී වුණා.. මේ නංගිවත් මට මුණගැහුනෙ එහෙදි.. ඉතිං ඔය වැඩමුළුවෙ එක්තරා අවස්ථාවක.. අපි ඔක්කෝවම එක තැනකට ගෙනත් අපේ ගුරුතුමා අපට පුංචි පාඩමක් කියලා දෙනවා.. ඒ Phobia.. ගැන.. 

සර් කියනවා සමහරු කැරපොත්තන්ට බයයිලු, සමහරු මකුළුවන්ට බයයිලු, සමහරු සර්පයින්ට බයයිලු.. යනාදී වශයෙන්.. මේවා ඔක්කොම අපේ හිතේ තියෙන අදහස් නිසා ඇති වෙන බියවල් මිසක ඇත්තටම බය වෙන්ට කරුණු බොහොම අඩුයි... යනාදී වශයෙන්..  මේ කෙටි පැහැදිලි කිරීමෙන් පස්සෙ.. අපේ සර් අහනවා.. දැන් ඔයාලගෙන් කාට හරි Phobia... එහෙම තියෙනවද? කියලා..

අපේ හිතවත් නංගි නැගිටලා.. මෙහෙම කිවුවා.. 

"සර්.. මං මීයන්ට හරී... බයයි.."

සර් ගත් කටටම කිවුවා.. 

"ආ.. ඒක බැන්දම හරියයි.." කියලා..


ප.ලි.
ඔය මීට අවුරුදු 13කට විතර ඉස්සර සිද්ධ වෙච්ච කාරණයක්..

කෙල්ල (ඒ කාලෙ) බැඳලා නං දැං ටික කලක්.. ඒත් අහන්න මොකද්ද වගේ තාම මීයන්ට බයද කියලා..

සහන් එළි සෙවිමි ඇගෙ නෙතු උයන් මැද..



ඔබ දිය බිඳයි හමු වුණ නිරුදක .........කතර

ඇය මහ සයුර හදවත මගෙ කළ .......නතර
නොසොයමි පැණි බිඳක් නිල මැස්සන් අතර
පෙම මගෙ තරු බඳුය දිලි අතරින්....... පතර

හිරු නැඟ සැඟව ඇත තුළ රුදු අඳුරු ....වළා
එළියද විටෙක දෙයි සිටි මුත් නිසල ...වෙලා
ඔබ ගැන මතක මගෙ හද කම්පනය ....කළා
ඇය නිවැරදියි ගිය එක නිසි සෙවණ ....බලා


වහන් කරන් නුඹ මට දුන් සෙනෙහෙ ...කඳ
සහන් එළි සෙවිමි ඇගෙ නෙතු උයන් ..මැද
යහන් මත වැටුණි කඳුළැලි බිඳෙන් ......බිඳ
පහන් ටැඹත් මට කළුවර ගෙනෙයි .......අද

Wednesday, August 21, 2013

කෘතවේදී මිනිස්සු.. 1! සිමෙන්ති මිටිය.


මහත්තයා පුළුවන්නං තව සිමෙන්ති කොට්ට දෙකක් වත් ගෙනත් දාලා යන්න.. බාසුන්නැහේ අප්පච්චිට කිවුවෙ.. හෙට අප්පච්චි වැඩට ගිහාම ආයෙ එන්නෙ දවස් දෙක තුනකින් බව දන්න හින්දා..  ඉතිං අප්පච්චිත් අප්පච්චිගෙ දඬුමොනරෙ නැඟලා ටවුන් එකට ගිහිං සිමෙන්ති කොට්ට දෙකක් අරං ආවා.. ඒත් ගෙදට්ට ඔන්න මෙන්න කියලා තියෙන හංදියෙදි එක කොට්ටයක් බිමට වැටුණා.. මෝටර් සයිකලේ පාර මැද්දෙ නවත්තලා ඕක පටවගන්න දුක් විඳින්නෙ මොකටද කියලා හිතපු අප්පච්චි.. ගෙදරට ඇවිත් අනෙක් සිමෙන්ති කොට්ටෙ බාලා ආපහු ගියෙ වැටුණු සිමෙන්ති කොට්ටෙ පටවගෙන එන්න හිතාන..  ඒත් එතනට යනකොට සිමෙන්ති කොට්ටෙ තිබුණෙ නෑ..

