Thursday, July 9, 2020

IT දන්න අයට මොනවද කරන්න පුළුවන්!


IT හෙවත් තොරතුරු තාක්ෂණය කියන විෂයය  කියන්නෙ ඉතා පුළුල් ක්ෂේත්‍රයක් ආවරණය කරන  විෂයයක්. ඉතින් කෙනෙක්  IT  එහෙමත් නැත්නම්  Computer දන්නවාය කියලා කීවාම ඒක ඒ තරම් සාධාරණ ප්‍රකාශයක් වෙන්නෙ නෑ.. අපට බැලු බැල්මටම පේන්න තියෙන IT ක්ෂේත්‍ර කිහිපයක් මං සඳහන් කරන්නම්..
1. Networking
2. Computer Assembling & Repairing
3. Software Developing
4. Web Designing
5. Graphic Designing
ඉතිං ඔය කියන ක්ෂේත්‍ර වලින් එකක හෝ කිහිපයක දැනුමක් තියෙනවා නම්..
1. අදාළ විෂයයන් උගන්වන්න
2. අදාළ විෂයය දැනුම භාවිතයෙන් රැකියාවක් කරන්න
3. අදාළ විෂයය දැනුම භාවිතයෙන් ව්‍යාපාරයක් කරන්න
ඔබට අවස්ථාව තියෙනවා.
ඉගැන්වීම
උගන්නනවා කියන්නෙ අද කාලෙ හොඳ ව්‍යාපාරයක්. සේවයක් කරන අතරෙම හොඳ මුදලකුත් හොයන්න පුළුවන්. මේ ඉගැන්වීම තනි පුද්ගලයෙකු වශයෙන්, ආයතනයක් තමන් ම අරඹලා .. එහෙමත් නැත්නම් තිබෙන ආයතනයකට සම්බන්ධ වෙලා කරන්න පුළුවන් තමන්ගෙ කැමැත්ත අනුව.
ඒ ඇරුණම කරන්න පුළුවන් හොඳ වැඩක් තමයි තමන්ගෙ දැනුම පොතක් ලෙස එළිදක්වන එක. මුද්‍රිත පොතක් නැත්නම්  e-book එකක් ලෙසත් ජනතාව අතරට තම දැනුම ගෙනියන්න පුළුවන්. මේක තමන්ගෙ ලිවීමේ හැකියාව වර්ධනය කරගන්න, තමන්ගෙ දැනුම වැඩි දෙනෙක් අතරෙ බෙදා දෙන්න වගේ ම වැඩි කාලයක් පුරාවට ටිකෙන් ටික ලොකු වෙන ආදායමක් උපයා ගන්නටත් ප්‍රයෝජනවත් වෙන වැඩක්. IT සංකල්ප දිනෙන් දින දියුණු වීම නිසා.. ලියූ දේ ඉක්මණින් කල් ඉකුත් වීම කියන කාරණා අනෙක් කාරණයක් සම්බන්ධව පොත් ලියනවා ට සාපේක්ෂව ටිකක් පාඩුදායක වැඩක්.
ඔබ ගේ හැකියාව Software Developing, Web Designing, Graphic Designing වගේ අංශයකින් තියෙනවා නම් Free Lancer කෙනෙක් විදිහටත් ඔබට ඔබ ගෙ හැකියාවෙන් ප්‍රයෝජනයක් ගන්න පුළුවන්. අන්තර්ජාලයේ ඒ සඳහා හොඳ ඉල්ලුමක් තියෙනවා.
Software Developing කියන විෂයය ගත්තත් එය Standalone Applications Developing, Web Applications Developing සහ Android Applications Developing කියලා ප්‍රධාන ධාරාවෙන් වෙන්කරගන්න පුළුවන්.  මේවැයිත් අනුකොටස් මහ ගොඩක් තියෙනවා.
Web Designing කියන්නෙ අද කාලෙ බොහෝ දෙනාට අවශ්‍ය වෙන සේවාවක්. ඒ වුණත්.. ලංකාවෙ ඒ සම්බන්ධ Market එක නම් හොඳටම සවුත්තු වෙලයි තියෙන්නෙ. ඒ වුණත් ඒ සම්බන්ධ කටයුතු සාර්ථකව කරගෙන යන අය නැතුවාමත් නොවෙයි.
Graphic Designing කියන්නෙ විවිධ ක්ෂේත්‍ර ගණනාවකට ප්‍රයෝජනවත් වෙන තාක්ෂණයක්. මුද්‍රිත හා විද්‍යුත් මාධ්‍ය සඳහා මෙන්ම වෙළඳ ප්‍රචාරණ ආයතන  වලින් මේ සම්බන්ධ දැනුම හා හැකියාව ඇති අයගේ සේවය ලබා ගන්නවා.

MS Office පැකේජයේ තිබෙන MS Word සහ MS Excel කියන  Application දෙකෙන් එකක් දැනගත්තත් ලංකාවෙ රස්සාවක් හොයාගන්න හොඳ අවස්ථාවක් තියෙනවා. Computer Type Setting, Computer Operator කියන්නෙ එහෙම රැකියා දෙකක්. රස්සාවකට කෙසේ වෙතත් ඔය  Office පැකේජ ගැන ටිකක් හදාරලා ඉන්න එක මොන දේ කරන්න ගියත් සෑහෙන්න ප්‍රයෝජනවත්. මොකද මේ Applications වලින් අපේ එදිනෙදා පරිගණක අවශ්‍යතා බොහොමයක් කරගන්න පුළුවන් වෙනවා.

Computer Assembling & Repairing කියන්නෙ නම් අද කාලෙ පොඩි එකෙකුටත් පුළුවන් දේවල්. ඒත් ඉතිං.. එච්චර කට්ටියකට පුළුවන් වුණත්.. මේ වැඩේට තියෙන ඉල්ලුම ඊට වඩා ඉහළයි. ඒකට හේතුව තමයි අද කාලෙ තියෙන සංකීර්ණ ජීවන රටාවත් එක්ක මිනිස්සු කැමතියි වගකීමක් ඇතුව.. හොඳට දන්න කෙනෙකුට කියලා වැඩක් කරවගන්න. මේකෙ වටිනාකම තවත් වැඩි වෙන්නෙ.. ඔබට Laptops Repair කරන්න පුළුවන්නම්. මොකද අපි වුණත් Desktop පරිගණකයක් ගලවලා.. RAM එක එහෙම  Check කරලා බැලුවට.. කවදාවත් Laptop එකක් ගලවන්න හිතන්නේ නෑ. දන්න කියන කෙනෙක් ගාවට යනවා මිසක්.

Networking කියන්නෙම ටිකක් පහළ මට්ටමේදි භාවිතා නොවෙන දෙයක්.. ඒ කියන්නෙ තනි පරිගණකයක් භාවිත කරන කෙනෙක්ට සම්බන්ධ වෙන්න තියෙන්නෙ Internet හෙවත් අන්තර්ජාලය කියන Network එකට විතරයි. ඉතිං ඒ දැනුම නම් හරිම සුලභයි. ඒත් එතනිං එහාට Domain එකක් Configure කරගන්න තැන ඉඳලා ඉහළට තියෙන වැඩ ටික හරි සුවිශේෂයි.. ඒ දැනුම හැමෝටම ඇත්තෙ නෑ විතරක් නෙවෙයි. ලංකාවෙ බොහොමයක් ආයතන වල IT Executive වගේ ම IT Manager තනතුරු වල ඉන්න බොහොම දෙනෙක් ට වත් මේ දැනුම ප්‍රමාණවත් මට්ටමට නෑ.  ඉතිං ඒ සම්බන්ධ සේවා සපයන ආයතනයක් පවත්වන්න ගත්තොත් දියුණු වෙන්න ඉතා හොඳ අවස්ථාවක් තියෙනවා කියන එකයි මගේ අදහස.


Tuesday, June 30, 2020

ලැප්ටොප් පරිගණකය හා බැටරිය| Laptop & Battery


ඔබ ගේ ලැප්ටොප් පරිගණකය එක දිගට විදුලි සැපයුමට සම්බන්ධ කිරීම බැටරියට අහිතකරද?
මේ ලිපිය ලියන මා පවා කලක් සිතා උන්නේ එය අහිතකර බවයි. නමුත් තොරතුරු සොයා බැලූ විට එහි ඇති වරදක් නැත. 

එම සංකල්පය මෙයට ටික කලකට පෙර භාවිත වූ නිකල්-කැඩ්මියම් බැටරිය සමඟ අප අතරට පැමිණි එකකි. වර්තමානයේ භාවිත වන ලිතියම් අයන් බැටරි සඳහා එය අදාළ නොවේ. මෙහිදී බැටරිය සම්පූර්ණයෙන් චාර්ජ් වූ පසු ස්වයංක්‍රීයව ම චාර්ජ් වීම නවතාලන බව පැවසේ. 

කෙසේ වෙතත් බැටරියේ ආයු කාලය කෙරෙහි බලපාන යම් යම් ක්‍රියා මාර්ග කිහිපයක් දැක්විය හැක.
1. ලිතියම් අයන් බැටරියක් බිංදුවටම බස්සවා උපරිමයටම චාර්ජ් කිරීම පුළුවන් තරම් අවම කළ යුතුය (මෙය ද නිකල් කැඩ්මියම් බැටරි සඳහා යොදාගත් තාක්ෂණයකි)

2. නමුත් මාසයකට පමණ වරක් මෙලෙස උපරිමයට චාර්ජ් කොට බිංදුවටම බැස්සවීම කළ යුතු බව කියැවේ. බිංදුවට බස්සවා පැය පහක් පමණ තබා නැවත උපරිමයට (එක දිගට) චාර්ජ් කළ යුතුය.  මෙය බැටරියේ ශක්තිය පිළිබඳ නිවැරදි තක්සේරුවක් රඳවා ගැනීමට හේතු වේ.

3. බැටරියේ හා පරිගණකයේ රත් වීම බැටරියේ පැවැත්ම දුර්වල කිරීමට ඉවහල් වේ. එබැවින් බැටරියේ උෂ්ණත්වය ගැන සැලකිළිමත් වීම අත්යවශ්‍ය කරුණකි. විශේෂයෙන් පරිගණක ක්‍රීඩා වැනි වැඩි ක්‍රියාකාරීත්වයක් ඇති වැඩසටහන් (Programmes) භාවිතයේ දී හා එකවර වැඩසටහන් කිහිපයක් භාවිතයේ දී පරිගණකයේ රත්වීම ඉහළ යන බව පැවසේ. එනිසා පරිගණකයේ පහසු කම ඇත්නම් හැකි හැම විටම බැටරිය විසන්ධි කොට භාවිත කිරීම සුදුසුය. 


Monday, June 8, 2020

පරිගණකයේ දෘඩ තැටිය ට යන කල! HDD and SSD | PATA and SATA

පරිගණකයේ ද්විතීයික මතක ගබඩාව (Secondary Storage) කියන්නෙ ඉතිං පරිගණකයේ අත්‍යවශ්‍ය මෙන්ම වැදගත්ම උපාංගයක්. දෘඩ තැටිය (Hard Disk) තමයි මේ යටතෙ භාවිත වෙන ප්‍රධාන උපාංගය. මුල් කාලයේ අපි භාවිත කරපු දෘඩ තැටි පෙනුමින් විශාල වුණත්.. එහි මතක ධාරිතාව ඉතා කුඩයි.. මට මතකයි මගේ මුල්ම පරිගණකයේ දෘඩ තැටියේ ධාරිතාවය මෙගා බයිට්ම 350ක්. Primary Storage නොහොත්  RAM එක.. 4MB. මාරයි නේ.. ? අද භාවිත කරන්නෙ.. 2TB දෘඩ තැටියක්.. 8GB RAM එකක්.. කාලය මැවු වෙනසක අරුමේ.. තමයි ඉතිං..

18in Dual Drive Ultra ATA IDE Cable | IDE Cables & Adapters ...
IDE Cables
Seagate ST330610A - 30GB 5.4K IDE 3.5" Hard Disk Drive (HDD) - CPU ...
IDE Hard Dis Drive


ඉතිං මේ දෘඩ තැටිය එහෙම නැත්නම්. Hard Disk Drive (HDD) අද වෙනකොට ධාරිතාවය ඉහළ ගොහිං තිබුණට.. පෙනුම.. පුංචි වෙලා  මිසක්කා ලොකු වෙලා නම් නෑ . අපි ඒ කාලෙ භාවිත කළේ   IDE කියන අතුරුමුහුණත (Interface) එක භාවිත කළ දෘඩ තැටි.  ඒ කියන්නෙ පරිගණකයේ ප්‍රධාන පුවරුව (Mother Board) හා දෘඩ තැටිය සම්බන්ධ කෙරුනෙ IDE කියන තාක්ෂණය තිබුණු Cable සහ Ports/Slots භාවිතයෙන්. ඒත් කාලය ගෙවෙද්දි, 2007 විතර, මේ වැඩේ ට අලුත් තාක්ෂණයක් හඳුන්වා දුන්නා.. ඒ තමයි SATA. මේ තාක්ෂණයත් එක්ක තමයි..  දෘඩ තැටියෙ ධාරිතාවය ඉක්මණින් ඉහළ ගියේ. ඒ කියන්නෙ ඒ වෙනකොට තිබුණු 80GB වගේ IDE දෘඩ තැටිය , 512GB SATA දෘඩ තැටිය මඟින් ඉතා පහසුවෙන්  ප්‍රතිස්ථාපනය උනා. ඒ කියන්නෙ මතක ඒකකයක මිලත් සැලකිය යුතු ලෙස පහල බැස්සා.. එයිට අමතරව වේගය.. ඔවු.. දත්ත ගමන් කිරීමේ වේගය SATA වල ඉතා ඉහළයි.. එය IDE වගේ තිස් හතලිස් ගුණයක් තරම්.. ඒ වගේ ම IDE සහ SATA CABLES අතර පෙනුමෙ තිබුනු වෙනසත් කැපී පෙනුනා. එතෙක් කල් තිබුනු පළල් රිබන් එකක් වගේ  IDE CABLE එක වෙනුවට සිහින් SATA CABLE ආදේශ වුණා. හිතන්න එපා පරණ පරිගණක වල IDE CABLE එක ගලවලා SATA CABLE ගැහුවාය කියලා. ඇත්තටම මේක උනේ.. අලුතෙන් එන පරිගණක වල.. ඒවයේ IDE වෙනුවට SATA යොදා ගත්තා.. IDE දෘඩ තැටි වල අනුපිළිවෙල හඟවන්න භාවිත වුණු Jumpers නමැති කුඩා Pins එකිනෙක සම්බන්ධ කරන Connectors වර්ගය  SATA තාක්ෂණයේ දී අවශ්‍ය වුණේ නෑ.. SATA තාක්ෂණයෙන් දෘඩ තැටියක් හරි CD, DVD ආදී වෙනත් උපාංගයක් හරි සම්බන්ධ කළ ගමන් ඒක හඳුනගන්න පරිගණකයට හැකියාව ලැබුණා.. ඒකට කිවුවෙ Plug and Play කියලා.  අද මං භාවිත කරන 2TB දෘඩ තැටියත් භාවිත කරන්නෙ.. SATA කියන තාක්ෂණය.

1TB SATA HDD Hard Drive
SATA HDD
Amazon.com: StarTech.com 12in SATA Serial ATA Cable - SATA cable ...
SATA Cables
SATA කිවුවෙ Serial Advance Technology Attachment කියන එක නෙ. තවත් තාක්ෂණයක් තමයි PATA හෙවත් Parellal Advance Technology Attachment කියන්නෙ. දැං හොයපල්ලකො මේ ගැන. නෑ කරදර වෙන්න ඕන නෑ. PATA කියන්නෙ IDE (Integrated Drive Electronics) කියන එකම තමයි ලු.
Goldenfir SATA III 240GB SSD 2.5 solid state drive disk 240gb ssd ...
SSD

කොහොම හරි ඉතිං අද වෙනකොට ඊටත් වඩා අපූරු තාක්ෂණයක් ඇවිත්.. හැබැයි මේක SATA විසින් IDE නැත්නං PATA ව පැන්නුවා වගේ නෙවෙයි.. මේක තමයි SSD (Solid State Drive). මේකෙන් ප්‍රතිස්ථාපනය කළේ.. මෙතෙක් කල් දෘඩ තැටිය ඇතුළේ ක්‍රියාකාරීත්වය. ඒ නිසා තව දුරටත්  අතුරු මුහුණත විදිහට ඉන්නෙ SATA ම තමයි. ඉස්සර යකඩ තැටි ටිකක් කැරකි කැරකි දත්තත් එක්ක කරපු මෙහෙයුම SSD මඟින් Memory Chips භාවිත කරලා කරනවා. පුරුද්දට වගේ Hard Disk Drive කිවුවට..  SSD කියන්නෙ තවත් HDD එකක් නෙවෙයි.. SSD කියන්නෙ HDD වලට විකල්පයක්. මිළ අධික කම හැරුණම මේක හැම අතින්ම වගේ විශිෂ්ඨයි.. වේගය අතින් ඉතාම ඉහළයි.. යාන්ත්‍රික ශක්තිය වැය නොවන නිසා.. බල පිරිමැස්මත් ඉතා ඉහළයි. බර ඉතා අඩුයි. එකම ප්‍රශ්නය මිළ වැඩියි.. හැබැයි.. HDD එකට සාපේක්ෂව SSD වල කාර්යක්ෂමතාව සිය ගුණයක් විතර ඉහළයි කියලා කියන නිසා. HDD එක වගේ දහ ගුණයක් විතර මිළ වුණත් .. ඒක නොසලකා හැරියට කමක් නෑ කියලා කියන්නත් පුළුවන්.. ඒ වගේ ම ලොකු ඉඩක් අවශ්‍ය වන වැඩ වලට භාවිත කරන්න ලොකු ධාරිතාවයක් තියෙන HDD එකකුත්.. OS (Operating System) එක ඇතුළු Systems Software ටික දාගන්න (250GB විතර) පොඩි  SSD එකකුත් තියාගත්තා නම් හොඳයි.. හොඳයි නෙවෙයි ඒක පට්ට..

ප.ලි.
මං ඉතිං දන්න තරමිං ලිවුවෙ.. අඩු පාඩු.. ඌණ පූර්ණ.. විවේචන කරන්න ආරාධනා කරනවා.. ඔබ සැමට..

Thursday, March 26, 2020

කොරෝනා


කඳුළැලි ම පුරෝනා
ලෝකයට විරෝනා
දිවි නිමා කරෝනා
වෙසඟනය කොරෝනා

අඳෝනා පැතිරිලා
පැතු සිහින ඉහිරිලා
තුන් සුතුර මැතිරිලා
එ ද අඳුර ඉතිරිලා

අලුත් දොරවල් හැරී
දිසෙයි ගුණදම් පෙරී
කොරෝනා වෙන් හරී
කරමු සුව මං සරී



Tuesday, December 10, 2019

දැන් ලොකුයි.. මගෙ පුතා


වසර දහයකට පෙර
නුඹ මෙලොව එළිය දුටු
ඒ දිනය අමතකව
නෑ පුතේ මට තවම ..

මාස නවයක් පුරා
ඇඟිලි ගනිමින් උන්නෙ
හඬ නඟා කියන්ටයි
මට පුතෙක් ඉන්න වග..

නුඹෙ සුවඳ දැනුණාම
ඒ රසට බැඳුණාම
පුතෙක් යනු රජෙක් බව
පියෙක් ලෙස හැඳින්නෙමි..

අපෙ සෙනෙහෙ කැදැල්ලේ
පුංචි දඟකාරයා
හනේ දැන් ලොකු එකෙක්
කොහොම නම් සිතන්නද..

අඩි තියා ඇවිදිද්දි
මුදු වදන් අමුණද්දි
දැනුණු ඒ සුරතලය
තවම අපෙ සිත් පුරයි..

අනාගත ලෝකයේ
ඔටුණු නුඹ පළඳාවි
ඒ ඔටුන්නට වඩා
අපේ සෙනෙහස බරයි..

එපා තව ලොකු වෙන්න
නොම කියමි පුතණුවෙනි..
ගුණ දහම් රැක ගන්න
එඩි පිරුණු දැඩි සිතිනි..!

Monday, October 7, 2019

ඔයාට පිස්සුද?

