කැඩපත ට මුළා වී 5!

  අයියෙ.. නැන්දා.. ටිකක් අසනීපෙන් වගේ.. සුජාතා ගේ සිහින්, බිය මුසු හඬ මට ඇසුණේ සිහිනයකින් මෙනි. වෙනදා හවස් වරුවේ කඩයට එන අම්මා අද නො ආවේ.. නෑමට හෝ රෙදි සේදීමට ගිය නිසා යැයි මම සිතා උන්නෙමි. එහෙත් ප්‍රශ්නය අනෙකක් සේ ය. 

නෑ .. නෑ අයියෙ කලබල වෙන්න දෙයක් නෑ.. එහෙමට අමාරුවක් නෑ.. නැන්දා හොඳින් ඉන්නවා.. ඒත් නැන්දා එක්ක කතා කරද්දි මට පුංචි වෙනසක් දැනුණා.. අයියා පුළුවන් නම් හවසට ගිහින් බෙහෙත් ටිකක් අරන් දෙන්න. මා කලබල වූ බව දුටු සුජාතා වහා මා අස්වැසුවාය. 

හදිස්සියකට ළඟට පාතට යන්න.. පා පැදියක් වත් නැති එකේ අඩුව මට දැනුණේ එවෙලේ ය. සුජාතා ට කඩේ බලා ගන්නා ලෙස පැවසූ මා නිවස වෙත හැල්මේ දිව ගියෙමි. 

මොකද මචං හදිස්සියක් ද? ලසන්ත යතුරු පැදියකින් විත් මා පසු කොට නැවැත්වීය. 

ම්.. ඔවු මචං.. ටිකක්.. අම්මාට සනීප මදි කියලා ආරංචියක් ආවා.. ඒකයි මේ ගෙදර දුවන්නෙ.. කියමින් මම යළිත් දුවන්නට සැරසුණෙමි.

ඉතිං නැගපං.. මං ගිහිං දාන්නම්.. ලසන්ත ආරාධනා කළේ සුපුරුදු ලෙංගතු කමිනි. 

වෙලාවේ හැටියට දෙයියෝ දුන්නා වගේ වැඩක් නෙ උනේ.. යැයි සිතමින් යතුරුපැදියට ගොඩවූ මා හට ඉක්මණින් ම නිවෙස වෙත යාමට හැකි වූ අතර.. යතුරු පැදියෙන් බැස වැඩි කලබලයක් නොපෙන්වා.. නිවස තුළට ගියේ තත්වය හරි හැටි ම නොදන්නා බැවිනි.. 

අම්මේ.. අම්මේ.. කියා මා කතා කළේ අම්මා පේන්නට නොසිටි බැවිනි. 

ආ... පුතේ මොකද මේ කලබොලෙන්..? කිසිත් නොවුණු ගානට සරලව පවසමින් කාමරය දෙස සිට පැමිණි අම්මා කිසියම් අපහසුවකින් පෙළෙන බැවු ඇගේ ඉරියවු කියා පෑ ය. 

නෑ.. අම්මා හවස කඩේ පැත්තෙ ආවෙ නැත්තෙ ඇයි බලන්නත් එක්ක මං ආවෙ.. සුජාතා නංගිව කඩේ තියලා.. නංගිත් කිවුවා අම්මගෙ අසනීප ගතියකුත් දැක්කයි කියලා.. මම වැඩි බරක් නොදා ම කීවෙමි.

එහෙමට අසනීපයක් නෑ පුතේ.. මේ පොඩි හිසේ රුජාවක්.. පස්පංගුව ඩිංගක් බීවා නං ඕක ඇරිලා යයි.. ඇය කියන කතාවත් ඇත්තය. නිකරුණේ දොස්තර බේත් හොය හොයා යන එක ඒ හැටි සුදුසු දෙයක් නොවේ. ඒත් ඇඟේ උණ තිබේ දැයි බැලිය යුතු ය.  ඔලුවටත් පපුවටත් අත තබා බැලුව ද එහෙම අමුතු රස්නයක් නොදැනුණෙන්.. හිතේ උපන් බිය තරමක් පහව ගියා සේ ය. ලසන්ත ට කියා ම පස් පංගුව පැකට් කිහිපයක් අසල කඩයෙන් ගෙන්වා ගත් මා ඉන් එකක් අම්මාට තම්බා දුන්නේ ඉන් හිසේ වේදනාව අඩු වේයැයි සිතා ය. එහෙත් සිදු වූයේ අනෙකකි.. කෝප්පයෙන් බාගයක් බොත් ම වාරු ගෙන නැගිට ගන්නටත් පෙර ම.. නිවස තුළ ම.. ඇය වමනය කරන්නට ගත්තාය.  මම වහා ඇගේ පිට අත ගෑවේ ඈ සතු ශාරීරික වේදනාවක් වේ නම් දුරු වේවායි සිතමිනි.. 

ලසන්තගේ උදවුවෙන් ම ත්‍රී රෝද රියක් ගෙන්වා ගත් මා අම්මා සමඟ හන්දියේ ඩිස්පැන්සරියට ගොස් දොස්තර මහතාට අම්මාව පෙන්වීමි. විස්තර ඇසූ දොස්තර මහතා.. අප මේ ගමේ ම අයදැයි ඇසුවේ.. ඩිස්පෙන්සරිය දමා වසර ගනණක් වුවද.. අප කිසි දින ඔහුගෙන් බෙහෙත් ගැනීමට ගොස් නැති නිසා විය යුතු ය. අන්තිමට අප බෙහෙත් ගත්තේ මීට අවුරුදු දහ අටකට පමණ පෙර ය.  

මා පුංචි සන්දියේ හතිය සෑදී හුස්ම ගන්නට අමාරු වී හුන් විට කපුරු තෙල් ගෑවේ අම්මා ය. එය ද ප්‍රමාණවත් නැති වූ කල, තාත්තා මා එක්ක ගියේ ඉස්පිරිතාලයේ ලොකු මහත්තයා ගාවට ය. මගේ පපුවටත් පිටටත් නළාව තැබූ දොස්තර මහතා මා ඉස්පිරිතාලේ නවත්වන්නැයි කීවේ ය.  අම්මාත් ආච්චි අම්මාත් මාරුවෙන් මාරුවට මා ළඟ නැවතී උන් බවත් තාත්තා තුන් වේලට ම මා බලන්න ආ බවත් හැර ඒ හැටි දෙයක් මට මතක නැත. මා වාට්ටුව පුරා දුව පැන්න බවත් එය ලෙඩේට හොඳ නැති බව කොතෙක් කීවද ඇසුවේ නැති බවත් ඉඳ හිට පරණ මතක ආවර්ජනයේ දී අම්මා කියන්නීය.. අන්තිමේ මාව මේච්චල් කරගෙන තිබෙන්නේ ඉස්පිරිතාලෙන් ගිය ගමන් ම මං ආසම කරන අයිස් ක්‍රීම් එකක් අරන් දෙන පොරොන්දුවට ය. එහෙත් දෙසතියක් යන තුරු සීතල කිසි දෙයක්  මා හට නොදෙන්නැයි දොස්තර මහතා දුන් උපදෙස් නිසා එම පොරොන්දුව ඉටු කරන්නට නොහැකි වීම ගැන මටත් වඩා තාත්තා උන්නේ කණගාටුවෙන් බව කියද්දි අම්මාගේ දෑස් අගට කඳුළක් උණයි. 

අම්මාගේ රුධිර පීඩනය වැඩි බවත්.. තවත් පරීක්ෂණ කිහිපයක් කළ යුතු බවත් කී දොස්තර මහතා බෙහෙත් පෙත්තක් ලියා දී දින දෙකකින් නැවත පැමිණ රුධිර පීඩනය පරීක්ෂා කර ගන්නා ලෙස ද කීවේය. අධි රුධිර පීඩනය ගැන යම් තරමක පැහැදිලි කිරීමක් කරන අතරතුර ආහාර පාලනය මෙන්ම ගත හා සිත පාලනය ගැන ද මනා උපදෙස් මාලාවක් ලබා දීමට එතුමා අමතක කළේ නැත. 

අම්මා මීට පස්සෙ උදේ ම නැගිටින්න ඕන නෑ. සුජාතා නංගි ඉන්නවනෙ. අපි එයාගෙ උදවුවට කෙනෙක් ගමු. 

දොස්තර මහතාගේ උපදෙස් නිසා යම් තැති ගැන්මක් ද හටගෙන තිබූ නිසා දෝ අම්මා මගේ යෝජනාවට විරුද්ධව කිසිවක් නොකීවාය. 

නංගී.. අම්මට ප්‍රෙෂර් වැඩි ලු. විවේක ගන්න කිවුවා.. ඔයාගෙ උදවුවට කතා කරගන්න කෙනෙක් නැද්ද? 

මමත් කියන්නමයි හිටියෙ අයියෙ.. නැන්දා මහන්සි වෙනවා වැඩියි.. දවාලෙ වත් ඉස්පාසුවක් නෑ නෙ. මගෙ හොඳ යාළුවෙක් ඉන්නවා. එයාටත් මට වගේ හරි ම ප්‍රශ්න.. මං කතා කරලා බලන්නද? 

හරි නංගි.. හෙට ඉඳන් හරි කමක් නෑ.. වැඩට එන්න කියන්න.. ඔයා ගෙ යාළුවෙක් නෙ.. බය වෙන්න දෙයක් නෑ නෙ.. 

හරි අයියෙ.. මං හෙට හවසට එයාට අයියව හම්බවෙන්න එන්න කියන්නම්.. 

පසු දින උදෑසන වෙනදා වෙලාවට ම අම්මා නැගිට කුස්සියට ආව ද ඇයට තව හෝරාවක් වත් නිදා ගන්නැයි අප දෙදෙනාම කීවෙමු. අපගේ දැඩි පෙරැත්තය මත නැවතත් සයනයට ගිය ඇය නැවත එන විට බොහෝ වැඩ අවසන් කර තබන්නට අපට හැකි විය. එදිනට සුජාතා නංගි ගෝලයා මම වීමි. 

හොද්ද හැඳි ගාන්න.. පොල් ටිකක් ගාන්න.. ඉඳි ආප්ප තට්ටු පිරිසිදු කරන්න .. ආදී වශයෙන්.. සුළු සුළු.. රාජකාරී රැසක් මා වෙත පැවරිනි.  තමා ගේ ගෝලයා ගේ ම ගෝලයා වීම අපූරු අත්දැකීමක් බව මට පසක් වූ අතර අප දෙදෙනා අතර තිබූ දුරස්ත බව ද දුරු වූවා සේ දැනිණි. 

ඔන්න බොස් ආවා.. එහෙනං මං යන්නං මගේ වැඩ වලට.. කියමින් සුජාතා නංගී හදා දුන් තේ කෝප්පය හිස් කරමින් මම ගෙතුළට ගියෙමි. 

අම්මාගේ මුහුණේ ඊයේ තිබූ වෙහෙසකර බව වෙනුවට.. පැහැබර හිනාවත් සුජාතා නංගී ගේ සුන්දර හිනාවත් දුටු මා සිත ට ද ඇති වූයේ සැනසුමකි.  කලකට පසු නැවතත් අපි ආයෙමත් පිරුණු පවුලක් බව මට දැනුණේ සුජාතා ද මගේ ම නැගණියක් යැයි හැඟෙන තරම් කුළුපග වූ නිසා ය. 

කැඩපත ට මුළා වී 4!

 මොකද පුතේ .. නින්ද යන්නෙ නැද්ද? අම්මාටත් කලිං නැඟිට කල්පනාවේ නිමග්නව උන් මා දුටු අම්මා ඇසුවේ විස්සෝපයෙනි. 

නින්ද යනවත් හොරයි.. අද වැඩ ගොඩාරියක් තියෙනවා කරන්නත් ඒකයි මං මේ කල්පනා කළේ.. 

අම්මා පසුපස ම කුස්සියට ඇදුණු මම .. මට හුරු.. හිරමණේ උඩ වාඩි උනෙමි. 

අම්මෙ සුජාතා නංගි .. ඉස්කෝලෙ ගමන නවත්තලා ලු.. රස්සාවකුත් හොයනවලු.. මහතුං මාමා කිවුවෙ.. හරියන එකක් නැද්ද අම්මගේ අත් උදවුවට.. ? 

සිරිසේන ගෙ කෙලී ද? ඒකි ගෙ නම් ඇති වැරැද්දක් නෑ.. ඒත් පුතේ අපට ඇත්තට ම ඔය තව කෙනෙකුට ගෙවන්න තරම් පුළුවන් කමක් තියේ ද? අම්මා කවදත් මෙන් අවදානමක් ගන්නට බිය වූවාය. 

අම්මා බය වෙන්න එපා.. අපි වැඩිපුර කඩයප්පන් හදන්න නේ එයාව වැඩට ගන්නේ.. මොකෝ නිකං පඩි ගෙවනවා කියලයෑ.. අම්ම එහෙනං අද ගිහිං කතා කරගන්නවද?  හෙට ඉඳං හරි වැඩට එන්න කියන්න. දැනට දවල්ට ඕන නෑ නෙ. හවසට ඇවිත් අඩුම කුඩුම ටික ලෑස්ති කරලා.. නිදාගෙන උදේ නැගිටලා කඩයප්පන් ටික හැදුවාම වැඩ ඉවරයි.. ඒ ළමයට ඉගෙන ගන්නත් වෙලාව තියෙනවා කැමති නම්..  අම්මා ගේ බිය සැක දුරු කළ මා ඇය සම්බන්ධ කරගන්න වැඩේ අම්මාටම පැවරුවේ එයට ඈ වඩාත් දක්ෂ නිසා මෙන් ම මා කතා කළහොත් ඒ ළමයා .. ලැජ්ජා වීමට ඉඩ ඇති නිසා ය. 

නගරයට ගොස් මා ගෙනා කළමනා.. අම්මාගේ අනුදැනුම ඇතිව සුජාතා විසින් මනාව සැකසීය. අම්මාගේ කාමරයේ ම ඇයට ද නිදා ගන්නට ඉඩ ලබා දුන් අතර.. පාසැල් ගමන යළි ඇරඹූ ඇය ගේ පාඩම් වැඩ ද අප නිවසේ සිටම කරන්නට ඉඩ පහසුකම් සලසන්නට අපට හැකි විය. 

අම්මාගේ ත් මගේ ත් සිත් දිනා ගනිමින් වැඩ කටයුතු කරන්නට සුජාතා සමත් වූ අතර.. පෙරටත් වඩා පරෙස්සමින්.. මා සමඟ කතා බහ කරන සුජාතා ගැන .. මා සිතෙහි ද පහන් බවක් ඇති වුණි. 

ඉස්සර මෙන් මා උදේ නැගිට කුස්සියට නොගිය අතර.. අම්මා තේක මා වෙත ගෙනැවිත් දුන්නා ය. ඈ හදිසිම කාරිය ක නම්.. තේක ගේන්නේ සුජාතා ය. 

අයියේ තේ එක..  එයිට වඩා වචනයක් ඇගේ මුවින් නික්මෙන්නේ නැත. 

ඉඳ හිට අම්මා සමඟ කතා කිරීමට කුස්සියට ගිය විටෙක.. සුජාතා ගේ ඉගෙනීම ගැන අසා.. ඉගෙනීමේ වටිනා කම මතක් කර.. අවශ්ය ඕනෑ ම දෙයක් අම්මාගෙන් ඉල්ලා ගන්නා ලෙස මම ඇයට පවසමි. ඇය එවිට සියුම් සිනාවකින් සංග්‍රහ කරන්නේ.. එවදන් පිළිගත් බව පෙන්වමිනි. 

කෙළිලොල් නව යවුවනයේ යුවතියක් මෙතරම් අහිංසක විය හැකිදැයි මම සිතමි. 

සුජාතා ගේ ආගමනයත් සමඟ අම්මා වඩාත් සතුටින් සිටින බවක් දිස් වූ අතර.. අපගේ ව්‍යාපාරයේ ආදායම ද දිනෙන් දින ඉහළ ගියේ ය. තමා ගේ කඩයට ද පෙර පරිදි ම වාගේ වෙළඳාම ඇති බවත් අම්මාගේ කඩයප්පං වල රසය.. එයට හේතුව බවත් මහතුං මාමා පැවසුවේ ඉමහත් සතුටකිනි.  

මහතුං මාමා ගේ කඩයට පමණක් නොව අහළ ගං කිහිපයක ම කඩ කිහිපයකට අප ගේ කඩයප්පං යහමින් දැමීමට අපට හැකි වූ නිසා.. අප ගේ කාර්යබහුලත්වය ද මඳක් ඉහළ යමින් පැවැතුණි. 

කැඩපතට මුලා වී 3!

මහතුං මාමේ... අද වේලාසනින් කඩේ වහනවාදැයි අසමින් මා කඩ පිළට ගොඩ වූයේ මාමා කවදත් මෙන් මා හා සුහදයැයි යන උපකල්පනය මතය. එහෙත් සිදු වූයේ අනෙකකි. බලාපොරොත්තු වූ ලෙංගතු හිනාව වෙනුවට ලැබුණේ ඇනුම් පදයකි. කවුරු කවුරුත් බලා ඉන්නෙ ඉතිං කඩේ වැහෙනකම් නෙ... ඇනුම් පදය රොසලින් නැන්දාගෙනි. 

අනේ නැන්දෙ ඇයි එහෙම කියන්නෙ.. අපි කවුරුත් කැමති නෑ නෙව මේ කඩේ වැහෙනවට..? මා මගේ අවංක අදහස කීවේ සිත උපන් සංවේගයෙනි. 

