ඒ නමින් අපි දිවුරමු..

සුවහසක් පැතුමන් දරා
මා සමඟ පියවර තැබූ
එදින සිට අද තුරා සිටියේ
රැල්ල හා වෙරළත ලෙසයි..
සොඳුර එය මහමෙර සමයි..

ටිකක් පැතුමන් ඉටු වුණා
හුඟක් සුසුමින් වැළලුණා
අලුත් සුළගින් පන්නරය ගෙන
අපිත් තව මුවහත් වුණා
දිනත්, වයසත් ගතවුණා..

උපන් දිනයෙහි සැමරුම
යෙදෙන පින්බර අද දින
සතුට හෝ දුක නොවේ ඇත්තේ
කල්පනාවයි හෙට ගැන
ඒ අපේ දරුවන් ගැන..

දුරු ව ලෙඩ දුක් දොස් හැම
පැතිර තුට සහ සැනසුම
දිනේවා මතු සදා සුරැකී
ඔබේ ඔය මිනිසත් කම
එයයි ඔබ සතු සම්පත..

මතුත් සසරෙහි හමු වෙමු
හැකි වුණොත් අපි එක් වෙමු
එදාටත් අද වගේ සොඳූරිය
හැබෑටම මිනිසුන් වෙමු
ඒ නමින් අපි දිවුරමු..