මහ මුහුදේ රළ වෙනදාට වඩා උදාසීන යැයි සිතූ ඈ එය ඇත්තක්දැයි බලන්නට මෙන් දෑස් පෙති පිසදා මුහුද දෙස හොඳින් බැලුවාය.
 බලන්නකෝ.. මුහුදු රළ එන්නෙ.. අපට ඕනවට වගේ..
හ්ම්.. ඔහුගේ ප්‍රතිචාරය ඇසුණු විට ඇයට සිතුණේ.. මුහුදු රළ ඒ අතින් ඔහු ට වඩා උද්‍යෝගී බව ය.
හරියට අපි වගේ නේද? ඈ ඇසුවේ ඔහු ගේ දැහැන බිඳින්නට ය.
ඔවු.. අපි වගේ.. මෙලෝ රහක් නෑ.. එන්න ඕනවට එනවා.. යන්න ඕනවට යනවා.. මේවා මෙහෙම වෙලා තියෙන්නෙ.. කරුමෙට ම නෙවෙයි..  හිතුවට වඩා තදින් දැහැන බිඳුණු සෙයකි.. ඔහු කියෝගෙන යයි..
හරි.. හරි.. හුළඟ වැඩි වෙනකොට ඕක හරි යයි..  ඈ ප්‍රශ්නය සමනය කරයි..
ඔවු.. ඒත්.. කවදා හුළං හමයි ද? මුහුදට තරං ඉක්මණට අපට නං හුළං හමන එකක් නෑ.. ඔහු කියන්නේ නොරිස්සුමෙනි..
අපි ෆෑන් එකක් දාගමු.. ඈ සිහින්ව සිනා සෙයි..
කෘත්‍රිම හුළඟකින් ජීවිතේ යදින්න තරම් අපි බංකොලොත් ද? ඔහු ප්‍රශ්නය අතහරින පාටක් නැත..
දැං මට මොකද්ද කරන්න කියන්නෙ..? ඇගේ ස්වරයද මදක් උස් වී ඇත.
ඔයා තරින් ව බඳින්න..
ඔයාට පිස්සු ද?
++++++++++++++++++++++++++++++++++++++++++++++++
ගොඩක් වෙලා ද ඇවිත්..? පැයක් ප්‍රමාද වීම ගැන කණස්සල්ලක් ඒ ස්වරයේ නොවීය.
ඔවු.. ඒත් මේ වගේ තැනක .. වෙලාව යනවා දැනුණේ නෑ.. ඔහු කීවේ සැනසීමෙනි..
අනෙක ඔයා ඒවි කියන බලාපොරොත්තුවෙන්.. පැයක් නෙවෙයි දවසක් හරි ඉන්න බැරුවයෑ.. ඔහුගේ ස්වරය හදවතට ලෙංගතුය.
හ්ම්..බලාපොරොත්තු අපිව ජීවත් කරනව ලු නේ. ඇය ලය සැහැල්ලු කළාය...
ඉතිං.. මොනවද ඔයාගෙ බලාපොරොත්තු.. ඇල පාරට ගල් කැටයක් විසි කරමින් ඔහු ඇසුවේ.. සැහැල්ලුවෙනි..
ජීවත් වෙන එක තමයි..
ඒ කිවුවෙ..?
මං ආසයි ජීවත් වෙන්න.. ඒක තමයි මගේ බලාපොරොත්තුව..
මඳක් බැරෑරුම්ව බලා හුන් ඔහු ..
බලාපොරොත්තු අපිව ජීවත් කරනවා කියලා ඔයා ම නේද කිවුවේ..?
සමහර බලාපොරොත්තු එහෙම නෑ.. ඒවා.. හීන විතරමයි..
ඔයා ඉන්නෙ දුකින්ද?
එහෙම නෑ.. ඇය උත්තර දුන්නේ ඕනවට එපාවට ය.
හරි.. හරි.. අපි පොඩ්ඩක් ඇවිදිමු ද? ඔහු ඇගේ අතින් අල්ලා ගත්තේ ය.
ඔහුගේ සීතල ගොරහැඩි අත ඇයට ගෙනාවේ .. ආරක්ෂාවේත් .. සෙනේහයේත් .. ලෙංගතු බවේත් මුහුවකි.
මටත් දෙයක් කියන්න තියෙනවා.. ඔහුගේ ස්වරය බැරෑරුම් විය. දෑසට දෑස හමු විය..
මං කසාද බැඳපු කෙනෙක්.. ගොඩක් වේදනා විඳපු කෙනෙක්.. පුළුවන්නම්.. මගෙ ජීවිතේ හරිගස්සන්න..ඔහු කියාගෙන යයි..
ඇයි ඔයා ඔහොම බලන්නෙ..?
ඔයාට පිස්සුද?
+++++++++++++++++++++++++++++++++++++++++++++++++
මං හිතුවෙ ආයෙ එන එකක් නෑ.. කියලා.. ඔහු ගේ දෑස දීප්තියෙන් බැබලෙයි..
ආවට අකමැති ද? ඇය කීවේ නෝක්කාඩු ස්වරයෙනි..
අද නං රැල්ල හරි සැරයි.. හොඳටෝම හුළං.. ඔහු උද්‍යෝගයෙන් කියයි..
මුහුදට නං.. ජයයි.. ඈ සිහින් ව සිනාසෙයි.
අපට මොකද වෙන්නෙ..? ඔයා තරීන් ව බඳින්නෙ නැද්ද? ඔහු යළිත්.. බැරෑරුම් ය..
මට ඒකට හිත හදාගන්න බෑ..
ඇයි..? බඳින්න ආදරේ කරන්නම ඕනද?
හරි.. හරි.. අපි කාලයට ඉඩ දෙමු.. ඇය බොරු කියන්නට කැමති නැත..
හෙට තිස්සයි .. සුරේනියි බඳිනවා..
ඔවු.. අපි යනවනේ..?
ඔයා යන්න.. මං එන්නෙ නෑ..
ඇයි..? අපි තවත් මේක හංගන්නෙ ඇයි..?
ආදරේ කළා ම බඳින්නම ඕනද?
ඇත්තටම ඔයාට පිස්සුද?


Tuesday, September 24, 2019

මහ වනේ මතු වෙලා

එදා කපලා තිබුණු 

මහ වනේ මතු වෙලා

ආයෙමත් කොළ පාට 

අපිත් කුල්මත්වෙලා

හරි පුදුමෙ මාසයෙන් දෙකෙන් 

ගස් ලොකු වෙලා

ජාතියේ හුස්ම ටික

තවත් ඔද්දල් වෙලා...
ඒ අඳුර.. ඒ සිසිල

නැත්තෙ කිම බල බලා

උන්නෙ මං දහවලේ

හීනෙකට බය වෙලා..


Wednesday, March 27, 2019

මහ වනේ - කෝ අනේ

Deforestation


               
ඒ අතට මේ අතට අතු විහිදි තුරුපතර
තාම මතකයි අඳුරු සුවය සිත කළ නතර
කෝඩ සුළඟින් වුණත් දඟය මොහොතක්විතර
මා පැතුවෙ නිසල බව තිබූ ඒ වන නිතර
  
දිය පිරුණු උල්පත් ය එහි තිබහහැඟුණෙ නෑ
ගෙඩි පිරුණු ගහ වැලින් සුදහ ගිණිරැඳුණෙ නෑ
හිරු රැසින් වැසි වලින් විඩා බරදැනුණෙ නෑ
වන සතුන් මැවු අසිරි වෙන තැනකතිබුණෙ නෑ
  
ගෙපැල් පොඩි තනන්නට කැළෙන් ඉඩවෙන් වුණා
දොර ජනෙල් බිම පවා වන රුකෙන්නිමැවුණා
මළ කඳන් වගෙම මහ තුරු කඳන්විකිණුනා
අපේ ගස් මුදලාලි ඉබේ පොහො-සත් වුණා
  
එළිය වැටෙනව' හොඳට අඳුරු නෑ පෙරවගේ
තාර කාපට් වැටෙයි ඉඩ පිරුණු මහමඟේ
ටිකක් රස්නෙයි තමයි දැනෙයි වතුරෙත්හිඟේ
ඉතුරු ගස් ටිකත් නැති වුණොත් තේරෙයිරඟේ
  

Wednesday, January 16, 2019

බැරිදා විග්‍රහය! ලිබරල් හොඳයිද?

ඉස්සර මං ඔය ලිබරල් කියන වචනෙ තේරුම දැනං හිටියෙ නෑ.. රනිල් ලොක්කා ලිබරල් වාදියා ය කියලා.. ජෙප්පො ඉස්සර පස් පඩංගුවේ බනිද්දි මං හිතුවෙ... ලිබරල් කියන්නෙ හොර කපටි හීන් නූලෙ වැඩ තියෙන දර්ශනයක් කියලා.. ඒත් ඉතිං ලිබරල් වාදය ගැන ඩිංගිත්තක් හොයා බලද්දි.. තමයි දැනගත්තෙ.. ලිබරල් කියන්නෙ එහෙම නරක මෙවුවා එකක් නෙමෙයි කියලා.. ලිබරල් වාදය පදනම් වෙලා තියෙන්නෙ.. නිදහස සහ සමානාත්මතාවය කියන කාරණා මත කියලා දැනගත්තාම මං කල්පනා කළේ රනිල් ලිබරල් කියන්නෙ ඇයි කියලා. උන්දැව නායකත්වයෙන් ඉවත් කරන්න.. අවුරුදු ගානක් දත කන සැට් එකට ඒකට නිදහසක් නොදෙන.. නැගී එන නායකයෙකුට.. තමන්ගේ ජාති හිතෛශී වැඩ පිළිවෙල ජනතාව වෙත ගෙනියන්න නිදහසක් නොදෙන කෙනා ලිබරල් ය කියලා කියන්නෙ ඇයි කියන එක මට පැහැදිලි වුණේ නෑ.. පස්සෙ බැලුවම රනිල් ලොක්කා ආර්ථිකය හා අන්තර්ජාතික වෙළඳ ගනුදෙණු සම්බන්ධයෙන්  ලිබරල් වීමයි මෙතන ලිබරල් කියලා හඳුන්වලා තියෙන්නෙ. ලිබරල් ආර්ථික හා වෙළඳ ප්‍රතිපත්ති ඇතැම් වෙලාවට දේශීය කර්මාන්ත කෙරෙහි අහිතකර විදිහට බලපාන්න පුළුවන්. ඒ නිසා එවැනි අන්තර්ජාතික ගනුදෙණු වලදී බුද්ධිමතුන්/ උගතුන් විමසීමත් අවබෝධයකින් හා පාලනයකින් යුතුව ගිවිසුම් වලට එළැඹීමත් අතිශයින්ම වැදගත්. 100% ක් ලිබරල් ආර්ථික ක්‍රමවේද පවතින රටවල් නැතැයි මා සිතුවත් එහෙම පවතින්න බැරි කමක් තියෙනවද කියලා මං දන්නෙ නෑ.. කොහොම වුණත්.. ලිබරල් කිවුවම නිදහස ගැන විතරක් හිතන එකේ අවුලක් තියෙනවා.. සමානාත්මතාවය කියන කාරණාවත් ඉතා වැදගත්. ඒක ගනුදෙණු වලදී මෙන්ම අනෙකුත් කාරණා වලදීත්.. මේ සංකල්පය යටතේ.. මීට වඩා සැලකිල්ලට ගත යුතු කාරණාවක්..  

කොහොම වුණත්.. ජවිපෙ ඉස්සරට වඩා අනුර කුමාර යටතේ ලිබරල් අදහස් දරණ බව අපට පේනවා. අපි ඒකටයි කැමති. අන්ත ලිබරල් නොවී.. මධ්‍යස්ථ ලිබරල් මට්ටමක් පවත්වාගන්න පුළුවන් නම් ඒක ජයක්.. අනුර කුමාර යටතේ.. ජවිපෙ ප්‍රජාතන්ත්‍රවාදී වෙද්දි, ලිබරල් වෙද්දි ජවිපෙ කියන්නෙ එජාපයේ අතකොලුවක් කියලා චෝදනාවක් එන්නෙ.. එජාපය ඔය දෙක ක්‍රියාත්මක නොකළත්.. කරේ තියාගෙන යන පක්ෂයක් නිසා බව පැහැදිලියි.. අනිත් අතට.. එජාප හිතවාදී මත දරපු අපි වගේ මිනිස්සු, එජාපයේ ඇති දූෂණ, වංචා, අක්‍රමිකතා ඇතුළු අටෝරාසියක් පස්න නිසා සහ ලිබරල් වේගෙන එන, ප්‍රජාතන්ත්‍රවාදය ගරු කරන බව පෙනෙන, වංචා දූෂණ නැති ජවිපෙ පැත්තට තල්ලු වෙනවා.. ඒකෙන් අදහස් කරන්නෙ නෑ අපි ජවිපෙ නියෝජනය කරනවා කියලා.. ඔවුන්ගේ වැරදි .. වැරදියි කියලා අපි දකිනවා.. ඔවුන්ගේ ලිබරල් වාදී ගුණ, ප්‍රජාතන්ත්‍රවාදී ගුණ ඔවුන්ගේ ආණ්ඩුවක් නොපවතින කාලෙදි පමණයි ද කියන සැකෙත් අපට තිබෙනවා.. මොනවා වුණත් අපට පේන්න තියෙන විකල්පය ජවිපෙ බව පිළිගන්න වෙනවා.. ඒත් අපට JVP කාරයා කියන්න එපා.. අපි මාක්ස්වාදය හොඳද නරකද දන්නෙවත් නෑ..

Monday, December 31, 2018

එළැඹෙන 2019 සුබ නව වසරක් වේවා!

2018 න් 2019 ට යන්නෙ.. වෙනදට වඩා වෙනස් හැඟීම් සමුදායක් එක්ක. පවුලෙ පළමු සාමාජිකයා අඩුයි..ලොකු දෝණියෙකුත් ඉන්නවා. ණය කන්දකුත් තියෙනවා.. මේ හැම අලුත් අත්දැකීමකුත් එක්ක පටං ගන්න අමුතු අවුරුද්දක් 2019 කියන්නෙ. මට වගේ ම ඔයාලා හැමෝටමත්.. අභියෝග ගොඩක් ඇති. ඒ සියල්ලම 2019 දි ජයගන්න  ලැබේවා! කියලා මං ප්‍රාර්ථනා කරනවා..

අපි ජීවිතය හොයාගෙන දුවනවා..විටෙක හැල්මෙ දුවනවා.. විටෙක හුඟක් වේගෙන් දුවනවා.. සොබා දහම අපට අමතක වෙනවා.. මිනිස්කම කියන්නෙ සොබා දහම අපට දුන්නු තෑග්ගක්. මිනිස්කම කියන තනි වචනෙ ඇතුළෙ හුඟක් දේ තියෙනවා.. අතින්.. නෙතින් ස්පර්ෂ කරන හුඟක් දේ හදවතින් ස්පර්ෂ කරන්න අපට අමතක වෙනවා.

පහුගිය සතියෙ අපි විනෝද චාරිකාවක් ගියා.. අපි වැඩිය ඇවිද්දෙත් නෑ.. ඒත්..එද්දි හරි මහන්සියි.. එහෙම වෙන්න පුළුවන්ද? මට හිතා ගන්න බෑ.. ඒක මොන විදිහෙ විනෝද සවාරියක් ද කියලා.. අපි විනෝදය කියලා අල්ලාගන්නේ එකක්.. අපේ දෙමවුපියො තව එකක්.. අපේ ළමයි තව එකක්. ඒත් අපි කවුරුවත් ජීවිතය අල්ලගත්තද? නෑ.. අපි හැමෝම එක තැන දුවනවා.. මිනිස්කම අලුත් කරන්න.. සොබා දහම ගැඹුරින් ඇසුරු කරන්න.. අපට පුළුවන් වුණ දාට .. සමහර විට ආයෙත් ජීවිතය අපට හමුවෙයි..
2019 දි වත්.. අපේ ජීවිත අපට හමුවේවා..

කුරුළු කිචි බිචි උදේ
සවන් වැකුණේ නොමැත
හිරු නැඟෙන බැසෙන රුව
දෙනෙත් දුටුවේ නොමැත
සඳ කැණින් උදම් වී
සිත පිබිදුනේ නොමැත
මා සොයන ජීවිතය 
මට හමුවුණේ නොමැත

අවදි වී අරුණෝදෙ
දරුවන් ද ඇහැරවා
ජීවිකා පිණිස ගොස්
මනස එහෙ මෙහෙ යවා
පුරුද්දට මෙන් ගතත්
කුටුම්භය වෙත එවා
අහම්බෙනි දකින්නේ
කෙසඟ නිදි දෙවු පවා

Friday, November 2, 2018

බැරිදා විග්‍රහය! මහින්ද අගමැති වීමේ හොඳ නරක

එජාප නායක රනිල් වික්‍රමසිංහ මහතාව අගමැති කමින් නෙරපා දමා මෛත්‍රී විසින් හිටපු ජනපති, වත්මන් පාර්ලිමේන්තු මන්ත්‍රී, මහින්ද රාජපක්ෂ මහතා අගමැති වශයෙන් පත් කර ගැනීම පසුගිය සිකුරාදා හවස ජනපති මෛත්‍රීපාල සිරිසේන මහතා විසින් සිදු කළ අතර රනිල් පාර්ශවය හා අනෙකුත් බොහෝ පාර්ශවයන් එම පත් කිරීම ව්‍යවස්ථා විරෝධී පත් කිරීමක් බවත්.. ජනපතිවරයාට අගමැති ඉවත් කිරීමේ බලයක් නොමැති බවත් පෙන්වා දෙති. ඒ අතර මහින්ද පාර්ශවය පාර්ලිමේන්තුව නොකැඳවා ම ඇමති මණ්ඩලයක් ද  පිහිටුවාගෙන ඉදිරියට ඇදෙයි.. .. මේ එයින් ලැබෙන/ලැබිය හැකි පිළිබඳ මගේ අවබෝධය අකුරුය.. (එම පත් කිරීමේ නීත්‍යානුකූල බව හෝ ආචාර ධර්ම උල්ලංඝනය ගැන හෝ කතා කිරීම මෙහි අරමුණ නොවේ..)

දෛනික කටයුතු වලට බාධා..
පුද්ගලික අංශයේ කටයුතු බොහෝ දුරට වෙනදා සේ ම කෙරීගෙන ගිය ද, රාජ්‍ය, අර්ධ රාජ්‍ය ආයතන බොහොමයක, අමාත්‍යංශ ලේඛම් වරුන් හෝ අදාළ ප්‍රමුඛ නිලධාරීන් මාරුවීම හා මාරු වෙතැයි යන උපකල්පනය නිසා බොහෝ වැඩ කටයුතු මේ වන විටත් අඩාල වී ඇතැයි සිතමි. එම ආයතන හා සම්බන්ධ විවිධ ආකාරයේ ව්‍යාපෘති ද මේ වන විට ඇණ හිට ඇතුවාට සැක නැත. විශේෂයෙන් නැවතත් රනිල් අගමැති වී සියල්ල කණපිට ගසාවි දැයි යන අවිනිශ්චිත භාවය මේ වන විට සෑම තැනකම වැඩ කටයුතු අඩාල වීමට බෙහෙවින් බලපා ඇත. මෙය තාවකාලික වුවත්.. පාර්ලිමේන්තුව පවත්වා.. දෙකෙන් එකක් බේරා නොගෙන කල් මැරීම රටට සිදු කරන පාඩුව සුළු පටු නොවේ..

උද්ඝෝෂණ කරුවන්ගේ කරදර ඉවරයි..
පහුගිය කාලේ හයියෙන් අධෝවාතයක් පිට වුණත් උද්ඝෝෂණ කරන්නට පෙළැඹී සිටි අය දැන් පාඩුවේ තමන්ගේ වැඩක් බලා ගනු ඇත. එය පාඩුවේ වැඩ කරන මිනිසුන්ට කරන ලොකු උදවුවකි..