ඔය ළමයා ඕවා ගණං ගන්න එපා.. අපි යමුකො ගෙට.. හාමිනේ මේ ළමයටයි මටයි තේ වතුර ඩිංගක් වත් කළා නං.. කියමින් මහතුං මාමා කඩයේ අන්තිම ලෑල්ලත් වසා මා දෙසට එමින් පැවසුවේ සුපුරුදු ලෙංගතු කමිනි. 

මං මේ මහතුං මාමා හම්බවෙන්ට කියලා ආවේ පොඩි කාරණයක් කතා කරගන්ට.. මා පවසද්දී මාමා මා දෙස බැලූයේ තද බල කුතුහලයකිනි. මහතුං මාමගෙන් මට පොඩි උදවුවක් ඕන. අපේ කඩේ වෙළඳාම් නරක නෑ. ඒත් මං හිතුවෙ.. එදා ඉඳං අම්මා කඩයප්පං දාපු මහතුං මාමගෙ කඩේටත් කඩයප්පං ටිකක් දාන්න. මහතුං මාමාගේ කුතුහලයෙන් පිරී තිබුණු මුහුණ අඳුරු වළාපට ඉවත්ව සුපැහැදිලි තරු පෑයූ අහස මෙන් දීප්තිමත් වනු මම මහත් ආශ්වාදයකින් නිරීක්ෂණය කළෙමි.

අනේ දරුවො ඒක නං කියලාවත් කොර ගන්ට බැරි උදවුවක්.. ඒත් ඉතිං රංමැණිකෙ ට ඉස්පාසුවක් තියෙයිද එච්චර හරියක් කරන්ට.. මාමා කවදත් මෙන් සාධාරණව සිතන බව පෙන්වන ප්‍රශ්නයක් නැඟුවේ ය. 

ඒක තමයි මාමා මං හිතුවෙ කාව හරි අත් උදවුවට එක් කරගන්ට.. අම්මට තනියෙන් ඔය සුමේ කරන්ට බෑ.. හොඳ පිරිසිදුවට ඉන්න කෙනෙක් හොයන්ටත් එපාය.  මා කීවේ මාමාගෙන් ම හොඳ කෙනෙක් ගැන ඔත්තුවක් ලබා ගැනීමේ අටියෙනි.

අර සිරිසේනගෙ කෙලී ... සුජාතා.. ඉස්කෝලෙ ගමන නවත්තලා ලු.. රස්සාවක් හොයනවා කියලා මටත් කීවා.. පවු අග හිඟකම් එහෙමත් ඇති.. අම්මා තාත්තා දෙන්නම අසනීපෙන් නෙව. බලාපොරොත්තු වූ පරිදි ම මාමා ගෙන් ඔත්තුව ලැබුණි. එකාතකට ඒ දැරිවියට දිගටම ඉගෙන ගන්නට උදවු විය හැකිය. අනෙක් අතට අම්මාට ද සහනයකි. 

ආ.. නේ.. මේ.. සම්පත් අයියා නෙව..  මුව පිරි සිනා මැද තේ කෝප්පය රැගෙන ආවේ ඈ ය. ඈ දුටු මතින් මට සියල්ල අමතක වන බව ඈ දනී. මම එසේ නොවී සිටීමට යත්න දරමින් සිනාවකින් පමණක් පිළිවදන් දී තේ කෝප්පය අතට ගත්තෙමි. 

කොහොමද දැන් බිස්නස් සරු ද? ඈ නොදන්නවා වගේ අසයි.. 

හොඳයි.. දැන් උදේට කැඳ ටිකකුත් හදනවා.. කොහොමද නංගිගෙ ඉගෙනීමේ වැඩ එහෙම.. ? අමාරුවෙන් වුවත් සාර්ථකව වචන ටිකක් ගලපා ගත හැකි වීම ගැන මම සතුටු වීමි. 

අම්මා කඩේ වහන්ට බලා ගෙන ඇති.. මාමේ එහෙනං මං ගිහිං එන්නං.. නැන්දා නං මගෙත් එක්ක අමනාපෙන් ද කොහෙද.. කියමින් මම ගෙතුළට එබුණෙමි. 

අනේ මොකට අමනාප වෙන්ටද ළමයො.. මං මේ කිරි හොද්දක් හැඳි ගාන ගමන් උන්නෙ.. ඒකයි කතාවට නාවෙ.. කියමින් සාලයට එබුනාය.  වැඩේ ගොඩින් බේරා ගත හැකි වීම මට මහත් සැනසුමක් විය. 

තේ කෝප්පය ඈ අතට දී සිනාවකින් ම ඈ ට සමුදී මම එන්නට පිටත් වීමි.  

කොහොමට උන්නු කොලුවෙක්ද.. මං හිතං උන්නෙ මූ මහ උලු ගෙදර නතර වෙයි කියලා කරපු නසරානි වැඩ වලට.. මාමා කියනු මා පල්ලම් බසිද්දී මට යාන්තමට ඇසිණි. 

කැඩපතට මුලා වී!2

 අරුණැල්ලට පෙර අවදි වන්නට මා පුරුදු වී දෙමසකට නොවැඩිය.. වෙනදා අනුන්ගේ කඩවල් වලට අම්මා දමන කඩයප්පං දැන් දැමෙන්නේ මගේ කඩේ ට ය... සමාවෙන්න .. ඒ අපේ කඩේ ය.. අම්මාගේත්.. මගේත්.. ඇගේත්.. කඩේ ය..

පුතා අද වෙනදාටත් කලිං නැගිටලා.. අම්මගේ දයාබර හඬ මා සිතට මිහිරක් එක් කරයි.. 

අද ඉ‍ඳං කැඳ වර්ග ටිකකුත් දාන්න හිතුවේ අම්මා.. කීප දෙනෙක්ම ඇහුවා....කියමින් මම අම්මාගේ මුහුණ දෙස බැලීමි..

දෙවියනේ .. මට කීවා නං කොළ ටිකක් ගෙනැවිත් ලෑස්ති කරනවනෙ.. ඈ මුවෙහි මැවුණේ විමතිය මුසු කනස්සලු සොබාවකි.. 

නෑ අම්මා ..දැං ඒවට ලේසි ක්‍රම තියෙනවා .. පැකැට් එක කැඩුවා .. රත් කළා... ගුණෙනුත් අඩුවක් නෑ කියලයි කියන්නේ.. මා වහා අම්මාව දැනුවත් කළේ.. ඇගේ සිත නිවනු පිණිස ය. 

හනේ මංදා ඉතිං ඕවා...   මිනිස්සුන්ට වස විස එහෙම දෙනවා නෙවෙයි.. මේ වින්ද දුක් මදැයි.. තවත් සංසාරෙට පවු නං එපා..! ඈ දෙන අවවාද.. පෙරදා මෙන් නොව..  අරුත්බරයැයි.. මට හැඟෙයි.. වෙනස් වී ඇත්තේ අම්මා නොවේ.. මා ය..

නෑ අම්මා .. මං ගන්නේ ආයුර්වේදෙන් රැකමන් කරපු තැනකින්.. අනිවා..මිනිස්සුන්ට හොඳක් තමයි වෙන්නෙ.. මම ඇයට වටහා දෙමි..

එදින උදයේ වෙළඳාම වෙනදාට වඩා යහපත්ව පැවතිනි..දහවල් වෙද්දී බත් පතකුත් ඔතාගෙන අම්මා කඩයට එයි.... දෙදෙනා එක්ව බත්පතට වග කියන අතර කවුරුන් හෝ කඩයට ආවොත් .. මම වහා අත් සෝදා ඔහුට අවැසි දේ සපයමි.. ඉන්පසු .. කන බත් කටවල් රහ වැඩිය.. ඒ ඒවා කවන්නේ අම්මා නිසා විය යුතුය ..

හැන්දෑවට අම්මා උයන ආප්ප..පිට්ටු..ඉඳිආප්ප .. වල රහ බලන්නට .. නො එන්නෝ ගමේ ඇත්තේ අතලොස්සකි.. පිරිසිදුකම ..රස .. මෙන්ම සුහදත්වය .. මුසු අපගේ සංග්‍රහය සැවොම සතුටින් භුක්ති වින්දාහ..

දැං මහතුං ගෙ කඩේ වැහෙන්ටයි යන්නෙ.. ආරංචිය දෙන්නේ මහතුං මාමා සමඟ තරමක් අමනාප සුමනෙ මාමා ය..

හපොයි.. අර මොකද..?  අම්මා විස්සෝප වෙයි.. මොනා වුණත් අපේ එක්කෙනා නැතිවුණ දා පටං.. මට පිහිට වුණු කඩේ.. ඒ විස්සෝපය ඈ ම සාධාරණීකරණය කරයි..

රංමැණිකෙ ගෙ කෑම කන්න මිනිස්සු මෙතන්ට හොයාගෙන එන්නෙ.. දැං මහතුවගෙ කඩේට කවුරු කඩයප්පන් දානවද මංදා.. මෙලෝ රහක් නෑ.. සුමනෙ මාමා කියන කතාව ඇත්ත නං .. මහතුං මාමා බොහෝ අසරණ වී ඇත.. එය අම්මාගේ මෙන්ම මගේ සිත ද කම්පාවට පත් කළ ආරංචියක් විය..

අම්මා ම‍ං අද හවස මහතුං මාමාගේ කඩේ පැත්තේ ගිහිං එන්නම්.. කියන පරක්කුවෙන් .. ඈ එය අනුමත කළා ය..

-=========================

පළමු කොටසට මුහුණුපොතේ ලැබුණු ප්‍රතිචාර අනුව හිතුණා .. භාශාව තව චූට්ටක් විතර ලිහිල් කරන්න.. අදහස් කියනවා නම් හරි වටිනවා..

කැඩපත ට මුළා වී! 1

 

හාත්පස අඳුර රජයන්නට වී ද මා හැර යන හිතක් ඈ වෙත නො වී මා තුරුලේ මැ රස සුව මැවුවා ය. කාඩයෙකු පිස්සෙකු ලෙසින් ලෝකයා ගේ අනේකවිද අපහාසයන්ට මැදිව සිටි මා.. අපිළිවෙලට පිහිටි දසන් දෙපෙලෙහි මිස කිසි දු පැහැපත් බවෙක් නැති මා.. ස්ත්‍රීන් සහසෙක් අතර වුව රුවෙන් දිදුලන ඈ වැන්නියක මෙතරම් වසඟයට ගත්තේ කෙසේදැයි ඊර්ෂ්‍යාව මුසු විශ්මයාර්ථයෙන් මිතුරන් කරන විමැසීම් මනසෙහි නැඟී මා දෙතොලග සිහින් සිනහවක් මැවෙනු නිරීක්ෂණය කළ ඈ දෙනෙත් හි මැවි විමතිය මුසු භීතිය .. මෘගයෙකු දුටු මුවැත්තියක මා හට මවා පෑ ය.

" ඇයි?" ඈ කතා කළේ මිනිත්තු තිහ හතලිහකට පසු ව යැයි මා හට හැඟිණ.

"නෑ.. මට රට්ටු කියන කතා සිහි වුණා" .. ඈ නිහඬව ම සිටී...

"ඔයා වගේ ලස්සන කෙල්ලක් මං වගේ අපතයෙකුට කැමති වුණේ කොහොමද කියලා උන් පුදුම වෙනවා" මම මෙතෙක් තෙරපා සිරකැර ගෙන හුන් සිනහව මුදා හළෙමි.

"අපතයා කියන්නේ මොකක්ද ?" ඇගේ ස්වරය සිහින් යැ .. එ ද බැරෑරුම්යැ.

"අපතයා කියන්නේ වැඩකට නැති එකා කියන එක නේද?" ඈ තරමේ භාෂා ඥානයක් නොවූ මා හිතෙහි නැඟි පිළිතුර ඈ වෙත යොමු කළෙමි.

"අපතයා කියන්නේ අපතේ යන එකා කියන එක"

"අපතේ යන වටිනා සම්පතක් රැක ගන්න එක වරදක් යැ?" ඈ තොඳොල් වැ එද ස්ථිර වැ අසයි..

"අපි යමු සුදූ දැන් රෑත් වුණා.." ආදරයෙන් නලලත සිප.. උයන් මළුවෙන් නික්ම යන රිසින් මා නැඟී එනු දුටු ඈ ද හනි හනික නැඟී ගමනට සූදානම් වූවේ .. ගෞරවය.. ආදරය .. සපිරි.. කීකරු ම කඩිමුඩියකිනි.

අත්වැල් අල්වා පාළු මාවතෙහි පිය මැනැ ආ අපි .. මහ මඟ ට පිළිපන්නේ.. කිසි දා දැක නොමැති පරදේශක්කාරයින් දෙපලක් බඳුවයැ.

සත්තකින් මැ .. ඈ මා අපතේ යා නොදී රැකැ ඇත්තේ වරක් දෙවරක් නොවැ.. දහ පහලොස් වරෙක් ඈ මා රැකගෙනැ තිබෙයි. පස් පවින් මා වැළැකූ ඈ කරුණාව.. මුදිතාව මා හට ඉගැන්වීයැ. කලින් මෘගයෙකු වූ මා හෘදයාංගමයෙකු සේ දකින්නට බොහෝ යහපත් මිනිසුන් උත්සුක වෙද්දී ඇතැම් මිතුරෙක්.. ඒ ගමනට අකුල් නොහෙලුවේ ද නොවේ.

"ජීවිතේ... සුන්දර ද මෙතරම්.. සුවඳ දැනී.. දැනී .. දැනෙනවා.. " කියා කිසිවෙකුට නෑසෙන්නට.... මා සිතට පමණක් ඇසෙන්නට ගයමින් නින්දට යන්නට එදා මම සමත් වීමි.

===================

මතු සම්බන්ධයි..

===================

ටිකක් වෙනස් විදිහෙ භාෂා විලාශයක් ද භාවිත කරමින්.. ටිකක් වෙනස් විදිහේ වැඩක් කරන්න හිතුණා.. හොඳයි ද බලන්න.. බලලා කියන්න.. තව කොටස් 3-4 ක් ලියන්න හිතාන ඉන්නවා.. ප්‍රතිචාර අනුව.. තමයි..

බැරිදා විග්‍රහය !අපි අලුත් ජනතාවක් පත් කර ගත යුතුද?

මෙවර ඡන්දයේ දී මගේ ඡන්දය දෙන්නේ කවර පක්ෂයකටදැයි තවම තීරණයක් නොමැත. ඇතැම් විට මා ඡන්දය පාවිච්චි නොකරනු ඇත. 

කාරණය එය නොවේ. මෙවර ඡන්දයට ඉදිරිපත් වන අයගෙන් කීයෙන් කීදෙනෙක් හැබෑටම තමන් දැරිය යුතු වගකීම ගැන අවබෝධයකින් පසුවන්නේද යන්නයි.  බොහෝ අයට අනුව පාර්ලිමේන්තු මන්ත්‍රී ධූරය තිබෙන්නේ තමන්ගේ යාළුවාට කොන්ත්‍රාත් එකක් අල්ලා දීමට.. යාළුවාගේ දරුවාව පාසලකට දමා දීමට.. යාළුවාගේ බිරිඳට ස්ථාන මාරුවක් ලබා දීමට.. පොලීසියට ඇමතුම් ලබා දී සුළු වරදකරුවන් නිදහස් කර ගැනීමට... වගේ වැඩ වලට කියාය. ජනතාවත් හිතන්නේ එහෙමය. එහෙම කරන්ට පුළුවන් ජාතියේ මිනිස්සු පාර්ලිමේන්තු යවන්ට ඡන්දෙ දෙන්නේ ඒ නිසාය.  දැන් අපි අලුත් ජනතාවක් පත් කර ගත යුතුයැයි සමහරු කියන කතාව බැලුවාම ඇත්තය.

කාරණාව එය ද නොවේ. ජාතික මට්ටමෙන් ගත් කල වඩාත් ම ආකර්ශනීය ලැයිස්තුව ඉදිරිපත් කර ඇත්තේ ජාතික ජන බලවේගයයි. වෙනත් බලවේග හා පක්ෂ වල ආකර්ශනීය චරිත ඉඳ හිට තිබුණ ද, ඕනෑම තැනකින් බැලුවත් හොඳම බඩු ටික ඉන්නේ ජා. ජ. බලවේගයේ ය. එහෙවු ජා. ජ. බලවේගය ට මෙවරද ආතක් පාතක් නැතිවීමේ ඉඩ කඩ බොහෝ ය. NGO කාරයෝ යන්න ඔවුන්ට එල්ලවෙන ප්‍රභලතම විවේචනයයි. රාජ්‍ය නොවන සංවිධාන හෙවත් Non Government Organizations මේ තරම් අපට ඇලජික් ඇයිදැයි මට ප්‍රශ්නයක් විය. එයට ලැබුණු පිළිතුරු අතර වඩාත් තාර්කික පිළිතුර වූයේ.. රට තුළ වැරදි මත පතුරුවාලීම සඳහා පිටරට වලින් ඩොලර් එවැනි ඇතැම් සංවිධාන වලට ලැබෙන බවයි. ජාතික ජනබලවේගයේ ඇති සංවිධාන වලින් සැලකිය යුතු ප්‍රමාණයක් NGO ගණයට අයත් වන බව සත්‍ය නමුත්. ඒවා ඔය කියන ජාතියේ පිටරට ඩොලර් වලින් යැපෙන සංවිධාන නොවන බව ජවිපෙ නායක අනුර දිසානායක මහතා එක්තරා නාලිකාවක වූ සාකඡ්ඡාවකදී ශපථ කළේය. එහෙත් අපි හිතන්නේ NGO නම් බටහිර ඩොලර් වලට ඇති කෑදර කම නිසා රටට වින කටින සංවිධාන පමණක් වන බවය. දැන් අපි අලුත් ජනතාවක් පත් කර ගත යුතුයැයි සමහරු කියන කතාව එහෙම බැලුවාම ද ඇත්තය. 