එතනට ආපු කළු අයියා.. වෑන් එකකින් ඇවිත් සිමෙන්ති කොට්ටෙ දාගෙන ගියානෙ.. මං කෑගැහුවා.. මිනිහා ගනං ගන්නෙ නැතුව ගියා.. හැබැයි මං නොම්මරේ ලියාගත්තා.. මහත්තයා ගිහිං පොලීසියෙ ඇන්ට්‍රියක් දාන්න.. කියලා කිවුවා..

අප්පච්චිත් ඒ පිම්මටම ගිහිං පොලීසියෙ ඇන්ට්‍රියක් දැම්මෙ.. ආයෙ සිමෙන්ති මිටිය හම්බවෙයි කියලා ලොකු විශ්වාසයක් ඇතුව නම් නෙවෙයි.. හොරුන්ට දඬුවමක් දෙන්න ඕන නිසා.. පහුවදා උදේම අප්පච්චි වැඩට ගියා..

පහුවදා හවස් වෙද්දි.. අපේ ගෙදරට වෑන් එකකින් කට්ටියක් ආවා.. මං හිතන්නෙ දහ දොලොස් දෙන්නෙක් හිටියා..
ඔයාලගෙද සිමෙන්ති මිටියක් නැති උනේ..?  එක්කෙනෙක් ඇහුවා..
ඔවු.. ඔයාලා කවුද? එහෙම ඇහුවේ අපේ අම්මා..
අනේ අපේ පුතා තමයි සිමෙන්ති මිටිය දාගෙන ගිහිං තියෙන්නෙ.. මෙතන කඩේ හිටිය කෙනෙක් තමයි කියලා තියෙන්නෙ දාගෙන යන්න කියලා.. පුතා හිතලා තියෙන්නෙ දුර ගිය වාහනේකින් වැටුණ එකක් වෙන්න ඇති කියලා.. අනේ අපේ පුතාව බේරලා දෙන්න..  මේ මිනිස්සු පිංසෙණ්ඩු වෙනවා..
මහත්තයා නම් ගෙදර නෑ.. වැඩට ගිහිං.. හෙට හවසට තමයි එන්නෙ.. මහත්තයා තමයි ඇන්ට්‍රිය දැම්මෙ..
අපේ අම්මටත් දුක හිතිලා වගෙයි.. මටත් ඉතිං වැඩේට දුකයි..

අපි දැං ගිහිං මහත්තයාව එක්කගෙන එමු.. පුතාට පුළුවන්නෙ අපිත් එක්ක එන්න..
මෙයාට විභාගෙට පාඩං කරන්නත් තියෙනවා.. අපි මහත්තයව හම්බවෙන විදිහ කියන්නම්.. අම්මා කිවුවෙ.. මට මඟදී කරදරයක් කරයි කියලා බව මට තේරුණා..

අනේ පුතේ යං.. ඒ අම්මා මට පිංසෙණ්ඩු වෙනවා.. කොහොම බෑ කියන්නද..? මං අපේ අම්මගෙන් අවසර අරං යන්න පිටත් උනා.. කොයි එකටත් සාක්කුවෙ පොඩි කතුරක් දාගත්තා.. මගදි තත්වෙ වෙනස් උනොත් කියලා.. ඒත් ඒ මිනිස්සු අහිංසකයි.. අප්පච්චිත් එක්කරගෙන ආවා.. ඇවිත් පොලීසියට කියලා බැලුවත්.. හරි ගියේ නෑ.. හඳුනාගැනීමේ පෙරෙට්ටුවකට තියලා තමයි ගන්ට වෙන්නේ කිවුවා.. මේ මිනිස්සුන්ට කන්න බොන්න එහෙමත් දීලා එදා පිටත් කොළා.. ඔන්න පහුවදාත් කට්ටිය ඇවිත්.. හඳුනාගැනීමේ පෙරෙට්ටුවට යන්න වෙන්නෙ.. කළු අයියටයි, බාසුන්නැහේටයි..  ඒ දෙන්නගෙ දවසෙ මහන්සිය නම් ගෙවන්න වෙයි කියලා අප්පච්චි එයාලට කිවුවා.. ඒ දෙන්නට තිබුණේ.. හඳුනාගැනීමේ පෙරෙට්ටුවෙදි හඳුනානොගෙන ඉන්න.. ඒකට එයාලට පොඩි සම්තිං එකක් හම්බ උනා.. හවස යන ගමං කට්ටිය අපේ ගෙදර ඇවිත් තේත් බීලයි ගියෙ..