ජනතාවටත් සංතෝෂම්..
මන්ත්‍රී වරුන් කෝටි ගණන් වලට වෙන්දේසි වන මේ සමයේ.. ජනතාවට ද පුංචි පුංචි සංතෝෂම් ලැබෙනු ඇත. පෙට්‍රල් රු. 10 කින් අඩුවීම, පරිප්පු, සීනි, තිරිඟු පිටි මිල අඩු වීම, විදුලි සංදේශ බදු අඩු වීම ඒ අතර කැපී පෙනෙන.. . මේ වන විටත් ලැබී ඇති සංතෝෂම් ය. 

ජාත්‍යන්තර පීඩනය
 2015 ට පෙර.. ශ්‍රී ලංකාව ජාත්‍යන්තරය තුළ කුප්‍රකටව සිටියේ ප්‍රජාතන්ත්‍රවාදය ඉතා දුර්වලව පවතින රටක් ලෙස ය. එහෙත්.. 2015 න් පසුව.. රජය.. බොහෝ අංශ වලින් ඉතා සාධනීය මට්ටමින් ප්‍රජාතන්ත්‍රවාදය සුරක්ෂා කළ නිසා.. එම අංශයෙන් රට ගැන තිබූ අප්‍රසාදය බොහෝ සෙයින් දුරු විය. එහෙත්... ප්‍රජාතන්ත්‍ර විරෝධී ආකාරයෙන් මහින්ද මහතා ව අගමැති කළ බවට වත්මනෙහි ප්‍රජාතන්ත්‍රවාදය වෙනුවෙන් පෙනීසිටින ජාත්‍යන්තරයේ බහුතරයක් රටවල් පිළිගන්නා තත්වය තුළ.. ඉදිරියේ දී වත්.. ප්‍රජාතන්ත්‍රවාදී ව නොහැසිරුණහොත්.. පෙරටත් වඩා ප්‍රබල ලෙස... ජාත්‍යන්තරය ක්‍රියාත්මක වනු ඇතැයි අනුමාන කළ හැක. 

රට හදනවා නම්..
මහින්ද - මෛත්‍රී හවුල ට රට හදනවා නම්.. මේ ද එක් හොඳ අවස්ථාවක් බව කිව යුතුය.. ඒ සඳහා ඔවුන් කළ යුත්තේ.. පැවති රජය ගෙන ආ.. ප්‍රජාතන්ත්‍රවාදී පිළිවෙත් වල වෙනසක් නොකොට.. ඔවුන්ගේ තිබූ දුර්වලතා වන.. හොරකම්, දූෂණ හා වංචා දුරු කිරීමත්, අනවශ්‍ය රාජ්‍ය වියදම් කපා හැරීමත් ය.

ප.ලි.
රටේ පවතින තත්වය හා දේශපාලකයින්ගේ ජරා ජීර්ණ ස්වභාවයට අනුව.. ආණ්ඩු මාරු වූවත් නැතත්.. රටට හා ජනතාවට යහපතක් නම් සිදු නොවන බැවු පැහැදිලි ය. 

Thursday, October 25, 2018

බැරිදා විග්‍රහය!Uber - ත්‍රී රෝද වලිය

Uber - ත්‍රී රෝද වලිය නැගලා යද්දී කට පියං ඉන්න එක .. මට ටිකක් අමාරු වැඩක් නිසා මෙසේ ලියමි. පැත්තක ඉඳං ලියන එක අසාධාරණ වුවත්.. මැද්දක ඉඳං ලියන්ට හිත් නොදෙන්නේ ත්‍රි රෝද ත් එක්ක මගේ ඇරියස් එකක් තියෙන නිසා ය.

එකී ඇරියස් එකට හේතු කිහිපයකි. කිලෝ මීටරයකට රු. 10ක් තරම් වියදමක් යද්දී.. ඒ වගේ පස් ගුණයක් හෝ ඊටත් වඩා අය කරන එක එක් හේතුවකි.. පාරේ යද්දී වැඩිපුරම මාර්ග නීති කඩන්නේ ත්‍රී රෝද කරුවන් වීම තවත් එකකි. රටේ අපරාධ වලට ත්‍රී රෝද කරුවන් බොහෝ සෙයින් දායක වන නමුත්.. එය එතරම් ලොකු හේතුවක් නොවේ.. පාරට බැස්සහම වාහනයක් පාර්ක් කරන්ට හදන ඕනම තැනක ත්‍රී රෝද රථ ගාලක් ය.. එය ද ලොකු ම හේතුවකි.

තත්වය එසේ වුවත්.. ත්‍රි රෝද රථ රියැදුරෝ.. යම් යම් අවස්ථා වලදී සමාජයට විවිධ සේවා සපයති. අනතුරක් වූ විටෙක.. මොවුන් බොක්කෙන්ම ඉදිරිපත් වෙති.. උදවු කරති.. පාරවල් හොයාගෙන යන විටදී ගූගල් නංගිටත් වඩා විශ්වාසදායී මාර්ගෝපදේශකයා ත්‍රී වීල් මල්ලි ය.

Uber, PickMe, Sonit වැනි Cab Service ආයතන ගැන මගේ පැහැදීම හොඳ ය. ත්‍රී රෝද රථ මිළ ට ආසන්න හෝ ඊටත් අඩු මිළකට කාර් එකක් ලබා දෙන මේ සේවාව අගය කළ යුතු ම ය. මේ අතර Uber සුවිශේෂී වන්නේ.. මිළ බොහෝ සෙයින් අඩු වීමත්.. විවිධ වෘත්තීන්හී නියැලෙන්නන්ට තමන්ගේ ගමන් බිමන් අතර තුර කීයක් හෝ හොයාගන්නට මඟ පාදා දීමත් නිසා ය. එයට අමතරව නවීන තාක්ෂණය ඔස්සේ.. වාහනය තිබෙන තැන සොයාගැනීමේ පහසුව ද Uber, PickMe වැනි ආයතන මඟින් ලබා දී ඇත..

මගේ මතයට අනුව නම්.. වෘත්තීය පූර්ණ කාලීන ත්‍රී රෝද රථ ධාවකයින්ගේ සේවය.. ඉදිරියේදී ලංකාවට අවැසි නොවනු ඇත.. ඔවුන් ද වෙනත් වෘත්තියක නියැලෙන අතර තුර, මෙම වෘත්තියෙහි යෙදීම යහපත් ය. අනෙක් අතට .. ඔවුන් මේ අයකරන අසාධාරණ මුදල වෙනුවට.. සාධාරණ මුදලක් අය කරන්නේ නම්.. ඔවුන්ගේ රැකියාව අවදානමකට ලක් වන්නේ ද නැත.

වඩා හොඳ සේවය සමඟ තරඟකාරීව ගැටෙනු නොහැකි විට.. අයථා ලෙස ඔවුන්ව පන්නා දැමීමට උත්සාහ කිරීම ම ඔවුන්ගේ ඇති මුග්ධ බව ලොවට කියා පාන්නකි.. Uber වැනි ආයතන වැඩි වැඩියෙන් බිහිවේවා යන්න මගේ පැතුමයි..

Tuesday, October 23, 2018

සුසන්තිකා කුහක ද?

සුසන්තිකා ජයසිංහ.. එන්නට පෙර.. ආසියාවේ කළු වෙළඹ.. දමයන්ති දර්ශා ය. එහෙත්.. සුසන්තිකා ගේ ආගමනයෙන්.. දර්ශාට පසු බසින්නට සිදු විය.. දර්ශා.. සුසන්තිකා ලෙසින් කෑගෑවේ නැත. ඔලිම්පික් පදක්කමක් ගෙනා සුසන්තිකා.. වීරවරියක් විය.. ආසියාවේ කළු වෙළඹ සුසන්තිකා විය.. සුසන්තිකා.. තමන්ට ලැබුණු දෑ මදි බවට හඬ නඟන්නට විය.. සුසන්තිකා දුෂ්කරත්වයේ ගිරි දුර්ගය තරණය කළ.. වීර කාන්තාවක් බවට තර්කයක් නැත.. හඬ නඟා බොහෝ දෑ ඇය ලබා ගත්තාය.. ඒ නිසා ම ක්ෂේත්‍රයේ අනෙක් අයට ද පෙරට වඩා සැලකිලි ලැබෙන්නට ඇතැයි ද මම සිතමි..

කාලය ගෙවී ගොස් පාරමී - පාසැල් දියණිය.. යොවුන් ඔලිම්පික් පදක්කමක් ගෙන ආවාය.. ඇයගේ කතාව ද සුසන්තිකාගේ මෙන් ම දුක්බර එකකි.. ඇය ට සුසන්තිකාට පාසැල් කාලයේ නොලැබුණු වරප්‍රසාද ලැබුණු බවට සැකයක් නැත. ක්‍රීඩා අමාත්‍යාංශයෙන් .. ඒ කාලේ කරපු දේවල් වලට වඩා දෙයක් කරන්නට ද ඇත. එහෙත්.. පාරමීට ද සුසන්තිකාට මෙන්ම ලැබෙන/ලැබුණ ටික මදි බව ඇය කීවාය..

මෙයට උත්තර බඳින්නේ සුසන්තිකා වීම දෛවයේ සරදමක් බඳු ය... සුසන්තිකා.. ප්‍රශ්නය දකින ආකාර කිහිපයකි.. පළමුවැන්න.. ඇය තමාගේ පාසැල් කාලයේ තමාට ලැබුණු දෑ.. සමග පාරමී ට ලැබෙන දෑ සංසංදනය කරයි..දෙවැනුව .. ඇය තමාගේ පදක්කම හා පාරමීගේ පදක්කම සංසංදනය කරයි.. තෙවැනුව.. ඇය ක්‍රීඩා අමාත්‍යංශ නිලධාරිනියක ලෙස බලයි.. මේ අවස්ථා තුනේදී ම ඇයට පාරමී .. පෙනෙන්නේ කුඩාවට වීම අරුමයක් නොවේ.. මේ හැර.. මවක, මානව දයාව පිරි කාන්තාවක ලෙස ඇය පාරමී ව දුටුවා නම්.. තත්වය වෙනස් වන්නට තිබුණි.. එහෙත් සුසන්තිකා යනු සුසන්තිකා ය.. ඇය රේස් දුවන/දුවපු කෙනෙකි..

පාරමී තව යා යුතු දුර බොහෝ ය. මේ පදක්කමට වඩා වටින්නේ .. ඇය ගැන සැම දෙනා ගේ අවධානය යොමු වීමය.. සුසන්තිකා ගිය දුරට වැඩි දුරක් දිවීමට ඇයට ඉඩ ඇත.. අවශ්‍ය කැපවීම හා ධෛර්යයි.. ඒ දෙකත් සුසන්තිකාගෙන් ම උගෙන.. හැසිරීම.. දර්ශාගෙන්, ශ්‍රියාණි කුලවංශගෙන් එහෙම ඉගෙන ගන්නේ නම්.. පාරමී ඔබ රටට සම්පතක් වනු ඇත...

Friday, August 31, 2018

බැරිදා විග්‍රහය! ලංකාවේ දේශපාලනය

අද වන විට බරපතළ ලෙස සෝදාපාළුවට ලක්ව ඇතැයි සැලකෙන.. අතිශය ප්‍රෝඩාකාරී කේෂේත්‍රයක් ලෙස ශ්‍රී ලංකාවේ දේශපාලන ක්ෂේත්‍රය බැලූ බැල්මට පෙනේ. මුහුණුපොතට ගොඩ වූ පසු වැඩිපුරම දක්නට ලැබෙන්නේ තම තමන්ගේ පිළිමලුන්ට දෝෂාරෝපණය කරන එක්තරා දේශපාලක පිරිසක් සරණ ගිය අයගේ සටහන් හෝ ඡායාරූප ය. ඉඳ හිට සමහරු, මෙවැනි පාදඩ දේශපාලකයන් පත් කළ ජනතාවට ද දොස් පවරති.  
ජනතාව යනු හිතා මතා.. 58 ලක්ෂයක් එයාට දෙන්ට.. 62ලක්ෂයක් මෙයාට දෙමු කියා කතාවෙළා ඡන්දෙ දාන එවුන් ටිකක් නොවන බව මුලින් ම පැවසිය යුතුය.. 58 ලක්ෂය ඇතුළේ .. අඩු තරමේ කැපුවත් මහින්ද ජාතියේ උන්දැලා ලක්ෂ 35 ක් වත් ඉන්නා බවට සැක නැත. 62 ඇතුළේ .. කැපුවත් කොළ කාරයෝ ලක්ෂ 25ක් වත් ඉන්නවා සුවර් ය. සතුටට කරුණ ඉස්සරට වඩා උත්තර මාරු කරලා බලන්ට කැමති උදවිය ටිකක් වැඩි එක ය. ඒ ගොල්ලන්ට කියන්නේ පාවෙන ඡන්ද දායකයෝ කියාය. හැබැයි ඒක පට්ට වැරදි ය. උන් අර ඉස්සෙල්ලා කියපු වහල්ලු දෙවර්ගය මෙන් හීන ලෝක වල පාවි පාවි ඉන්නේ නැත.  ප්‍රායෝගිකව යමක් කරන්නට පොඩි හෝ උත්සාහයක් උන් ගන්න එක ගැන අප ගරු කළ යුතුය. හැබැයි ඔය අතර පාවෙන තව සැට් එකක් සිටී.. ඒ ජවිපෙ වැනි සුළුතර පක්ෂ වල අනුගාමිකයෝය. ඔවුන් විශේෂයෙන්ම පාවෙන්නේ ජනාධිපතිවරණයේ දී ය. ඒ ඔවුන්ට පාවෙනවා හැර වෙනත් විකල්ප නැති නිසා ය. නරකම කරුණ නම්..  මන්ත්‍රී වරු ලෙස තක්කඩියන් තේරීමේ වරද ජනතාව පිට පැටවීමයි.. එහෙත් ඇත්තෙන්ම එයට වගකිව යුත්තේ පක්ෂ නායකත්වයයි.. තක්කඩියන් පිරිසක් අතුරින් තෝරා ගැනීම ජනතාවට භාර කළ පසු.. ජනතාව අනිවාර්යයෙන් ම තෝරනුයේ තක්කඩින් පිරිසකි.. මන්ද යත් තක්කඩින් නොවන පිරිස් .. තෝරන ලැයිස්තු වල නොමැති නිසාය. සාපේක්ෂව හොඳ ලැයිස්තුව නිතරඟයෙන් ජවිපෙ වුව.. 71 හා 89 දී ජනතාව ඔවුන් කෙරෙහි ඇති කරගත් පිළිකුල හා අකැමැත්ත තවමත් පවතින නිසා.. ඔවුන්ගේ ලැයිස්තුවට තවමත් ලැබෙන්නේ කුඩම්මාගේ සැලැකිළි ය. 

ඔක්කොම කුණු බෙංගාල බොක්කටය කියා දේශපාලකයාට පස් පඩංගුවේ බණින ජනතාව ගේ කිල්ලෝට වල ඇති හුණු ප්‍රමාණය දේශපාලකයාට දෙවැනි වෙතැයි මට නම් නොසිතේ.. ජනතාව සුචරිතවාදී නොවනතාක් දේශපාලකයා සුචරිතවාදී නොවන අතර.. එහි විලෝමය ද සත්‍ය වේ. අනෙක් අතට වත්මනෙහි ආගමික නායකවරුන්ගේ දුර්වලතා හා වැරදි හැසිරීම් නිසා ද ජනතාව ගුණ දහමින් පිරිහී ඇත. 

පසෙකින් දේශපාලකයා ද, පසෙකින් ආගමික දේශකයා ද, පසෙකින් පාදඩ දොස්තරලා ද, පසෙකින් බාල ටෙලි ද, පසෙකින් අඳබාල නිවේදකයින් ද,  පසෙකින් තිරිසන් ගුරුවරුන් ද, පසෙකින් රැඩිකල් ය කියන ලේඛකයින්, පදරචකයින්, ගායකයින්, සිනමාවේදීන් ඇතුළු කලාකරුවන් ද, පසෙකින් ඉහළ තනතුරු හොබවන නිලදරුවන් ද ඇතුළු මේ සමාජය ම මේ සමාජය විනාශ කරමින් සිටී..

හරියට වලිගෙ පැත්තෙන් කාගෙන එන සර්පයා වගේ ය. 
ඉතින් අපට විකල්ප නැත්තේ ය. ඇත්තේ නම් ඒ මොත්තේ ය. මේ නම් සත්තේ ය.. කූඩුවත් අරං.. අප පියා හැඹිය යුත්තේය..

Wednesday, August 15, 2018

පඬුපුල් ආසනේ..

උණුවෙනවා උණුවෙනවා ඉවරයක් නෑ කියලා ගලෝලා පැත්තකට විසි කරලා තිබුණ පඬුපුල් ආසනේ.. ළඟපාත තිබුණ කුෂන් කඩේකින් අලුතින් කුෂන් කරවගෙන කාරිය සක්කර දෙයියෝ ආපහු සිය සුපුරුදු වැඩ පිළිවෙල පටං ගන්ටෝනි කියලා හිතුවෙ.. පහුගිය කාලෙ තමන්ගෙන් ඉටු නොවුණු රාජකාරි ආයෙත් පටං ගන්ට ගැම්මක් හිතට ආපු නිසයි...

හයිකරලා ටික වෙලාවක් ගියත්.. උණු නොවුනෙ.. මේක හරියට වැඩ කරන්නෙ නැද්ද කියලා දෙයියන්ට හිතුණු නිසා එයා වහාම එයාගෙ තාක්ෂණික නිලධාරියාට කතා කළා.. කාලෙකින් පඬුපුල් ආසනයක් එක්ක හැප්පෙන නිසා තාක්ෂණික නිලධාරියා මේ දවස් වල පඬුපුල් ආසනේ අත්පොත කියවමිනුයි උන්නෙ.. දෙයියන්ගෙන් කැඳවීමක් ආවම.. හීන්දාඩිය දැම්ම ටෙකා පස්වාන්දහසකට සමාව අවසරයි මයෙ දෙයියො.. මොකද්ද ප්‍රශ්නෙ කියාගෙන දෙයියො ළඟට ගියා.. නෑ මේ පඬුපුල් ආසනේ වැඩ කරන්නෙ නැද්ද කොහෙද පොඩ්ඩක් බලපන්කො.. සක්කර දෙයියො ආමන්ත්‍රණය කළ සුහදශීලී ස්වභාවය නිසා ටෙකා ගෙ බය පොඩ්ඩක් අඩුවුණා.. මූලික කාරණා පරීක්ෂා කරපු ටෙකා මේකෙ කිසිම අඩුවක් දැක්කෙ නැති හින්දා ඒ බව සක්කරයට කිවුවා..

ඔය අතරෙ.. සභාව මැද්දෙන් ඇවිත් පඬුපුල් ආසනයෙ.. ලොක්කා වගේ වාඩි වෙන ගමන් "අප්පට සිරි අලුත් පුටුවක් අරං තියෙන්නෙ" කියලා මොර දුන්නෙ වෙන කවුරුවත් නෙවෙයි වයිමා..

තාත්තටත් ඉතිං මං මොනවා හරි ඉල්ලුවොත් මහා භාණ්ඩාගාරෙ ප්‍රස්න.. මං මේ කසි කබල් ෆෝන් කට්ටක් එක්ක විඳින වදේ.. අලුත් එකක් අරන් දුන්නෙ නෑ නෙ. එෆ් බී ගිය කාලයක් මතක නෑ..මේ විදියට අඳෝනාව කියං යද්දි.. ටෙකා ට හෙණම අවුල්.. වෙන මොකවත් නොවෙයි .. මෙච්චර දුකට පත් වෙච්ච එකෙක් ළඟ පාතම ඉඳලත් මේ ඉලවුව වැඩ නොකරන එකට.. බැහැපිය පඩත්තලයා ඕකෙන් කියමින් ඉදිරියට පැන්න සක්කරයා.. දුන්න පයිං පාර වැදුණේත්.. පඬුපුල් ආසනේට..  යකෝ පෘතුවියට ගිහිං ෆෝන් එකක් අරං එනකොට..ඒවා අවුටොප් පැසන් වෙලා.. කියාගෙන ආපහු පඬුපුල් ආසනේ වාඩි උනා..