කාරණාව එය ද නොවේ.  පසුගිය වසර ගනණාවක් පුරා රටේ සිදුවුණු හොරකම් ඇතුළු අකටයුතුකම් බොහොමයක් ගැන සාධාරණව හඬ නැඟූ අය අතර ඉදිරියෙන්ම සිටියේ ජවිපෙ මන්ත්‍රීවරු ය. ඔවුන්ගේ පුද්ගලික ජීවිත ගැන අප නොදන්නා මුත් ඉඳ හිට ලත් තොරතුරකින් හෙළි වූයේ ඔවුන් සාමාන්‍ය මිනිසුන් ලෙස ජීවත් වන බවය. එසේ තිබියදී ඔවුන් මත් පැන් පානය කිරීම, තරමක් හොඳ වාහනයක් පැදීම වගේ අතිශය සාමාන්‍ය දේවල් ඇතැමුන්ට හරිම අමුතු දේවල්ය.  ඔවුන් සිතන්නේ ජවිපෙ මන්ත්‍රීවරු  පුස් සයිකලෙන් එහෙ මෙහෙ ගොස් රතු හාලේ බත් පමණක් තුන් වේලට ම කා ජීවත් විය යුතු බව ය. දැන් අපි අලුත් ජනතාවක් පත් කර ගත යුතුයැයි සමහරු කියන කතාව එහෙම බැලුවාම ද ඇත්තය. 

පිංතූරය අන්තර්ජාලයෙනි.

IT දන්න අයට මොනවද කරන්න පුළුවන්!

IT හෙවත් තොරතුරු තාක්ෂණය කියන විෂයය  කියන්නෙ ඉතා පුළුල් ක්ෂේත්‍රයක් ආවරණය කරන  විෂයයක්. ඉතින් කෙනෙක්  IT  එහෙමත් නැත්නම්  Computer දන්නවාය කියලා කීවාම ඒක ඒ තරම් සාධාරණ ප්‍රකාශයක් වෙන්නෙ නෑ.. අපට බැලු බැල්මටම පේන්න තියෙන IT ක්ෂේත්‍ර කිහිපයක් මං සඳහන් කරන්නම්..

1. Networking

2. Computer Assembling & Repairing

3. Software Developing

4. Web Designing

5. Graphic Designing

ඉතිං ඔය කියන ක්ෂේත්‍ර වලින් එකක හෝ කිහිපයක දැනුමක් තියෙනවා නම්..

1. අදාළ විෂයයන් උගන්වන්න

2. අදාළ විෂයය දැනුම භාවිතයෙන් රැකියාවක් කරන්න

3. අදාළ විෂයය දැනුම භාවිතයෙන් ව්‍යාපාරයක් කරන්න

ඔබට අවස්ථාව තියෙනවා.

ඉගැන්වීම

උගන්නනවා කියන්නෙ අද කාලෙ හොඳ ව්‍යාපාරයක්. සේවයක් කරන අතරෙම හොඳ මුදලකුත් හොයන්න පුළුවන්. මේ ඉගැන්වීම තනි පුද්ගලයෙකු වශයෙන්, ආයතනයක් තමන් ම අරඹලා .. එහෙමත් නැත්නම් තිබෙන ආයතනයකට සම්බන්ධ වෙලා කරන්න පුළුවන් තමන්ගෙ කැමැත්ත අනුව.

ඒ ඇරුණම කරන්න පුළුවන් හොඳ වැඩක් තමයි තමන්ගෙ දැනුම පොතක් ලෙස එළිදක්වන එක. මුද්‍රිත පොතක් නැත්නම්  e-book එකක් ලෙසත් ජනතාව අතරට තම දැනුම ගෙනියන්න පුළුවන්. මේක තමන්ගෙ ලිවීමේ හැකියාව වර්ධනය කරගන්න, තමන්ගෙ දැනුම වැඩි දෙනෙක් අතරෙ බෙදා දෙන්න වගේ ම වැඩි කාලයක් පුරාවට ටිකෙන් ටික ලොකු වෙන ආදායමක් උපයා ගන්නටත් ප්‍රයෝජනවත් වෙන වැඩක්. IT සංකල්ප දිනෙන් දින දියුණු වීම නිසා.. ලියූ දේ ඉක්මණින් කල් ඉකුත් වීම කියන කාරණා අනෙක් කාරණයක් සම්බන්ධව පොත් ලියනවා ට සාපේක්ෂව ටිකක් පාඩුදායක වැඩක්.

ඔබ ගේ හැකියාව Software Developing, Web Designing, Graphic Designing වගේ අංශයකින් තියෙනවා නම් Free Lancer කෙනෙක් විදිහටත් ඔබට ඔබ ගෙ හැකියාවෙන් ප්‍රයෝජනයක් ගන්න පුළුවන්. අන්තර්ජාලයේ ඒ සඳහා හොඳ ඉල්ලුමක් තියෙනවා.

Software Developing කියන විෂයය ගත්තත් එය Standalone Applications Developing, Web Applications Developing සහ Android Applications Developing කියලා ප්‍රධාන ධාරාවෙන් වෙන්කරගන්න පුළුවන්.  මේවැයිත් අනුකොටස් මහ ගොඩක් තියෙනවා.

Web Designing කියන්නෙ අද කාලෙ බොහෝ දෙනාට අවශ්‍ය වෙන සේවාවක්. ඒ වුණත්.. ලංකාවෙ ඒ සම්බන්ධ Market එක නම් හොඳටම සවුත්තු වෙලයි තියෙන්නෙ. ඒ වුණත් ඒ සම්බන්ධ කටයුතු සාර්ථකව කරගෙන යන අය නැතුවාමත් නොවෙයි.

Graphic Designing කියන්නෙ විවිධ ක්ෂේත්‍ර ගණනාවකට ප්‍රයෝජනවත් වෙන තාක්ෂණයක්. මුද්‍රිත හා විද්‍යුත් මාධ්‍ය සඳහා මෙන්ම වෙළඳ ප්‍රචාරණ ආයතන  වලින් මේ සම්බන්ධ දැනුම හා හැකියාව ඇති අයගේ සේවය ලබා ගන්නවා.

MS Office පැකේජයේ තිබෙන MS Word සහ MS Excel කියන  Application දෙකෙන් එකක් දැනගත්තත් ලංකාවෙ රස්සාවක් හොයාගන්න හොඳ අවස්ථාවක් තියෙනවා. Computer Type Setting, Computer Operator කියන්නෙ එහෙම රැකියා දෙකක්. රස්සාවකට කෙසේ වෙතත් ඔය  Office පැකේජ ගැන ටිකක් හදාරලා ඉන්න එක මොන දේ කරන්න ගියත් සෑහෙන්න ප්‍රයෝජනවත්. මොකද මේ Applications වලින් අපේ එදිනෙදා පරිගණක අවශ්‍යතා බොහොමයක් කරගන්න පුළුවන් වෙනවා.

Computer Assembling & Repairing කියන්නෙ නම් අද කාලෙ පොඩි එකෙකුටත් පුළුවන් දේවල්. ඒත් ඉතිං.. එච්චර කට්ටියකට පුළුවන් වුණත්.. මේ වැඩේට තියෙන ඉල්ලුම ඊට වඩා ඉහළයි. ඒකට හේතුව තමයි අද කාලෙ තියෙන සංකීර්ණ ජීවන රටාවත් එක්ක මිනිස්සු කැමතියි වගකීමක් ඇතුව.. හොඳට දන්න කෙනෙකුට කියලා වැඩක් කරවගන්න. මේකෙ වටිනාකම තවත් වැඩි වෙන්නෙ.. ඔබට Laptops Repair කරන්න පුළුවන්නම්. මොකද අපි වුණත් Desktop පරිගණකයක් ගලවලා.. RAM එක එහෙම  Check කරලා බැලුවට.. කවදාවත් Laptop එකක් ගලවන්න හිතන්නේ නෑ. දන්න කියන කෙනෙක් ගාවට යනවා මිසක්.

Networking කියන්නෙම ටිකක් පහළ මට්ටමේදි භාවිතා නොවෙන දෙයක්.. ඒ කියන්නෙ තනි පරිගණකයක් භාවිත කරන කෙනෙක්ට සම්බන්ධ වෙන්න තියෙන්නෙ Internet හෙවත් අන්තර්ජාලය කියන Network එකට විතරයි. ඉතිං ඒ දැනුම නම් හරිම සුලභයි. ඒත් එතනිං එහාට Domain එකක් Configure කරගන්න තැන ඉඳලා ඉහළට තියෙන වැඩ ටික හරි සුවිශේෂයි.. ඒ දැනුම හැමෝටම ඇත්තෙ නෑ විතරක් නෙවෙයි. ලංකාවෙ බොහොමයක් ආයතන වල IT Executive වගේ ම IT Manager තනතුරු වල ඉන්න බොහොම දෙනෙක් ට වත් මේ දැනුම ප්‍රමාණවත් මට්ටමට නෑ.  ඉතිං ඒ සම්බන්ධ සේවා සපයන ආයතනයක් පවත්වන්න ගත්තොත් දියුණු වෙන්න ඉතා හොඳ අවස්ථාවක් තියෙනවා කියන එකයි මගේ අදහස.

ලැප්ටොප් පරිගණකය හා බැටරිය| Laptop & Battery

ඔබ ගේ ලැප්ටොප් පරිගණකය එක දිගට විදුලි සැපයුමට සම්බන්ධ කිරීම බැටරියට අහිතකරද?

මේ ලිපිය ලියන මා පවා කලක් සිතා උන්නේ එය අහිතකර බවයි. නමුත් තොරතුරු සොයා බැලූ විට එහි ඇති වරදක් නැත. 

එම සංකල්පය මෙයට ටික කලකට පෙර භාවිත වූ නිකල්-කැඩ්මියම් බැටරිය සමඟ අප අතරට පැමිණි එකකි. වර්තමානයේ භාවිත වන ලිතියම් අයන් බැටරි සඳහා එය අදාළ නොවේ. මෙහිදී බැටරිය සම්පූර්ණයෙන් චාර්ජ් වූ පසු ස්වයංක්‍රීයව ම චාර්ජ් වීම නවතාලන බව පැවසේ. 

කෙසේ වෙතත් බැටරියේ ආයු කාලය කෙරෙහි බලපාන යම් යම් ක්‍රියා මාර්ග කිහිපයක් දැක්විය හැක.

1. ලිතියම් අයන් බැටරියක් බිංදුවටම බස්සවා උපරිමයටම චාර්ජ් කිරීම පුළුවන් තරම් අවම කළ යුතුය (මෙය ද නිකල් කැඩ්මියම් බැටරි සඳහා යොදාගත් තාක්ෂණයකි)

2. නමුත් මාසයකට පමණ වරක් මෙලෙස උපරිමයට චාර්ජ් කොට බිංදුවටම බැස්සවීම කළ යුතු බව කියැවේ. බිංදුවට බස්සවා පැය පහක් පමණ තබා නැවත උපරිමයට (එක දිගට) චාර්ජ් කළ යුතුය.  මෙය බැටරියේ ශක්තිය පිළිබඳ නිවැරදි තක්සේරුවක් රඳවා ගැනීමට හේතු වේ.

3. බැටරියේ හා පරිගණකයේ රත් වීම බැටරියේ පැවැත්ම දුර්වල කිරීමට ඉවහල් වේ. එබැවින් බැටරියේ උෂ්ණත්වය ගැන සැලකිළිමත් වීම අත්යවශ්‍ය කරුණකි. විශේෂයෙන් පරිගණක ක්‍රීඩා වැනි වැඩි ක්‍රියාකාරීත්වයක් ඇති වැඩසටහන් (Programmes) භාවිතයේ දී හා එකවර වැඩසටහන් කිහිපයක් භාවිතයේ දී පරිගණකයේ රත්වීම ඉහළ යන බව පැවසේ. එනිසා පරිගණකයේ පහසු කම ඇත්නම් හැකි හැම විටම බැටරිය විසන්ධි කොට භාවිත කිරීම සුදුසුය. 

පරිගණකයේ දෘඩ තැටිය ට යන කල! HDD and SSD | PATA and SATA

පරිගණකයේ ද්විතීයික මතක ගබඩාව (Secondary Storage) කියන්නෙ ඉතිං පරිගණකයේ අත්‍යවශ්‍ය මෙන්ම වැදගත්ම උපාංගයක්. දෘඩ තැටිය (Hard Disk) තමයි මේ යටතෙ භාවිත වෙන ප්‍රධාන උපාංගය. මුල් කාලයේ අපි භාවිත කරපු දෘඩ තැටි පෙනුමින් විශාල වුණත්.. එහි මතක ධාරිතාව ඉතා කුඩයි.. මට මතකයි මගේ මුල්ම පරිගණකයේ දෘඩ තැටියේ ධාරිතාවය මෙගා බයිට්ම 350ක්. Primary Storage නොහොත්  RAM එක.. 4MB. මාරයි නේ.. ? අද භාවිත කරන්නෙ.. 2TB දෘඩ තැටියක්.. 8GB RAM එකක්.. කාලය මැවු වෙනසක අරුමේ.. තමයි ඉතිං..

IDE Cables

IDE Hard Dis Drive

ඉතිං මේ දෘඩ තැටිය එහෙම නැත්නම්. Hard Disk Drive (HDD) අද වෙනකොට ධාරිතාවය ඉහළ ගොහිං තිබුණට.. පෙනුම.. පුංචි වෙලා  මිසක්කා ලොකු වෙලා නම් නෑ . අපි ඒ කාලෙ භාවිත කළේ   IDE කියන අතුරුමුහුණත (Interface) එක භාවිත කළ දෘඩ තැටි.  ඒ කියන්නෙ පරිගණකයේ ප්‍රධාන පුවරුව (Mother Board) හා දෘඩ තැටිය සම්බන්ධ කෙරුනෙ IDE කියන තාක්ෂණය තිබුණු Cable සහ Ports/Slots භාවිතයෙන්. ඒත් කාලය ගෙවෙද්දි, 2007 විතර, මේ වැඩේ ට අලුත් තාක්ෂණයක් හඳුන්වා දුන්නා.. ඒ තමයි SATA. මේ තාක්ෂණයත් එක්ක තමයි..  දෘඩ තැටියෙ ධාරිතාවය ඉක්මණින් ඉහළ ගියේ. ඒ කියන්නෙ ඒ වෙනකොට තිබුණු 80GB වගේ IDE දෘඩ තැටිය , 512GB SATA දෘඩ තැටිය මඟින් ඉතා පහසුවෙන්  ප්‍රතිස්ථාපනය උනා. ඒ කියන්නෙ මතක ඒකකයක මිලත් සැලකිය යුතු ලෙස පහල බැස්සා.. එයිට අමතරව වේගය.. ඔවු.. දත්ත ගමන් කිරීමේ වේගය SATA වල ඉතා ඉහළයි.. එය IDE වගේ තිස් හතලිස් ගුණයක් තරම්.. ඒ වගේ ම IDE සහ SATA CABLES අතර පෙනුමෙ තිබුනු වෙනසත් කැපී පෙනුනා. එතෙක් කල් තිබුනු පළල් රිබන් එකක් වගේ  IDE CABLE එක වෙනුවට සිහින් SATA CABLE ආදේශ වුණා. හිතන්න එපා පරණ පරිගණක වල IDE CABLE එක ගලවලා SATA CABLE ගැහුවාය කියලා. ඇත්තටම මේක උනේ.. අලුතෙන් එන පරිගණක වල.. ඒවයේ IDE වෙනුවට SATA යොදා ගත්තා.. IDE දෘඩ තැටි වල අනුපිළිවෙල හඟවන්න භාවිත වුණු Jumpers නමැති කුඩා Pins එකිනෙක සම්බන්ධ කරන Connectors වර්ගය  SATA තාක්ෂණයේ දී අවශ්‍ය වුණේ නෑ.. SATA තාක්ෂණයෙන් දෘඩ තැටියක් හරි CD, DVD ආදී වෙනත් උපාංගයක් හරි සම්බන්ධ කළ ගමන් ඒක හඳුනගන්න පරිගණකයට හැකියාව ලැබුණා.. ඒකට කිවුවෙ Plug and Play කියලා.  අද මං භාවිත කරන 2TB දෘඩ තැටියත් භාවිත කරන්නෙ.. SATA කියන තාක්ෂණය.

SATA HDD

SATA Cables

SATA කිවුවෙ Serial Advance Technology Attachment කියන එක නෙ. තවත් තාක්ෂණයක් තමයි PATA හෙවත් Parellal Advance Technology Attachment කියන්නෙ. දැං හොයපල්ලකො මේ ගැන. නෑ කරදර වෙන්න ඕන නෑ. PATA කියන්නෙ IDE (Integrated Drive Electronics) කියන එකම තමයි ලු.