සිමෙන්ති මිටිය කෝ.. මං අප්පච්චිගෙන් ඇහුවා..

ඒක නඩු භාණ්ඩයක් විදිහට පොලීසියෙ තියාගත්තා..

ඒ නඩුව නං අපූරුවට විසඳුනා.. මං තනියෙම කල්පනා කළා..

අපරාදෙ කියන්න බෑ.. ඒ මිනිස්සු අපේ ගේ ඉස්සරහින් යන හැම වතාවෙම...
තියා එක වතාවක්වත්..  ආයෙ අපේ ගෙදර ආවෙ නෑ...





Tuesday, August 6, 2013

හී ගඩු පිපුණා..

එක දොහකට 
දහ දොලොස් වතාවක්
හී ගඩු පිපුණා..
හීතල දැනුණා..

අප වෙනුවෙන් 
කෑ ගසන සියොතුනේ
නුඹ වෙත පෑ හී .. 
සැරටම වැදුණා..
අපටත් රිදුණා..

බයක් නිසා නොව
නිහඬව ඉන්නේ
ඵල නැති හින්දා..
අසරණ වූ දා..
කරනු කුමංදා..

Wednesday, July 31, 2013

ඒ ඇගෙ පෙමයි

කිත් පැසසුම් වලට වැඩියෙන් නව ....නින්දා
මේ පෙම නිසා අප තනි තනියෙන් .....වින්දා
එක් වී පෙම් කරන්නට නුඹ නැති ......හින්දා
තෙත් බව සිඳෙන තුරු නෙත කවි පද බැන්දා

ගේ දොර ඉඩ කඩම් සහ හරකා ..........බාන
වාහන මිළ මුදල් වෙත නතු වූ ..............හීන
නෑ හිත මිතුන් වටවූවත් .................පුරවාන
නෑ මට වගෙම නුඹටත් දැල්වුවෙ .......පාන

පෙවු කිරි වලට සදහට ණයගැති .......වන්නා
කැවු රස බොජුන් මට අමතක නොම වන්නා
නැවු නැඟ යන්ට සිතුවිළි හද ..නොනඟින්නා
මවු මගෙ පණ සමයි මා පමණක් .......දන්නා

නෑ හිත තරහ' මා අමතක ..............කෙරුවාට
වාවනු හැකිය නුඹ මගෙ ළඟ .........නැතුවාට
මෑණිය මගේ විත් හරහට ................හිටියාට
ඒ ඇගෙ පෙමයි නොව වෛරයෙ ....රතුපාට

Monday, July 29, 2013

රසමදිරා..


අතීතය නම් මිරිඟුවට වද දී
එකතු කළ ජීවිතයෙ රස සොයමී
හිස් ම හිස් වේ බඳුන ඒ පුදුමා
කවුරු සොරකම් කළෙද රසමදිරා..

හකුරු හංගපු වක්කඩේ
කිමද මට සරදම් කළේ
දැනුණ දා ගලනා දියෙහි අරුමා
මුහුද මා වෙත රැගෙන එනු මැනවී..

තුටින නැඟි මහ ගිරි දඹේ
කෙළවරක් නොම හමු වුණේ
දෙපස ඇත්තේ මහරු කඳු පමණා
මගේ සිහි මා මුලා කළ මැනවී..

Wednesday, July 24, 2013

වාසනාව අහිමි තරු..