මෙන්න රත්වෙනෝ.. මෙන්න රත්වෙනෝ... කියාගෙන සංතෝෂෙන් උඩ පැන්න සක්කර දෙයියො.. බැලුවා මොන පැත්තට ද ප්‍රශ්නෙ යොමු වෙලා තියෙන්නෙ කියලා.. හත්තිලවුවෙ.. ප්‍රංශෙට..
මොකද්ද කියලා බැලුවම.. ප්‍රංශෙ පාරකට තමන්ගෙ පුතා බීපු කිරි පැකට් එකක් විසිකරනවා දැකපු වයසක අම්මා කෙනෙක්ට පැසර් නැගලා.. සක්කරයා ටක් ගාලා පොඩි දෙයියෙක්ව පිටත් කරලා.. කිරි පැකට් එක ආපහු අර පුතා ගෙ අතටම දුන්නම.. දීලා දඩ කොලයක් දුන්නම.. ටක් ගාලා ආසනේ නිවුණා.. ආයෙත් ඉතිං ෆුල් කූල්..
ටෙකෝ .. මොකෑ බං.. මේක මෙච්චර පුංචි ප්‍රශ්න වලටත් රත් වෙන්නෙ.. ? සක්කරයටත් තියෙන ප්‍රශ්න..
දේවයන් වහන්ස.. ඔය පොලිතීන් අප ද්‍රව්‍ය පරිසරයට මුදාහරින එක දැං බරපතල අපරාධයක්.. ඒකනෙ ඕක රත්වෙන්නෙ.. හප්පට .. එතකොට අම්මට පැසර් වැඩි වුණු එකට නෙවී ද බං?
ඉතිං කොලුවො.. ඔය පොලිතින් පරිසරයට මුදා හරින එක නම්.. ලෝකෙ පුරාම දරුණුවට සිද්ධ වෙනවනෙ... එහෙමනම් ඒවට පත්තු නොවෙන්නෙ ඇයි? පොඩ්ඩක් බලපන් ආයෙමත් සිස්ටම් අවුලක්වත්ද කියලා?
හරිනෙ.. මේකෙ ඩිටෙක්ටිං ස්විච් එක දාලා තියෙන්නෙ ප්‍රංශෙ ට නෙ.. 
ඒක තමයි.. දාපං ඕක සිලෝන් එකට..
සුවර් ද දේවයන් වහන්ස..?
ඇයි උඹ එහෙම අහන්නෙ?
නෑ..මේකෙ සෙන්සර් එක ආයෙ යයිද?

පහුගිය කාලෙ සිලෝන් ඒරියා එකේ දුක් ගැනැවිලි වලට රත් වෙලා වැඩි වුණු පාර තමයි ඔය පුටුව අතෑරලා දාලා තියෙන්නෙ.. ඒත් ඉතිං.. දැං කොටි ප්‍රශ්නත් ඉවර නිසා.. යහපාලනයකුත් තියෙන නිසා.. තමයි .. සක්කරයාට ආයෙත් ආසාවක් ආවෙ.. පුටුවෙ වාඩි වෙන්න.. සිලෝන් කියලා ස්විච් එක මාරු කරපු ගමන්.. පුටුව රත් වුණා රත්විල්ලක්.. සක්කරයා උඩ විසික්කා වෙන්න..

හප්පට.. පුටු කේස් එකක්.. බස්නාහිර පළාත් සභාවෙන් පඬුපුල් ආසන වගයක් ඕඩර් කරලා කියන්නෙ.. සක්කරයා ටක් ගාලා පොඩි දෙයියෙක්ව යැවුවා.. සරල ජනපති ගාවට.. පත්තරේකුත් අරගෙන.. වැඩේ ශේප්..
ඒත් පුටුව රත් වෙලා..
ඒ පාර.. කෝච්චි ඉස්ටැයික්..  හරි හරි.. ඒකත් අර පත්තරේ ම තිබිලා.. වැඩේ ශේප්..
තාම පුටුව රස්නෙයිනෙ..
මොනාද බං මේ ලිස්ට් එකක් එන්නෙ..?
සැප වාහන, මන්ත්‍රී දීමනා, කැලෑ වැනැසීම්, බැඳුම්කර මගඩිය, දොස්තර වර්ජන බ්ලා.. බ්ලා.. බ්ලා..
දාපං.. ආයෙත් ස්විච් එක ප්‍රංශෙ ට..

Thursday, July 26, 2018

පුළුවන්නම් බැණපල්ලා

            
ආදර කකුළුවනි මේ ටිකඅහපල්ලා
යා හැකි දුරක් ඇද නැතිවම පලයල්ලා
ආරය වෙනස් විය හැකි බවපවසල්ලා
තේරුණෙ නැතොත් කට වහගෙනහිටපල්ලා
  
රස කොට දෙසුව බණ පදයක්අහපල්ලා
අහලා බණේ දෙකණින් පිටකරපල්ලා
බලපිය රටට යන කල එයරැකපල්ලා
රජෙකුට යටහත්ව සදහටඉඳපල්ලා
  
මිටි තැන මුව හමක් ගෙන තඩිබාපල්ලා
උස් තැන් ළඟ දි මුව ගල් වලඋලපල්ලා
කපුවා යවන පඩ සුවඳයි සිතපල්ලා
දෙයියන් බුදුන් සිහිකොට දැන්දුවපල්ලා
  

Thursday, June 14, 2018

අප්පච්චි..


මීට අවුරුදු 38කට විතර ඉස්සර දවසක මට හොඳටම තැලුවලු.. ඒ මං නැකතට අකුරු කියෙවුවෙ නෑ කියලා.. මට ඒක මතක නෑ.. ඒත් ඊට පැය ගානකට පස්සෙ ආදරෙන් කතාකරපු ලොකු බාප්පත් එක්ක අකුරු කියන්න කැමැත්ත පළ කළා මතකයි.. ඒක රාහු කාලෙ ලු.. කොහොම වුණත්.. අප්පච්චි ඔය තරම් නිච්චියටම නැකැත් සෑස්තරේ වත් දෙයියන්වත් විශ්වාස කරපු කෙනෙක් නෙවේ ලු ඉස්සර.. ඒත් දරුවන් ගෙ දේකදි එහෙමවත් අවදානමක් ගන්න අප්පච්චි අකැමති වෙන්නැති..
මං උපන් ගෙයි දඟ මල්ල වෙද්දි අක්කා සුවච කීකරු දියණිය වුණු නිසා.. අප්පච්චි අක්කට වැඩියෙන් ආදරෙයි වගෙයි මට දැනුණෙ.. අප්පච්චි මට වැඩි වැඩියෙන් තරවටු කරද්දි.. මං වැඩි වැඩියෙන් දරදඬු වුණා... අප්පච්චි කවදාවත් මගේ ලෝකෙ වීරයෙක් වුණේ නෑ.. මට අවුරුදු 25ක් විතර වෙනකම්.. කොටින් ම.. අප්පච්චි දැඩි ලෙස අවංක වීම පවා මං දැක්කෙ.. දුර්වලතාවයක් විදිහට.. ඒත් යම් අවස්ථාවක.. මට අප්පච්චිගෙ හොඳ ගතිගුණ පෙනෙන්න ගන්නවා..
අවංක කම වගේ ම වෙලාවට වැඩ කිරීම, කවි කම වගේ හුඟාක් ගතිගුණ මට නිසඟයෙන් හිමි වෙලා තියෙන්නෙ අප්පච්චිගෙන් කියලා මට දැනුණ දා අප්පච්චි මගේ ලෝකෙ වීරයෙක් වෙනවා.. මං පුංචි අනතුරකට මුහුණ පෑ වෙලාවෙ වගේ ම අප්පච්චි ඊට ටිකක් වැඩි අනතුරකට මුහුණ පෑ වෙලාවෙ.. අප්පච්චි මටත් .. මං අප්පච්චිටත් කොයි තරම් ආදරෙයි ද කියලා මට දැනෙන්න ගන්නවා..
අක්කා හෝ මං කියා වෙනසක් නැතිව .. අපි දෙන්නට ම අප්පච්චි එක වගේ තමන්ට කරන්න පුළුවන් හැම දෙයක්ම කරද්දි මට හිතෙනවා අපරාදෙ පොඩි කාලෙ අප්පච්චි ගැන එහෙම හිතුවෙ කියලා.. ඒත්.. එතැන් සිට වසර ගනණාවක් ගතවෙද්දි වුණත්.. අප්පච්චි මටත් මං අප්පච්චිටත් යුතුකම් ඉටු කළා මිස.. අපි අතර අන්‍යෝන්‍ය අවබෝධයක් තිබුණේ ම නැති තරම්.. ඒ වගේ ම මගේ යටිහිත ඒ වන තුරුත් හිටියේ අප්පච්චිගේ උපදෙස් එසැණින් ප්‍රතික්ෂේප කරන තරම් උඩඟුවෙන්.. ඒක ඇඟටම කාවැදිලා තිබුණා..මට තනියෙම තීරණ ගන්න පුළුවං කියන අධි මානය මට තිබුණා වගේ ම.. මට තනියෙම තීරණ ගන්ට බෑ කියලා අප්පච්චි හිතාන උන්නා..
පහුගිය වසර 8 ක කාලය තුළ අප්පච්චිගේ සෞඛ්‍ය තත්වය බලා ඉඳිද්දී පිරිහුණා.. අප්පච්චි තනිවම ගමන් බිමන් යෑම නතර වුණා.. ඉඩම පුරා ඇවිදීම නතර වුණා.. ගේ ඇතුළේ තනියෙම ගමන් කිරීමත් අඩු වුණා..
මගේ දරුවන් ලොකු වුණා.. සමාජය මාව ගෘහ මූලිකයා විදිහට සලකන්න ගත්තා.. මගේ යාළුවො ඇවිත් කතා කළේ මාත් එක්ක..  අප්පච්චිත් එක්ක කතා කළත් වච්නයයි දෙකයි.. අපි වුණත් අප්පච්චිත් එක්ක සතුටු සාමීචියට ගියේ අඩුවෙන්.. අපේ අවිවේකය වගේ ම තවත් පුංචි පුංචි හේතු තිබුණා..
අප්පච්චි හැම කෙනාත් එක්කම ඉතා කුළුපගව කතා කරපු.. හැමෝට ම උපදේශන සපයපු කෙනෙක්.. මානසිකව මේක හුඟක් දැනෙන්න ඇති..
ශරීර සෞඛ්‍යය හොඳට ම පිරිහිලා තිබුණු අප්පච්චිගෙ මානසික සෞඛ්‍යයත් හදිසියේ ම පිරිහෙන්න ගත්තා.. එය බලා ඉන්නැද්දී සිදු වුණා.. ළඟ මතකය මුලින් නැති වුණා.. කතාවත් අඩු වුණා..
අද මගෙ ආදරණීය අප්පච්චි ජීවත් වන මළ මිනියක් ගානයි.. හැම දේම කරන්න වෙලා තියෙන්නෙ අපිට.. තවම අප්පච්චිට 75යි..
ආදරණීය යළුවනේ.. ඔයාලගෙ දෙමවුපියොත්.. තවම හොඳ සිහි කල්පනාවෙන් ඉන්නවා නම්.. ඔවුන්ගේ වයස 60 ට වැඩි නම්.. ඔවුන් සමඟ වෙනදාට වඩා කතා බහ කරන්න.. යාළුවනේ.. ගෙවල් වලට ගිහාම වයසක අම්මලා තාත්තලා ඉන්නවා නම්.. ඔවුන් එක්ක වචනයක් කතා කරන්න.. ඒක ඔවුනට හුඟක් වටිනවා.. හුඟාක්..

Wednesday, April 11, 2018

අලුත් අවුරුද්ද ..

  නෑදෑයෝ එකා දෙන්නා හරි මුණගැහෙන්ට ඉඩක් ලැබෙන.. පවුලේ අය එක්ක තුටු පහටු වන්නට ඉඩක් ලැබෙන කාලයකි.. ඉස්සරට වඩා දැන් අලුත් අවුරුද්දේ වෙනසක් ඇත.. එදා තරම් අවුරුද්ද අලුත් නැත.. හැම දේ ම අපි කරමු.. ඒත් එහි කිසිම ස්වභාවික ගතියක් නැත..
ජීවිතය එපා කරවන්නේ පූර්ව අලුත් අවුරුදු සමය (ම) යි. නෝනලා ඇඳුම් හොයන්නට සාප්පු පුරා දුවද්දී.. ක්‍රෙඩිට් කාඩ් වල බිල් ගෙවන්නේ කෙසේදැයි සාප්පුවේ පඩියක වාඩි වී කල්පනා කරන මහත්තුරු එමට ය. පුස්සිටියට ගොහිං එලියට එද්දී හිතෙන්නේ අවුරුද්දෙන් පස්සෙ පුස්සිටි වහනු ඇතැයි කියා ය. ලොරි බාගයක් නොගෙනාවේ අපරාදේ කියා ය.
රත්ඤ්ඤා මරහඬ නිසා අවුරුදු දින වල කසාද බැඳ අවුරුදු ගනං ඇස්පීරියන්ස් තියෙන අප වැනි පිරිමි කෙසේ වෙතත්..  අන් අය සිටිය යුත්තේ කන් වල ඇඟිලි ගහගෙන හෝ පොරොප්ප මූඩි ගහගෙන ය.

නොනගතයට පෙර බඩ පැලෙන්ට කා.. අවුරුදු ලබන තුරු.. කැවුම් කොකිස් කකා තේ බිබී කාලය ගත කිරීම අපේ විනෝදාංශයයි.. අලුත් අවුරුදු නැකතේ දී නැවත බඩ පැලෙන්ට කන අපි කන්ටම උපන් ජාතියකැයි විටක සිතෙයි...

ඒ කාලේ නම්.. ළිඳත් එක්ක ගනුදෙනු කළත්.. අද ගනුදෙනු කරන්නට එහෙම හිත හොඳ ලිං නැති නිසා.. පවුලේ අය සමභ ම ගනුදෙනු කිරීම අපේ ක්‍රමය වුවත්.. වැරදිලාවත් බැංකුවකට ගියහොත්.. එය සඳුදා නිවාඩු පිට අඟහරුවාදාටත් වඩා පිරී ඇති බව දැක ගත හැක.. ඒ අතින් බලන විට.. මිනිස්සු පට්ට සල්ලි කාරයෝ යැයි සිතෙන්නේ ඔවුන් පැමිණ සිටින්නේ මුදල් තැන්පත් කිරීමට මිස මුදල් ඉවත් කර ගැනීමට නොවන නිසාය.
ඉස්සර මිදුලේ අඹ ගහේ ඔන්චිල්ලාව බඳිතත්.. දැන් මිදුලේ යකඩෙන් තැනූ ඔන්චිල්ලාවක් තිබේ.. අඩුවකට ඇත්තේ ඒවා පදින්නට ළමයින් ය.
ක්‍රිෂ්ණා, ශිවා හෝ සූටිං මාටිං ඇත්නම්.. ළමයින්ට හැමදා අවුරුදු ය.
මල් වවද්දී අවුරුදු කාලෙට පිපෙන එරබදු, මැයි මාසෙට පිපෙන මැයි මල් වගේ සීසොනල් මල් ටිකක් වවන්නට මගේ ආසාවක් ඇත්තේ.. සීසොන් වෙනස් වෙද්දී ඒක අපට තේරෙන එක මරු නිසාය.. අපට එරබොදු මල් නැතත්.. කොහා ඉන්නවා ය කියා හිත හදාගන්නට හැකි වීම අප ලද භාග්‍යයක්ය. මැයි මල් නොතිබුණාට.. ගං වතුර එන නිසා.. අපට මැයි මල් වල අඩුවක් ද දැනෙන්නේ නැති ය..
ඔක්කෝමත් හරි ය.. අලුත් අවුරුදු උස්සවත් හරි ය.. මුලින් ම ආධාර ඉල්ලන්ට කොල්ලෝ කුරුට්ටෝ විඩෙං විඩේ .. එයි. ඉන්පසු උස්සවේ තියෙයි.. සැඟැවුණු අමුත්තා හොයයි.. ගස්ලබ්බේ ඇට ගාණ හොයයි.. ඔය වාගේ අටෝරාසියක් සෙල්ලම් ය.. ඒ අතර.. කඹ ඇදීම, කණා මුට්ටිය බිඳීම, ලිස්සන ගහේ  නැඟීම වැනි සම්ප්‍රදායික අවුරුදු ක්‍රීඩා තවමත් පැවැතීම සතුටු දායකය. අවුරුදු කුමාරි තේරීම එහි තිබෙන නරකම අංගයක්යැයි මට හිතේ..

ඔය ක්‍රීඩාවලට නොදෙවෙනි ක්‍රීඩාවක් අවුරුදු දා ක්‍රියාත්මක වෙයි.. ඒ කෑම පිඟන් ගම වටා යැවීමේ ක්‍රීඩාවයි.. බොහෝ විට එහි ජයග්‍රාහකයින් වන්නේ බල්ලන්, පූසන් හා ලේනුන් යැයි සිතෙන්නේ .. එම කෑම පිඟන් වල ඇති දෑ අවසන හිමි වන්නේ ඔවුනට බැවිනි..

අවුරුද්ද මැද්දේ එන අලුත් අවුරුද්ද.. දැහැමින් සෙමෙන් සමරන එක අපේ යුතුකමය. ආර්ථික අමාරුකම් ගැන කියා.. ආණ්ඩුවට බැනීමෙන් වත්.. තමන් ගේ පුරාජේරුව ෆේස්බුක් දැමීමෙන්වත් සිදුවන සෙතක් නැත.. සරලව සැහැල්ලුවෙන් ගත කිරීම තරම් විවේක කාලයකින් ලද හැකි ප්‍රයෝජනයක් මා නොදන්නා නිසා.. ඉදිරි දින වලදී ඒ සඳහා කැපවීම සුදුසු බව ඔබ හැමට ආදරයෙන් නිර්දේශ කරන්නේ චතුර විජේකෝන් වන මම ය.

Monday, March 26, 2018

ක්‍රෙඩිට් කාඩ් වලට අහු වුණාද?

ඔබත් ක්රෙඩිට් කාඩ් එකක් භාවිත කරන්නෙක් ද? මාසය අවසන සම්පූර්ණ මුදලම නොගෙවන අයෙක් ද? එසේ නම්.. නිකරුණේ ඔබ අදාල බැංකුව හෝ සමාගම පොහොසත් කරන්නෙකි.

අද කාලයේ ක්‍රෙඩිට් කාඩ් භාවිතය සමාජයේ සුලභ වී ඇතිවාක් මෙන්ම එය ඉතා ප්‍රයෝජනවත් බවට සැකයක් ද නැත. එහෙත් ඔබගේ මාසික බිල සම්පූර්ණයෙන් නොගෙවූ විට අසාධාරණ පොළියක් ඔබෙන් අය කරන බව ඔබ තවම නොදන්නවා විය හැක.. මා මේ කියන්නේ වාර්ෂික ව 24% ක් පමණ වූ පොළී අනුපාතිකය ගැන නොවේ.. ඔවුන් පොළිය ගණනය කරන ක්‍රමවේදය ගැනයි.. එම ක්‍රමවේදයට අනුව.. ඔබට ගෙවන්නට අතපසු වූ මුදල රුපියලක් හෝ ශත පණහක් විය හැක.. එහෙත්.. ඔබ භාවිතා කළ මුළු මුදලට ආසන්න ප්‍රමාණයකට ඔබට පොළී ගෙවන්නට සිදුවේ.. දැනට අත්දුටු පරිදි.. ප්‍රධාන බැංකු  තුනකම (නේෂන්ස් ට්‍රස්ට්, සම්පත් හා සෙලාන්)  එසේ ය.  පහත දැක්වෙන්නේ මා මුහුණ දුන් එවන් අවස්ථා කිහිපයකි.