SSD

කොහොම හරි ඉතිං අද වෙනකොට ඊටත් වඩා අපූරු තාක්ෂණයක් ඇවිත්.. හැබැයි මේක SATA විසින් IDE නැත්නං PATA ව පැන්නුවා වගේ නෙවෙයි.. මේක තමයි SSD (Solid State Drive). මේකෙන් ප්‍රතිස්ථාපනය කළේ.. මෙතෙක් කල් දෘඩ තැටිය ඇතුළේ ක්‍රියාකාරීත්වය. ඒ නිසා තව දුරටත්  අතුරු මුහුණත විදිහට ඉන්නෙ SATA ම තමයි. ඉස්සර යකඩ තැටි ටිකක් කැරකි කැරකි දත්තත් එක්ක කරපු මෙහෙයුම SSD මඟින් Memory Chips භාවිත කරලා කරනවා. පුරුද්දට වගේ Hard Disk Drive කිවුවට..  SSD කියන්නෙ තවත් HDD එකක් නෙවෙයි.. SSD කියන්නෙ HDD වලට විකල්පයක්. මිළ අධික කම හැරුණම මේක හැම අතින්ම වගේ විශිෂ්ඨයි.. වේගය අතින් ඉතාම ඉහළයි.. යාන්ත්‍රික ශක්තිය වැය නොවන නිසා.. බල පිරිමැස්මත් ඉතා ඉහළයි. බර ඉතා අඩුයි. එකම ප්‍රශ්නය මිළ වැඩියි.. හැබැයි.. HDD එකට සාපේක්ෂව SSD වල කාර්යක්ෂමතාව සිය ගුණයක් විතර ඉහළයි කියලා කියන නිසා. HDD එක වගේ දහ ගුණයක් විතර මිළ වුණත් .. ඒක නොසලකා හැරියට කමක් නෑ කියලා කියන්නත් පුළුවන්.. ඒ වගේ ම ලොකු ඉඩක් අවශ්‍ය වන වැඩ වලට භාවිත කරන්න ලොකු ධාරිතාවයක් තියෙන HDD එකකුත්.. OS (Operating System) එක ඇතුළු Systems Software ටික දාගන්න (250GB විතර) පොඩි  SSD එකකුත් තියාගත්තා නම් හොඳයි.. හොඳයි නෙවෙයි ඒක පට්ට..

ප.ලි.
මං ඉතිං දන්න තරමිං ලිවුවෙ.. අඩු පාඩු.. ඌණ පූර්ණ.. විවේචන කරන්න ආරාධනා කරනවා.. ඔබ සැමට..

කොරෝනා

කඳුළැලි ම පුරෝනා
ලෝකයට විරෝනා
දිවි නිමා කරෝනා
වෙසඟනය කොරෝනා

අඳෝනා පැතිරිලා
පැතු සිහින ඉහිරිලා
තුන් සුතුර මැතිරිලා
එ ද අඳුර ඉතිරිලා

අලුත් දොරවල් හැරී
දිසෙයි ගුණදම් පෙරී
කොරෝනා වෙන් හරී
කරමු සුව මං සරී

දැන් ලොකුයි.. මගෙ පුතා

වසර දහයකට පෙර
නුඹ මෙලොව එළිය දුටු
ඒ දිනය අමතකව
නෑ පුතේ මට තවම ..

මාස නවයක් පුරා
ඇඟිලි ගනිමින් උන්නෙ
හඬ නඟා කියන්ටයි
මට පුතෙක් ඉන්න වග..

නුඹෙ සුවඳ දැනුණාම
ඒ රසට බැඳුණාම
පුතෙක් යනු රජෙක් බව
පියෙක් ලෙස හැඳින්නෙමි..

අපෙ සෙනෙහෙ කැදැල්ලේ
පුංචි දඟකාරයා
හනේ දැන් ලොකු එකෙක්
කොහොම නම් සිතන්නද..

අඩි තියා ඇවිදිද්දි
මුදු වදන් අමුණද්දි
දැනුණු ඒ සුරතලය
තවම අපෙ සිත් පුරයි..

අනාගත ලෝකයේ
ඔටුණු නුඹ පළඳාවි
ඒ ඔටුන්නට වඩා
අපේ සෙනෙහස බරයි..

එපා තව ලොකු වෙන්න
නොම කියමි පුතණුවෙනි..
ගුණ දහම් රැක ගන්න
එඩි පිරුණු දැඩි සිතිනි..!

ඔයාට පිස්සුද?

මහ මුහුදේ රළ වෙනදාට වඩා උදාසීන යැයි සිතූ ඈ එය ඇත්තක්දැයි බලන්නට මෙන් දෑස් පෙති පිසදා මුහුද දෙස හොඳින් බැලුවාය.
 බලන්නකෝ.. මුහුදු රළ එන්නෙ.. අපට ඕනවට වගේ..
හ්ම්.. ඔහුගේ ප්‍රතිචාරය ඇසුණු විට ඇයට සිතුණේ.. මුහුදු රළ ඒ අතින් ඔහු ට වඩා උද්‍යෝගී බව ය.
හරියට අපි වගේ නේද? ඈ ඇසුවේ ඔහු ගේ දැහැන බිඳින්නට ය.
ඔවු.. අපි වගේ.. මෙලෝ රහක් නෑ.. එන්න ඕනවට එනවා.. යන්න ඕනවට යනවා.. මේවා මෙහෙම වෙලා තියෙන්නෙ.. කරුමෙට ම නෙවෙයි..  හිතුවට වඩා තදින් දැහැන බිඳුණු සෙයකි.. ඔහු කියෝගෙන යයි..
හරි.. හරි.. හුළඟ වැඩි වෙනකොට ඕක හරි යයි..  ඈ ප්‍රශ්නය සමනය කරයි..
ඔවු.. ඒත්.. කවදා හුළං හමයි ද? මුහුදට තරං ඉක්මණට අපට නං හුළං හමන එකක් නෑ.. ඔහු කියන්නේ නොරිස්සුමෙනි..
අපි ෆෑන් එකක් දාගමු.. ඈ සිහින්ව සිනා සෙයි..
කෘත්‍රිම හුළඟකින් ජීවිතේ යදින්න තරම් අපි බංකොලොත් ද? ඔහු ප්‍රශ්නය අතහරින පාටක් නැත..
දැං මට මොකද්ද කරන්න කියන්නෙ..? ඇගේ ස්වරයද මදක් උස් වී ඇත.
ඔයා තරින් ව බඳින්න..
ඔයාට පිස්සු ද?
++++++++++++++++++++++++++++++++++++++++++++++++
ගොඩක් වෙලා ද ඇවිත්..? පැයක් ප්‍රමාද වීම ගැන කණස්සල්ලක් ඒ ස්වරයේ නොවීය.
ඔවු.. ඒත් මේ වගේ තැනක .. වෙලාව යනවා දැනුණේ නෑ.. ඔහු කීවේ සැනසීමෙනි..
අනෙක ඔයා ඒවි කියන බලාපොරොත්තුවෙන්.. පැයක් නෙවෙයි දවසක් හරි ඉන්න බැරුවයෑ.. ඔහුගේ ස්වරය හදවතට ලෙංගතුය.
හ්ම්..බලාපොරොත්තු අපිව ජීවත් කරනව ලු නේ. ඇය ලය සැහැල්ලු කළාය...
ඉතිං.. මොනවද ඔයාගෙ බලාපොරොත්තු.. ඇල පාරට ගල් කැටයක් විසි කරමින් ඔහු ඇසුවේ.. සැහැල්ලුවෙනි..
ජීවත් වෙන එක තමයි..
ඒ කිවුවෙ..?
මං ආසයි ජීවත් වෙන්න.. ඒක තමයි මගේ බලාපොරොත්තුව..
මඳක් බැරෑරුම්ව බලා හුන් ඔහු ..
බලාපොරොත්තු අපිව ජීවත් කරනවා කියලා ඔයා ම නේද කිවුවේ..?
සමහර බලාපොරොත්තු එහෙම නෑ.. ඒවා.. හීන විතරමයි..
ඔයා ඉන්නෙ දුකින්ද?
එහෙම නෑ.. ඇය උත්තර දුන්නේ ඕනවට එපාවට ය.
හරි.. හරි.. අපි පොඩ්ඩක් ඇවිදිමු ද? ඔහු ඇගේ අතින් අල්ලා ගත්තේ ය.
ඔහුගේ සීතල ගොරහැඩි අත ඇයට ගෙනාවේ .. ආරක්ෂාවේත් .. සෙනේහයේත් .. ලෙංගතු බවේත් මුහුවකි.
මටත් දෙයක් කියන්න තියෙනවා.. ඔහුගේ ස්වරය බැරෑරුම් විය. දෑසට දෑස හමු විය..
මං කසාද බැඳපු කෙනෙක්.. ගොඩක් වේදනා විඳපු කෙනෙක්.. පුළුවන්නම්.. මගෙ ජීවිතේ හරිගස්සන්න..ඔහු කියාගෙන යයි..
ඇයි ඔයා ඔහොම බලන්නෙ..?
ඔයාට පිස්සුද?
+++++++++++++++++++++++++++++++++++++++++++++++++
මං හිතුවෙ ආයෙ එන එකක් නෑ.. කියලා.. ඔහු ගේ දෑස දීප්තියෙන් බැබලෙයි..
ආවට අකමැති ද? ඇය කීවේ නෝක්කාඩු ස්වරයෙනි..
අද නං රැල්ල හරි සැරයි.. හොඳටෝම හුළං.. ඔහු උද්‍යෝගයෙන් කියයි..
මුහුදට නං.. ජයයි.. ඈ සිහින් ව සිනාසෙයි.
අපට මොකද වෙන්නෙ..? ඔයා තරීන් ව බඳින්නෙ නැද්ද? ඔහු යළිත්.. බැරෑරුම් ය..
මට ඒකට හිත හදාගන්න බෑ..
ඇයි..? බඳින්න ආදරේ කරන්නම ඕනද?
හරි.. හරි.. අපි කාලයට ඉඩ දෙමු.. ඇය බොරු කියන්නට කැමති නැත..
හෙට තිස්සයි .. සුරේනියි බඳිනවා..
ඔවු.. අපි යනවනේ..?
ඔයා යන්න.. මං එන්නෙ නෑ..
ඇයි..? අපි තවත් මේක හංගන්නෙ ඇයි..?
ආදරේ කළා ම බඳින්නම ඕනද?
ඇත්තටම ඔයාට පිස්සුද?

මහ වනේ මතු වෙලා

එදා කපලා තිබුණු 

මහ වනේ මතු වෙලා

ආයෙමත් කොළ පාට 

අපිත් කුල්මත්වෙලා

හරි පුදුමෙ මාසයෙන් දෙකෙන් 

ගස් ලොකු වෙලා

ජාතියේ හුස්ම ටික

තවත් ඔද්දල් වෙලා...
ඒ අඳුර.. ඒ සිසිල

නැත්තෙ කිම බල බලා

උන්නෙ මං දහවලේ

හීනෙකට බය වෙලා..

මහ වනේ - කෝ අනේ

               

ඒ අතට මේ අතට අතු විහිදි තුරු	පතර
තාම මතකයි අඳුරු සුවය සිත කළ	නතර
කෝඩ සුළඟින් වුණත් දඟය මොහොතක්	විතර
මා පැතුවෙ නිසල බව තිබූ ඒ වන	නිතර
දිය පිරුණු උල්පත් ය එහි තිබහ	හැඟුණෙ නෑ
ගෙඩි පිරුණු ගහ වැලින් සුදහ ගිණි	රැඳුණෙ නෑ
හිරු රැසින් වැසි වලින් විඩා බර	දැනුණෙ නෑ
වන සතුන් මැවු අසිරි වෙන තැනක	තිබුණෙ නෑ
ගෙපැල් පොඩි තනන්නට කැළෙන් ඉඩ	වෙන් වුණා
දොර ජනෙල් බිම පවා වන රුකෙන්	නිමැවුණා
මළ කඳන් වගෙම මහ තුරු කඳන්	විකිණුනා
අපේ ගස් මුදලාලි ඉබේ පොහො-	සත් වුණා
එළිය වැටෙනව' හොඳට අඳුරු නෑ පෙර	වගේ
තාර කාපට් වැටෙයි ඉඩ පිරුණු මහ	මඟේ
ටිකක් රස්නෙයි තමයි දැනෙයි වතුරෙත්	හිඟේ
ඉතුරු ගස් ටිකත් නැති වුණොත් තේරෙයි	රඟේ

බැරිදා විග්‍රහය! ලිබරල් හොඳයිද?

ඉස්සර මං ඔය ලිබරල් කියන වචනෙ තේරුම දැනං හිටියෙ නෑ.. රනිල් ලොක්කා ලිබරල් වාදියා ය කියලා.. ජෙප්පො ඉස්සර පස් පඩංගුවේ බනිද්දි මං හිතුවෙ... ලිබරල් කියන්නෙ හොර කපටි හීන් නූලෙ වැඩ තියෙන දර්ශනයක් කියලා.. ඒත් ඉතිං ලිබරල් වාදය ගැන ඩිංගිත්තක් හොයා බලද්දි.. තමයි දැනගත්තෙ.. ලිබරල් කියන්නෙ එහෙම නරක මෙවුවා එකක් නෙමෙයි කියලා.. ලිබරල් වාදය පදනම් වෙලා තියෙන්නෙ.. නිදහස සහ සමානාත්මතාවය කියන කාරණා මත කියලා දැනගත්තාම මං කල්පනා කළේ රනිල් ලිබරල් කියන්නෙ ඇයි කියලා. උන්දැව නායකත්වයෙන් ඉවත් කරන්න.. අවුරුදු ගානක් දත කන සැට් එකට ඒකට නිදහසක් නොදෙන.. නැගී එන නායකයෙකුට.. තමන්ගේ ජාති හිතෛශී වැඩ පිළිවෙල ජනතාව වෙත ගෙනියන්න නිදහසක් නොදෙන කෙනා ලිබරල් ය කියලා කියන්නෙ ඇයි කියන එක මට පැහැදිලි වුණේ නෑ.. පස්සෙ බැලුවම රනිල් ලොක්කා ආර්ථිකය හා අන්තර්ජාතික වෙළඳ ගනුදෙණු සම්බන්ධයෙන්  ලිබරල් වීමයි මෙතන ලිබරල් කියලා හඳුන්වලා තියෙන්නෙ. ලිබරල් ආර්ථික හා වෙළඳ ප්‍රතිපත්ති ඇතැම් වෙලාවට දේශීය කර්මාන්ත කෙරෙහි අහිතකර විදිහට බලපාන්න පුළුවන්. ඒ නිසා එවැනි අන්තර්ජාතික ගනුදෙණු වලදී බුද්ධිමතුන්/ උගතුන් විමසීමත් අවබෝධයකින් හා පාලනයකින් යුතුව ගිවිසුම් වලට එළැඹීමත් අතිශයින්ම වැදගත්. 100% ක් ලිබරල් ආර්ථික ක්‍රමවේද පවතින රටවල් නැතැයි මා සිතුවත් එහෙම පවතින්න බැරි කමක් තියෙනවද කියලා මං දන්නෙ නෑ.. කොහොම වුණත්.. ලිබරල් කිවුවම නිදහස ගැන විතරක් හිතන එකේ අවුලක් තියෙනවා.. සමානාත්මතාවය කියන කාරණාවත් ඉතා වැදගත්. ඒක ගනුදෙණු වලදී මෙන්ම අනෙකුත් කාරණා වලදීත්.. මේ සංකල්පය යටතේ.. මීට වඩා සැලකිල්ලට ගත යුතු කාරණාවක්..  

කොහොම වුණත්.. ජවිපෙ ඉස්සරට වඩා අනුර කුමාර යටතේ ලිබරල් අදහස් දරණ බව අපට පේනවා. අපි ඒකටයි කැමති. අන්ත ලිබරල් නොවී.. මධ්‍යස්ථ ලිබරල් මට්ටමක් පවත්වාගන්න පුළුවන් නම් ඒක ජයක්.. අනුර කුමාර යටතේ.. ජවිපෙ ප්‍රජාතන්ත්‍රවාදී වෙද්දි, ලිබරල් වෙද්දි ජවිපෙ කියන්නෙ එජාපයේ අතකොලුවක් කියලා චෝදනාවක් එන්නෙ.. එජාපය ඔය දෙක ක්‍රියාත්මක නොකළත්.. කරේ තියාගෙන යන පක්ෂයක් නිසා බව පැහැදිලියි.. අනිත් අතට.. එජාප හිතවාදී මත දරපු අපි වගේ මිනිස්සු, එජාපයේ ඇති දූෂණ, වංචා, අක්‍රමිකතා ඇතුළු අටෝරාසියක් පස්න නිසා සහ ලිබරල් වේගෙන එන, ප්‍රජාතන්ත්‍රවාදය ගරු කරන බව පෙනෙන, වංචා දූෂණ නැති ජවිපෙ පැත්තට තල්ලු වෙනවා.. ඒකෙන් අදහස් කරන්නෙ නෑ අපි ජවිපෙ නියෝජනය කරනවා කියලා.. ඔවුන්ගේ වැරදි .. වැරදියි කියලා අපි දකිනවා.. ඔවුන්ගේ ලිබරල් වාදී ගුණ, ප්‍රජාතන්ත්‍රවාදී ගුණ ඔවුන්ගේ ආණ්ඩුවක් නොපවතින කාලෙදි පමණයි ද කියන සැකෙත් අපට තිබෙනවා.. මොනවා වුණත් අපට පේන්න තියෙන විකල්පය ජවිපෙ බව පිළිගන්න වෙනවා.. ඒත් අපට JVP කාරයා කියන්න එපා.. අපි මාක්ස්වාදය හොඳද නරකද දන්නෙවත් නෑ..

එළැඹෙන 2019 සුබ නව වසරක් වේවා!

2018 න් 2019 ට යන්නෙ.. වෙනදට වඩා වෙනස් හැඟීම් සමුදායක් එක්ක. පවුලෙ පළමු සාමාජිකයා අඩුයි..ලොකු දෝණියෙකුත් ඉන්නවා. ණය කන්දකුත් තියෙනවා.. මේ හැම අලුත් අත්දැකීමකුත් එක්ක පටං ගන්න අමුතු අවුරුද්දක් 2019 කියන්නෙ. මට වගේ ම ඔයාලා හැමෝටමත්.. අභියෝග ගොඩක් ඇති. ඒ සියල්ලම 2019 දි ජයගන්න  ලැබේවා! කියලා මං ප්‍රාර්ථනා කරනවා..