අපේ අසිරිමත් ලංකාවෙ විතරක් නෙවෙයි ලෝකෙ හුඟාක් තැන් වල විවිධ ක්ෂේත්‍ර වල හුඟාක් අය තමන්ට නිසි ගෞරවය ලබන්ට තරම් වාසනාවක් ලබන්නෙ නෑ.. ක්‍රිකට් ක්‍රීඩකයො මේ අතින් සුවිශේෂයි.. මං අද පෙන්වන ක්‍රීඩකයො කීප දෙනාත්.. සෑහීමකට පත්වෙන තරම් දස්කම් තමන් ලද අවස්ථාවලදී පෙන්නුවත් පොරෝජනයක් වෙලා නැති උදවිය..

1.  Lalithamana Fernando මෙයා 1989 අවුරුද්දෙ කැන්ගරු කණ්ඩායමට විරුද්ධව එක්දින තරඟයකට සහභාගී වෙන්ට අවස්ථාව ලබපු දකුණත් මඳවේග පන්දු යවන්නෙක් සහ දකුණත් පිතිකරුවෙක්.. පළමු තරඟයේ  ඔහුට පන්දු හයක දී ලකුණු අටක් තමයි ලබාගන්න පුළුවන් වෙලා තියෙන්නෙ. ඒත් ඉතිං  අලුත් පිතිකරුවෙක් පරදින්න යන තරඟයක අංක අට පිතිකරුවා විදිහට ඇවිත් අර්ධ ශතකයක් ගහයි කියලා බලාපොරොත්තු වෙන්න බෑ නෙ. පන්දු යැවීමෙදි ඔහු ඕවර 3 ක දී.. ලකුණු 16කට එක කඩුල්ලක් ලබාගෙන තියෙනවා.. විශේෂත්වය නම්.. මෙයා දවාගෙන තියෙන්නෙ සුපිරි ඕස්ට්‍රේලියානු පිතිකරුවෙකු වූ ඩේවිඩ් බූන් ව. තරඟ විස්තරේ බලන්නකො.. කොහොම උනත් මෙයාට මේ තරඟයට පස්සෙ කිසිම තරඟයකට නම් සහභාගී වෙන්ට ලැබිලා නෑ.. 


2. Dinusha Fernando දිනූෂ නම් සමහර විට තවමත් ක්‍රීඩා කරනවා ඇති.. මොකද තවම මෙයාට වයස අවුරුදු 33යි.. මෙයත් දකුණත් මඳවේග පන්දු යවන්නෙක්.. මෙයාටත් එකම එක එක්දින තරඟයකට විතරයි සහභාගී වෙන්ට ලැබිලා තියෙන්නෙ.. හැබැයි ඊට පස්සෙ ටෙස්ට් තරඟ දෙකකටත් අරගෙන තියෙනවා.. කොහොම උනත්.. මෙයාගෙ එක්දින තරඟෙදි ප්‍රතිවාදි රට උනේ එංගලන්තෙ.. දඹුල්ලෙදි එංගලන්තෙට දුවන්ට ගහපු දවසක දිනූෂ එක් අන්තයකින් පන්දු යැවීමත් පටං ගත්ත කෙනෙක්..චමින්ද වාස් එක්ක හරි හරියට පන්දු යවපු දිනූෂ.. පන්දු ඕවර 7ක් තුළ ලකුණු 13කට දවා ගත්තු කඩුළු දෙකත් එසේ මෙසේ දෙන්නෙක්ගෙ නෙවෙයි.. එක්කෙනෙක් ඇන්ඩෲ ස්ට්‍රෞස්.. අනෙකා මයිකල් වෝගන්.. තරඟ විස්තරේ මෙතන තියෙනවා.. මෙච්චර හරියක් කරපු මේ කොල්ලව අවුරුදු දහයක් යනකල් පැත්ත පළාතෙ නොගෙනෙන්ට අපේ තේරීම් කමිටුව හරි වෙන කවුරු හරි වග බලාගෙන තියෙනවා...