උදා: 1.සෙලාන්..
පෙබ. 25 දිනට පෙර ගෙවීමට තිබූ මුදල (රු) ==> 25,107.38
පෙබ 22 ගෙවූ මුදල (රු) ==> 25,100.00
හිඟ මුදල (රු) ==> 7.38
මාර්තු 05 ලැබුණු බිලෙහි එක් කර ඇති.. පොළී මුදල (රු)==> 573.49

උදා: 2. නේෂන්ස් ට්‍රස්ට්
මාර්තු. 05 දිනට පෙර ගෙවීමට තිබූ මුදල (රු) ==> 63,502.27
පෙබ 19 ගෙවූ මුදල (රු) ==> 25,000.00
පෙබ. 28 ගෙවූ මුදල (රු)==> 38,500.00
හිඟ මුදල (රු)==>2.27
මාර්තු 16 ලැබුණු බිලෙහි එක් කර ඇති.. පොළී මුදල (රු)==> 922.57

උදා 3: සම්පත්
2017 අගෝස්තු 08 දිනට හෝ ඊට පෙර ගෙවීමට තිබූ මුදල(රු) ==>28,265.21
2017 අගෝස්තු 08 දින ගෙවූ මුදල (රු) ==> 28,000.00
හිඟ මුදල (රු) ==>265.21
2017 අගෝස්තු 16 ලැබුණු බිලෙහි එක් කර ඇති පොළී මුදල(රු) ==>754.14

බිල්පතෙහි සඳහන් අවම මුදල ගෙවීමෙන් පමණක් සෑහෙන ඔබ මෙන් ම.. සුළු ගණනක් හෝ හිඟ තබන ඔබ ද.. ක්‍රෙඩිට් කාඩ් පිරිනමන බැංකු වල ගසා කෑමට ලක්වෙයි.. මේ ගැන දැනුවත්ව ක්‍රෙඩිට් කාඩ් භාවිත කර..වාසි අත් කර ගන්න..


Sunday, February 25, 2018

කඩමාල්ල

ඉර ට කළින් මුළුතැන්ගෙයි වැඩ අල්ලද්දී නුඹ
පරණ ගවුං කඩමල්ලක් ඇන්දෙත් මොහොතක් සිඹ
ඒ සුවඳේ මොන අඩුවද සිතමින් හුස්මක් පිඹ
වළා සිනාවක් දිසි තද හිරු රැස් අතරින් නුබ

පුංචි කාලෙ අපේ කඳුළු හා කුණු දහඩිය පවා
හිත් රිදුණම නුඹ දෙනෙතින් වැගිරුණු මුතුවැල් පවා
එළවලු, මස්, බිත්තර හා දෙහි, ලුණු, තුනපහ පවා
ගවුමේ තව තිබුණා අප බිවු කිරි වල රහ පවා

අවුරුද්දට අලුත් ගවුම් මං අරගෙන දෙන්නම්
ඒ ඇඳගෙන වන්දනාවෙ එක්කරගෙන යන්නම්
ආදරයෙන් අම්මේ එක වරයක් ඉල්ලන්නම්
පරණ ගවුම හැඳ එනු එහි හිස සතපන් ඉන්නම්

Thursday, December 14, 2017

සතුටින් යන්න

ඔබ ඇත සයනක වැතිරී දුක සේ
දිනයක යනු ඇත අතහැර නිසි සේ
කලකදි වින්දත් සැප හැම රිසි සේ
දුරකය එම දේ ඇති හුදු මනසේ

හැම දෙයකට නිසි කල එළඹෙනවා
ඔබ මා වෙන් වන දිනකුදු එනවා
මැවි මැවි පෙනෙනා මතකය පිනවා
සමු ගන්නෙද කෙලෙසක සිත දනවා

පැරදුමකුයි හදවතට දැනෙන්නේ
මම ඇයි යන ඔබ මෙහි නවතන්නේ
වැඩකට නොවැ මෙහි එන්නේ යන්නේ
එයටනෙ ජීවිතයයි පැවසෙන්නේ

යන තැනකට ඔබ සතුටින් යන්න
එහි ඇති බොහො අය ඔබ පිළිගන්න
අප ගැන තව වැඩි දුර නොසිතන්න
බැරි නැත ළඟදිම යළි හමුවෙන්න

Friday, December 8, 2017

බයිට් වූ කලා කරුවෝ..

ටික කලකට පෙර එක්තරා රූපවාහිනී නාලිකාවක තිබුණු එක්තරා වැඩසටහනකින් සිදු කළේ.. කලාකරුවන් වෙත අහඹු ලෙස කඩා පැන.. ඔවුන් නොසිතූ නොපැතූ දේවල් සිදු කර.. ඔවුන්ගේ ප්‍රතිචාර වලට සිනා වීමයි.. ප්‍රෑන්ක් යනුවෙන් අන්තර්ජාලයේ එවැනි දෑ ඇති තරම් ඇත. කෙසේ වෙතත්.. මෙහිදී කලාකරුවා නොදැනම .. නොමිලේ ම බයිට් වේ.. මෙයට එරෙහිව නැඟී සිටියේ දක්ෂතම ප්‍රහසන නළුවෙකු වන මිහිර සිරිතිලකයි.. නොමිලේ බයිට් විය නොහැකි බව ඔහු කියා සිටියේ ය..

මට මෙය මතක් වූයේ ඊයේ පෙරේදා කරලියට පැමිණ ඇති.. පිංපොං ඇතුළු නඩයේ රණවිරු කතන්දරය නිසාය.. ඇත්තෙන්ම මේකත් බයිට් වීම පිළිබඳ කතන්දරයකි.. අද කාලයේ කලාකරුවෝ.. නොමිලේ බයිට් වීමට කැමති නැත. 
පිං පොං ඇතුළු නඩය ට ගෙවන්නට ඇත්තේ ඒ බයිට් වීම උදෙසා ය. මට ඒ සමඟ පැන කිහිපයක් මතුවේ..
ජැක්සන්ලා වැනි අයට ගෙවුවේ කෙසේ ද?
නොගෙවුවා නම් ඔවුන් නොමිලේ ම බයිට් වුණා ද?
ඔවුන් බයිට් වු බව ඔවුන් නොදැන සිටියා ද?

යනු ඒවාය.
කොහොම වුණත්.. උන් පවු ය..මුදලට හෝ නිකම්ම ඔවුහු බයිට් වූහ.. අපි ඊටත් පවුය.. මන්ද උන්ට ගෙවා ඇත්තේ අපේ මුදලිනි..

Tuesday, November 28, 2017

අදින් හෙටට

ඉස්සර මං උසස් පෙළ කරන කාලෙ.. මං අවිස්සාවේල්ලටත් හැතැක්ම දෙකක් විතර එහායින් නෙ හිටියෙ.. ඉස්කෝලෙ තිබුණෙ.. කොල්ලුපිටියෙ ඉතිං උදේ පාන්දර ගෙදරින් පිටත් වෙනවා.. සඳුදට නම්.. පාන්දර හතර හමාරට.. අනෙක් දවස් වලට පාන්දර පහයි කාලට විතර.. දැං වගේ.. අවිස්සාවේල්ලෙ ඉඳං පාසැල් බස් තිබුණෙ නෑ ඒකාලෙ.. (අපි අයින් වෙන කාලෙ තමයි පටං ගත්තෙ.. ). ඉතිං කොහොම හරි.. මං බස් එකට නැග්ගට පස්සෙ.. ඉඳගෙන ඉන්න කාට හරි පොත් බෑග් එක දෙනවා.. බොහොම සුහද සිනහවකුත් දාලා.. ඒ කාලෙ ඉතිං දන්නවනෙ .. වැඩිම වුණොත් පොත් තුන හතරයි තියෙන්නෙ.. එක දවසක් මේක දුන්නු කෙනා.. ඒක ප්‍රතික්ෂේප කළා.. ළමයි වුණාම බෑග් එක අරං යන්න පුළුවන් වෙන්න ඕනලු.. එයාලගෙ කාලෙ.. ඔහොම කාටවත් කරදර කළේ නෑ ලු.. එයාලා ගොඩක් මහන්සි වෙලා ලු ඉස්කෝලෙ ගියේ.. ආදී වශයෙන්.. කතන්දර ගොඩක්.. 

තමන් මහන්සි වෙලා යම් දෙයක් ලබා ගත්තා නම් ඒක හොඳයි.. ඒත් එහෙමයි කියලා තවත් කෙනෙකුත් .. ඒ මහන්සියම යොදවලා එය ලබා ගන්ට ඕනියි කියලා හිතන එක මොන වගේ තත්වයක් ද? බුදු හාමුදුරුවො එහෙම හිතුවා නම් එහෙම.. :D රහතන් වහන්සේලා ට ත්  ඉස්සෙල්ලා.. දුෂ්කරක්‍රියා එහෙම කරලා.. එන්ට වෙයි.. :D 

අපි බස් වල පැය 2-3 දුක් විඳගෙන ඉස්කෝලෙ ගියේ.. ඒත් අපේ දරුවන්ට ඒ දුක දෙන්ට හොඳ නෑ කියලයි අපි නම් හිතන්නෙ.. එකාතකට.. දුක් විඳීමෙන් ලැබෙන පන්නරය ළමයින්ට අහිමි වෙනවා තමයි.. ඒත්.. ජීවිතය කියන්නෙ එහෙමයි.. ලෝකෙ අලුත් වෙනවා.. ඕනම ක්ෂේත්‍රයක අලුත් අය පටං ගන්න ඕන පරණ අය නවත්තපු තැනින්.. පරණ අය විදිහට ම ඉගෙන ගෙන .. යම් දෙයක් ඉදිරියට ගෙනයන්න පුළුවන් ද කියන එක ගැටළුවක්..

Wednesday, October 4, 2017

ඡන්ද මෙච්චර ඕනම ද?

 පසුගිය වසර 8 ක පමණ සිට මෘදුකාංග අලෙවිකරුවන් වන අප අප ආයතනයේ විකිණුම් දත්ත විශ්ලේශනය කිරීමේ දී පෙනී යන කරුණක් වන්නේ.. පහත කාල වලදී අපගේ මෘදුකාංග සඳහා වන ඉල්ලුම ඉතා පැහැදිලිව පහල බසින බවයි..
1. ඡන්දයක් ප්‍රකාශයට පත් කළ දින සිට ඡන්දය පැවැත්වී සතියක් පමණ ගත වන තෙක්..
2. අලුත් අවුරුදු නිවාඩුව සහ නත්තල් නිවාඩුව ආශ්‍රිත දින වල.
මෙහිදී ඡන්දයක බලපෑම දීර්ඝ කාලයකට බලපවත්වන බව පැහැදිලිය. මෘදුකාංගයක් ස්ථාපනය කිරීම ආයෝජනයකි. අපගේ නිශ්පාදන මිළ දී ගන්නේ ලංකාවේ පවතින ආයතනයන්ය. මෙවන් කාල වලදී ආයතන වල ආයෝජන ක්‍රියාවලිය අකර්මන්ය වන බව මෙයින් පැහැදිලි වේ. මෙය රටෙහි සමස්ථ ආර්ථික ක්‍රියාවලියට ම බලපාන බව රටෙහි නීති හදන්නන්ට නොවැටහීම කණගාටුවකි.
අපේ රටේ ප්‍රධාන වශයෙන් ඡන්ද වර්ග කිහිපයක් ඇත.
1. ජනාධිපතිවරණය
2. පාර්ලිමේන්තු මැතිවරණය
3. පළාත් සභා මැතිවරණය
4. ප්‍රාදේශීය සභා/ නගර සභා මැතිවරණය (පුංචි ඡන්දය)
1 හා 2 ඡන්ද මේ වන විට පවත්වා වසර 2ක් පමණ ගත ව ඇති අතර 3 ඡන්දය අවසන් වරට පවත්වා වසර 3-4 ක් පමණ වන්නට ඇත. දැන් ප්‍රමාද කරමින් සිටින්නේ 4 හෙවත් පුංචි ඡන්දයයි..
මේ වගේ පුංචි රටක් පාලනය කරන්නට මේ තරම් විශාල දේශපාලන ආයතන සංඛ්‍යාවක් සහ සභිකයන් සංඛ්‍යාවක් අවශ්‍ය වන්නේ ඇයිදැයි යන්න මට නොතේරුනත් මට ඇති ප්‍රධානතම ගැටළුව වන්නේ එය කරන්නට ම අවශ්‍ය නම්.. එය එක් ඡන්දයකින් හෝ දෙකකින් කරන්නට බැරි ඇයි දැයි යන්නයි.
පාලකයින් වෙනස් කිරීම හැරුණු කොට ජනතාවට ඡන්දයකින් වෙන මෙලෝ සුබසිද්ධියක් ඇත්දැයි මගේ කල්පනාවට එන්නේ නැත. නිසි ධූරාවලියක් (Hierarchy) සකස් කොට පහළ ම මට්ටමේ (4) ඡන්දයක් පවත්වා .. ඒ හරහා පිළිවෙලින් 3,2,1 යන ආයතන වලට සභිකයන් පත් කළ හැකි නම්.. ජනතා මුදල් මෙන්ම ජනතාවගේ වටිනා කාලය ද ඉතිරි කරන කටයුත්තක් වනු ඇත.

Friday, September 15, 2017

5 ශිෂ්‍යත්වයේ දක්ෂයින් කොන් වෙයි ද?



පසුගිය දා නිමා වූ ශිෂ්‍යත්ව විභාගයේ දී සුළු සුළු වැරදි සඳහා ලකුණු කැපීම සිදු වන බැවු සැවොම කලින් ම දැනුවත් ව සිටි නිසා.. සුළු හෝ වැරදි නොකරන ලෙස දරුවන්ට උපදෙස් ලැබුණි. එයට අමතරව සාර්ථකව හා ඉක්මණින් කෙටි ක්‍රම හා කට්ට ක්‍රම ද දරුවන්ට ගුරුවරුන් විසින් ලබා දුන්නේ තම තමන් ගේ පූර්ව අත්දැකීම් ද උපයෝගී කර ගනිමිනි.


නිවැරදි පිළිතුරට යටින් ඉරක් ගසන්නට ඇති විට.. දිගු ඉරක් නො ඇඳ, කෙටි ඉරක් ඇඳීමට උපදෙස් දුන්නේ ද සාමාන්‍යයෙන් තිතක් නොවන තරම් ඉරක්.. පිළිතුර ලෙස භාර ගැනීම සාමාන්‍ය ක්‍රමය බව පවසමිනි. එහෙත් මෙවර දෙවන ප්‍රශ්න පත්‍රයේ දී.. එම උපදෙස පිළිපැදි දරුවන් අනාථ කර ඇත. එහිදී උපදෙස් දී ඇත්තේ පිළිතුරු අංකයට යටින් පමණක් ඉරි ඇඳි විට එය පිළිතුර ලෙස භාර නොගන්නා ලෙසයි.

මෙමඟින් දරුවෙකුට අහිමි විය හැකි ලකුණු ගනණ 30 කි. ප්‍රශ්න පත්‍රයේ උපදෙස් අතර වත් එවන් උපදෙසක් නැතිව.. පරීක්ෂාවේදී එවන් රීතියක් පැනැවීම කොයි තරම් අසාධාරණ දැ'යි අමුතුවෙන් කිව යුතු නැත.

දරුවන්ගේ දක්ෂතාවය මනිනවා වෙනුවට මෙවන් අමන රීතීන් හරහා දරුවන්ගේ ලකුණු අඩු කිරීම හරහා සිදුවන්නේ සැබෑ දක්ෂයින්ට පසුබෑමටය. එමඟින් සිදු වන්නේ හොඳයැයි සම්මත පාසැලකට යාමට අහිංසක, සාධාරණ දෙමවුපියන්ගේ දක්ෂ දරුවන්ට ඇති එකම අවස්ථාව ගිලිහී යෑමයි..

ප්‍රශ්න පත්‍රයේ ගනණක තිබූ වරදක් ද හඳුනාගෙන එයට හැම දරුවාට ම අදාල ලකුණු ප්‍රමාණය හිමි කර දීමට තීරණය කර ඇති බව ඇසුවෙමි. එය ඉතා හොඳ තීරණයකි. 

ඒ ආකාරයට මෙම ප්‍රශ්න 30 නැවත සමීක්ෂණය කළ හැකි නම් එය දරුවන්ට කරන බලවත් සාධාරණයක් වනු ඇත. 

වගකිව යුත්තන්ගේ දෑස් මේ කෙරෙහි යොමු වී මෙම දරුවන්ට සාධාරණයක් ඉටු වේවායි පතනවා හැර අපට කළ හැකි වෙනත් කිසිවක් වේදැයි අඩමාන ය.

Thursday, August 17, 2017

Google Voice Typing - සිංහලෙන් දාගත්තද?


සිංහලෙන් කතා කරද්දි ලියවෙන ඇප් එකක් ගූගල් එකෙන් හදලනෙ.. ෆේස් බුක් එක බැලුවාම ඉතිං මේකෙ වරුණෙ හැම තැන ම තිබුණා.. විශේෂයෙන් අපේ මල්ලි කෙනෙක් මට පණිවුඩයකුත් එවලා තිබුණා ඒ ගැන කියැවෙන මෙන්න මේ වීඩියෝව බලන්න කියලා.. නලීන් අයියත් පෝස්ටුවක් දාලා අවවාද කරලා තිබුණා.. ආයෙ.. සිංග්ලිශ් එහෙම ලියන්න එපා කියලා.. :D 



ඒත් ඒ වීඩියෝවෙ තිබුණු විදිහට GBoard කියන ඇප් එක Install කරගත්තාට.. ඒකෙන් කිසිම සෙතක් වුණේ නෑ.. ඒ කියන්නෙ  Voice Typing කියන Function එක හරියට වැඩ කළේ නෑ.. මං හිතුවෙ Phone එකේ අවුලක්වත් ද කියලයි.. ටිකක් වෙලා  එක එක ඒවා කරද්දි.. ඔන්න Voice Typing ප්‍රශ්නෙ නම් හරි ගියා.. ඒත් ඉතිං සිංහල වැඩ කරන්නෙ නෑ.. ඒ වගේ ම Voice Typing හරි ගියෙ කොහොමද කියලා හරි හමං අදහසකුත් නෑ.. ඉතිං ඕක ටිකක් හොයලා බලද්දි තමයි දැන ගත්තෙ.. ඒක වෙන්නෙ..(Voice Typing නැතිවෙන්නෙ හෙවත්  Keyboard එකේ recording Icon  එක නැති වෙන්නෙ)  Google Apps කියන App එක disable උනාමයි කියලා.. මං ඉස්සර දවසක.. ඕක  disable කළා.. නිකං මෙමරියට වද දෙන නිසා.. අද නිකමට වගේ ඒක enable  කළානෙ මේ අවු අස්සෙ.. ඒ වුණත් තාම හිතට හරි නෑ තවම සිංහලෙන් ලියැවෙන්නෙ නැති නිසා.. 

ඔය අතරෙ මට හමු වුණා.. තව සරල වීඩියෝවක්..



ඇත්තටම මේ Video එකේ ඉතා හොඳින් Configurations වෙනස් කරගන්න හැටි කියලා දෙනවා.. මගේ අවාසනාව ද මංදා.. ඔය ටික කළත්.. වැඩේ පත්තු වුණේ නෑ.. පස්සෙ මම .. GBoard ඇප් එක uninstall කරලා .. reinstall කළා.. ඊට පස්සෙ ආයෙමත් ඔය උඩ තියෙන Configurations ටික හදා ගත්තා.. දෙයියන්නෙ පිහිටයි කියලා.. මෙන්න බඩු වැඩ.. 

ඉතිං මං මේක ඔයාලත් එක්ක බෙදා ගන්න හිතුවෙ.. ඔයාලත්.. මේක දාගන්ට ගොහිං මේ වගේ අපහසුතා වලට පත් වුණාද දන්නෙ නැති නිසා..වගේ ම පස්සෙ කාලෙක මට අමතක වුණොත් බලාගන්ට.. කට්ටක් කාලා වුණත් දාගන්ට වටින ඇප් එක..


Friday, July 21, 2017

එක් කලෙක..

මුව මුවග මිමිණීම්
මඟ සිහින විමසීම්
ගී සුරල් සුගැයීම්
රස කතා නිමැවීම්

පතට බත් රොක් වීම්
පොර ට වැද පැරදීම්
තරඟයට බොරු කීම්
නොසිතු ජය පැන් බීම්

සොඳුරු සිත් ඇගැයීම්
හොරට ගල් ඇහිඳීම්
දුක හිතෙන කොන්වීම්
ඇත නොයෙක රැවටීම්

හද දවන සමු දීම්
තද ලොවට මුසුවීම්
කණ පිට ම හැරවීම්
සොඳුරු ම ය සිදුවීම්

Wednesday, July 12, 2017

බැරිදා විග්‍රහය! අපි කවුරුද?