අපි ජීවිතය හොයාගෙන දුවනවා..විටෙක හැල්මෙ දුවනවා.. විටෙක හුඟක් වේගෙන් දුවනවා.. සොබා දහම අපට අමතක වෙනවා.. මිනිස්කම කියන්නෙ සොබා දහම අපට දුන්නු තෑග්ගක්. මිනිස්කම කියන තනි වචනෙ ඇතුළෙ හුඟක් දේ තියෙනවා.. අතින්.. නෙතින් ස්පර්ෂ කරන හුඟක් දේ හදවතින් ස්පර්ෂ කරන්න අපට අමතක වෙනවා.

පහුගිය සතියෙ අපි විනෝද චාරිකාවක් ගියා.. අපි වැඩිය ඇවිද්දෙත් නෑ.. ඒත්..එද්දි හරි මහන්සියි.. එහෙම වෙන්න පුළුවන්ද? මට හිතා ගන්න බෑ.. ඒක මොන විදිහෙ විනෝද සවාරියක් ද කියලා.. අපි විනෝදය කියලා අල්ලාගන්නේ එකක්.. අපේ දෙමවුපියො තව එකක්.. අපේ ළමයි තව එකක්. ඒත් අපි කවුරුවත් ජීවිතය අල්ලගත්තද? නෑ.. අපි හැමෝම එක තැන දුවනවා.. මිනිස්කම අලුත් කරන්න.. සොබා දහම ගැඹුරින් ඇසුරු කරන්න.. අපට පුළුවන් වුණ දාට .. සමහර විට ආයෙත් ජීවිතය අපට හමුවෙයි..
2019 දි වත්.. අපේ ජීවිත අපට හමුවේවා..

කුරුළු කිචි බිචි උදේ

සවන් වැකුණේ නොමැත

හිරු නැඟෙන බැසෙන රුව

දෙනෙත් දුටුවේ නොමැත

සඳ කැණින් උදම් වී

සිත පිබිදුනේ නොමැත

මා සොයන ජීවිතය 

මට හමුවුණේ නොමැත

අවදි වී අරුණෝදෙ

දරුවන් ද ඇහැරවා

ජීවිකා පිණිස ගොස්

මනස එහෙ මෙහෙ යවා

පුරුද්දට මෙන් ගතත්

කුටුම්භය වෙත එවා

අහම්බෙනි දකින්නේ

කෙසඟ නිදි දෙවු පවා

බැරිදා විග්‍රහය! මහින්ද අගමැති වීමේ හොඳ නරක

එජාප නායක රනිල් වික්‍රමසිංහ මහතාව අගමැති කමින් නෙරපා දමා මෛත්‍රී විසින් හිටපු ජනපති, වත්මන් පාර්ලිමේන්තු මන්ත්‍රී, මහින්ද රාජපක්ෂ මහතා අගමැති වශයෙන් පත් කර ගැනීම පසුගිය සිකුරාදා හවස ජනපති මෛත්‍රීපාල සිරිසේන මහතා විසින් සිදු කළ අතර රනිල් පාර්ශවය හා අනෙකුත් බොහෝ පාර්ශවයන් එම පත් කිරීම ව්‍යවස්ථා විරෝධී පත් කිරීමක් බවත්.. ජනපතිවරයාට අගමැති ඉවත් කිරීමේ බලයක් නොමැති බවත් පෙන්වා දෙති. ඒ අතර මහින්ද පාර්ශවය පාර්ලිමේන්තුව නොකැඳවා ම ඇමති මණ්ඩලයක් ද  පිහිටුවාගෙන ඉදිරියට ඇදෙයි.. .. මේ එයින් ලැබෙන/ලැබිය හැකි පිළිබඳ මගේ අවබෝධය අකුරුය.. (එම පත් කිරීමේ නීත්‍යානුකූල බව හෝ ආචාර ධර්ම උල්ලංඝනය ගැන හෝ කතා කිරීම මෙහි අරමුණ නොවේ..)

දෛනික කටයුතු වලට බාධා..

පුද්ගලික අංශයේ කටයුතු බොහෝ දුරට වෙනදා සේ ම කෙරීගෙන ගිය ද, රාජ්‍ය, අර්ධ රාජ්‍ය ආයතන බොහොමයක, අමාත්‍යංශ ලේඛම් වරුන් හෝ අදාළ ප්‍රමුඛ නිලධාරීන් මාරුවීම හා මාරු වෙතැයි යන උපකල්පනය නිසා බොහෝ වැඩ කටයුතු මේ වන විටත් අඩාල වී ඇතැයි සිතමි. එම ආයතන හා සම්බන්ධ විවිධ ආකාරයේ ව්‍යාපෘති ද මේ වන විට ඇණ හිට ඇතුවාට සැක නැත. විශේෂයෙන් නැවතත් රනිල් අගමැති වී සියල්ල කණපිට ගසාවි දැයි යන අවිනිශ්චිත භාවය මේ වන විට සෑම තැනකම වැඩ කටයුතු අඩාල වීමට බෙහෙවින් බලපා ඇත. මෙය තාවකාලික වුවත්.. පාර්ලිමේන්තුව පවත්වා.. දෙකෙන් එකක් බේරා නොගෙන කල් මැරීම රටට සිදු කරන පාඩුව සුළු පටු නොවේ..

උද්ඝෝෂණ කරුවන්ගේ කරදර ඉවරයි..

පහුගිය කාලේ හයියෙන් අධෝවාතයක් පිට වුණත් උද්ඝෝෂණ කරන්නට පෙළැඹී සිටි අය දැන් පාඩුවේ තමන්ගේ වැඩක් බලා ගනු ඇත. එය පාඩුවේ වැඩ කරන මිනිසුන්ට කරන ලොකු උදවුවකි..

ජනතාවටත් සංතෝෂම්..

මන්ත්‍රී වරුන් කෝටි ගණන් වලට වෙන්දේසි වන මේ සමයේ.. ජනතාවට ද පුංචි පුංචි සංතෝෂම් ලැබෙනු ඇත. පෙට්‍රල් රු. 10 කින් අඩුවීම, පරිප්පු, සීනි, තිරිඟු පිටි මිල අඩු වීම, විදුලි සංදේශ බදු අඩු වීම ඒ අතර කැපී පෙනෙන.. . මේ වන විටත් ලැබී ඇති සංතෝෂම් ය. 

ජාත්‍යන්තර පීඩනය

 2015 ට පෙර.. ශ්‍රී ලංකාව ජාත්‍යන්තරය තුළ කුප්‍රකටව සිටියේ ප්‍රජාතන්ත්‍රවාදය ඉතා දුර්වලව පවතින රටක් ලෙස ය. එහෙත්.. 2015 න් පසුව.. රජය.. බොහෝ අංශ වලින් ඉතා සාධනීය මට්ටමින් ප්‍රජාතන්ත්‍රවාදය සුරක්ෂා කළ නිසා.. එම අංශයෙන් රට ගැන තිබූ අප්‍රසාදය බොහෝ සෙයින් දුරු විය. එහෙත්... ප්‍රජාතන්ත්‍ර විරෝධී ආකාරයෙන් මහින්ද මහතා ව අගමැති කළ බවට වත්මනෙහි ප්‍රජාතන්ත්‍රවාදය වෙනුවෙන් පෙනීසිටින ජාත්‍යන්තරයේ බහුතරයක් රටවල් පිළිගන්නා තත්වය තුළ.. ඉදිරියේ දී වත්.. ප්‍රජාතන්ත්‍රවාදී ව නොහැසිරුණහොත්.. පෙරටත් වඩා ප්‍රබල ලෙස... ජාත්‍යන්තරය ක්‍රියාත්මක වනු ඇතැයි අනුමාන කළ හැක. 

රට හදනවා නම්..

මහින්ද - මෛත්‍රී හවුල ට රට හදනවා නම්.. මේ ද එක් හොඳ අවස්ථාවක් බව කිව යුතුය.. ඒ සඳහා ඔවුන් කළ යුත්තේ.. පැවති රජය ගෙන ආ.. ප්‍රජාතන්ත්‍රවාදී පිළිවෙත් වල වෙනසක් නොකොට.. ඔවුන්ගේ තිබූ දුර්වලතා වන.. හොරකම්, දූෂණ හා වංචා දුරු කිරීමත්, අනවශ්‍ය රාජ්‍ය වියදම් කපා හැරීමත් ය.

ප.ලි.

රටේ පවතින තත්වය හා දේශපාලකයින්ගේ ජරා ජීර්ණ ස්වභාවයට අනුව.. ආණ්ඩු මාරු වූවත් නැතත්.. රටට හා ජනතාවට යහපතක් නම් සිදු නොවන බැවු පැහැදිලි ය. 

බැරිදා විග්‍රහය!Uber - ත්‍රී රෝද වලිය

Uber - ත්‍රී රෝද වලිය නැගලා යද්දී කට පියං ඉන්න එක .. මට ටිකක් අමාරු වැඩක් නිසා මෙසේ ලියමි. පැත්තක ඉඳං ලියන එක අසාධාරණ වුවත්.. මැද්දක ඉඳං ලියන්ට හිත් නොදෙන්නේ ත්‍රි රෝද ත් එක්ක මගේ ඇරියස් එකක් තියෙන නිසා ය.

එකී ඇරියස් එකට හේතු කිහිපයකි. කිලෝ මීටරයකට රු. 10ක් තරම් වියදමක් යද්දී.. ඒ වගේ පස් ගුණයක් හෝ ඊටත් වඩා අය කරන එක එක් හේතුවකි.. පාරේ යද්දී වැඩිපුරම මාර්ග නීති කඩන්නේ ත්‍රී රෝද කරුවන් වීම තවත් එකකි. රටේ අපරාධ වලට ත්‍රී රෝද කරුවන් බොහෝ සෙයින් දායක වන නමුත්.. එය එතරම් ලොකු හේතුවක් නොවේ.. පාරට බැස්සහම වාහනයක් පාර්ක් කරන්ට හදන ඕනම තැනක ත්‍රී රෝද රථ ගාලක් ය.. එය ද ලොකු ම හේතුවකි.

තත්වය එසේ වුවත්.. ත්‍රි රෝද රථ රියැදුරෝ.. යම් යම් අවස්ථා වලදී සමාජයට විවිධ සේවා සපයති. අනතුරක් වූ විටෙක.. මොවුන් බොක්කෙන්ම ඉදිරිපත් වෙති.. උදවු කරති.. පාරවල් හොයාගෙන යන විටදී ගූගල් නංගිටත් වඩා විශ්වාසදායී මාර්ගෝපදේශකයා ත්‍රී වීල් මල්ලි ය.

Uber, PickMe, Sonit වැනි Cab Service ආයතන ගැන මගේ පැහැදීම හොඳ ය. ත්‍රී රෝද රථ මිළ ට ආසන්න හෝ ඊටත් අඩු මිළකට කාර් එකක් ලබා දෙන මේ සේවාව අගය කළ යුතු ම ය. මේ අතර Uber සුවිශේෂී වන්නේ.. මිළ බොහෝ සෙයින් අඩු වීමත්.. විවිධ වෘත්තීන්හී නියැලෙන්නන්ට තමන්ගේ ගමන් බිමන් අතර තුර කීයක් හෝ හොයාගන්නට මඟ පාදා දීමත් නිසා ය. එයට අමතරව නවීන තාක්ෂණය ඔස්සේ.. වාහනය තිබෙන තැන සොයාගැනීමේ පහසුව ද Uber, PickMe වැනි ආයතන මඟින් ලබා දී ඇත..

මගේ මතයට අනුව නම්.. වෘත්තීය පූර්ණ කාලීන ත්‍රී රෝද රථ ධාවකයින්ගේ සේවය.. ඉදිරියේදී ලංකාවට අවැසි නොවනු ඇත.. ඔවුන් ද වෙනත් වෘත්තියක නියැලෙන අතර තුර, මෙම වෘත්තියෙහි යෙදීම යහපත් ය. අනෙක් අතට .. ඔවුන් මේ අයකරන අසාධාරණ මුදල වෙනුවට.. සාධාරණ මුදලක් අය කරන්නේ නම්.. ඔවුන්ගේ රැකියාව අවදානමකට ලක් වන්නේ ද නැත.

වඩා හොඳ සේවය සමඟ තරඟකාරීව ගැටෙනු නොහැකි විට.. අයථා ලෙස ඔවුන්ව පන්නා දැමීමට උත්සාහ කිරීම ම ඔවුන්ගේ ඇති මුග්ධ බව ලොවට කියා පාන්නකි.. Uber වැනි ආයතන වැඩි වැඩියෙන් බිහිවේවා යන්න මගේ පැතුමයි..

සුසන්තිකා කුහක ද?

සුසන්තිකා ජයසිංහ.. එන්නට පෙර.. ආසියාවේ කළු වෙළඹ.. දමයන්ති දර්ශා ය. එහෙත්.. සුසන්තිකා ගේ ආගමනයෙන්.. දර්ශාට පසු බසින්නට සිදු විය.. දර්ශා.. සුසන්තිකා ලෙසින් කෑගෑවේ නැත. ඔලිම්පික් පදක්කමක් ගෙනා සුසන්තිකා.. වීරවරියක් විය.. ආසියාවේ කළු වෙළඹ සුසන්තිකා විය.. සුසන්තිකා.. තමන්ට ලැබුණු දෑ මදි බවට හඬ නඟන්නට විය.. සුසන්තිකා දුෂ්කරත්වයේ ගිරි දුර්ගය තරණය කළ.. වීර කාන්තාවක් බවට තර්කයක් නැත.. හඬ නඟා බොහෝ දෑ ඇය ලබා ගත්තාය.. ඒ නිසා ම ක්ෂේත්‍රයේ අනෙක් අයට ද පෙරට වඩා සැලකිලි ලැබෙන්නට ඇතැයි ද මම සිතමි..

කාලය ගෙවී ගොස් පාරමී - පාසැල් දියණිය.. යොවුන් ඔලිම්පික් පදක්කමක් ගෙන ආවාය.. ඇයගේ කතාව ද සුසන්තිකාගේ මෙන් ම දුක්බර එකකි.. ඇය ට සුසන්තිකාට පාසැල් කාලයේ නොලැබුණු වරප්‍රසාද ලැබුණු බවට සැකයක් නැත. ක්‍රීඩා අමාත්‍යාංශයෙන් .. ඒ කාලේ කරපු දේවල් වලට වඩා දෙයක් කරන්නට ද ඇත. එහෙත්.. පාරමීට ද සුසන්තිකාට මෙන්ම ලැබෙන/ලැබුණ ටික මදි බව ඇය කීවාය..

මෙයට උත්තර බඳින්නේ සුසන්තිකා වීම දෛවයේ සරදමක් බඳු ය... සුසන්තිකා.. ප්‍රශ්නය දකින ආකාර කිහිපයකි.. පළමුවැන්න.. ඇය තමාගේ පාසැල් කාලයේ තමාට ලැබුණු දෑ.. සමග පාරමී ට ලැබෙන දෑ සංසංදනය කරයි..දෙවැනුව .. ඇය තමාගේ පදක්කම හා පාරමීගේ පදක්කම සංසංදනය කරයි.. තෙවැනුව.. ඇය ක්‍රීඩා අමාත්‍යංශ නිලධාරිනියක ලෙස බලයි.. මේ අවස්ථා තුනේදී ම ඇයට පාරමී .. පෙනෙන්නේ කුඩාවට වීම අරුමයක් නොවේ.. මේ හැර.. මවක, මානව දයාව පිරි කාන්තාවක ලෙස ඇය පාරමී ව දුටුවා නම්.. තත්වය වෙනස් වන්නට තිබුණි.. එහෙත් සුසන්තිකා යනු සුසන්තිකා ය.. ඇය රේස් දුවන/දුවපු කෙනෙකි..

පාරමී තව යා යුතු දුර බොහෝ ය. මේ පදක්කමට වඩා වටින්නේ .. ඇය ගැන සැම දෙනා ගේ අවධානය යොමු වීමය.. සුසන්තිකා ගිය දුරට වැඩි දුරක් දිවීමට ඇයට ඉඩ ඇත.. අවශ්‍ය කැපවීම හා ධෛර්යයි.. ඒ දෙකත් සුසන්තිකාගෙන් ම උගෙන.. හැසිරීම.. දර්ශාගෙන්, ශ්‍රියාණි කුලවංශගෙන් එහෙම ඉගෙන ගන්නේ නම්.. පාරමී ඔබ රටට සම්පතක් වනු ඇත...

බැරිදා විග්‍රහය! ලංකාවේ දේශපාලනය

අද වන විට බරපතළ ලෙස සෝදාපාළුවට ලක්ව ඇතැයි සැලකෙන.. අතිශය ප්‍රෝඩාකාරී කේෂේත්‍රයක් ලෙස ශ්‍රී ලංකාවේ දේශපාලන ක්ෂේත්‍රය බැලූ බැල්මට පෙනේ. මුහුණුපොතට ගොඩ වූ පසු වැඩිපුරම දක්නට ලැබෙන්නේ තම තමන්ගේ පිළිමලුන්ට දෝෂාරෝපණය කරන එක්තරා දේශපාලක පිරිසක් සරණ ගිය අයගේ සටහන් හෝ ඡායාරූප ය. ඉඳ හිට සමහරු, මෙවැනි පාදඩ දේශපාලකයන් පත් කළ ජනතාවට ද දොස් පවරති.  