3. Michael Vandort මයිකල් වැන්ඩෝට් කියන නම නම් ටිකක් මතකයි.. මොකද මෙයා ටෙස්ට් තරඟ 20 කට සෙල්ලම් කළානෙ.. තරමක් උස වමත් පිතිකරුවෙක් වන වැන්ඩෝර්ට් තමන්ගෙ එකම එක්දින තරඟයට මුහුණදුන්නෙත් කැන්ගරුවො එක්කම තමා. අංක තුන පිතිකරුවා විදිහට පිටියට එන වැන්ඩෝට් ට එදා උනේ ප්‍රබල ඕස්ට්‍රේලියානු පන්දු යවන්නන් ඉදිරියෙ තමන්ගෙ කණ්ඩායමේ ඉදිරිපෙළ ක්‍රීඩකයින් එකා පිට එකා දැවෙද්දි.. පුළුවං හැටියට පැත්තක් අල්ලගෙන ඉන්න එක. ඒත් ඉතිං වැන්ඩෝට් එදා පන්දු 117 කින් ලකුණු 48ක් රැස් කළේ ලකුණු 319ක් හඹා යන වෙලාවක කියන එකත් අමතක කරන්ට බෑ. කොහොම හරි එදායින් පස්සෙ වැන්ඩෝර්ට් ටත් ආයෙ එක්දින තරඟ වලට කැඳවීමක් නම් ලැබිලා නෑ.. මේ තියෙන්නෙ තරඟෙ විස්තර


මං මේ කිවුවෙ.. සිද්ධි කීපයක් විතරයි.. තව සිද්ධි එමට.. මට නිකං හිතුණා.. මෙයාලව පොඩ්ඩක් මතක් කරන්න..

Tuesday, July 16, 2013

හිඟා කෑම

අනේ මහත්තයා.. මගේ උකුල් ඇටේ කැඩිලා දැන් අවුරුද්දක් වෙනවා.. සිංහල බෙහෙත් තමයි කරන්නෙ.. තාම දවල්ට කෑවෙත් නෑ මහත්තයා..

තොර තෝංචියක් නැතුව කියෝගෙන යන ඔහුගේ ලා දුඹුරු පැහැ ගත් අපිළිවෙලට පිහිටි දත් ටික මා හා සිනාසෙයි..

කැහැටු වූ ඔහුගේ සිරුර දෙස ත්.. කිසියම් දෙයක් තබා බැඳ ඇති සෙයක් පෙනෙන උදර ප්‍රදේශය දෙසත් බැලූ මා..

දැන් මගෙන් මොනවද ඕන..? කියා ඇසුවේ.. ඔහුට අවශ්ය මුදල් බව නොදැන නොවේ..

සල්ලි කීයක් හරි තමා..

දුම්රිය පිටත් වීමට සූදානම්ව හූ කියයි.. රුපියල් විස්සේ කොළයක් පසුම්බියෙන් ගෙන ඔහු අත තබා කෝච්චියේ එල්ලුනෙමි..
================================================
මෙය කාර්යාල වෙලාව නිසා ඒ හැටි සෙනඟක් නැත.. එහෙත් අසුන් ගනණට වාගේ සෙනඟ ඇත.. ඉඩ කඩක් සොයා ඉඳ ගත්තෙමි.. සුපුරුදු ලෙසම ඉඳගන්නා අතර අසල අසුනේ සිටි මහත්මයා සමඟ සිනාසුනෙමි..  පෙරළා සිනාසෙන්නට තරම් මනුස්සකමක් ඇති මහත්මයෙක් වූ හෙතෙම.. මා හා කතාවට වැටෙන්නට ද සූදානම් බවක් පෙනුණි..

මහත්තයා ස්ටේශන් එකේ හිටපු වයසක මනුස්සයාට සල්ලි දුන්නා නේද?  ඔහු මගෙන් විමසන්නේ කුමක්දැයි මම දැන ගත්තෙමි..

ඔවු.. මහත්තයා කියන්න යන්නේ.. මිනිහගෙ උකුල් ඇටේ අමාරුවක් නෑ කියලා නේද?
ඇයි මේ මිනිස්සු මේ තරම් අහිංසකයින් එක්ක තරහා ඇත්තට.. මිනිහට ලෙඩක් දුකක් නැති වුණත්.. හිඟාකන්න තරම් ජීවිතේ පරාජිත බවක් දැනෙණ කෙනෙක් වෙන්න ඇතිනේ.. තමන් දෙන්නෙ නැත්නම්.. කට පියාගෙන ඉන්න එපාය.. මට ඇති වුණේ කලකිරීමකි..