මදුරුවන් හපා කෑම නිසා සියොළඟ ම කහඹිලියා ගෑවුණු සෙයක් දැනෙද්දී..වහා ඇඳෙන් මෑත්ව මදුරු දඟරය නිවී ඇති දැයි බැලීමි. නැත මදුරු දඟරය තවමත් දැවෙයි.. වහා නැඟිට වෙලාව බැලූ විට වේලාව තවමත් පාන්දර දෙක ට පමණ වූ නිසා විකල්ප උපක්‍රමයක් වන පැඟිරි තෙල් - හඳුන් කූරු උපක්‍රමයට යෑම පළක් නැති නිසා දෙවන විකල්පය හෙවත්.. කුරුඳු තෙල් උපක්‍රමය* වෙත යොමු වීමි. පුතු ගේ දැඟලීම නිසා ඔහුට පෙරවූ රෙද්ද ද ඉවත් වී සිරුර නිරාවරණය වී තිබුණෙන්.. (පළක් නැති බව දැන දැන ම) එය නැවත පෙරවීමි. මදුරු කරදරය නිමා වූවද පැතු පරිදි නින්ද මා වෙත ලඟා වූයේ නැත. ඒ වෙනුවට කල්පනා-සිහින ලෝක අතර සැරිසරන්නට වීමි.
සඳුදා උදයේ දිරන නොදිරන ලෙස වෙන් කළ කුඩා කුණු මළු දෙක විදුලි ආලෝක කණුව යට තැබුවේ.. සඳුදා උදයේ නගර සභාවෙන් කුණු රැගෙන යන බැවින් වුවත්.. හැන්දෑ වන විට.. එම කුණු දසත විසිරී තිබුණේ.. බල්ලන් විසින් ඇද දැමීම නිසාය. අප සිටින්නේ කුඩා අතුරුපාරක නිසා.. කුණු ගෙන යන වාහනය.. අප සිටින නිවෙස් ඉදිරිපිට ට පැමිණෙන්නේ නැත. එසේ පැමිණියa නම් අපට ද තරමක් ලොකු ප්‍රමාණයේ බඳුන් තබා..ඒ තුළ ට කුණු දමා උඩින් ලොකු ගල් ගෙඩියක් තබන්නට තිබුණි. නමුත් පහන් කණුව යට ලොකු බඳුනක් තැබුවේ නම්.. අපේ පාරෙන් ගෙනෙන කුණු එම බඳුනට දමන්නට තිබුණි.. එහෙත් නිසි කලට කුණු නොගෙනියන එකට එයින් තටු ලැබෙනු ඇත.. පිළිතුරු ඇත්තේම නැති ප්‍රශ්න තිබෙන්නේ අපේ රටේ පමණක් දැයි විටෙක සිතේ. ගැටළුව මිනිසුන් ගේ ය. වැරැද්ද ද මිනිසුන්ගේ ය. යන්ත්‍ර සූත්‍ර හෝ සතා සීපාවා මීට පලි නැත. මදුරුවා හැසිරෙන්නේ.. මදුරුවාගේ ක්‍රමයටය.. බල්ලා .. බලු ක්‍රමයට හැසිරෙයි.. මිනිසුන් වන අප හැසිරෙන්නේ මිනිසුන් විදිහට නොවීම ද මේ ගැටළුවට මුල?
පාරකට ටොපි කොළයක් තරම් දෙයක් නොදැමිය යුතු බව, කෙළ පිඩක් නොගැසිය යුතු බව අප පාසැල් යන කාලයේ දී ද උගෙන ඇත. ඒත් ඊට වසර විසි ගනණකට පසුව ද, අපේ මිනිසුන් ඒ දේ පිළිපදින්නේ නැත. ඒ අතින් බලන විට අපේ වැඩ .. කකුළුවන් මෙනි..
ප.ලි
* කුරුඳු තෙල් උපක්‍රමය - කුඩා බඳුනකින් අඩකට පමණ ජලය පුරවා.. කුරුඳු තෙල් බිංදුවක් දමා හොඳින් කලවම් කර .. විදුලි පංකාවේ සුළඟට මුසු වන ආකාරයෙන් තැබීම.
* පැඟිරි තෙල් - හඳුන්කූරු උපක්‍රමය - හඳුන් කූරක් ගෙන පැඟිරි තෙලෙන් පොඟවා දැල්වීම. හඳුන් කූර පැයකට මඳක් වැඩි කලකදී දැවී නිම වීම මෙහි ඇති ගැටළුවයි.

Thursday, May 18, 2017

අපට හුප්පේ!

මල් යටට යාවේ
කළු ගල් ජලයෙ පාවේ
ගොළුවන් කතාවේ
අඳ අයත් ටෙලි සුවයෙ නෑවේ


හොර මැර තක්කඩින්
ඉහළය කිවොත් ලුහුඬින්
දුරුවල අපෙ හඬින්
අවදි වෙති ටින් එකේ සාඩින්

බුදු බණට හුරුවා
යහපත ගරුව සරුවා
අය පදින ඔරුවා
හිල් කරති දස අතින් මරුවා

රජ මැදුරු සරුය
සිටු ඇමති වරු හොරුය
වනන්නෙම බොරුය
ලැබෙන වාහන ටිකත් මරුය

විභාගෙට කොප්පේ
ගහපු අය අපෙ අප්පේ
නිතර ඒරොප්පේ
උගත්, වෙහෙසෙන අයට හුප්පේ



Friday, May 5, 2017

බැරිදා විග්‍රහය! නිදහස් අධ්‍යාපනය.


ලංකාවට නිදහස් අධ්‍යාපනය හඳුන්වා දුන්නේ .. සී. ඩබ්. ඩබ්. කන්නංගර මැතිතුමා බව අප උගෙන ඇත. එහෙත් ඒ ලබා දුන්නේ නිදහස් අධ්‍යාපනය ම ද? යන පැනය මා සිතෙහි නිබඳව නැගෙන්නකි. අධ්‍යාපනය නිදහස් නම් තමාට කැමති කලෙක නියාමනයන්ට යටත්ව කැමැති විෂයයක් ඉගෙන ගැනීමේ ආවස්ථාව තිබිය යුතුයැයි මට සිතෙයි. ඉහත කී නියාමනයන් සැපිරීමට ප්‍රමාණවත් වටපිටාවක් තිබීම ද ඉතා වැදගත්ය. උදාහරණයක් ලෙස වියදම සැලකුවහොත්.. එකී වියදම උපයා ගැනීමට සාධාරණ ක්‍රම වේදයන් සමාජය තුළ ස්ථාපනය වී තිබීම ඉතා වැදගත් ය. නියමිත වයස් සීමාව ඉහළට ගෙන ඒමෙන් එකී වියදම ඉපැයීමට කාලය ලබා දෙනු ඇත. එහෙත් අපට එබඳු අයිතීන් නැති නිසා.. ලංකාවේ ඇත්තේ හුදෙක් නොමිළේ අධ්‍යාපනයක් පමණකැයි මා සිත තර්ක කරයි.

මා අධ්‍යයනය කැර ඇති ඇතැම් චරිත වල ඉගෙන ගැනීමේ හැකියාව උපරිම තලයකට පැමිණ ඇත්තේ වයස 20-30 අතර හෝ.. ඊටත් පසු ය. ඊට පූර්වයේ ඔහු ගේ හැසිරීම සහ එතෙක් උගත් දෑ එයට අත්වැලක් නොවන්නේ යැයි මම නොකියමි. එහෙත් ස්වකීය කැමැත්ත ඔස්සේ අධ්‍යාපනය සඳහා අවස්ථාව තිබීම නිදහස් අධ්‍යාපනය ලෙස මම දකිමි.

මෙහිදී අධ්‍යාපනය ලබා දීම සඳහා මුදලක් වැය වීම පැහැදිලිය. එකී අධ්‍යාපනයට යන පිරිවැය දැරීමට නොහැකි අය ට අත්වැලක් වීම රජය සතු යුතුකමකි. කන්නන්ගර මැතිතුමා සියළු සිසුන් සඳහා ඉහත කී පිරිවැය රජය විසින් දැරීමට භාර ගැනීමෙන් අධ්‍යාපනය සඳහා නිදහසක් ලබා දුන් බව සැබෑවකි. එහිදී ඉගෙන ගන්නා සිසුන් වරින් වර විභාග නම් පෙරණයෙන් පෙරා අවසන සීමිත සිසුන් පිරිසකට පමණක් සරසවි වරම් උරුම වන්නට නියමිත විය. එහෙත් උසස් පෙළ යන්තමින් සමත් හෝ අසමත් අයෙකුට අධ්‍යාපනයෙන් ඉහළට යෑමේ අවස්ථා රජය සපයා ඇත්තේ අවම වශයෙනි. තාක්ෂණික ආයතන සහ විවෘත විශ්ව විද්‍යාලය ඒ සඳහා බිහිවූ රජයට අනුබද්ධ ආයතන වේ. කෙසේ වෙතත් මේ සියල්ලෙන් වුව සිසුන්ගේ අධ්‍යාපන අවශ්‍යතා ඉල්ලුම සපුරා ලිය නොහැකි නිසා ටියුෂන් පංතියේ සිට පෞද්ගලික විශ්ව විද්‍යාල දක්වා වූ පෞද්ගලික අධ්‍යාපන සේවා සැපයීමේ ක්‍රමවේදයන් ද නිර්මාණය වී ඇත. එයින් ද ඉල්ලුම සැපිරිය නොහැකි නිසා පිටරට වල විශ්වවිද්‍යාල කරා ගොස් අති විශාල පුද්ගලික වියදමක් දරා වුව ඉගෙන ගැනීම සිදු වෙයි.

මෙහිදී වෛද්‍ය වෘත්තිකයෙකු වීමේ අරමුණෙන් උසස් පෙළ හදාරා වෛද්‍ය විද්‍යාලයට සුදුසුකම් නොලබන සිසුනට ශ්‍රී ලංකාව තුළ එය ලබා ගත හැකි ක්‍රමවේදයක් නැති කම මා දකින අඩුවකි. ඒ සඳහා ඔවුහු පිට රට යා යුතුය.

හොඳින් නියාමනය කළ හා පරීක්ෂාවට බඳුන්වන පුද්ගලික වෙද සරසවියක් මෙයට හොඳ විසඳුමකි. දැන් සයිටම් ඇත.. අවශ්‍ය වන්නේ නියාමනය හා පරීක්ෂාවයි..

මූලික සුදුසුකම්, වයස, අය කිරීම, ගුරුවරු, ඉගැන්වීම, උපකරණ, පුහුණුව, විඟාග වැනි කරුණු නිසි ලෙස නියාමනය හා පරීක්ෂාවට බඳුන් කිරීම කරතොත් සමාජයට යහපත් ප්‍රතිඵලයක් ලබා ගැනීමට මෙන්ම නිදහස් අධ්‍යාපනයට තල්ලුවක් දීමටත් හැකි වනු ඇත.

Thursday, March 9, 2017

දේශපාලකයා හා අපේ දේශපාලනය..


දේශපාලකයා කී සැනින් අපගේ හිතට නැඟෙන්නේ ප්‍රාදේශීය සභා, පළාත් සභා, පාර්ලිමේන්තු ආදියේ ඉන්න සහ ඒවාට තරඟ කරන.. සහ ඔවුනට කඩේ යන හාදයින් පිරිසයි.. මේ සියළු දෙනා සෘජුව හෝ වක්‍රව.. ඉහත කී ආයතන වලින් යැපෙන හෝ වාසි ප්‍රයෝජන ගන්නා පිරිස වෙති..

ඉහත කී පිරිස හැර ඉතිරිය ප්‍රතිශතයක් ලෙස ඉතා ඉහළ අගයක් ගන්නකි.. එහෙත් අප රටට පිරිසිදු දේශපාලනයක් නොහොත්.. පිරිසිදු දේශපාලකයන් පිරිසක් හඳුන්වා දීමේ අපහසුවක් පවතින්නේ කිම.. ?

මේ පැනය මා සිතේ නැඟුනු වාර ඉමහත්ය.. එහි ප්‍රධාන වරද ජනතාව හෙවත්.. ඉහත කී දේශපාලකයන් නොවන අයගේ තකතීරු කම හා නොහික්මුණු කමයි.. දේශපාලකයන්ගේ බොහෝ ව්‍යාපෘති ක්‍රියාත්මක වන්නේ.. රජයේ නිලධාරීන් හරහා ය. දේශපාලකයා රජයේ නිලධාරියාව මිටින් අල්වා සිටින විට උන් දේශපාලකයාට ගොට්ට අල්ලයි.. දේශපාලකයා එසේ නොකර තම බැමි ලිහිල් කළ විට.. නිලධාරියා ජනතාව මිටින් අල්වා.. දූෂණ ක්‍රියා සිදු කරයි.. ජනතාව එක්කෝ දේශපාලන ගැත්තන්ට.. නැතිනම්.. නිලධාරී ගැත්තන්ට.. පගාව දී වැඩ කරගන්නට පුරුදුව සිටිති..

මා හට ද මේ ආකාරයෙන් පගා දෙන්නට හෝ දේශපාලකයන් පස්සේ යන්නට අවස්ථා කීපයක් ජීවිතයේ උදා වී තිබේ.. ඉන් පළමුවැන්න.. රැකියාවයි.. එහිදී.. ඉහත කී කාරණා දෙකට ම මවු පියන් විසින් උත්සාහයක් ගත් නමුත්.. වාසනාව තිබුණෙන්.. මගේ රැකියාව මගේ හැකියාවෙන් ම උපයා ගැනීමට මට හැකි විය.. ඊළඟ ගැටලුව ආවේ.. මගේ දරුවන් පාසැල් යවන්නටය.. මාගේ බිරිඳගේ එකඟතාවය ද ලැබුණෙන්.. දේශපාලකයන්ගේ හෝ දූෂිත නිලධාරීන්ගේ පසු පස නොයා පුද්ගලික පාසැල් වලට දරුවන් ඇතුළත් කළ හැකි විය. දේශපාලකයන් ඉදිරියේ මඳකට වත් හිස නොනමන්නට තරම් ගර්වයක් මා සිත තුළ පවතින්නේ එනිසාය..

මගේ දේශපාලනය නම්.. රටේ පවතින කවර හෝ අසාධාරණයක් වැරදියි කියා දැකීමයි.. කවර හෝ හොඳක් හොඳයි කියා දැකීමයි..

ඔබ අතින් .. මීට පෙර.. ඉහත කී ආකාරයේ වැරදි සිදු වී තිබෙන්නට පුළුවන.. ඉදිරියටවත්.. මොවුනට ගොට්ට නො අල්ලා.. පගාව නොදී ඉන්නට හැකි නම්.. ඔබ දූෂිත ක්‍රමයට විරුද්ධව නිහඬ සටනක නිරත වූ බව හඟිමි..

Wednesday, March 8, 2017

වින්ඩෝස් 7 ශෙයාරින් වල පාස්වර්ඩ් ඕෆ් කරන්නෙ කොහොමද? How to off Password Protected Sharing in Windows 7

වැඩිය තාක්ෂණික ලිපි නොලියන මට තාක්ෂණික ලිපියක් ලියන්ට හිතුනෙ.. මට වෙච්චි අවශ්‍යතාවයකට පිළියම හොයාගත්තම අනිත් අයටත් ඕනෙ වෙයි කියලාත් මට වුණත් අනාගතේ දි ඕන වෙයි කියලාත් හැඟුන නිසා.. 

කාරණේ මේකයි.. අපේ ආයතනයට අලුතින් පරිගණකයක් ගත්තා.. ඒකට ස්ථාපනය කළේ.. Windows 7 කියන Operating System එක. අපට අවශ්‍ය වුණා.. හැම දෙනාටම වගේ අවශ්‍ය වන Files කිහිපයක් Folder එකකට දාලා Share කර ගන්න. ඉතිං දන්න ක්‍රමයට Folder එක Share කළාට.. වෙනත් පරිගණකයක ඉඳං ඒ Folder එකට ඇතුළු වෙන්න ගිහාම User Name එකක් සහ Password එකක් අහනවා.. මට මතක් වුණා මීට ටික කාලෙකට ඉස්සර මගේ ලැප් වහන්සේ ට Windows 7 දාලා තියෙන වෙලාවකත් ඔය විදිහෙ ප්‍රශ්නයක් ඇවිත්.. කොහෙ හරි සෙටිංස් වගයක් මාරු කරලා වැඩේ ගොඩ දාගත්තා කියලා.. ඒත් ඒ ක්‍රමේ එක පාරට මතක් වුණේ නෑ.. සෑහෙන වෙලාවක් ගත කළාට පස්සෙයි වැඩේ ගොඩ දාගත්තෙ.. මෙන්න මේකයි කරන්න තියෙන්නෙ..

1. යන්න Control Panel එකට
2. එතනින් යන්න  Network and Sharing Center එකට
3. එතන වම් පැත්තෙන් තෝරගන්න.. Change Advanced Sharing Settings.
4. එතන තිබෙන මාතෘකා වල පහලට යද්දී.. File and Printer Sharing යටතේ.. Turn on file and printer sharing යන්න තෝරා ඇත්දැයි බලන්න.. (මේක මගේ එකේ නං තෝරලයි තිබුණේ)
5. තවත් පහලට යද්දී.. Password Protected Sharing කියලා එකක් ඇති. ඒක on  වෙලයි ඇත්තෙ. off  කරලා දැම්මා නම් වැඩේ ඉවරයි..
6. දැං ඉතිං Save කරන්න..

හ්ම්.. පුංචි ලිපියක්..

Tuesday, March 7, 2017

ඔබෙ ගුණ කීමට හෝඩියෙ අකුරු මට මදී

අද මට විශේෂ දවසක්.. මගේ ආදරණීය මෑණියන්ගේ උපන්දිනය.. උදේම සිත FM දැම්මා.. ඒකෙ මේ සිංදුව ගියා..

දුනුකෙයියා මලක් වගේ දුරට පෙනෙනවා
වැටකෙයියා මලක් වගේ සුවඳ හමනවා
පසලොස්වක සඳ වාගේ එළිය ගෙනෙනවා
මගෙ අම්මා මට ජීවන සුවය සදනවා

සංසාරෙන් සංසාරෙට එකට ආ බැඳී
කෙනෙක් නොමැත දරුවෙකු හට මවක සේ ලැදී
අම්මා යන සමාධියට සිටිමි සමවැදී
ඔබෙ ගුණ කීමට හෝඩියෙ අකුරු මට මදී

සිවු බුදුවරු දුටු ලෙස එක දිනයක පිම්මේ
ඔබ දුටුවම මගෙ දුක් ගිනි නිවෙනවා අම්මේ
සක්විති රජවරුනගෙ දණ ඔබ ළඟ නැම්මේ
සිරිමා බෝ මුල මතු දින බුදුවනු අම්මේ..

ඔරිජිනල් එක සුජාතා අත්තනායක මහත්මිය කිවුවත්.. අද ඇහුණෙ පොඩි දරුවෙකුගෙ හඬින්.. ප්‍රේමකීර්ති නම් අති විශිෂ්ඨයා ගේ පබැඳුමක්... මා මීට පෙරත් කියා තියෙනවා.. මා අම්මා ගැන ලීවෙ හරි අඩුවෙන්.. මං හිතන්නෙ.. ප්‍රේමකීර්ති කියපු විදිහට.. හෝඩියෙ අකුරු මදි නිසාම වෙන්ටැති..

සිත FM එකට.. සුජාතා.. ප්‍රේම් දෙපළට.. අද ගායනා කළ දරුවට.. වගේ ම මෙම ගීතය විකාශයට දායක වුණු හැමෝටම පිං.. අද මගෙන් කෙරෙන්න ඕන දෙයක් මං වෙනුවෙන් කළා ට..

ප.ලි.
අන්තර්ජාලයේ හොයලා බලද්දී ප්‍රේමකීර්ති මහතා ගේ නමත්. හේම ශ්‍රී ද අල්විස් මහතා ගේ නමත් තැනින් තැන තිබෙනවා.. ඉතිං කවුරු වුණත්.. මේක ලියපු කෙනාට පිං අයිති වේවා.