ජනතාව යනු හිතා මතා.. 58 ලක්ෂයක් එයාට දෙන්ට.. 62ලක්ෂයක් මෙයාට දෙමු කියා කතාවෙළා ඡන්දෙ දාන එවුන් ටිකක් නොවන බව මුලින් ම පැවසිය යුතුය.. 58 ලක්ෂය ඇතුළේ .. අඩු තරමේ කැපුවත් මහින්ද ජාතියේ උන්දැලා ලක්ෂ 35 ක් වත් ඉන්නා බවට සැක නැත. 62 ඇතුළේ .. කැපුවත් කොළ කාරයෝ ලක්ෂ 25ක් වත් ඉන්නවා සුවර් ය. සතුටට කරුණ ඉස්සරට වඩා උත්තර මාරු කරලා බලන්ට කැමති උදවිය ටිකක් වැඩි එක ය. ඒ ගොල්ලන්ට කියන්නේ පාවෙන ඡන්ද දායකයෝ කියාය. හැබැයි ඒක පට්ට වැරදි ය. උන් අර ඉස්සෙල්ලා කියපු වහල්ලු දෙවර්ගය මෙන් හීන ලෝක වල පාවි පාවි ඉන්නේ නැත.  ප්‍රායෝගිකව යමක් කරන්නට පොඩි හෝ උත්සාහයක් උන් ගන්න එක ගැන අප ගරු කළ යුතුය. හැබැයි ඔය අතර පාවෙන තව සැට් එකක් සිටී.. ඒ ජවිපෙ වැනි සුළුතර පක්ෂ වල අනුගාමිකයෝය. ඔවුන් විශේෂයෙන්ම පාවෙන්නේ ජනාධිපතිවරණයේ දී ය. ඒ ඔවුන්ට පාවෙනවා හැර වෙනත් විකල්ප නැති නිසා ය. නරකම කරුණ නම්..  මන්ත්‍රී වරු ලෙස තක්කඩියන් තේරීමේ වරද ජනතාව පිට පැටවීමයි.. එහෙත් ඇත්තෙන්ම එයට වගකිව යුත්තේ පක්ෂ නායකත්වයයි.. තක්කඩියන් පිරිසක් අතුරින් තෝරා ගැනීම ජනතාවට භාර කළ පසු.. ජනතාව අනිවාර්යයෙන් ම තෝරනුයේ තක්කඩින් පිරිසකි.. මන්ද යත් තක්කඩින් නොවන පිරිස් .. තෝරන ලැයිස්තු වල නොමැති නිසාය. සාපේක්ෂව හොඳ ලැයිස්තුව නිතරඟයෙන් ජවිපෙ වුව.. 71 හා 89 දී ජනතාව ඔවුන් කෙරෙහි ඇති කරගත් පිළිකුල හා අකැමැත්ත තවමත් පවතින නිසා.. ඔවුන්ගේ ලැයිස්තුවට තවමත් ලැබෙන්නේ කුඩම්මාගේ සැලැකිළි ය. 

ඔක්කොම කුණු බෙංගාල බොක්කටය කියා දේශපාලකයාට පස් පඩංගුවේ බණින ජනතාව ගේ කිල්ලෝට වල ඇති හුණු ප්‍රමාණය දේශපාලකයාට දෙවැනි වෙතැයි මට නම් නොසිතේ.. ජනතාව සුචරිතවාදී නොවනතාක් දේශපාලකයා සුචරිතවාදී නොවන අතර.. එහි විලෝමය ද සත්‍ය වේ. අනෙක් අතට වත්මනෙහි ආගමික නායකවරුන්ගේ දුර්වලතා හා වැරදි හැසිරීම් නිසා ද ජනතාව ගුණ දහමින් පිරිහී ඇත. 

පසෙකින් දේශපාලකයා ද, පසෙකින් ආගමික දේශකයා ද, පසෙකින් පාදඩ දොස්තරලා ද, පසෙකින් බාල ටෙලි ද, පසෙකින් අඳබාල නිවේදකයින් ද,  පසෙකින් තිරිසන් ගුරුවරුන් ද, පසෙකින් රැඩිකල් ය කියන ලේඛකයින්, පදරචකයින්, ගායකයින්, සිනමාවේදීන් ඇතුළු කලාකරුවන් ද, පසෙකින් ඉහළ තනතුරු හොබවන නිලදරුවන් ද ඇතුළු මේ සමාජය ම මේ සමාජය විනාශ කරමින් සිටී..

හරියට වලිගෙ පැත්තෙන් කාගෙන එන සර්පයා වගේ ය. 

ඉතින් අපට විකල්ප නැත්තේ ය. ඇත්තේ නම් ඒ මොත්තේ ය. මේ නම් සත්තේ ය.. කූඩුවත් අරං.. අප පියා හැඹිය යුත්තේය..

පඬුපුල් ආසනේ..

උණුවෙනවා උණුවෙනවා ඉවරයක් නෑ කියලා ගලෝලා පැත්තකට විසි කරලා තිබුණ පඬුපුල් ආසනේ.. ළඟපාත තිබුණ කුෂන් කඩේකින් අලුතින් කුෂන් කරවගෙන කාරිය සක්කර දෙයියෝ ආපහු සිය සුපුරුදු වැඩ පිළිවෙල පටං ගන්ටෝනි කියලා හිතුවෙ.. පහුගිය කාලෙ තමන්ගෙන් ඉටු නොවුණු රාජකාරි ආයෙත් පටං ගන්ට ගැම්මක් හිතට ආපු නිසයි...

හයිකරලා ටික වෙලාවක් ගියත්.. උණු නොවුනෙ.. මේක හරියට වැඩ කරන්නෙ නැද්ද කියලා දෙයියන්ට හිතුණු නිසා එයා වහාම එයාගෙ තාක්ෂණික නිලධාරියාට කතා කළා.. කාලෙකින් පඬුපුල් ආසනයක් එක්ක හැප්පෙන නිසා තාක්ෂණික නිලධාරියා මේ දවස් වල පඬුපුල් ආසනේ අත්පොත කියවමිනුයි උන්නෙ.. දෙයියන්ගෙන් කැඳවීමක් ආවම.. හීන්දාඩිය දැම්ම ටෙකා පස්වාන්දහසකට සමාව අවසරයි මයෙ දෙයියො.. මොකද්ද ප්‍රශ්නෙ කියාගෙන දෙයියො ළඟට ගියා.. නෑ මේ පඬුපුල් ආසනේ වැඩ කරන්නෙ නැද්ද කොහෙද පොඩ්ඩක් බලපන්කො.. සක්කර දෙයියො ආමන්ත්‍රණය කළ සුහදශීලී ස්වභාවය නිසා ටෙකා ගෙ බය පොඩ්ඩක් අඩුවුණා.. මූලික කාරණා පරීක්ෂා කරපු ටෙකා මේකෙ කිසිම අඩුවක් දැක්කෙ නැති හින්දා ඒ බව සක්කරයට කිවුවා..

ඔය අතරෙ.. සභාව මැද්දෙන් ඇවිත් පඬුපුල් ආසනයෙ.. ලොක්කා වගේ වාඩි වෙන ගමන් "අප්පට සිරි අලුත් පුටුවක් අරං තියෙන්නෙ" කියලා මොර දුන්නෙ වෙන කවුරුවත් නෙවෙයි වයිමා..

තාත්තටත් ඉතිං මං මොනවා හරි ඉල්ලුවොත් මහා භාණ්ඩාගාරෙ ප්‍රස්න.. මං මේ කසි කබල් ෆෝන් කට්ටක් එක්ක විඳින වදේ.. අලුත් එකක් අරන් දුන්නෙ නෑ නෙ. එෆ් බී ගිය කාලයක් මතක නෑ..මේ විදියට අඳෝනාව කියං යද්දි.. ටෙකා ට හෙණම අවුල්.. වෙන මොකවත් නොවෙයි .. මෙච්චර දුකට පත් වෙච්ච එකෙක් ළඟ පාතම ඉඳලත් මේ ඉලවුව වැඩ නොකරන එකට.. බැහැපිය පඩත්තලයා ඕකෙන් කියමින් ඉදිරියට පැන්න සක්කරයා.. දුන්න පයිං පාර වැදුණේත්.. පඬුපුල් ආසනේට..  යකෝ පෘතුවියට ගිහිං ෆෝන් එකක් අරං එනකොට..ඒවා අවුටොප් පැසන් වෙලා.. කියාගෙන ආපහු පඬුපුල් ආසනේ වාඩි උනා..

මෙන්න රත්වෙනෝ.. මෙන්න රත්වෙනෝ... කියාගෙන සංතෝෂෙන් උඩ පැන්න සක්කර දෙයියො.. බැලුවා මොන පැත්තට ද ප්‍රශ්නෙ යොමු වෙලා තියෙන්නෙ කියලා.. හත්තිලවුවෙ.. ප්‍රංශෙට..
මොකද්ද කියලා බැලුවම.. ප්‍රංශෙ පාරකට තමන්ගෙ පුතා බීපු කිරි පැකට් එකක් විසිකරනවා දැකපු වයසක අම්මා කෙනෙක්ට පැසර් නැගලා.. සක්කරයා ටක් ගාලා පොඩි දෙයියෙක්ව පිටත් කරලා.. කිරි පැකට් එක ආපහු අර පුතා ගෙ අතටම දුන්නම.. දීලා දඩ කොලයක් දුන්නම.. ටක් ගාලා ආසනේ නිවුණා.. ආයෙත් ඉතිං ෆුල් කූල්..
ටෙකෝ .. මොකෑ බං.. මේක මෙච්චර පුංචි ප්‍රශ්න වලටත් රත් වෙන්නෙ.. ? සක්කරයටත් තියෙන ප්‍රශ්න..
දේවයන් වහන්ස.. ඔය පොලිතීන් අප ද්‍රව්‍ය පරිසරයට මුදාහරින එක දැං බරපතල අපරාධයක්.. ඒකනෙ ඕක රත්වෙන්නෙ.. හප්පට .. එතකොට අම්මට පැසර් වැඩි වුණු එකට නෙවී ද බං?
ඉතිං කොලුවො.. ඔය පොලිතින් පරිසරයට මුදා හරින එක නම්.. ලෝකෙ පුරාම දරුණුවට සිද්ධ වෙනවනෙ... එහෙමනම් ඒවට පත්තු නොවෙන්නෙ ඇයි? පොඩ්ඩක් බලපන් ආයෙමත් සිස්ටම් අවුලක්වත්ද කියලා?
හරිනෙ.. මේකෙ ඩිටෙක්ටිං ස්විච් එක දාලා තියෙන්නෙ ප්‍රංශෙ ට නෙ.. 
ඒක තමයි.. දාපං ඕක සිලෝන් එකට..
සුවර් ද දේවයන් වහන්ස..?
ඇයි උඹ එහෙම අහන්නෙ?
නෑ..මේකෙ සෙන්සර් එක ආයෙ යයිද?

පහුගිය කාලෙ සිලෝන් ඒරියා එකේ දුක් ගැනැවිලි වලට රත් වෙලා වැඩි වුණු පාර තමයි ඔය පුටුව අතෑරලා දාලා තියෙන්නෙ.. ඒත් ඉතිං.. දැං කොටි ප්‍රශ්නත් ඉවර නිසා.. යහපාලනයකුත් තියෙන නිසා.. තමයි .. සක්කරයාට ආයෙත් ආසාවක් ආවෙ.. පුටුවෙ වාඩි වෙන්න.. සිලෝන් කියලා ස්විච් එක මාරු කරපු ගමන්.. පුටුව රත් වුණා රත්විල්ලක්.. සක්කරයා උඩ විසික්කා වෙන්න..

හප්පට.. පුටු කේස් එකක්.. බස්නාහිර පළාත් සභාවෙන් පඬුපුල් ආසන වගයක් ඕඩර් කරලා කියන්නෙ.. සක්කරයා ටක් ගාලා පොඩි දෙයියෙක්ව යැවුවා.. සරල ජනපති ගාවට.. පත්තරේකුත් අරගෙන.. වැඩේ ශේප්..
ඒත් පුටුව රත් වෙලා..
ඒ පාර.. කෝච්චි ඉස්ටැයික්..  හරි හරි.. ඒකත් අර පත්තරේ ම තිබිලා.. වැඩේ ශේප්..
තාම පුටුව රස්නෙයිනෙ..
මොනාද බං මේ ලිස්ට් එකක් එන්නෙ..?
සැප වාහන, මන්ත්‍රී දීමනා, කැලෑ වැනැසීම්, බැඳුම්කර මගඩිය, දොස්තර වර්ජන බ්ලා.. බ්ලා.. බ්ලා..
දාපං.. ආයෙත් ස්විච් එක ප්‍රංශෙ ට..

පුළුවන්නම් බැණපල්ලා

            

ආදර කකුළුවනි මේ ටික	අහපල්ලා
යා හැකි දුරක් ඇද නැතිවම	පලයල්ලා
ආරය වෙනස් විය හැකි බව	පවසල්ලා
තේරුණෙ නැතොත් කට වහගෙන	හිටපල්ලා
රස කොට දෙසුව බණ පදයක්	අහපල්ලා
අහලා බණේ දෙකණින් පිට	කරපල්ලා
බලපිය රටට යන කල එය	රැකපල්ලා
රජෙකුට යටහත්ව සදහට	ඉඳපල්ලා
මිටි තැන මුව හමක් ගෙන තඩි	බාපල්ලා
උස් තැන් ළඟ දි මුව ගල් වල	උලපල්ලා
කපුවා යවන පඩ සුවඳයි	සිතපල්ලා
දෙයියන් බුදුන් සිහිකොට දැන්	දුවපල්ලා

අප්පච්චි..

මීට අවුරුදු 38කට විතර ඉස්සර දවසක මට හොඳටම තැලුවලු.. ඒ මං නැකතට අකුරු කියෙවුවෙ නෑ කියලා.. මට ඒක මතක නෑ.. ඒත් ඊට පැය ගානකට පස්සෙ ආදරෙන් කතාකරපු ලොකු බාප්පත් එක්ක අකුරු කියන්න කැමැත්ත පළ කළා මතකයි.. ඒක රාහු කාලෙ ලු.. කොහොම වුණත්.. අප්පච්චි ඔය තරම් නිච්චියටම නැකැත් සෑස්තරේ වත් දෙයියන්වත් විශ්වාස කරපු කෙනෙක් නෙවේ ලු ඉස්සර.. ඒත් දරුවන් ගෙ දේකදි එහෙමවත් අවදානමක් ගන්න අප්පච්චි අකැමති වෙන්නැති..
මං උපන් ගෙයි දඟ මල්ල වෙද්දි අක්කා සුවච කීකරු දියණිය වුණු නිසා.. අප්පච්චි අක්කට වැඩියෙන් ආදරෙයි වගෙයි මට දැනුණෙ.. අප්පච්චි මට වැඩි වැඩියෙන් තරවටු කරද්දි.. මං වැඩි වැඩියෙන් දරදඬු වුණා... අප්පච්චි කවදාවත් මගේ ලෝකෙ වීරයෙක් වුණේ නෑ.. මට අවුරුදු 25ක් විතර වෙනකම්.. කොටින් ම.. අප්පච්චි දැඩි ලෙස අවංක වීම පවා මං දැක්කෙ.. දුර්වලතාවයක් විදිහට.. ඒත් යම් අවස්ථාවක.. මට අප්පච්චිගෙ හොඳ ගතිගුණ පෙනෙන්න ගන්නවා..
අවංක කම වගේ ම වෙලාවට වැඩ කිරීම, කවි කම වගේ හුඟාක් ගතිගුණ මට නිසඟයෙන් හිමි වෙලා තියෙන්නෙ අප්පච්චිගෙන් කියලා මට දැනුණ දා අප්පච්චි මගේ ලෝකෙ වීරයෙක් වෙනවා.. මං පුංචි අනතුරකට මුහුණ පෑ වෙලාවෙ වගේ ම අප්පච්චි ඊට ටිකක් වැඩි අනතුරකට මුහුණ පෑ වෙලාවෙ.. අප්පච්චි මටත් .. මං අප්පච්චිටත් කොයි තරම් ආදරෙයි ද කියලා මට දැනෙන්න ගන්නවා..
අක්කා හෝ මං කියා වෙනසක් නැතිව .. අපි දෙන්නට ම අප්පච්චි එක වගේ තමන්ට කරන්න පුළුවන් හැම දෙයක්ම කරද්දි මට හිතෙනවා අපරාදෙ පොඩි කාලෙ අප්පච්චි ගැන එහෙම හිතුවෙ කියලා.. ඒත්.. එතැන් සිට වසර ගනණාවක් ගතවෙද්දි වුණත්.. අප්පච්චි මටත් මං අප්පච්චිටත් යුතුකම් ඉටු කළා මිස.. අපි අතර අන්‍යෝන්‍ය අවබෝධයක් තිබුණේ ම නැති තරම්.. ඒ වගේ ම මගේ යටිහිත ඒ වන තුරුත් හිටියේ අප්පච්චිගේ උපදෙස් එසැණින් ප්‍රතික්ෂේප කරන තරම් උඩඟුවෙන්.. ඒක ඇඟටම කාවැදිලා තිබුණා..මට තනියෙම තීරණ ගන්න පුළුවං කියන අධි මානය මට තිබුණා වගේ ම.. මට තනියෙම තීරණ ගන්ට බෑ කියලා අප්පච්චි හිතාන උන්නා..
පහුගිය වසර 8 ක කාලය තුළ අප්පච්චිගේ සෞඛ්‍ය තත්වය බලා ඉඳිද්දී පිරිහුණා.. අප්පච්චි තනිවම ගමන් බිමන් යෑම නතර වුණා.. ඉඩම පුරා ඇවිදීම නතර වුණා.. ගේ ඇතුළේ තනියෙම ගමන් කිරීමත් අඩු වුණා..
මගේ දරුවන් ලොකු වුණා.. සමාජය මාව ගෘහ මූලිකයා විදිහට සලකන්න ගත්තා.. මගේ යාළුවො ඇවිත් කතා කළේ මාත් එක්ක..  අප්පච්චිත් එක්ක කතා කළත් වච්නයයි දෙකයි.. අපි වුණත් අප්පච්චිත් එක්ක සතුටු සාමීචියට ගියේ අඩුවෙන්.. අපේ අවිවේකය වගේ ම තවත් පුංචි පුංචි හේතු තිබුණා..
අප්පච්චි හැම කෙනාත් එක්කම ඉතා කුළුපගව කතා කරපු.. හැමෝට ම උපදේශන සපයපු කෙනෙක්.. මානසිකව මේක හුඟක් දැනෙන්න ඇති..
ශරීර සෞඛ්‍යය හොඳට ම පිරිහිලා තිබුණු අප්පච්චිගෙ මානසික සෞඛ්‍යයත් හදිසියේ ම පිරිහෙන්න ගත්තා.. එය බලා ඉන්නැද්දී සිදු වුණා.. ළඟ මතකය මුලින් නැති වුණා.. කතාවත් අඩු වුණා..
අද මගෙ ආදරණීය අප්පච්චි ජීවත් වන මළ මිනියක් ගානයි.. හැම දේම කරන්න වෙලා තියෙන්නෙ අපිට.. තවම අප්පච්චිට 75යි..
ආදරණීය යළුවනේ.. ඔයාලගෙ දෙමවුපියොත්.. තවම හොඳ සිහි කල්පනාවෙන් ඉන්නවා නම්.. ඔවුන්ගේ වයස 60 ට වැඩි නම්.. ඔවුන් සමඟ වෙනදාට වඩා කතා බහ කරන්න.. යාළුවනේ.. ගෙවල් වලට ගිහාම වයසක අම්මලා තාත්තලා ඉන්නවා නම්.. ඔවුන් එක්ක වචනයක් කතා කරන්න.. ඒක ඔවුනට හුඟක් වටිනවා.. හුඟාක්..