මගේ පැනයෙන් ඔහු වික්ෂිප්ත වූ බවක් නොපෙනිණ..

හෙක්.. හෙක්.. එහෙනම් මහත්තයා මිනිහා ගැන දන්නවා..? ඔහු දැන් හදන්නේ මේ මනුස්සයාගේ පට්ටන්දරය දිග හරින්නට විය යුතුය.. වාසනාවකටදෝ.. ඊළඟ ස්ටේෂන් එකෙන් ගැබිණි මාතාවක් ගොඩ වූයෙන්.. මගේ අසුන ඇයට දී.. මා සිටගත්තේ ගැබිණි මවට තිබූ ආදරයට වඩා.. නිවී හැනහිල්ලේ ඉන්න තිබූ ආසාවටය.. ඉන් පසු මම වෙනත් තැනකින් ගොස් හිඳ ගතිමි..

========================================
තරමක් සෙනඟ පිරුණු දුම්රියේ .. අර මහත්මයා සෙමින් සෙමින් මා අසලට එයි.. මහත්තයා කරපු දේ හරි අගෙයි.. ඒ මනුස්සයා නොකිවුවට.. උකුල් ඇටේ බිඳිලා තියෙන්නෙ එයාගෙ නෙවෙයි.. එයාගෙ දුවගෙ.. හැබැයි අනිත් ඔක්කොම ඇත්ත..
මං ඊළඟ ස්ටේෂන් එකෙන් බහිනවා.. ආයෙත් හම්බවෙමු.. කියමින් ඔහු සමු ගත්තේ.. මගේ හිතේ බොහෝ ප්‍රශ්න ඉතිරි කරමිනි..

=========================================
තමන් වෙනුවෙන් මිනිසුන් රවටන බොහෝ දෙනා අතර.. අනුන් වෙනුවෙන් තම ආත්ම ගරුත්වය පවා අහිමි කරගත් මේ මිනිසා ගැනත්.. ඒ ගැන මට කියන්නට තරම් කාරුණික වූ මහත්මයා ගැනත්.. සතුටෙන්ම මෙනෙහි කළෙමි..

Tuesday, July 9, 2013

ගෑණු නම් එපා..!


මා වැනි දිළින්දා
කෙල්ලෙකුට පෙම් බැන්දා
ඈත් හොඳ හින්දා
මා ගියා ඇගෙ ගෙදර කැන්දා

කාරය කෝ ඇසේ
තට්ටු කීයද නිවසේ
බැංකුව මොන දෙසේ
නෑ කිසිත් මට හිඳිමි සුවසේ

මෙය මෙයාකාරය
බඳින්නට කරකාරය
තිබිය යුතු බාරය
එසේ නැත්නම් මහා පාරය

නැන්දම්මා කිපී
පොළොවේ හැපී නොහැපී
පරළව යළි පිපී
කීය යනලෙස නොඉඳ සැතපී

හිත වාවනු කෙසේ
ඇගෙ මූණ වත් නොදිසේ
පිටවී යන ලෙසේ
නැගිට යන'තර බැලිමි ඇ'දෙසේ

කිසි වෙනසක් නැතේ
සිනාසී ඈ සිටිතේ
බලා මම දසතේ
කළෙමි ගෑණුන් එපා සපතේ..!

Friday, July 5, 2013

සිංහලය, ඉංගිරිසිය හා සිංගිරිසිය..

ඔයාලා දන්නවනෙ.. මං ඉතිං සිංහලයට ආදරේ කරන ජාති ද්‍රෝහියෙක්, දේශ ද්‍රෝහියෙක් හා ප්‍රතිගාමියෙක් කියලා.. මං ඉතිං මගේ බස නසනවට පොඩ්ඩක්වත් කැමති නෑ.. අපි සිංහල භාෂාව ඒකෙ තියෙන රීති ටික රැකගෙන පාවිච්චි කරන්ට ඕන කියලයි මං කියන්නෙ.. ඒකෙ මොනවා හරි වරදක් කාරිය තියෙනවා නං.. ලොකු ලොකු ඇදුරුතුමාල ඔක්කොම එකතු වෙලා.. සාකඡ්ඡාවක් තියලා ... තීරණේකට ආවට වරදක් නෑ.. ඒත් එක එක්කෙනාගෙ ඕන එපාකං වලට මගේ භාෂාව රැප්/රේප් කරන්ට එපා කියන එකයි මං කියන්නේ..