Thursday, November 17, 2016

බැරිදා විග්‍රහය! කල්ලි

අපේ රට නිරන්තරයෙන්.. ක්‍රමිකව හා ඉතා සීග්‍රයෙන්.. ආක්‍රමණය කෙරෙමින් පවතී.. එය සිදුවන්නේ විවිධ ආකාරයට ය.
1. දේශපාලන කල්ලි
2. පාතාල කල්ලි
3. ආගමික අන්තවාදී කල්ලි
4. ජාතිවාදී කල්ලි

ඔවුහූ තම ආක්‍රමණය විවිධ ස්වරූප හා විවිධ මං ඔස්සේ දියත් කරති.. මෙකී කල්ලි අතර අපූරු සහ සම්බන්ධතා ද පැවතීම ජුගුප්සාජනකය. මේ කල්ලි වලට මැදි නොවී නිදහස් මිනිසුන් අතලොස්ස .. තම තමන්ගේ හිතවතුන් එකී කල්ලි වලින් මුදවා ගැනීමට කෙතෙක් උත්සාහ දැරුවද එයින් පළක් නොවේ..
පළමු කල්ලි දෙක එළිපිට රටේ හා ජනතාවගේ දේපොළ සොරකම් කරමින් හා මංකොල්ල කමින් තම ආක්‍රමණය දියක් තරන අතර අනෙකුත් කල්ලි ජනතාවගේ මනස් විකෘති කරමින් සිය ආක්‍රමණය දියත් කරති..
ගැලැවුම ඇත්තේ.. ප්‍රජාතන්ත්‍රවාදයේ සීමා සහ සැබෑ නිදහස ගැන සමස්ථ ජනතාවෙන් වැඩි පිරිසකට තේරුම් ගත හැකි වූ විට ය.
මීට වසර දෙකකට පමණ පෙර අතිශය දරුණු කල්ලියක දේශපාලන බලය නිම කොට තවත් දේශපාලන කල්ලියකට බලය ලබා දීමට ජනතාව සමත් විය.. එයින් අමු අමුවේ පාදඩකරණයට ලක්වූ නීතිය හා සාමය තව දුරටත් පවතින බවට සියුම් විශ්වාසයක් ජන හදවත් හී ඇතිවුණි. යහපාලනය ක්‍රියාත්මක කිරීමට කියා පැමිණි මෙකී කල්ලියට මෙන්ම ජනතාවගෙන් සැලකිය යුතු පිරිසකට ද යහපාලනයක සැබෑ වුවමනාවක් මෙන්ම සැබෑ අවබෝධයක් ද නොතිබුණු බව මොනවට පැහැදිලි වන්නේ ක්‍රමක්‍රමයෙන් නැවත එළිබැසගත්.. ඉහත කී කල්ලිවාදී ආක්‍රමණ වලට එරෙහිව ක්‍රියාත්මක (නො) වූ ආකාරයෙනි.
විශේෂයෙන් ම.. පසුගිය දශක කිහිපයක හෝ ඊටත් පෙර සිට කාලයක් තිස්සේ ම මුස්ලිම් අන්තවාදය ක්‍රමක්‍රමයෙන් වර්ධනය වන අයුරු දැක ගත හැකි විය. එයට එරෙහිව සිංහල බෞද්ධ අන්තවාදයක්ද වරින් වර මතු වුවද එය පැවති රජයෙන් ඔවුන්ට එරෙහිව ද ක්‍රියාත්මක වූයේ නැත. ඒ අතින් බලන විට ඔවුන් දෙගොල්ලන්ටම එතරම් වෙනසක් කර නැත.. එහෙත් අන්තවාදය ට පවතින්නට ඉඩ දුන් බව අමතක නොකළ යුතුය..
නව රජය පත්වූ පසු..ලද හැම විට ම.. සිංහල බෞද්ධ අන්තවාදී කොටස් මර්ධනය කරන්නට පෙළඹුනි.. එය සැබවින්ම අගය කළ යුතුය.. එහෙත්.. ඊට සමගාමීව එකී අන්තවාදයට හේතු වූ මුස්ලිම් අන්තවාදයට එරෙහිව අබැටක තරම් පියවරකුදු ලබාගැනීමට උනන්දුවක් නොදැක්වීය.. එය සැබැවින්ම පුදුමාකාර ලෙස සමාන දෙපිරිසකට දෙවිදිහකට සැලකීමකි.. අපට අවැසි එක රටකි.. එක නීතියකි.. අන්තවාදය මුස්ලිම් ද, සිංහල ද යන්න අදාළ නැත.. ඔවුන් මර්ධනය කළ යුතුය..

Thursday, November 10, 2016

ඒ නමින් අපි දිවුරමු..

Photo: සුවහසක් පැතුමන් දරා
මා සමඟ පියවර තැබූ
එදින සිට අද තුරා සිටියේ
රැල්ල හා වෙරළත ලෙසයි..
සොඳුර එය මහමෙර සමයි..

ටිකක් පැතුමන් ඉටු වුණා
හුඟක් සුසුමින් වැළලුණා
අලුත් සුළගින් පන්නරය ගෙන
අපිත් තව මුවහත් වුණා
දිනත්, වයසත් ගතවුණා..

උපන් දිනයෙහි සැමරුම
යෙදෙන පින්බර අද දින
සතුට හෝ දුක නොවේ ඇත්තේ
කල්පනාවයි හෙට ගැන
ඒ අපේ දරුවන් ගැන..

දුරු ව ලෙඩ දුක් දොස් හැම
පැතිර තුට සහ සැනසුම
දිනේවා මතු සදා සුරැකී
ඔබේ ඔය මිනිසත් කම
එයයි ඔබ සතු සම්පත..

මතුත් සසරෙහි හමු වෙමු
හැකි වුණොත් අපි එක් වෙමු
එදාටත් අද වගේ සොඳූරිය
හැබෑටම මිනිසුන් වෙමු
ඒ නමින් අපි දිවුරමු..




Saturday, August 20, 2016

රියැදුරු බලපතක් ලබා ගන්ට අමාරුද?

පහුගිය කාලෙ කරදර, ඉන් පස්සෙ වැඩ රාජකාරි.. එක පිටට ආපු හින්දා.. මං බ්ලොග් ලියන බවත් මට අමතක වෙන තරමට ම මං බ්ලොග් කෙරුවාවෙන් ඈත් උනා.. ඉඳලා හිටලා ලිපියක් එහෙම කියෙවුවා උනත්.. අනෙක් අයගෙ බ්ලොග් වලටත් ගොඩවුණේ අඩුවෙන්..

පහුගිය දවසක මගේ තරුණ බාල සහෝදරයෙක් එක්ක කතා කර කර ඉන්නකොට.. තමයි මේ ලිපිය ලියන්ට ඕන කියලා හිතුණෙ.. 


අපේ රටේ.. රජය මඟින් ලබා දෙන බොහොමයක් සේවාවන් තියෙනවා.. ඒවා හරියට ජනතාව අතරට ගිහිං නෑ.. ඒ කියන්නෙ.. ජනතාව දන්නෙ නෑ .. ඒ සේවාව ලබා ගන්නෙ කොහොමද කියලා. 

මං මගේ රියැදුරු බලපත මුලින්ම ලබා ගත්තෙ.. මට අවුරුදු 21 පිරුණට පස්සෙ.. ඒ.. කියන්නෙ 1998 දි.. ඒ බරවාහන බලපත ම ලබා ගන්ට ඕන නිසා.. ඉතිං සැහැල්ලු.. බර.. බයිසිකල්.. ආදී සියල්ල සපිරි... බලපතක් මං ලබා ගත්තෙ.. මං ඒක ලබාගත්තෙ.. "ලර්නර්ස්" එකක් හෙවත් රියැදුරු පුහුණු ආයතනයක් හරහා ඉදිරිපත් වීමෙන්.. හැබැයි .. මං ලොකු පුහුණුවක් ගත්තෙ නෑ.. දවස් 4-5 න් වැඩේ ෂේප් උනා.. මොකද.. මං ගෙදරදි බයිසිකල් සහ සැහැල්ලු වාහන පුරුදු වෙලයි එතනට ගියෙ.. ආයතනයෙ අයිතිකරු.. අපේ අප්පච්චිගෙ යාළුවෙකුත් වෙච්ච නිසා.. රුපියල් 3,500 ක් වගේ මුදලකට.. මේ සම්පූර්ණ ලැයිසොම ගන්ට ලැබුණා..

ඒ කාලෙම මට අහන්න ලැබුණා.. ප්‍රාදේශීය ලේකම් කාර්යාලය හරහා.. සැහැල්ලු වාහන සඳහා රියැදුරු බලපත්‍රය ඉල්ලුම් කරලා ලබාගන්න ක්‍රමවේදයක් තියෙනවා කියලා.. කොහොම උනත් ඒ ගැන එතනින් එහාට සොයන්න මට අවශ්‍ය උනේ නෑ.. ඒත් කාලෙකට පස්සෙ.. කීප දෙනෙක් ගෙ මැසිවිලි මට අහන්න ලැබුණා.. ලර්නර්ස් එකෙන් වැඩිපුර සල්ලි ගත්ත බවට
එග්සැමිනර් විසින් ට්‍රයල් හිතුමතේ ෆේල් කරන බවට..

අලුත් ම කතාව තමයි අපේ මල්ලිගෙ කතාව.. එතනදී එයාත් .. ලර්නර්ස් එකකට වැඩි ගානක් ගෙවලා.. ඒ ලර්නර්ස් එකෙන්.. එයාට අවශ්‍ය පහසුකම් හරියට සලසපු නැති එක ගැනත්.. මේ විදිහට ලයිසන් ගන්ට නම්.. වඩාත්ම හොඳ විදිහ වේරහැර ප්‍රධාන කාර්යාලයට යන එක බවත් තමයි මල්ලිගේ අදහස උනේ..

ඉතිං හොයලා බලද්දි.. ලැයිසොම ගන්න.. වේරහැර ප්‍රධාන කාර්යාලයෙන් වගේ ම තවත් දිස්ත්‍රික් කාර්යාල කිහිපයකුත්.. අනෙක් දිස්ත්‍රික් කාර්යාල වලිනුත් පුලුවන් කියලා මෙන්න මේ පිටුවේ තියෙනවා.. පුහුණුව තියෙන කෙනෙකුට සාමාන්‍යයෙන් යන මුදලෙන් පහෙන් පංගුවක් වගේ මුදලකට මේ වැඩේ කරගන්ට පුළුවං වෙන ලකුණු තමයි පේන්ට තියෙන්නෙ..

ඉතිං නිකං ඉන්ට එපා... ලහි ලහියෙ ලැයිසොං ගන්ට..!

Thursday, June 30, 2016

චරිත වලට ආදරය කිරීම


මා මුලින්ම ආදරය කළ චරිතය වන්නට ඇත්තේ අම්මාය.. නැතහොත් අප්පච්චී ය.අත්තම්මලා, අක්කා මෙන්ම පුංචි අම්මලා, නැන්දලා, මාමලා සහ බාප්පලා ද ඒ අතර සිටින්නට ඇත.. පාසැල් ගුරුවරියන්.. අසල්වැසියන්.. යහළුවන්.. යෙහෙළියන් ගේ චරිත වලට ද මා ආදරය කරන්නට ඇත.. ඒ චරිත අතර මුලින්ම මට මතකයට එන්නේ එකේ පංතිය භාරව උන්නු නාවල මිස් නමින් හැඳින්වූ ගුරුවරියයි.... ඉතා වයෝවෘද වුවත්..  කරුණාබර ඇයගේ කතා බහ තවමත් සිතෙහි ඇතිවී නැතිවී යයි.. තුනේ පංතියේ දී ඉංග්‍රීසි ඉගැන්වූ රුවනි මිස් ගේ චරිතයටද මම ආදරය කළෙමි.. ඇය ඉතා තරුණ, ඉතා ලස්සන,ඉතා කරුණාබර ගුරුවරියක් වූවා පමණක් නොව..අපට අම්මා කෙනෙකු තරම් සමීප බවක් දැක්වූ බව මට සිතේ.. අවාසනාවකට මෙන් මේ පරමාදර්ශී ගුරුවරියන් දෙදෙනාම අද මිහිපිට නැත..
ඊ ළඟට මා ආදරය කළ චරිතය.. අපේ සංගීත ගුරුතුමා.. ඔස්ටින් මුණසිංහයන් ය.. ඇත්තටම එම ආදරයේ විශේෂත්වයක් ඇත.. ඒ ආදරය ඇති වූයේ.. එතුමා මිය ගිය පසු ය.. ඒ.. එතුමාගේ චරිතය පිළිබඳව, එතුමා මිය යෑමෙන් පසුව මා ඇසූ කරුණු හා මා අත්විඳ තිබූ කරුණු සැසැඳීමකින් පසුවය..
ගාමිණී දිසානායක මහතා ගේ චරිතයට මා ඉතා ආදරය කළ බව මට සිහිවන්නේ ඔහු මිය ගිය දින මට හැඬුම් ආ බව මතක නිසා ය. එහෙත් ඩී.බී. විජේතුංග චරිතයට මම ඊට වඩා කිහිප ගුණයකින් ඇලුම් කළෙමි.. වත්මන් අගමැති රනිල් වික්‍රමසිංහ ගේ චරිතයට ද මම ආදරය කළෙමි..
දුලිප්, රෝයි, අර්ජුන, අරවින්ද, රොෂාන්, ගුරා, සනත්, මාවන්, සංගා,මුරලි මෙන්ම, අසාරුදීන්, ස්ටීව් වෝ, බ්‍රයන් ලාරා, කාල් හූපර්, විවියන් රිචර්ඩ්ස් ඇතුළු බොහෝ ක්‍රිකට් චරිත වලට ද මම බෙහෙවින් ආදරය කළෙමි..
යුද්ධය අවසානයේ.. ගෝඨා සහ සරත් ෆොන්සේකා චරිත වලට ආදරය කළෙමි..
මිතුරන් අතර.. උතුම්, පරෝපකාරී, පරාර්ථකාමී මිතුරන්ට ද අප්‍රමාණව ආදරය කළෙමි..
නිසි වයස එළැඹි කල පෙම්වතියන්ට ද විවාහයෙන් පසු බිරිඳට ද ආදරය කළෙමි..
පසුගිය ආණ්ඩු පෙරළි සමයේ විචිත්‍ර කථිකයන් වූ පාඨලී, අනුර කුමාර, ලාල් කාන්ත වැන්නන් හට ද බෙහෙවින් ඇලුම් කළෙමි..

ආණ්ඩු පිහිටුවීමෙන් පසු වත්මන් ජනපති තුමා ගේ චරිතයට ද බෙහෙවින් ආදරය කළෙමි..
මෙකී ආදරය හා ගෞරවය.. අප කරන්නේ චරිත වලට ය.. ඔවුන්ගේ අප දකින ක්‍රියාකාරකම් වලට ය.. මිය ගිය අය හැර අනෙක් බොහෝ චරිත හිමියන්.. ඔවුනට අප ආදරය කර ඇත්තේ වැරදි වැටහීමකින් බව ඔප්පු කර හමාර ය..
ඒ අතර ප්‍රධාන ම දෙදෙනා .. අර්ජුන රණතුංග සහ සරත් ෆොන්සේකා ය..
ඉතා ඉක්මණින්.. ඉතුරු දේශපාලන චරිත ටිකත්.. මගේ බලාපොරොත්තු සුන්කරනු ඇතැයි සිතේ..

මා කියන්නට ආවේ එය නොවේ..

ඉහත කී හැම තැනකම මා ආදරය කළේ ඔවුන්ගේ චරිතයටයි.. චරිත ලක්ෂණ වලටයි.. එහෙත් චරිතය මක්ක උනත් මා එක ලෙස ම ආදරය කරන දෙදෙනෙකු ඇත.. ඒ මගේ දරුවන් දෙදෙනායි.. ඔවුන් කෙසේ කොයි ලෙස හැසිරුණ ද... හදවතේ ඔවුන් වෙත ඇති ඉඩ කිසිදා නොවෙනස් වනු ඇත.. මා සිතා සිටියේ.. මා වැඩිපුරම ආදරේ කරන්නේ මගේ මවට බවය.. එහෙත් මා ආදරය කරන්නේ ද ඇගේ චරිතයටය. මවක් නම් ඈ බඳු විය යුතුය.. බිරිඳක් නම් මගේ බිරිඳ බඳු විය යුතුය..මම ඒ චරිත වලට ආදරය කරමි.. එහෙත්..දරුවන්.. මම ආදරය කරන්නේ ඔවුන්ගේ චරිත වලට නොවේ.. ඔවුන්ට ම ය..

Saturday, June 11, 2016

ජල - සසර


ඇලෙන් දොළෙන් ගඟට ගියා
ඟඟ නොබියව මූදු .........ගියා
මුහුදෙන් අහසටත් .........ගියා
පුදුමයි කන්දටත් ...........ගියා

කන්දෙන් ආ ජල ........බින්දූ
පොළොවෙහි සිසිලත් රැන්දූ
සිඳු කුස දඟ කළ .........ලන්දූ
එකමැයි නොසිතනු .....ඉන්දූ

මොහොතින් මොහොතට සැකසේ
තරමත් නොදනියි .........වෙහෙසේ
හරවත් යමකුත් .................රහසේ
ලොවටත් පුදමින් ............සැනසේ

හේතුව ඵල විලස ...................සැදී
ආ ගිය හැම තැනදි .................බැඳී
වෑහෙන පෙම ලොවට .............දිදී
ජීවය මුසු කරන ......................ලදී

කොහෙන්ද මේ තරම් වතුර
උල්පතකින් ඇදෙයි ..නිතර
කිසිදා නොම වේ ද ....නතර
සසර ඔහොම තමයි ...මිතුර

Thursday, June 9, 2016

බැරිදා විග්‍රහය ! මහින්ද කරන්නේ රනිල් ගේ කොන්ත්‍රාත්තුවක් ද?

ගිය වසරේ ජනවාරි 08 ඓතිහාසික තීන්දුවක් ගනිමින් ගෙදර යැවූයේ සදාකාලිකව රජ සැප විඳීමට සූදානම් ව සිටි මහින්ද රාජපක්ෂව ය. එතෙක්.. බොහෝ සොරුන් බලා ගන්නා අතර.. මහින්ද රනිල්ව ද බලාගත්තේය.. දැන් රනිල්ගේ වාරයයි.. රනිල් මහින්දව බලාගනී.. මොන වංගුව ගසා තිබුණත්.. රාජපක්ෂලා නිර්දෝෂී වන්නේ පුදුමාකාර ලෙසටය.. එක්කෝ නඩු යට යයි.. එක්කෝ විසිවෙයි.. ඉඳ හිට කරලියට නො එන්නේ ද නොවේ..

මහින්ද සාධකය විරුද්ධ පක්ෂයේ බලය අල්ලා ඇත.. එය සත්‍යයකි.. එහෙත්.. මහින්දට යළි බලයට එනු හැකි වෙතැයි.. මට නම් සිතෙන්නේ නැත.. රනිල්ටත් එසේ නොසිතෙන බව මට සිතෙයි.. රනිල් ට සිතෙන්නේ.. මහින්දව විශ්‍රාම යැවීම තම තක්කඩි කම්.. යටිකූට්ටු වැඩ කරගැනීමට බාධාවක් බව යැයි මට සිතෙයි.. එනිසා රනිල්.. මහින්දට බලයත් නොදී.. එහෙත්.. විශ්‍රාම යන්නටත් නොදී.. ඉන්න තැනට වැඩ කරයි.. රනිල්ට උවමනාවක් ඇත්නම්.. මහින්දව නැත්තටම නැතිකර දමන එක කජ්ජක් නොවන බවත්.. එසේ නැති කළොත්.. මෛත්‍රීට සහ ඔහුගේ පිළට ප්‍රතිවාදියාගේ ස්ථානය හිමිවන බවත් රනිල් දනී..