අලුත් අවුරුද්ද ..

  නෑදෑයෝ එකා දෙන්නා හරි මුණගැහෙන්ට ඉඩක් ලැබෙන.. පවුලේ අය එක්ක තුටු පහටු වන්නට ඉඩක් ලැබෙන කාලයකි.. ඉස්සරට වඩා දැන් අලුත් අවුරුද්දේ වෙනසක් ඇත.. එදා තරම් අවුරුද්ද අලුත් නැත.. හැම දේ ම අපි කරමු.. ඒත් එහි කිසිම ස්වභාවික ගතියක් නැත..
ජීවිතය එපා කරවන්නේ පූර්ව අලුත් අවුරුදු සමය (ම) යි. නෝනලා ඇඳුම් හොයන්නට සාප්පු පුරා දුවද්දී.. ක්‍රෙඩිට් කාඩ් වල බිල් ගෙවන්නේ කෙසේදැයි සාප්පුවේ පඩියක වාඩි වී කල්පනා කරන මහත්තුරු එමට ය. පුස්සිටියට ගොහිං එලියට එද්දී හිතෙන්නේ අවුරුද්දෙන් පස්සෙ පුස්සිටි වහනු ඇතැයි කියා ය. ලොරි බාගයක් නොගෙනාවේ අපරාදේ කියා ය.
රත්ඤ්ඤා මරහඬ නිසා අවුරුදු දින වල කසාද බැඳ අවුරුදු ගනං ඇස්පීරියන්ස් තියෙන අප වැනි පිරිමි කෙසේ වෙතත්..  අන් අය සිටිය යුත්තේ කන් වල ඇඟිලි ගහගෙන හෝ පොරොප්ප මූඩි ගහගෙන ය.

නොනගතයට පෙර බඩ පැලෙන්ට කා.. අවුරුදු ලබන තුරු.. කැවුම් කොකිස් කකා තේ බිබී කාලය ගත කිරීම අපේ විනෝදාංශයයි.. අලුත් අවුරුදු නැකතේ දී නැවත බඩ පැලෙන්ට කන අපි කන්ටම උපන් ජාතියකැයි විටක සිතෙයි...

ඒ කාලේ නම්.. ළිඳත් එක්ක ගනුදෙනු කළත්.. අද ගනුදෙනු කරන්නට එහෙම හිත හොඳ ලිං නැති නිසා.. පවුලේ අය සමභ ම ගනුදෙනු කිරීම අපේ ක්‍රමය වුවත්.. වැරදිලාවත් බැංකුවකට ගියහොත්.. එය සඳුදා නිවාඩු පිට අඟහරුවාදාටත් වඩා පිරී ඇති බව දැක ගත හැක.. ඒ අතින් බලන විට.. මිනිස්සු පට්ට සල්ලි කාරයෝ යැයි සිතෙන්නේ ඔවුන් පැමිණ සිටින්නේ මුදල් තැන්පත් කිරීමට මිස මුදල් ඉවත් කර ගැනීමට නොවන නිසාය.
ඉස්සර මිදුලේ අඹ ගහේ ඔන්චිල්ලාව බඳිතත්.. දැන් මිදුලේ යකඩෙන් තැනූ ඔන්චිල්ලාවක් තිබේ.. අඩුවකට ඇත්තේ ඒවා පදින්නට ළමයින් ය.
ක්‍රිෂ්ණා, ශිවා හෝ සූටිං මාටිං ඇත්නම්.. ළමයින්ට හැමදා අවුරුදු ය.
මල් වවද්දී අවුරුදු කාලෙට පිපෙන එරබදු, මැයි මාසෙට පිපෙන මැයි මල් වගේ සීසොනල් මල් ටිකක් වවන්නට මගේ ආසාවක් ඇත්තේ.. සීසොන් වෙනස් වෙද්දී ඒක අපට තේරෙන එක මරු නිසාය.. අපට එරබොදු මල් නැතත්.. කොහා ඉන්නවා ය කියා හිත හදාගන්නට හැකි වීම අප ලද භාග්‍යයක්ය. මැයි මල් නොතිබුණාට.. ගං වතුර එන නිසා.. අපට මැයි මල් වල අඩුවක් ද දැනෙන්නේ නැති ය..
ඔක්කෝමත් හරි ය.. අලුත් අවුරුදු උස්සවත් හරි ය.. මුලින් ම ආධාර ඉල්ලන්ට කොල්ලෝ කුරුට්ටෝ විඩෙං විඩේ .. එයි. ඉන්පසු උස්සවේ තියෙයි.. සැඟැවුණු අමුත්තා හොයයි.. ගස්ලබ්බේ ඇට ගාණ හොයයි.. ඔය වාගේ අටෝරාසියක් සෙල්ලම් ය.. ඒ අතර.. කඹ ඇදීම, කණා මුට්ටිය බිඳීම, ලිස්සන ගහේ  නැඟීම වැනි සම්ප්‍රදායික අවුරුදු ක්‍රීඩා තවමත් පැවැතීම සතුටු දායකය. අවුරුදු කුමාරි තේරීම එහි තිබෙන නරකම අංගයක්යැයි මට හිතේ..

ඔය ක්‍රීඩාවලට නොදෙවෙනි ක්‍රීඩාවක් අවුරුදු දා ක්‍රියාත්මක වෙයි.. ඒ කෑම පිඟන් ගම වටා යැවීමේ ක්‍රීඩාවයි.. බොහෝ විට එහි ජයග්‍රාහකයින් වන්නේ බල්ලන්, පූසන් හා ලේනුන් යැයි සිතෙන්නේ .. එම කෑම පිඟන් වල ඇති දෑ අවසන හිමි වන්නේ ඔවුනට බැවිනි..

අවුරුද්ද මැද්දේ එන අලුත් අවුරුද්ද.. දැහැමින් සෙමෙන් සමරන එක අපේ යුතුකමය. ආර්ථික අමාරුකම් ගැන කියා.. ආණ්ඩුවට බැනීමෙන් වත්.. තමන් ගේ පුරාජේරුව ෆේස්බුක් දැමීමෙන්වත් සිදුවන සෙතක් නැත.. සරලව සැහැල්ලුවෙන් ගත කිරීම තරම් විවේක කාලයකින් ලද හැකි ප්‍රයෝජනයක් මා නොදන්නා නිසා.. ඉදිරි දින වලදී ඒ සඳහා කැපවීම සුදුසු බව ඔබ හැමට ආදරයෙන් නිර්දේශ කරන්නේ චතුර විජේකෝන් වන මම ය.

ක්‍රෙඩිට් කාඩ් වලට අහු වුණාද?

ඔබත් ක්රෙඩිට් කාඩ් එකක් භාවිත කරන්නෙක් ද? මාසය අවසන සම්පූර්ණ මුදලම නොගෙවන අයෙක් ද? එසේ නම්.. නිකරුණේ ඔබ අදාල බැංකුව හෝ සමාගම පොහොසත් කරන්නෙකි.

අද කාලයේ ක්‍රෙඩිට් කාඩ් භාවිතය සමාජයේ සුලභ වී ඇතිවාක් මෙන්ම එය ඉතා ප්‍රයෝජනවත් බවට සැකයක් ද නැත. එහෙත් ඔබගේ මාසික බිල සම්පූර්ණයෙන් නොගෙවූ විට අසාධාරණ පොළියක් ඔබෙන් අය කරන බව ඔබ තවම නොදන්නවා විය හැක.. මා මේ කියන්නේ වාර්ෂික ව 24% ක් පමණ වූ පොළී අනුපාතිකය ගැන නොවේ.. ඔවුන් පොළිය ගණනය කරන ක්‍රමවේදය ගැනයි.. එම ක්‍රමවේදයට අනුව.. ඔබට ගෙවන්නට අතපසු වූ මුදල රුපියලක් හෝ ශත පණහක් විය හැක.. එහෙත්.. ඔබ භාවිතා කළ මුළු මුදලට ආසන්න ප්‍රමාණයකට ඔබට පොළී ගෙවන්නට සිදුවේ.. දැනට අත්දුටු පරිදි.. ප්‍රධාන බැංකු  තුනකම (නේෂන්ස් ට්‍රස්ට්, සම්පත් හා සෙලාන්)  එසේ ය.  පහත දැක්වෙන්නේ මා මුහුණ දුන් එවන් අවස්ථා කිහිපයකි.

උදා: 1.සෙලාන්..
පෙබ. 25 දිනට පෙර ගෙවීමට තිබූ මුදල (රු) ==> 25,107.38
පෙබ 22 ගෙවූ මුදල (රු) ==> 25,100.00
හිඟ මුදල (රු) ==> 7.38
මාර්තු 05 ලැබුණු බිලෙහි එක් කර ඇති.. පොළී මුදල (රු)==> 573.49

උදා: 2. නේෂන්ස් ට්‍රස්ට්
මාර්තු. 05 දිනට පෙර ගෙවීමට තිබූ මුදල (රු) ==> 63,502.27
පෙබ 19 ගෙවූ මුදල (රු) ==> 25,000.00
පෙබ. 28 ගෙවූ මුදල (රු)==> 38,500.00
හිඟ මුදල (රු)==>2.27
මාර්තු 16 ලැබුණු බිලෙහි එක් කර ඇති.. පොළී මුදල (රු)==> 922.57

උදා 3: සම්පත්
2017 අගෝස්තු 08 දිනට හෝ ඊට පෙර ගෙවීමට තිබූ මුදල(රු) ==>28,265.21
2017 අගෝස්තු 08 දින ගෙවූ මුදල (රු) ==> 28,000.00
හිඟ මුදල (රු) ==>265.21
2017 අගෝස්තු 16 ලැබුණු බිලෙහි එක් කර ඇති පොළී මුදල(රු) ==>754.14

බිල්පතෙහි සඳහන් අවම මුදල ගෙවීමෙන් පමණක් සෑහෙන ඔබ මෙන් ම.. සුළු ගණනක් හෝ හිඟ තබන ඔබ ද.. ක්‍රෙඩිට් කාඩ් පිරිනමන බැංකු වල ගසා කෑමට ලක්වෙයි.. මේ ගැන දැනුවත්ව ක්‍රෙඩිට් කාඩ් භාවිත කර..වාසි අත් කර ගන්න..

කඩමාල්ල

ඉර ට කළින් මුළුතැන්ගෙයි වැඩ අල්ලද්දී නුඹ
පරණ ගවුං කඩමල්ලක් ඇන්දෙත් මොහොතක් සිඹ
ඒ සුවඳේ මොන අඩුවද සිතමින් හුස්මක් පිඹ
වළා සිනාවක් දිසි තද හිරු රැස් අතරින් නුබ

පුංචි කාලෙ අපේ කඳුළු හා කුණු දහඩිය පවා
හිත් රිදුණම නුඹ දෙනෙතින් වැගිරුණු මුතුවැල් පවා
එළවලු, මස්, බිත්තර හා දෙහි, ලුණු, තුනපහ පවා
ගවුමේ තව තිබුණා අප බිවු කිරි වල රහ පවා

අවුරුද්දට අලුත් ගවුම් මං අරගෙන දෙන්නම්
ඒ ඇඳගෙන වන්දනාවෙ එක්කරගෙන යන්නම්
ආදරයෙන් අම්මේ එක වරයක් ඉල්ලන්නම්
පරණ ගවුම හැඳ එනු එහි හිස සතපන් ඉන්නම්

සතුටින් යන්න

ඔබ ඇත සයනක වැතිරී දුක සේ
දිනයක යනු ඇත අතහැර නිසි සේ
කලකදි වින්දත් සැප හැම රිසි සේ
දුරකය එම දේ ඇති හුදු මනසේ

හැම දෙයකට නිසි කල එළඹෙනවා
ඔබ මා වෙන් වන දිනකුදු එනවා
මැවි මැවි පෙනෙනා මතකය පිනවා
සමු ගන්නෙද කෙලෙසක සිත දනවා

පැරදුමකුයි හදවතට දැනෙන්නේ
මම ඇයි යන ඔබ මෙහි නවතන්නේ
වැඩකට නොවැ මෙහි එන්නේ යන්නේ
එයටනෙ ජීවිතයයි පැවසෙන්නේ

යන තැනකට ඔබ සතුටින් යන්න
එහි ඇති බොහො අය ඔබ පිළිගන්න
අප ගැන තව වැඩි දුර නොසිතන්න
බැරි නැත ළඟදිම යළි හමුවෙන්න

බයිට් වූ කලා කරුවෝ..

ටික කලකට පෙර එක්තරා රූපවාහිනී නාලිකාවක තිබුණු එක්තරා වැඩසටහනකින් සිදු කළේ.. කලාකරුවන් වෙත අහඹු ලෙස කඩා පැන.. ඔවුන් නොසිතූ නොපැතූ දේවල් සිදු කර.. ඔවුන්ගේ ප්‍රතිචාර වලට සිනා වීමයි.. ප්‍රෑන්ක් යනුවෙන් අන්තර්ජාලයේ එවැනි දෑ ඇති තරම් ඇත. කෙසේ වෙතත්.. මෙහිදී කලාකරුවා නොදැනම .. නොමිලේ ම බයිට් වේ.. මෙයට එරෙහිව නැඟී සිටියේ දක්ෂතම ප්‍රහසන නළුවෙකු වන මිහිර සිරිතිලකයි.. නොමිලේ බයිට් විය නොහැකි බව ඔහු කියා සිටියේ ය..

මට මෙය මතක් වූයේ ඊයේ පෙරේදා කරලියට පැමිණ ඇති.. පිංපොං ඇතුළු නඩයේ රණවිරු කතන්දරය නිසාය.. ඇත්තෙන්ම මේකත් බයිට් වීම පිළිබඳ කතන්දරයකි.. අද කාලයේ කලාකරුවෝ.. නොමිලේ බයිට් වීමට කැමති නැත. 
පිං පොං ඇතුළු නඩය ට ගෙවන්නට ඇත්තේ ඒ බයිට් වීම උදෙසා ය. මට ඒ සමඟ පැන කිහිපයක් මතුවේ..
ජැක්සන්ලා වැනි අයට ගෙවුවේ කෙසේ ද?
නොගෙවුවා නම් ඔවුන් නොමිලේ ම බයිට් වුණා ද?
ඔවුන් බයිට් වු බව ඔවුන් නොදැන සිටියා ද?

යනු ඒවාය.
කොහොම වුණත්.. උන් පවු ය..මුදලට හෝ නිකම්ම ඔවුහු බයිට් වූහ.. අපි ඊටත් පවුය.. මන්ද උන්ට ගෙවා ඇත්තේ අපේ මුදලිනි..

අදින් හෙටට

ඉස්සර මං උසස් පෙළ කරන කාලෙ.. මං අවිස්සාවේල්ලටත් හැතැක්ම දෙකක් විතර එහායින් නෙ හිටියෙ.. ඉස්කෝලෙ තිබුණෙ.. කොල්ලුපිටියෙ ඉතිං උදේ පාන්දර ගෙදරින් පිටත් වෙනවා.. සඳුදට නම්.. පාන්දර හතර හමාරට.. අනෙක් දවස් වලට පාන්දර පහයි කාලට විතර.. දැං වගේ.. අවිස්සාවේල්ලෙ ඉඳං පාසැල් බස් තිබුණෙ නෑ ඒකාලෙ.. (අපි අයින් වෙන කාලෙ තමයි පටං ගත්තෙ.. ). ඉතිං කොහොම හරි.. මං බස් එකට නැග්ගට පස්සෙ.. ඉඳගෙන ඉන්න කාට හරි පොත් බෑග් එක දෙනවා.. බොහොම සුහද සිනහවකුත් දාලා.. ඒ කාලෙ ඉතිං දන්නවනෙ .. වැඩිම වුණොත් පොත් තුන හතරයි තියෙන්නෙ.. එක දවසක් මේක දුන්නු කෙනා.. ඒක ප්‍රතික්ෂේප කළා.. ළමයි වුණාම බෑග් එක අරං යන්න පුළුවන් වෙන්න ඕනලු.. එයාලගෙ කාලෙ.. ඔහොම කාටවත් කරදර කළේ නෑ ලු.. එයාලා ගොඩක් මහන්සි වෙලා ලු ඉස්කෝලෙ ගියේ.. ආදී වශයෙන්.. කතන්දර ගොඩක්.. 