ඒත්.. අපි.. ඉන්දියාව පැත්තෙ ඉඳලා ආව වචන අපේ කරගත්තා වගේ.. බටහිර පැත්තෙ ඉඳං එන ඒවත් අපේම බවට පත් කරගත්තට වරදක් නෑ.. ඒක සොබාවිකව වෙන දෙයක් මිසක්කා බලෙන් රිංගවන දෙයක් නොවෙන්ට ඕන.. දැං අහලා බලන්ට එපාය.. ඇෆ්. ඇම්. චැනල් ටික.. අමු අමුවෙ සිංහලය මර මර.. සිංගිරිසි වමාරනවා.. ඉතිං අපි වගේ එවුන්ට කාලා ඉන්ට බෑ ඕවා ඇහෙනකොට..

ඒ වගේම තමයි.. ගොඩාක් දේවල්... විශේෂයෙන්ම පරිගණක ආශ්‍රිත දේවල් (බටහිර පැත්තෙන් ආපුවනෙ..) සිංහලට පරිවර්ථනය කොරන්ට ගිහිං අනාගන්න එකත් සුදුසු නෑ.. මං නං කියන්නෙ ඒ වගේ දේවල් ඉංගිරිසි වචන ආධාරයෙන්ම උගන්නන එකයි හොඳම වැඩේ..

මට මතකයි අපි එක්තරා කාලෙක Principles of Electricity කියලා විසයක් ඉගෙන ගත්තා.. අපි ඒක හැදෑරුවෙ ඉංගිරිසි මාධ්‍යයෙන්.. ඉතිං අපට තිබුණෙ ඉංගිරිසි පොත් පත්.. අපට ඉතිං ඔය පොතේ කියලා තියෙන දේ හරියටම වටහා ගන්ට අමාරු වුණ වෙලාවක.. ඔය විසය සිංහලෙන් කරන කෙනෙක්ගෙ පොතක් බලලා තේරුම් ගන්ට උත්සාහ කොළා.. කෙළියා තමයි.. ඒකෙ තියෙන වචන දැක්කම මඤ්ඤං වගේ..

එයිට හපං පරිගණක විද්‍යාවේ තියෙන පරිවර්ථන ටික... ඕක ඔළුවට ගත්තු සමහරෙක් හැම වචනයක්ම සිංහලයට පරිවර්ථනය කරලා කියන්ට හදනවා.. ඔය වගේ කෙනෙක් හා අපේ මිතුරෙක් සංවාදයක යෙදුණු හැටියි මේ..

1. Internet  වලට කියන්නේ මොකක්ද?
2: අතුරු දැල ... නැත්නම්.. අන්තර් ජාලය..
1. එහෙනම්.. Interview එකට.. අතුරු දැක්ම නැත්නම්.. අන්තර් දර්ශනය කියලා කියන්ට බැරිද?
1: Network Engineer ට කියන්නේ..  දැල්වැඩ ඉංජිනේරු කියලද?
2: නෑ.. පරිගණක ජාල ඉංජිනේරු කියලා.. මං හිතන්නෙ..

ඉතිං ඔය වගේ ඉංගිරිසියෙන් ආපු වචන බර ගානක් තියෙනවා නෙ නොගැලපෙනවයි කියලා හිතෙන..

Air Conditioner - වායු සමීකරණය
Download - බාගත කිරීම

ඔය වගේ වචන සෑහෙන්න තියෙනවා.. මතක් වෙන්නෙ නෑ.. මං  අහන්නෙ.. නරකද ඔය ඉංගිරිසියෙන් ආ වචනය.. ඒ විදිහටම පාවිච්චි කළොත්.. ?