මහින්ද සිටින තාක්කල් මෛත්‍රීට ඡන්දය දුන් මධ්‍යස්ථ ජනතාව.. ආණ්ඩුවට විරුද්ධව මොනවා කීවත්.. ආණ්ඩුවට විරුද්ධව ඡන්දය දෙන්නේ නැත.. රවී කරුණානායක, ජෝන් අමරතුංග, අකිල විරාජ් ඇතුළු ගොං ඇමති රැළ මොනවා කළත් කීවත්.. ආණ්ඩුවට විරුද්ධව ඡන්දය දෙන්නේ නැත.. ඔවුන් ඡන්දය දෙන්නේ මහින්දට විරුද්ධවය.. මහින්ද විරෝධය විකුණාගෙන කෑමට නම්.. මහින්ද සිටිය යුතුය.. රනිල් මහින්දව රකින්නේ ඒ නිසාය.. ඒ නිසාය කිවුව්වට ඒ නිසා පමණක්ම නොවේය.. මේ නිසා ද රනිල් මහින්දව රකී.. ඒ.. මොනවා උනත් රනිල්ගේ එජාප නායක කම රැක දුන්නේ මහින්ද නිසා ය..

තමන් ගේ පුත්තු තුන් දෙනා.. තමන්ගේ නෝනා සහ තමන්ගේ මල්ලිලා දෙන්නා බේරාගන්නට මහින්දට ඕනෑ ය.. රිමෝට් එක රනිල් අතේ ය.. මේක නම් හොලිවුඩ් පිලුම් එකකට වඩා ජුගුප්සාජනක පිලුම් එකකි..

Sunday, May 29, 2016

චතුර වීරයෙක් ද?


දෙරණ ටෙලිවිෂන් එකේ පත්තරේ කියවන චතුර අල්විස් මහත්තයා.. දෙන්ඩ තැනක් තිබ්බොත් ඇට්ටි හැලෙන්ට දෙනවා.. ඔය පහුගිය දොහේ නැගෙනහිර මහ ඇමතිටත් දුන්නෙ.. ඒ ගැන ආඩම්බර වෙලා ෆේස්බුක් එකේ පෝස්ට් යනවා..
ඔය අස්සෙ ඕක දිරවන්නෙ නැති මහත්තුරු ටිකක්.. පහුගිය කාලෙ ඔය වගේ දේවල් උනාට කටක් හෙල්ලුවෙ නැති එක මතක් කරලා චතුරට කෝචොක් එකට පෝස්ට් දානවා..
ඒ වගේ ම මං දැක්කා මරා දැමූ ලසන්ත වික්‍රමතුංග මහත්තයයි.. චතුර මහත්තයයි සංසන්දනය කරලා පෝස්ටුවකුත් ගියා.. ඇත්තටම ලසන්තයි චතුරයි අහසට පොළොව වගේ.. ලසන්ත.. කවුරුත් වාර්තා කරන්ට බය වෙච්ච දේවල් බය නැතුව කළා.. චතුර.. බය වෙන්න ඕන තැං වල බය වෙලා.. සිංහයා වෙන්න පුළුවං තැන සිංහයා වුණා.. ක්‍රිකට් මැච් එකක උනත්.. අමාරුම පන්දු වලට ගහන එකාට නෙවෙයි නෙ මෑන් ඔෆ් ද මැච් හම්බුවෙන්නෙ.. වැඩිම ලකුණු ගහන එකාට නෙ.. අමාරු ම ටිකට නෙලලා.. මැච් එක ගොඩ දාගෙන එද්දි අවුට් උණොත්.. හුප්පෙ තමයි..

කොහොම උනත් චතුරලා දැංවත් ඔය විදිහට කතා කරන එක ගැන අපි සතුටු වෙන්න ඕන... කොහොම උනත්.. නියම ගානට ඔලුව අතගාලා ටොක්ක අනින්ට නම්.. චතුර.. හිරු එකේ රංගනගෙන් ටියුෂන් එකක් ගන්ට වටිනවා..

Friday, May 27, 2016

බැරිදා විග්‍රහය! වාහන එක්ක කඩවුණු පොරොන්දුව

බලයට ඒමට ප්‍රථම.. ජනපතිවරණයේදිත්.. මහ මැතිවරණයේදීත්.. අපේක්ෂකයින් විසින්.. පොරොන්දු දුන්නේ තොග ගානටය.. ජනපතිවරණයේ දුන් පොරොන්දු වලින් නම් බොහොමයක් ඉටු කරන්නට දින සියයේ වැඩ පිළිවෙල හරහා හැකි විය.. (ඒවා ප්‍රායෝගිකව රටට ඔරොත්තු දෙනවා ද යන්න වෙනම කතාවකි). මහ මැතිවරණයේදී වූ පොරොන්දු ඉටු වෙනවා වෙනුවට දැන් වෙන්නේ.. තිබුණාටත් වඩා වැඩේ ගැස්සෙන තත්වයක් බව බැලූ බැල්මට පෙනෙයි.. ඒත් ජනතාව එජාප ආණ්ඩුවක් පිහිටුවන්නට වරමක් නොදුන් නිසා දැන් පවතින හවුල් ආණ්ඩුවෙන් එදා පොරොන්දු වූ දේ සහසුද්දෙන් ම ලැබේ යැයි අපේක්ෂාවක් ඇති කර ගැන්ම ද නුසුදුසු ය.

අද අලුත් ම ආරංචිය.. වාහන මිළ ඉහල යාම ය. එය මට එතරම් වැදගත් ප්‍රවෘත්තියක් නොවුණේ.. මෑත කාලයේ දී වාහනයක් මිළ දී ගැනීමට කිසිදු අදහසක් මා තුළ නොවූ නිසා ය. එහෙත් එවන් අපේක්ෂා තිබූ බොහෝ දෙනා දැඩි ලෙස විස්සෝපයට පත් ව තිබෙන අතර.. මුදල් ඇමති ගේ මවු දෙමවුපියන්ව සිහිකර පුණ්‍යානුමෝදනා කිරීම සුලභ ව දැකිය හැක.

රට ට ඔරොත්තු නොදෙන වාහන ප්‍රමාණය පාලනය කිරීම
ආනයන වියදම් අඩු කිරීම හරහා රුපියලේ අගය අවප්‍රමාණය වීම අවම කිරීම
ඉහළ බද්දක් අය කිරීම හරහා වැඩි බදු ආදායමක් ලබා ගැනීම
වැනි සාධනීය ලක්ෂණ මෙම සංශෝධනය හරහා දැකිය හැකි වුවත්.. වාහන සිහින බොඳ වන අයගේ වේදනාව මෙවැනි තර්ක හරහා සමනය වේයැයි සිතිය නොහැක..

ආණ්ඩුව ගෙන ඇත්තේ අසීරු තීරණයකි.. මෙතරම් වේදනාවක් විඳීමෙන් තෘප්තිමත් ප්‍රත්ඵලයක් ලැබෙනු ඇතිදැයි නැවත නැවතත් සිතිය යුතුය..

Wednesday, March 9, 2016

ඔවුහු ද මිනිස්සු ය..

මාලිංග.. නායකත්වයෙන් ඉවත් විය.. මැතිවුස් නායකත්වයට පත් විය.. මැතිවුස්.. එය බාර ගත්තේය.. ඒත් පොඩ්ඩක් ඥං පචං ගෑවේය.. මට ඉතිං ඉන්න කණ්ඩායමෙන් කරන්න පුළුවං උපරිමේ කරනවා කීවේය.. ඒ කියන්නේ දැං ඉන්නේ හොඳම ටීම් එක නොවේ කියා නොකියා කීවේය.. ඇත්තෙන්ම ඒක හරි ය .. ඒත් කණ්ඩායමේ මොරාල් වලට අවුල් ද දන්නෑ ය..

මහේල, සංගා.. ගියාට පසු .. තිරිමාන්න හා චන්දිමාල් ඒ තැන ගනී ය කියා තිබූ විශ්වාසය දැන් පළුදු වෙලා ය.. දිල්ෂානුත්.. එන්න එන්නම දුර්වල වෙන පාට ය.. මැතිවුසුත්.. ළඟකදි.. හොඳ වැඩක් පෙන්නුවේ නැතිය.. කුසල් .. බෑන් වෙලාය.. තිසරටත්.. ළඟදී අඩියක් වැදුණේ නැතිය.. හොඳින් වැඩ පෙන්නං ආපු මිලින්ද..ද පහුගිය තරඟ වල ඒ හැටි වැඩ පෙන්නුවේ නෑ ය.. මාලිංගත් නිතර අසනීපෙන් ය..

ප්ලස් පොයින්ට් ලෙස පෙනෙන්නේ.. ශෙහාන්, කපුගෙදර සහ හේරත් වැනි කීප දෙනෙක් පමණක් ය.. ක්‍රීඩාව ඇත්තේ සමාජීය.. සුහදතාවය හා සාමූහික විනය සුරැකීමට ය.. නැතුව ඇර ගැනීමට නොවේ ය.. ක්‍රිකට් හොඳ ක්‍රීඩාවක්ය.. ඒක මහත්තුරුන්ගේ ක්‍රීඩාවක් වීමට නම්.. ක්‍රිකට් ගහන අය වගේ ම බලන අයත් මහත්තුරු වෙන්ට ඕනෑ ය..

ක්‍රීඩකයෝ ද මනුස්සයෝ ය.. මනුස්සයින්ට වරදිනවා ය.. දිනන එවුන්ට පරදිනවා ය.. වැරදි අදහස් හිතේ මතු වෙනවා ය.. හිතේ දුකට වගේ ම බයටත්.. එක එක දේ කියවෙනවා ය..

Sunday, February 28, 2016

කෝම්පිට්ටු...

            
රෑට බතට කන්ට කියල කෝම් පිට්ටුඉවුවා
කාට හැකිද ඕව' කන්ට! කියල' අම්ම'රැවුවා
ඊට පස්සෙ බත් ගෙනැල්ල' අනල' අනල'කැවුවා
පාට පිරුණු රහයි ගුණයි අපේ බඩට යැවුවා
  
කූට මිනිස් කැළයකි මේ අනතුරු ඇඟැවෙවුවා
මීට වඩා ඉවසිය යුතු බව නිතිපැහැදෙවුවා
දේට හොඳම යොමු කරද්දි බැන බැනඇහැරෙවුවා
දාට මියෙන ආඩම්බර වෙන්නට දිවුරෙවුවා
  
මෝටරේට බිලක් නැතිව රුහිරු කිරෙන්පෙවුවා
ඊට වැඩිය ඇගෙ කුස තුළ මාස ගණන්ගෙවුවා
ගාට ගාට උනත් හරි ම පාරෙන් අපයැවුවා
කාට ඕන නැතත් ඇයට අපව ඕනිකිවුවා
  

Wednesday, February 24, 2016

සංස්කෘතිය, සදාචාරය සහ සංවර්ධනය


සංවර්ධනය මදියැයි කියා ඇතැමුන් මැසිවිලි නගද්දී.. සංස්කෘතිය සහ සදාචාරය විනාශ වන්නේයැයි තවත් පිරිසක් මැසිවිලි නඟයි.. 

සමාජ හැසිරීමේ ස්වභාවය සංස්කෘතිය යන වදනින් දැක්වෙන අතර.. එය නිරන්තරයෙන් වෙනස් වන්නක් බව වටහා නොගැනීම තුළ ගැටළු බොහෝ.. ඇති වී තිබේ.. 

යහපත් වූ ආචාර ධර්මයන් සදාචාරය ලෙස දැක්වෙන අතර.. මේවා සංස්කෘතිය තරම් වේගයෙන් වෙනස් වන්නේ නැති.. බොහෝ සෙයින් වෙනස් නොවිය යුතු.. එහෙත් අලුත් විය යුතු.. ක්‍රියා පිළිවෙත් ය.. සංස්කෘතීන් වෙනස් වීමේදී නිරායාසයෙන් ම ඒ හා බැඳුනු සදාචාරයන් ද වෙනස් වන උදාහරණ ඕනෑ තරම් හමු වේ.. 

උදාහරණයක් ලෙස..තොටියා ගේ රැකියාව සැලකිය හැක.. ඒ වටා වූ සංස්කෘතිය එහෙම පිටින්ම පරිවර්තනය වී.. අද තොටියාගේ වෘත්තිය ක්‍රියාත්මක වන්නේ නැත.. ඒ වෙනුවට.. පාලම හරහා යන.. බස්, ත්‍රී රෝද රථ, බයිසිකල් හෝ වෙනත් ප්‍රවාහන මාධ්‍යයක් එකී සංස්කෘතියේ දිගුවක් ලෙස පවතී..  එම සංස්කෘතිය තුළ.. එකල පැවත් සදාචාරයන් තවමත් වළංගු ද යන කාරණය විමසා බැලිය යුතුය..

ඉහත කී සංස්කෘතික වෙනස.. සිදුව ඇත්තේ භෞතික සංවර්ධනයේ ප්‍රතිඵලයක් ලෙස බව පැහැදිළිය. එහෙත් ඒ සමඟ, දැල්වී තිබූ සදාචාරයේ පහන් නිවී ගොස් ඇත්නම්..  අප ගමන් කර ඇත්තේ සංවර්ධනය දෙසට නොවන බව පැවසිය හැක.. එවැන්නකට ඊනීයා සංවර්ධනයක් යැයි කිව හැක. 


අපට අවැසි ඊනියා සංවර්ධනයක් නොව.. සැබෑ සංවර්ධනයක් නම්.. සදාචාරය රැක ගෙන සංස්කෘතිය වගා කරගෙන.. සංවර්ධනය කරා පිය නැගිය යුතුය.. 

භෞතික සංවර්ධනය යනු සංවර්ධනයේ.. එක් සාධකයක් පමණි.. 

Wednesday, February 17, 2016

කලමනාකරණය

බොහෝ දෙනා කතා කරන.. න්‍යායාත්මකව සිදු කරන ප්‍රායෝගිකව නොකරන කලමනාකරණයේ වෙසෙස් බොහෝය.. ව්‍යාපාර කලමනාකරණය, ජීවිත කලමනාකරණය, පිරිස් කලමනාකරණය, ආර්ථික කලමනාකරණය, කාල කලමනාකරණය.. ආදී වශයෙන් විවිධ වෙස් ගත් කලමනාකරණ විෂයයන් හා මාතෘකාවන් අපට හමුවේ..
ජීවිත කලමනාකරණය මේ අතර වැදගත්ම එකයැයි මා කියන්නේ .. ඒ මත අන් සියළුම දෑ තීරණය වන පසුබිමක් ඇති නිසා ය.. දිළින්දාගේ සිට මහා ධනවතා දක්වා දුක් විඳින්නේ.. නිසි කලමනාකරණයක් නොමැති වීම නිසා බව නිතර අසන්නට ලැබේ..
කලමනාකරණය යනු ප්‍රශ්නයක් විසඳීමයැයි මම කියමි..
ප්‍රශ්නය හඳුනාගෙන.. විකල්ප හඳුනාගෙන.. සුදුසුම විකල්පය තෝරාගෙන.. සැලසුම් සකස්කොට ක්‍රියාත්මක කිරීම.. යන සියල්ල කලමනාකරණයේ පියවරයන් වේ.. කලමනාකරණයේ අග්‍ර ඵලය වනුයේ.. ගුණාත්මක බවින් හා කාර්යක්ෂමතාවයෙන් ඉහළ විසඳුමක් ප්‍රශ්නයට හිමි වීමයි..
ජීවිත කලමනාකරණයේ දී.. කළ යුතු .. නොකළ යුතු දෑ, ශක්තීන්.. දුර්වලතා, සහයෝග.. අභියෝග.. ආදී සියල්ල සැලකිල්ලට ගෙන විශ්ලේෂණයෙහි යෙදිය යුතුය... බැලූ බැල්මට මෙය අතිශය දුෂ්කර කාර්යයක් සේ පෙනුන ද.. මේ සියල්ල මනාව පරිහරණය කරන්නා.. ලබන ඉහළම දායාදය චිත්ත සංතෘප්තිය මිස අනෙකක් නොවේ..
සටන් කලා සියයක් දන්නා කෙනාට බැරි වූ දේ එක් සටන් කලාවක් දැන සිටි කෙනා කළ කතාවක් ඔබ අසා ඇතැයි සිතමි.. එය එසේ සිදු වූයේ.. ඉහත කී කලමනාකරණයේ ප්‍රතිඵලයක් ලෙසය.. බොහෝ විකල්ප තිබීම.. තෝරාගැනීම අකාර්යක්ෂම කරන්නක් බව මෙයින් පැහැදිලි වේ..
අපේ ගමට පැමිණෙන එක්තරා පුද්ගලයෙකි. ඔහු කලින් ගමේ පදිංචිව සිටි අයෙකි. කසාද බැඳ බිරිඳත් සමඟ අසල ගමක පදිංචි විය.. උපතින් දුප්පත් කෙනෙකි.. වැඩි දුර අධ්‍යාපනයක් ලබා නැත.. ඔහුගේ වත්මන් දින චරියාව නම් මගේ සිත ඇද බැඳ ගත්තේය..
ඔහු රැකියාව ලෙස කරන්නේ.. කුලී වැඩයි.. පොල් කැඩීම, තැඹිලි කැපීම, වැලි පැටවීම, ඉඩම් ශුද්ධ කිරීම ආදී ඕනෑම වැඩක් ඔහු ලවා සාධාරණ මිලකට කරගත හැක.. උදේ පාන්දර හය විතර වෙද්දී රැකියාව පිණිස ඔහු එන්නේ අපේ ගමට ය..
තමාට ලැබෙන වැඩ රාජකාරි..කිරීමට වෙලාව තමාට කැමති අයුරින් සකසා ගන්නා ඔහු හදිසි වැඩ සඳහා අත ගසන්නේ කලාතුරකිනි.. දවස පුරා එක වැඩක් නොකරන නිසා.. ඔහුට දවස් පඩියක් නොලැබෙන අතර.. කරන ලද වැඩ ප්‍රමාණය අනුව සාධාරණ මුදලක් ඔහුට ලැබේ.. බොහෝ විට වැඩ කරන කොහෙන් හෝ උදෑසන දිවා ආහාරයද ගන්නා ඔහු.. හැන්දෑවේ 3 වීමට ප්‍රථම සිය රාජකාරි නිම කොට නිවෙස බලා පිටත් වේ..
ඔහුගේ දිනක ඉලක්ක ගත මුදලක් තිබේ.. එය.. රුපියල් 1100 කි.. එම මුදල බිරිඳ වෙත භාර දෙන ඔහු.. යමක් ඉතිරි වුවහොත්.. එය තමා වෙත තබා ගන්නේ.. කලාතුරකින් හෝ ඉලක්කය සපුරා ගත නොහැකි දිනක් පැමිණියහොත් ඊට මුහුණදීම පිණිස ය.. එයට අමතරව.. ඔහුගේ ගානේ පොඩි පොඩි පිංකම් ද සිදු කරයි.. හරියට පාරක් නැති තැනකට පාරක් හදා දීම, පාරවල් වලට පොඩි පොඩි කොන්ක්‍රීට් දැමීම.. වැනි දෑ.. මේ අතර වෙයි.. මේවා කිරීමට වට පිටාවේ ද සහයෝගය ලැබෙන අතර. එදිනට ආදායමක් නොලැබුණාය කියා.. ඔහුගේ බිරිඳට දෙන මුදලේ වෙනසක් කරන්නේ නැත.. එය තමා සතු මුදලින් යොදවන ඔහු.. පින හා පවුල් ජීවිතය පටලවා නොගන්නා අයුරු සැබැවින්ම විශ්මය ජනක විය...
ඉරිදා දින ඔහුගේ විවේක දිනය වන අතර.. එදින තම දරුවන් හා එක්ව..විවේකීව ගත කිරීම ඔහු ගේ අරමුණ බව කීවත්.. එය කොයිතරම් දුරට කලමනාකරණය කරන ලද්දක්දැයි.. අසන්නට මා හට අවස්ථාවක් නොවීය.. මතු දිනයක අවස්ථාවක් ලදහොත්.. ඒ ගැන ද තොරතුරු ඔබ වෙත ගෙන එන්නට සිතන්නේ.. එබඳු කුඩා මිනිසෙකු නිසා..වුවද අපේ ජීවිත ගැන මොහොතක් සිතන්නට අපට ඉඩක් ලැබෙන එක බොහෝ සෙයින් වටිනා නිසා ය..
අප ජීවිතයේ ඉගෙන ගන්නා බොහෝ දෑ ඇතත්.. අපට වැදගත් වන්නේ.. ඉන් ඉතා කුඩා කොටසකි.. වැදගත්ම දේ ඒ කොටස කුමක්දැයි හැඳිනගැනීමයි..