තමන් මහන්සි වෙලා යම් දෙයක් ලබා ගත්තා නම් ඒක හොඳයි.. ඒත් එහෙමයි කියලා තවත් කෙනෙකුත් .. ඒ මහන්සියම යොදවලා එය ලබා ගන්ට ඕනියි කියලා හිතන එක මොන වගේ තත්වයක් ද? බුදු හාමුදුරුවො එහෙම හිතුවා නම් එහෙම.. :D රහතන් වහන්සේලා ට ත්  ඉස්සෙල්ලා.. දුෂ්කරක්‍රියා එහෙම කරලා.. එන්ට වෙයි.. :D 

අපි බස් වල පැය 2-3 දුක් විඳගෙන ඉස්කෝලෙ ගියේ.. ඒත් අපේ දරුවන්ට ඒ දුක දෙන්ට හොඳ නෑ කියලයි අපි නම් හිතන්නෙ.. එකාතකට.. දුක් විඳීමෙන් ලැබෙන පන්නරය ළමයින්ට අහිමි වෙනවා තමයි.. ඒත්.. ජීවිතය කියන්නෙ එහෙමයි.. ලෝකෙ අලුත් වෙනවා.. ඕනම ක්ෂේත්‍රයක අලුත් අය පටං ගන්න ඕන පරණ අය නවත්තපු තැනින්.. පරණ අය විදිහට ම ඉගෙන ගෙන .. යම් දෙයක් ඉදිරියට ගෙනයන්න පුළුවන් ද කියන එක ගැටළුවක්..

ඡන්ද මෙච්චර ඕනම ද?

 පසුගිය වසර 8 ක පමණ සිට මෘදුකාංග අලෙවිකරුවන් වන අප අප ආයතනයේ විකිණුම් දත්ත විශ්ලේශනය කිරීමේ දී පෙනී යන කරුණක් වන්නේ.. පහත කාල වලදී අපගේ මෘදුකාංග සඳහා වන ඉල්ලුම ඉතා පැහැදිලිව පහල බසින බවයි..
1. ඡන්දයක් ප්‍රකාශයට පත් කළ දින සිට ඡන්දය පැවැත්වී සතියක් පමණ ගත වන තෙක්..
2. අලුත් අවුරුදු නිවාඩුව සහ නත්තල් නිවාඩුව ආශ්‍රිත දින වල.

මෙහිදී ඡන්දයක බලපෑම දීර්ඝ කාලයකට බලපවත්වන බව පැහැදිලිය. මෘදුකාංගයක් ස්ථාපනය කිරීම ආයෝජනයකි. අපගේ නිශ්පාදන මිළ දී ගන්නේ ලංකාවේ පවතින ආයතනයන්ය. මෙවන් කාල වලදී ආයතන වල ආයෝජන ක්‍රියාවලිය අකර්මන්ය වන බව මෙයින් පැහැදිලි වේ. මෙය රටෙහි සමස්ථ ආර්ථික ක්‍රියාවලියට ම බලපාන බව රටෙහි නීති හදන්නන්ට නොවැටහීම කණගාටුවකි.
අපේ රටේ ප්‍රධාන වශයෙන් ඡන්ද වර්ග කිහිපයක් ඇත.
1. ජනාධිපතිවරණය
2. පාර්ලිමේන්තු මැතිවරණය
3. පළාත් සභා මැතිවරණය
4. ප්‍රාදේශීය සභා/ නගර සභා මැතිවරණය (පුංචි ඡන්දය)
1 හා 2 ඡන්ද මේ වන විට පවත්වා වසර 2ක් පමණ ගත ව ඇති අතර 3 ඡන්දය අවසන් වරට පවත්වා වසර 3-4 ක් පමණ වන්නට ඇත. දැන් ප්‍රමාද කරමින් සිටින්නේ 4 හෙවත් පුංචි ඡන්දයයි..
මේ වගේ පුංචි රටක් පාලනය කරන්නට මේ තරම් විශාල දේශපාලන ආයතන සංඛ්‍යාවක් සහ සභිකයන් සංඛ්‍යාවක් අවශ්‍ය වන්නේ ඇයිදැයි යන්න මට නොතේරුනත් මට ඇති ප්‍රධානතම ගැටළුව වන්නේ එය කරන්නට ම අවශ්‍ය නම්.. එය එක් ඡන්දයකින් හෝ දෙකකින් කරන්නට බැරි ඇයි දැයි යන්නයි.
පාලකයින් වෙනස් කිරීම හැරුණු කොට ජනතාවට ඡන්දයකින් වෙන මෙලෝ සුබසිද්ධියක් ඇත්දැයි මගේ කල්පනාවට එන්නේ නැත. නිසි ධූරාවලියක් (Hierarchy) සකස් කොට පහළ ම මට්ටමේ (4) ඡන්දයක් පවත්වා .. ඒ හරහා පිළිවෙලින් 3,2,1 යන ආයතන වලට සභිකයන් පත් කළ හැකි නම්.. ජනතා මුදල් මෙන්ම ජනතාවගේ වටිනා කාලය ද ඉතිරි කරන කටයුත්තක් වනු ඇත.

5 ශිෂ්‍යත්වයේ දක්ෂයින් කොන් වෙයි ද?

පසුගිය දා නිමා වූ ශිෂ්‍යත්ව විභාගයේ දී සුළු සුළු වැරදි සඳහා ලකුණු කැපීම සිදු වන බැවු සැවොම කලින් ම දැනුවත් ව සිටි නිසා.. සුළු හෝ වැරදි නොකරන ලෙස දරුවන්ට උපදෙස් ලැබුණි. එයට අමතරව සාර්ථකව හා ඉක්මණින් කෙටි ක්‍රම හා කට්ට ක්‍රම ද දරුවන්ට ගුරුවරුන් විසින් ලබා දුන්නේ තම තමන් ගේ පූර්ව අත්දැකීම් ද උපයෝගී කර ගනිමිනි.

නිවැරදි පිළිතුරට යටින් ඉරක් ගසන්නට ඇති විට.. දිගු ඉරක් නො ඇඳ, කෙටි ඉරක් ඇඳීමට උපදෙස් දුන්නේ ද සාමාන්‍යයෙන් තිතක් නොවන තරම් ඉරක්.. පිළිතුර ලෙස භාර ගැනීම සාමාන්‍ය ක්‍රමය බව පවසමිනි. එහෙත් මෙවර දෙවන ප්‍රශ්න පත්‍රයේ දී.. එම උපදෙස පිළිපැදි දරුවන් අනාථ කර ඇත. එහිදී උපදෙස් දී ඇත්තේ පිළිතුරු අංකයට යටින් පමණක් ඉරි ඇඳි විට එය පිළිතුර ලෙස භාර නොගන්නා ලෙසයි.

මෙමඟින් දරුවෙකුට අහිමි විය හැකි ලකුණු ගනණ 30 කි. ප්‍රශ්න පත්‍රයේ උපදෙස් අතර වත් එවන් උපදෙසක් නැතිව.. පරීක්ෂාවේදී එවන් රීතියක් පැනැවීම කොයි තරම් අසාධාරණ දැ'යි අමුතුවෙන් කිව යුතු නැත.

දරුවන්ගේ දක්ෂතාවය මනිනවා වෙනුවට මෙවන් අමන රීතීන් හරහා දරුවන්ගේ ලකුණු අඩු කිරීම හරහා සිදුවන්නේ සැබෑ දක්ෂයින්ට පසුබෑමටය. එමඟින් සිදු වන්නේ හොඳයැයි සම්මත පාසැලකට යාමට අහිංසක, සාධාරණ දෙමවුපියන්ගේ දක්ෂ දරුවන්ට ඇති එකම අවස්ථාව ගිලිහී යෑමයි..

ප්‍රශ්න පත්‍රයේ ගනණක තිබූ වරදක් ද හඳුනාගෙන එයට හැම දරුවාට ම අදාල ලකුණු ප්‍රමාණය හිමි කර දීමට තීරණය කර ඇති බව ඇසුවෙමි. එය ඉතා හොඳ තීරණයකි. 

ඒ ආකාරයට මෙම ප්‍රශ්න 30 නැවත සමීක්ෂණය කළ හැකි නම් එය දරුවන්ට කරන බලවත් සාධාරණයක් වනු ඇත. 

වගකිව යුත්තන්ගේ දෑස් මේ කෙරෙහි යොමු වී මෙම දරුවන්ට සාධාරණයක් ඉටු වේවායි පතනවා හැර අපට කළ හැකි වෙනත් කිසිවක් වේදැයි අඩමාන ය.

Google Voice Typing - සිංහලෙන් දාගත්තද?

සිංහලෙන් කතා කරද්දි ලියවෙන ඇප් එකක් ගූගල් එකෙන් හදලනෙ.. ෆේස් බුක් එක බැලුවාම ඉතිං මේකෙ වරුණෙ හැම තැන ම තිබුණා.. විශේෂයෙන් අපේ මල්ලි කෙනෙක් මට පණිවුඩයකුත් එවලා තිබුණා ඒ ගැන කියැවෙන මෙන්න මේ වීඩියෝව බලන්න කියලා.. නලීන් අයියත් පෝස්ටුවක් දාලා අවවාද කරලා තිබුණා.. ආයෙ.. සිංග්ලිශ් එහෙම ලියන්න එපා කියලා.. :D 

ඒත් ඒ වීඩියෝවෙ තිබුණු විදිහට GBoard කියන ඇප් එක Install කරගත්තාට.. ඒකෙන් කිසිම සෙතක් වුණේ නෑ.. ඒ කියන්නෙ  Voice Typing කියන Function එක හරියට වැඩ කළේ නෑ.. මං හිතුවෙ Phone එකේ අවුලක්වත් ද කියලයි.. ටිකක් වෙලා  එක එක ඒවා කරද්දි.. ඔන්න Voice Typing ප්‍රශ්නෙ නම් හරි ගියා.. ඒත් ඉතිං සිංහල වැඩ කරන්නෙ නෑ.. ඒ වගේ ම Voice Typing හරි ගියෙ කොහොමද කියලා හරි හමං අදහසකුත් නෑ.. ඉතිං ඕක ටිකක් හොයලා බලද්දි තමයි දැන ගත්තෙ.. ඒක වෙන්නෙ..(Voice Typing නැතිවෙන්නෙ හෙවත්  Keyboard එකේ recording Icon  එක නැති වෙන්නෙ)  Google Apps කියන App එක disable උනාමයි කියලා.. මං ඉස්සර දවසක.. ඕක  disable කළා.. නිකං මෙමරියට වද දෙන නිසා.. අද නිකමට වගේ ඒක enable  කළානෙ මේ අවු අස්සෙ.. ඒ වුණත් තාම හිතට හරි නෑ තවම සිංහලෙන් ලියැවෙන්නෙ නැති නිසා.. 

ඔය අතරෙ මට හමු වුණා.. තව සරල වීඩියෝවක්..

ඇත්තටම මේ Video එකේ ඉතා හොඳින් Configurations වෙනස් කරගන්න හැටි කියලා දෙනවා.. මගේ අවාසනාව ද මංදා.. ඔය ටික කළත්.. වැඩේ පත්තු වුණේ නෑ.. පස්සෙ මම .. GBoard ඇප් එක uninstall කරලා .. reinstall කළා.. ඊට පස්සෙ ආයෙමත් ඔය උඩ තියෙන Configurations ටික හදා ගත්තා.. දෙයියන්නෙ පිහිටයි කියලා.. මෙන්න බඩු වැඩ.. 

ඉතිං මං මේක ඔයාලත් එක්ක බෙදා ගන්න හිතුවෙ.. ඔයාලත්.. මේක දාගන්ට ගොහිං මේ වගේ අපහසුතා වලට පත් වුණාද දන්නෙ නැති නිසා..වගේ ම පස්සෙ කාලෙක මට අමතක වුණොත් බලාගන්ට.. කට්ටක් කාලා වුණත් දාගන්ට වටින ඇප් එක..

එක් කලෙක..

මුව මුවග මිමිණීම්
මඟ සිහින විමසීම්
ගී සුරල් සුගැයීම්
රස කතා නිමැවීම්

පතට බත් රොක් වීම්
පොර ට වැද පැරදීම්
තරඟයට බොරු කීම්
නොසිතු ජය පැන් බීම්

සොඳුරු සිත් ඇගැයීම්
හොරට ගල් ඇහිඳීම්
දුක හිතෙන කොන්වීම්
ඇත නොයෙක රැවටීම්

හද දවන සමු දීම්
තද ලොවට මුසුවීම්
කණ පිට ම හැරවීම්
සොඳුරු ම ය සිදුවීම්

බැරිදා විග්‍රහය! අපි කවුරුද?

මදුරුවන් හපා කෑම නිසා සියොළඟ ම කහඹිලියා ගෑවුණු සෙයක් දැනෙද්දී..වහා ඇඳෙන් මෑත්ව මදුරු දඟරය නිවී ඇති දැයි බැලීමි. නැත මදුරු දඟරය තවමත් දැවෙයි.. වහා නැඟිට වෙලාව බැලූ විට වේලාව තවමත් පාන්දර දෙක ට පමණ වූ නිසා විකල්ප උපක්‍රමයක් වන පැඟිරි තෙල් - හඳුන් කූරු උපක්‍රමයට යෑම පළක් නැති නිසා දෙවන විකල්පය හෙවත්.. කුරුඳු තෙල් උපක්‍රමය* වෙත යොමු වීමි. පුතු ගේ දැඟලීම නිසා ඔහුට පෙරවූ රෙද්ද ද ඉවත් වී සිරුර නිරාවරණය වී තිබුණෙන්.. (පළක් නැති බව දැන දැන ම) එය නැවත පෙරවීමි. මදුරු කරදරය නිමා වූවද පැතු පරිදි නින්ද මා වෙත ලඟා වූයේ නැත. ඒ වෙනුවට කල්පනා-සිහින ලෝක අතර සැරිසරන්නට වීමි.
සඳුදා උදයේ දිරන නොදිරන ලෙස වෙන් කළ කුඩා කුණු මළු දෙක විදුලි ආලෝක කණුව යට තැබුවේ.. සඳුදා උදයේ නගර සභාවෙන් කුණු රැගෙන යන බැවින් වුවත්.. හැන්දෑ වන විට.. එම කුණු දසත විසිරී තිබුණේ.. බල්ලන් විසින් ඇද දැමීම නිසාය. අප සිටින්නේ කුඩා අතුරුපාරක නිසා.. කුණු ගෙන යන වාහනය.. අප සිටින නිවෙස් ඉදිරිපිට ට පැමිණෙන්නේ නැත. එසේ පැමිණියa නම් අපට ද තරමක් ලොකු ප්‍රමාණයේ බඳුන් තබා..ඒ තුළ ට කුණු දමා උඩින් ලොකු ගල් ගෙඩියක් තබන්නට තිබුණි. නමුත් පහන් කණුව යට ලොකු බඳුනක් තැබුවේ නම්.. අපේ පාරෙන් ගෙනෙන කුණු එම බඳුනට දමන්නට තිබුණි.. එහෙත් නිසි කලට කුණු නොගෙනියන එකට එයින් තටු ලැබෙනු ඇත.. පිළිතුරු ඇත්තේම නැති ප්‍රශ්න තිබෙන්නේ අපේ රටේ පමණක් දැයි විටෙක සිතේ. ගැටළුව මිනිසුන් ගේ ය. වැරැද්ද ද මිනිසුන්ගේ ය. යන්ත්‍ර සූත්‍ර හෝ සතා සීපාවා මීට පලි නැත. මදුරුවා හැසිරෙන්නේ.. මදුරුවාගේ ක්‍රමයටය.. බල්ලා .. බලු ක්‍රමයට හැසිරෙයි.. මිනිසුන් වන අප හැසිරෙන්නේ මිනිසුන් විදිහට නොවීම ද මේ ගැටළුවට මුල?
පාරකට ටොපි කොළයක් තරම් දෙයක් නොදැමිය යුතු බව, කෙළ පිඩක් නොගැසිය යුතු බව අප පාසැල් යන කාලයේ දී ද උගෙන ඇත. ඒත් ඊට වසර විසි ගනණකට පසුව ද, අපේ මිනිසුන් ඒ දේ පිළිපදින්නේ නැත. ඒ අතින් බලන විට අපේ වැඩ .. කකුළුවන් මෙනි..
ප.ලි
* කුරුඳු තෙල් උපක්‍රමය - කුඩා බඳුනකින් අඩකට පමණ ජලය පුරවා.. කුරුඳු තෙල් බිංදුවක් දමා හොඳින් කලවම් කර .. විදුලි පංකාවේ සුළඟට මුසු වන ආකාරයෙන් තැබීම.
* පැඟිරි තෙල් - හඳුන්කූරු උපක්‍රමය - හඳුන් කූරක් ගෙන පැඟිරි තෙලෙන් පොඟවා දැල්වීම. හඳුන් කූර පැයකට මඳක් වැඩි කලකදී දැවී නිම වීම මෙහි ඇති ගැටළුවයි.